ҪҪХПИ тунӑ сӑн

Чӑваш Енри ҫул-йӗр инспекторӗсем иккӗленӳ ҫуратакан машинӑна курнӑ та ӑна чарнӑ. Вӗсем йӑнӑшман – водитель ӳсӗр пулнӑ.

Инспекторсем унӑн пурнӑҫне ҫӑлнӑ тесен те йӑнӑш маар. Хайхискер вӗсене вӑхӑтра чарнӑшӑн тав та тунӑ. Арҫын арӑмӗпе хирӗҫнӗ хыҫҫӑн руль умне ӳсӗрлех ларнӑ-мӗн, фура ҫине пырса кӗрсе вилме шутланӑ имӗш. Инспекторсем ӑна май килнӗ таран лӑплантарнӑ.

Ҫапах арҫын яваплӑхран хӑтӑлайман. Ӑна руль умне ӳсӗр ларнӑшӑн правасӑр хӑварма, 30 пин тенкӗ штраф тӳлеттеме пултараҫҫӗ.

lyubimiigorod.ru сайтри сӑн

Ӗнер республикӑра кунӗпех ҫил-тӑман вӗҫтерчӗ. Ҫакна пула ҫулсем ҫинче транспорт ҫӳрессине чакарнине пӗлтернӗччӗ. Ҫапах республикӑра ӗнер аварисем нумай пулнӑ. Пӗтӗмпе – 64. Аварисенче 117 машина сиенленнӗ, тӑватӑ ҫынна ҫапса хӑварнӑ, вӗсенчен пӗри вилнӗ.

ЧР Транспорт министерстви пӗлтернӗ тӑрӑх, ӗнер республикӑра 428 транспорт юр тасатнӑ. Вӗсенчен 97-шӗ федераци ҫулӗсем ҫинче ӗҫленӗ.

Паян ҫанталӑк йӗркеленчӗ, ҫапах лӑпланма иртерех. Синоптиксем пӗлтернӗ тӑрӑх, кӑрлачӑн 16-мӗшӗнче, ыран, каллех юр ҫӑвӗ. Хальхинче ҫил-тӑман вӗҫтермессе шантараҫҫӗ. Анчах ҫулсем ҫинче транспорт ҫӳрессине чакарма пултарӗҫ.

Паян 14 сехетренпе М-7, А-151 тата Вятка ҫул ҫинче, Чӑваш Енре, транспортсене ҫӳрессине чакарнӑ. Хушӑва Атӑл-Вятскуправтодор ертӳҫи Илдар Мингазов алӑ пуснӑ. Ку паян ҫил-тӑман вӗҫтернипе ҫыхӑннӑ.

Ҫанталӑк питӗ япӑх пулнӑран, ҫил-тӑман вӗҫтернӗрен ҫулсем ҫинче лару-тӑру япӑх пулнӑ. Водительсем темиҫе вырӑнта машинӑсем нумай пухӑннине хыпарланӑ. Ҫанталӑка пула аварисем те нумай пулнӑ.

ҪҪХПИ паян водительсене кирлӗ-кирлӗ маршӑн руль умне ларса ҫула тухма сӗнмен. Синоптиксем пӗлтернӗ тӑрӑх, ыран валли ҫанталӑк йӗркеленмелле.

Шупашкартан Мускава 6-7 сехетре ҫитейӗн. «Мускав – Чулхула – Хусан» М-12 ҫула хута ярсан ҫапла пулӗ. Проекта ӗнер Ҫӗмӗрле районӗнче сӳтсе явнӑ чухне Чӑваш Ен транспорт тата ҫул-йӗр хуҫалӑхн министрӗ Владимир Осипов йӗркелӳ ӗҫӗнче хӑш-пӗр ыйту пуррине палӑртнӑ. Тӗслӗхрен, хӑйӑра ӑҫтан турттарасси паллӑ мар.

Машинӑсем хӑвӑрт ҫӳремели ҫул «Европа – Хӗвеланӑҫ Китай» пӗтӗм тӗнчери транспорт маршручӗн пӗр пайӗ пулӗ. Пирӗн республикӑра ку ҫул 94 километр тӑршшӗ пулӗ, Вӑрнар, Ҫӗмӗрле, Йӗпреҫ, Комсомольски, Канаш, Тӑвай районӗсемпе иртӗ.

Ҫулла машинӑсене ҫав ҫул ҫинче пӗр сехетре 130 километр таран хӑвалама май килӗ, хӗлле — 110 километр.

