forum.na-svyazi.ru сайтри сӑн

ҪҪХПИ ӗҫченӗсемпе пӗрле медиксем те рейда тухнӑ. Ҫак кунсенче вӗсем Хыркасси ялӗ ҫывӑхӗнче пулнӑ.

Водительсене юн пусӑмне тӗрӗслеме сӗннӗ, пульсоксиметрие те (организмра мӗн чухлӗ кислород пулни), спирометрие те пӑхнӑ. Хӑш-пӗр водителӗн чӗрепе юн тымарӗсен чирӗсем аталанас хӑрушлӑх пур, ҫавна май вӗсене электрокардиограмма тунӑ.

Медиксем, Хулари 1-мӗш пульницӑн терапевчӗпе медсестри, водительсене Хыркасси патӗнчи постра тӗрӗсленӗ. Ҫав вӑхӑтрах нарколог кашинпе калаҫнӑ, пирус мӗнле туртма пӑрахмалли пирки ӑнлантарнӑ, руль умӗнче эрех-сӑра, психотроплӑ япаласем ӑша яма юраманни ҫинчен аса илтернӗ. Пӗтӗмпе 30 водитель тӗрӗслев витӗр тухнӑ. Ку пурне те килӗшнӗ-мӗн.

ҪҪХПИ ӗҫченӗсем те ахаль тӑман: водительсем рейс умӗн медтӗреслев витӗр тухнипе тухманнине, тахограф лартнипе лартманнине тӗрӗсленӗ.

Вӑрнар, Йӗпреҫ, Канаш, Комсомольски, Ҫӗмӗрле, Тӑвай районӗсем урлӑ машинӑсем хӑвӑрт ҫӳремелли ҫул тума палӑртаҫҫӗ. Анчах ку вӑл — республика шайӗнче пурнӑҫлакан проект мар. «Европа – Западный Китай» (чӑв. Европа — Хӗвеланӑҫ Китай) тӗнче шайӗнчи автоҫула тӑвассине ҫӗршыв ертӳҫисем татса панӑ.

Чӑваш Енӗн Правительствин Пуҫлӑхӗ Иван Моторин ҫав ҫула тума пама май пама услови йӗркелесси ҫинчен калакан йышӑнӑва нумаях пулмасть алӑ пуснӑ. Документа Чӑваш Енӗн влаҫ органӗсен официаллӑ порталне вырнаҫтарнӑ.

Ҫӗнӗ объект тӑвакан вырӑна лекме пултаракан ҫӗр лаптӑкӗсене, куҫма пурлӑха халех палӑртмалла. Куншӑн яваплисем — маларах асӑннӑ Вӑрнар, Йӗпреҫ, Канаш, Комсомольски, Ҫӗмӗрле, Тӑвай районӗсем тата Росреестрӑн Чӑваш Енри управленийӗ.

Чӑваш Енри ҫулсем ҫинче пулкан аварисем пирки ятарлӑ сайтра пӗлме май пур. Хастарсем проект хута янӑ, ҪҪХПИ порталӗнчи материалсене пухнӑ, систематизациленӗ.

«Карта ДТП» сайт чӳк уйӑхӗн 12-мӗшӗнче ӗҫлеме пуҫланӑ. Унта 2015 ҫултанпа ҫулсем ҫинче пулнӑ аварисем пирки тӗплӗн пӗлме пулать. Проект авторӗсем ӗнентернӗ тӑрӑх, ку ҫулсене хӑрушсӑртарах тума май парать

Чӑваш Ен картти ҫине лекес тесен «Карта ДТП» сайтра хамӑр региона тупса «шӑшипе» пусмалла. Информацие пӗлме ансат: авари пулнӑ вырӑна «шӑшие» тӗллемелле е даннӑйсене кӗртмелле. Ҫапла майпа ҫак хыпарсене пӗлме пулать: авари мӗнле йӗркене пӑснӑшӑн сиксе тухнӑ, унта кам лекнӗ, водитель стажӗ, автомобиль марки, авари пулнӑ чухне мӗнле ҫанталӑк тӑнӑ. Инкекре ҫын вилнӗ тӗк ӑна хура ҫавракапа паллӑ тунӑ.

Сайта ҫӑмӑллӑнах кӗме май пур. Хальлӗхе вӑл компьютер е ноутбук урлӑ кӑна ӗҫлет.

