Йӗпреҫ районне ҫул юсама панӑ укҫа ӑҫта кайса кӗнӗ? Пӗр ял тӑрӑхӗнче унпа тӗллевлӗ усӑ курманни тӑрӑ шыв ҫине тухнӑ.

Йӗпреҫ районӗн прокуратури вырӑнти хӑйтытӑмлӑх органӗсем ҫул-йӗр фончӗн укҫи-тенкипе мӗнле усӑ курнине тӗрӗсленӗ. Ҫав вӑхӑтра йӗркене пӑснӑ тӗслӗхе тупнӑ. 2017 ҫулта Пысӑк Упакасси ял тӑрӑхӗнче ку укҫапа тӗллевлӗ усӑ курман-мӗн.

Куншӑн ял тӑрӑхӗн администрацийӗн пуҫлӑхне административлӑ майпа явап тыттарнӑ. Ертӳҫӗ 30 пин тенкӗ штраф тӳленӗ.

Елена Нарпи

«Раҫҫeй тӑрӑх 180 км хӑвӑртлӑхпа». Ҫапларах ят пама пулать тесе ҫырнӑ Елена Нарпи хайӗн ҫул ҫӳревне. Мӑшӑрӗпе вӗсем нумаях пулмасть кӑнтӑра мотоциклпа ҫитсе килчӗҫ. Ҫулта-йӗрте тӗл пулакан савӑклӑхпа пӑтӑрмаха Елена Фейсбукра пӗлтерсех тӑчӗ.

Пӑтӑрмахсенчен мотоциклӑн куҫкӗскийӗ ваннине, Крымра хӑна ҫуртне малтанах броньлесе хуманнине пула ҫӗр каҫма хаклӑ вырӑна лекнине палӑртнӑ.

Пирӗншӗн тата чи кӑсӑкли ҫакӑ пек туйӑнчӗ. Инҫе ҫултан, Елена Нарпи пӗлтернӗ тӑрӑх, Улатӑр вӑрманӗсем витӗр Елчӗк районӗнчи тӑван ялне таврӑннӑ. «Юлашки ҫухрӑмсем кӑмӑла кӑштах пӑсрӗҫ. Мӗнпур иртнӗ ҫултан Улатӑртан Патӑрьеле каяканни чи ванса пӗтни пулчӗ», — хыпарланӑ вӑл.

Пӗтӗмпе мӑшӑр 4500 километра яхӑн ҫул ҫӳренӗ. Раҫҫейӗн пысӑк 10 ытла хулинче: Чӗмпӗрте, Сызраньте, Сартура, Волгоградра, Ростов ҫинчи Донра, Керчьре, Феодосинче, Анапӑра, Краснодарта, Воронежра, Тамбовра, Пензӑра, Саранскра — пулнӑ.

moygorod-online.ru сайтри сӑнӳкерчӗк

Шупашкар хула администрацийӗ маршруткӑсем валли ҫула ятарлӑ паллӑ тӑвасшӑн. Ку тӗлӗшпе ыйтӑм ирттереҫҫӗ. Тӗнче тетелӗнчи сасӑлава хула администрацийӗн пуҫлӑхӗн Алексей Ладыковӑн пуҫарӑвӗпе йӗркеленӗ.

Хула администрацийӗн ЖКХ, энергетика, транспорт тата ҫыхӑну управленийӗ пӗлтернӗ тӑрӑх, ҫул ҫинчи хӑрушсӑрлӑх комиссийӗн элчисем те ыйтӑм ирттернине ырланӑ.

Ҫынсен ҫичӗ ҫулран пӗрне суйлама май пур.

- Мир проспекчӗ;

- Калинин урамӗ: «Энергозапчасть» ҫул ҫавринчен пуҫласа Сергий Радонежский урамӗ таран;

- Мускав проспекчӗ: Рашча ҫул ҫаври патӗнчен Афанасьев урамӗ таран;

- Иван Яковлев проспекчӗ: Мир проспектӗнчи 102-мӗш ҫуртран пуҫласа «Ромашка» ҫул ҫаври таран;

- Сӗнтӗрвӑрри ҫулӗ: «Энергозапчасть» ҫул ҫавринчен пуҫласа «Кӗрӗк» ҫул ҫаври таран;

- Тӑххӑрмӗш пилӗк ҫуллӑх проспекчӗ: «Ромашка» ҫул ҫавринчен пуҫласа «Шупашкар» ҫул ҫаври таран;

- Трактор тӑвакансен проспекчӗ: «Шупашкар» ҫул ҫавринчен пуҫласа Монтаж проезчӗ таран.

Сасӑлав ҫурлан 7-мӗшӗччен пырать. Хальлӗхе Мускав проспекчӗ малта. Ҫак каҫӑпа сасӑлама пулать: http://gov.cap.ru/vote.aspx?id=1116&gov_id=798.

Кӳкеҫри тӑхӑр хутлӑ ҫуртсенчен пӗринчи тӑххӑрмӗш хутра пурӑннӑ май ҫак йӗркесен авторӗ ҫӗркаҫ пӗр самолет малтан Шупашкар еннелле кайнине, кӑштахран каялла таврӑннине, унтан тата вӗҫсе иртнине хытах сӑнарӗ. Ытти чух та самолетсем вӗҫкелетчӗҫ, анчах ҫине-ҫине хутланине сисмен енне ҫакӑ кӑштах тӗлӗнтерчӗ.

Мускавран Шупашкара вӗҫсе килнӗ «Победа» (чӑв. Ҫӗнтерӳ) авиакомпанин самолечӗ аэропорта анса ларайман иккен. Самолетри кӑлтӑка пула мар — аэропортри лапама тепӗр самолет вырӑнсӑр йышӑннине кура.

Чӗмпӗрти граждан авиацийӗн институчӗн самолечӗ ӑнӑҫсӑр анса ларнӑран Мускавран пассажирсемпе килекеннин сывлӑшра 40 минут ҫаврӑнса ҫӳреме тивнӗ. 21 сехет те 35 минутра Мускава кайма хускалас вырӑнне вӑл 22 сехет те 05 минутра тапраннӑ.

Етӗрне хули ҫумӗпе юхса иртекен Сӑр юханшывӗ урлӑ эстакада тума пуҫлассине Чӑваш халӑх сайчӗ пӗлтернине пирӗн вулакансем астӑваҫҫӗ пулӗ. «Волго-Вятскуправтодор» федерацин хысна учрежденийӗ ҫав ӗҫе хӑш организаци пурнӑҫлассине утӑ уйӑхӗн 17-мӗшӗнче палӑртнӑ.

Подрядчикӑн ӗҫе ҫурла уйӑхӗн 1-мӗшӗнчен кӳлӗнмелле. Эстакада ҫулӗ 768 метр тӑршшӗ пулӗ.

Строительсем 33 метр тӑршшӗ тимӗр пӑрӑссем вырнаҫтарӗҫ. Эстакада патне пыракан ҫул-йӗре те вӗсен йӗркене кӗртме тивӗ. Ҫӗр ҫийӗнсе ишӗлсе пырасран та тӗплӗ ӗҫсем пурнӑҫламалла.

Чӑваш Енӗн Транспорт тата ҫул-йӗр хуҫалӑхӗн министерствинче пӗлтернӗ тӑрӑх, подрядичикӑн мӗнпур ӗҫе 2020 ҫулхи утӑ уйӑхӗн 31-мӗшӗ тӗлне вӗҫлемелле. Тепӗр майлӑ каласан, эстакадӑна шӑп та лӑп икӗ ҫулта хута ямалла.

Паян, утӑ уйӑхӗн 5-мӗшӗнче, Чӑваш Енри сакӑр районта «Чӑвашавтотранс» автобусӗсем ҫула тухмӗҫ. Кун пирки предприяти вокзалсен хуҫине — «АвтоВАС» акционерсен уҫӑ обществине — асӑрхаттарнӑ. Утӑ уйӑхӗн 3-мӗшӗнче шӑрҫаланӑ ҫырӑва вӑл Чӑваш Енӗн Транспорт тата ҫул-йӗр хуҫалӑхӗн министерствине те ӑсатнӑ.

«Чӑвашавтотрансӑн» автобусӗсем хӑш-пӗр хулара ҫӳреме пӑрахассине ведомство хӑйӗн сайтӗнче ӗнер пӗлтернине тӗпе хурса ку хыпара Чӑваш халӑх сайчӗ ӗнер пӗлтернӗччӗ-ха.

Министерство асӑннӑ хуласенче (Улатӑр, Ҫӗнӗ Шупашкар, Канаш, Куславкка, Ҫӗмӗрле) ҫеҫ мар, районсенче те предприяти автобусӗсем ҫӳремӗҫ иккен. Маларах асӑннӑ ҫырупа Александр Белов журналист паллаштарнӑ. Сакӑр районта пассажирсене пачах та турттарма пӑрахассине систернӗ вӑл. Унта сӑмах Улатӑр, Канаш, Куславкка, Комсомольски, Хӗрлӗ Чутай, Сӗнтӗрвӑрри, Ҫӗмӗрле, Тӑвай районӗсем пирки пырать. Чи пысӑк йывӑрлӑх — вӗсенче урӑх перевозчиксем ҫукки.

Автобуссене ҫӳретме пӑрахнине «Чӑвашавтотранс» ҫунтармалли-сӗрмелли материалсем тата транспортра цифра тахографӗсем ҫуккипе сӑлтавланӑ.

Малалла...

«Шупашкар — Семферополь» тата «Симферополь – Шупашкар» маршрутпа самолетсем вӗҫме тытӑннӑ. Маларах эпир асӑннӑ хулана «Саратовские авиалинии» (чӑв. Сартури авиалинисем) авиакомпани самолетсем ҫӳретеймессине /news/19239.html|хыпарланӑччӗ__. Аса илтерер, ҫу уйӑхӗн вӗҫӗнче Сывлӑш транспорчӗн федераци агентстви ҫав авиакомпанин ӗҫне ҫу уйӑхӗн 31-мӗшӗнченпе чарса лартма йышӑннӑччӗ. Ҫакна предприятире хӑрушсӑрлӑх йӗркине пӑхӑнманнипе ҫыхӑнтарнӑччӗ.