Йӗпреҫ районӗнчи Березовка яялӗнче пурӑнакансем Йӗпреҫе илсе ҫитерекен ҫул питӗ япӑх лару-тӑрура пулни пирки пӗлтерсе РФ Президенчӗ патне петици ҫырни ҫинчен сайтра хыпарланӑччӗ. Шӑтӑк-путӑклӑ ҫула 2019 ҫулта юсама пуҫлӗҫ ахӑртнех. Кун пирки ЧР Транспорт министерствин сайтӗнче пӗлтернӗ.

Хальлӗхе ӑна мӗнле укҫапа тӑвас ыйтӑва сӳтсе яваҫҫӗ. Ӑна ахаль кӑна юсанипе ҫырлахма ҫук, вӑл 1-2 ҫултан каллех арканӗ. Ҫула тӗплӗн юсамалла, ку вара ҫӗннине сарнипе танах.

Аса илтерер: петицие йӗреҫсем Change.org сайтра вырнаҫтарнӑ. 20 ҫухрӑм ҫула 10 ҫул ытла юсаман. Автобус икӗ рейс тӑвать, анчах хӑш чухне вӑл та килмест. Таксистсем вара 1000 тенкӗ ыйтаҫҫӗ.

Чӑваш Ен ертӳҫисем «Мускав – Чулхула – Хусан» автоҫул валли ултӑ районта ҫӗр уйӑрма палӑртаҫҫӗ. Объекта «Европа – Хӗвеланӑҫ Китай» транспорт коридорӗ проекта пурнӑҫланӑ май тӑвасшӑн.

Чӑваш Енӗн Министрсен Кабинечӗ пӗлтернӗ тӑрӑх ТАСС хыпарланине ӗненсен, Китайпа Чӑваш Ене ҫыхӑнтаракан автомобиль ҫулӗ валли Ҫӗмӗрле, Вӑрнар, Йӗпреҫ, Комсомольски, Канаш тата Тӑвай районӗсенче «Мускав – Чулхула – Хусан» ҫул валли ҫӗр уйӑрмалла.

Мускавран Хусана каякан автомагистраль тӑршшӗ 729 км пулмалла. Ӑна тума 550 млрд тенкӗ уйӑрмалла. Ҫула 2024 ҫул тӗлне туса пӗтересшӗн.

Правительство пайташӗсемпе ирттернӗ канашлусенчен пӗринче ку проекта Чӑваш Ен Элтеперӗ Михаил Игнатьев «аслӑ стройка» тесе хакланӑ.

Карачурапа Ҫӗнӗ Лапсар хушшинче пулнӑ авари хыҫҫӑн Росавтодор ҫав вырӑнта ҫула мӗнле майпа хӑрушсӑртарах тӑвасси пирки шухӑшлӗ. Пӗтӗмлетӳ халех пулмӗ, малтан следстви вӗҫленмелле.

Халех паллӑ: аварире ҫул-йӗр ӗҫченӗсен айӑпӗ ҫук. Ҫапах Росавтодор ҫав вырӑна хӑрушсӑртарах тӑвасси пирки шухӑшлӗ. «Эпир икӗ ҫул хушшине тимӗр карта тытсан транспорт ҫӳремелли вырӑн хӗсӗкрех пулӗ. Унта урӑх плансем хатӗрлеҫҫӗ. Мӗн тума май пурри пирки шухӑшлӑпӑр. Ҫул сарлакӑшне, тӑршшӗне виҫмелле. Следстви пӗтсен пӑхӑпӑр. Хальлӗхе унта ҫул-йӗр ӗҫченӗсем патне ыйтусем ҫук», - тенӗ Волго-Вятскуправтодор тӗп инженерӗ Валерий Тимашов.

Аса илтерер: юпа уйӑхӗн 11-мӗшӗнче самосвал микроавтобус ҫине пырса кӗнӗ. Тискер аварире 11 ҫын вилнӗ, 9-ӑн аманнӑ.

forum.na-svyazi.ru сайтри сӑн (кунти сӑнра кӗпере юсаса пӗтермен-ха)

Ҫак кунсенче тахҫантанпах юсама пуҫланӑ Ҫӗрпӳ кӗперне савӑнӑҫлӑ лару-тӑрура уҫӑсси пирки сайтра хыпарланӑччӗ. Анчах савӑнӑҫлӑ лару-тӑру пулмӗ.

Мӗншӗнне чухлама йывӑр мар: республика М-7 ҫул ҫинче, Мӑн Карачурапа Ҫӗнӗ Лапсар хушшинче, хӑрушӑ аварире вилнӗ ҫынсемшӗн хурланать. Аса илтерер: юпа уйӑхӗн 11-мӗшӗнче самосвал Канашран Мускава кайма тухнӑ микроавтобус ҫине пырса кӗнӗ. Хӑрушӑ аварире 11 ҫын вилнӗ.

Ку авари чӑваш халӑхне хурлантарчӗ. Ҫавна май Ҫӗрпӳ кӗперне те хӑюсемсӗр, хӑмпӑсемсӗр уҫӗҫ. Тепӗр тесен, халӗ кӗпер ҫулӗпе икӗ енӗпе те ҫӳреме пуҫланӑ ӗнтӗ. Машинӑсене ҫӗнӗ ҫулпа ямашкӑн республикӑри тӳре-шара килмен.

«Чӑваш Ен» ПТРК пӗлтернӗ тӑрӑх, республикӑри пӗрмай инкек пулакан ҫулсем ҫине патшалӑх автоинспекцийӗн автомобилӗсен макечӗсене лартнӑ.

Ҫул-йӗрпе патруль службин машинисен 3D-макечӗсем нумаях пулмасть курӑнма тытӑннӑ. Аякран пӑхсан вӑл чӑн-чӑн машина е макет пулнине уйӑрса илме йывӑр. Муляжсем ҫинче хӗрлӗ тата кӑвак тӗслӗ маяксем пур, тӗттӗмленсен вӗсем ҫутӑлаҫҫӗ. Чӑн-чӑн машина тейӗн!

Патшалӑх автоинспекцийӗн машинисен макечӗсене ахаль кӑна лартман. Ҫапла майпа республикӑри ҫулсем ҫинче инкек сахалрах пуласса шанаҫҫӗ. Ара, ҫил пек вӗҫтерсе пыракан водительсем вӗсене курсан хӑвӑртлӑха чакараҫҫех ӗнтӗ.

Ҫӗрпӳ кӗперне юсаса пӗтеричченхи самант

Ҫӗрпӳ кӗперне савӑнӑҫлӑ лару-тӑрура уҫма палӑртаҫҫӗ. Юсаса сарлакалатнӑ кӗпер урлӑ автомобильсене юпа уйӑхӗн 15-мӗшӗнче 11 сехет те 30 минутра ҫӳретме тытӑнӗҫ.

«Волга» (чӑв. Атӑл) М-7 федераци ҫулӗ ҫинчи 977-мӗш километрта вырнаҫнӑ кӗпере уҫма тӳре-шара хутшӑнӗ. Ҫав йышра Чӑваш Ен Элтеперӗ Михаил Игнатьев, ЧР строительство министрӗ Владимир Иванов, Федерацин ҫул-йӗр агентствин ертӳҫин ҫумӗ Игорь Астахов, «Волго-Вятскуправтодор» федерацин хысна

учрежденийӗн пуҫлӑхӗ Илдар Мингазов пулмалла.

Росавтодорта кӗпер калӑпӑшӗ енчен те, йывӑрлӑха чӑтассипе те хальхи вӑхӑт ыйтнипе тивӗҫсе тӑнине ӗнентереҫҫӗ. Кӗпер патне пыракан ҫула чӑтӑмлӑрах материалтан сарнӑ иккен. Кӗпере каҫпа ҫутатмалла тӑвассине пӗлтернӗ. Ҫӗрпӳ районӗнчи Виҫпӳрт Сали патӗнче пассажирсене меллӗ пултӑр тесе автопавильон вырнаҫтарнӑ.

Чӑваш Енпе Чулхула облаҫне ҫыхӑнтаракан кӗпере, Сӑр юханшывӗ урлӑ хывнӑскере, юсама палӑртнӑ. Кун валли 33,4 миллион тенкӗ уйӑрӗҫ.

Ӗҫе Чулхула облаҫӗнчи Автоҫулсен тӗп управленийӗн саккасӗпе юсӗҫ. Ку ӗҫе РЭБ СК «ОКА» тулли мар яваплӑ общество пурнӑҫлӗ.

Кӗпере чӳк уйӑхӗн 7-мӗшӗнче юсама пуҫлӗҫ. Понтонсене пӑсса юсава илсе кайӗҫ, ҫуркунне вара каялла илсе килӗҫ. Кӗперӗн ытти пайне, ун патне пымалли ҫула та юсӗҫ. Кӑҫал подрядчик ӗҫе 4 миллион тенкӗлӗх тӑвӗ, ҫитес ҫул – 29,4 миллион тенкӗлӗх.

Хӗлле кӗпер вырӑнӗнче пӑр ҫийӗн каҫмалли пулӗ. Ӑна пӑр хулӑнлансан ҫеҫ хурӗҫ.