Чӑваш Енӗн Транспорт министерствинче пӗлтернӗ тӑрӑх, республикӑн тӗп хулинчен кӑнтӑр енне самолетсем вӗҫме пуҫланӑ. «Нордвинд» авикомпани ҫӗртме уйӑхӗн 6-мӗшӗнче самолетсене ҫӳреттерме тытӑннӑ. Крыма тата унтан Шупашкара самолетпа юнкунсерен ҫитме пулать. Шупашкартан самолет 20 сехет те 20 минутра хускалать. Кунсӑр пуҫне «Нордавиа» авиакомпани эрнекунсерен хутлать. Унӑн самолечӗ Шупашкартан 13 сехет те 35 минутра хускалать.

Кӑҫалхи утӑ уйӑхӗнчен Шупашкарта халӑх транспорчӗпе ҫӳремешкӗн хаксене татах хӑпартассине Чӑваш халӑх сайчӗ ҫу,уйӑхӗн пуҫламӑшӗнчех пӗлтернӗччӗ. Аса илтерер, кун пирки паян ҫу уйӑхӗн 7-мӗшӗнче хула администрацийӗн пуҫлӑхӗ Алексей Ладыков каланӑччӗ.

Утӑ уйӑхӗн пуҫламӑшӗнчен троллейбусри хак тепӗр икӗ тенкӗ ӳсӗ. Ҫапла вара аллӑн укҫа тӳлекенсен хальхи 18 тенкӗ вырӑнне 20 тенкӗ кӑларса хума тивӗ.

Ҫакна та палӑртар, хулара автобуспа тата троллейбуспа ҫӳренӗшӗн хака кӑҫалхи нарӑс уйӑхӗнче хӑпартнӑччӗ. Автобуспа, троллейбуспа пӗрре ларса кайнӑшӑн халӗ 18 тенкӗ, машруткӑсенче 22 тенкӗ тӳлеттереҫҫӗ.

Маршруткӑсем ҫитес уйӑхран хӑпартасси уҫӑмлӑ мар, вӗсем ҫакна хӑйсем татса парӗҫ. Вӗсен тарифне раштав уйӑхӗн 1-мӗшӗ хыҫҫӑн ҫеҫ йӗркелӗҫ.

Ҫак уйӑхра Шупашкартан Симферополе тата Анапӑна самолетсем вӗҫме пуҫламаллаччӗ. Анчах палӑртнӑ вӑхӑтра авиарейссем уҫӑлаймӗҫ. Кӑлтӑк Шупашкарти аэропорт ӗҫ-хӗлӗпе ҫыхӑнман.

Иртнӗ уйӑхӑн вӗҫӗнче Сывлӑш транспорчӗн федераци агентстви «Саратовские авиалинии» (чӑв. Сартури авиалинисем) авиакомпанин ӗҫне ҫу уйӑхӗн 31-мӗшӗнченпе чарса лартма йышӑннӑ. Ҫакна предприятире хӑрушсӑрлӑх йӗркине пӑхӑнманнипе ҫыхӑнтараҫҫӗ.

Шӑпах ҫав авиакомпани «Симферополь – Шупашкар – Симферополь» тата «Анапа – Шупашкар – Анапа» авиамаршрутсемпе самолетсене вӗҫтермеллеччӗ. Симферополе самолетсем ҫӗртме уйӑхӗн 4-мӗшӗнче, Анапӑна ҫӗртмен 8-мӗшӗнче вӗҫме пуҫлӗҫ.

Саккунпа пӑхнӑ тӑрӑх, билет туянса тӑкакланнине саплаштармалла.

Ҫӗнӗ Шупашкарта Вексельберг теплица хута яни пирки сайтра унччен пӗлтернӗччӗ. Кӑҫалхи кӗркунне унта пахча ҫимӗҫ ӳстерме тытӑнмалла.

Анчах малтан теплица комплексӗ патне асфальт сармалла. Ҫула вара республика хуснинчи укҫа-тенкӗпе тӑвӗҫ. «Чӑваш Енре промышленноҫ тата инвестици ӗҫӗн аталанӑвӗн фончӗ» АУ «Ҫӗнӗ Шупашкар» теплица комплексӗ» патне ҫул хывмашкӑн электронлӑ аукцион ирттересси пирки пӗлтернӗ.

Ку тӗллевпе республика хыснинчен 27 миллион та 795 пин тенкӗ уйӑрма хатӗр. Ҫул 962 метр тӑршшӗ, 6 метр сарлакӑш пулӗ. Ҫавӑн пекех теплица комплексне шывпа тивӗҫтермешкӗн 9 миллион та 100 пин тенкӗ тӑкаклӗҫ.