Строительство ӗҫне кӑҫал пуҫӑнмалла, 2021 ҫулхи ҫулла валли туса пӗтермелле.

gazetabiznes.ru сайтри сӑн

Кӑрлач уйӑхӗн 12-мӗшӗнче Ҫӗмӗрле районӗнчи Турхан ялӗнче «Мускав – Хусан» тӳлевлӗ ҫулӑн строительствине сӳтсе явӗҫ. Кун пирки Чӑваш Енри Общество палати пӗлтерет.

Тӗлпулӑва «Автобан» ДСКна, ЧР Транспорт тата Ҫутҫанталӑк министерствисене, Ҫутҫанталӑка сыхлакан прокуратурӑна, Россельхознадзора, Росприроднадзора, общество канашӗсен элчисене, муниципалитетсен администрацийӗсен пуҫлӑхӗсене, МИХ элчисене, вырӑнти халӑха чӗннӗ.

Мероприяти Турхан ялӗнчи культурӑпа кану ҫуртӗнче 13 сехетре пуҫланать. Кӑшӑлвирус сарӑлнине шута илсе вырӑнсем шутлӑ кӑна пулӗҫ.

Тӳлевлӗ ҫул Чӑваш Енре Ҫӗмӗрле, Вӑрнар, Комсомольски, Йӗпреҫ районӗсем урлӑ иртмелле. Пӗтӗмпе - 90 ҫухрӑм. Ҫула 2024 ҫулта туса пӗтерме палӑртнӑ.

Ӗнер, раштав уйӑхӗн 26-мӗшӗнче, Куславкка районӗнче фура ҫул хӗррине тухса кайса тӳнсе кайнӑ. Инкекре водитель аманнӑ. Кун пирки патшалӑхӑн ҫул-йӗр хӑрушсӑрлӑхӗн инспекцийӗ пӗлтернӗ.

Пысӑк тиевлӗ машина рулӗ умӗнче 28 ҫулти арҫын пулнӑ. Хут тиенӗ машинӑпа вӑл Хусан енне кайма тухнӑ. Куславкка районӗнче машина ҫул айккине чӑмнӑ, йывӑр тиевлӗскер тӳнсе кайнӑ.

Инкекре ытти машина шар курман. Фурӑн аманнӑ водительне пульницӑна ӑсатнӑ.

Паян, раштав уйӑхӗн 26-мӗшӗнче, ирхи 7 сехет те 25 минутра «Шупашкар-Сурски» ҫул ҫинче инкек пулнӑ. Хуларан Шупашкар районӗнчи учхоза кайма тухнӑ автобуспа «Лада Гранта» ҫапӑннӑ.

Малтанласа шухӑшланӑ тӑрӑх, ҫӑмӑл машинӑн 32 ҫулти водителӗ хирӗҫ ҫул ҫине тухса кайнӑ. Унта вӑл автобуспа ҫапӑннӑ. Инкекре ҫӑмӑл автомобилӗн водителӗ вилнӗ. Автобусра ларса пынӑ 7 пассажиртан икӗ хӗрарӑм, 22 тата 65 ҫултискерсем, аманнӑ.

Инкекӗн чӑн сӑлтавне специалистсем палӑртӗҫ. Ҫул-йӗр инспекторӗсем асӑрханса ҫӳремеллине тепӗр хутчен аса илтереҫҫӗ.

bryansk.smolmotor.ru сӑн ӳкерчӗкӗ

Вӑрмар районӗнчи прокуратура вырӑнти ҫынсем ыйтнипе тротуар пуррипе ҫуккине тӗрӗсленӗ.

Вӑрмарсем надзор органне пӗлтернӗ тӑрӑх, «Вӑрмар-Кавал-Нурлат» ҫул хӗррипе тротуар сарман. Ҫавна май ача-пӑчана ҫӳреме хӑрушӑ, вӗсем машина айне ним мар лекме пултараҫҫӗ. Асӑннӑ ҫул хӗррипе ачасене ашшӗ-амӑшӗ ача пахчине илсе каять, ватӑ ҫынсем чиркӗве кайса килеҫҫӗ, район ҫыннисем те унтан иртсе ҫӳреҫҫӗ.

Кӑлтӑка тупса палӑртнӑ хыҫҫӑн прокуратура «Чӑвашупрдор» хысна учрежденийӗн директорӗн тивӗҫне пурнӑҫлакан ячӗпе хут ҫырса панӑ, унта кӑлтӑка пӗтерме хистенӗ. Анчах предприяти ӗҫе тытӑнман. Ҫавна май прокуратура суда тавӑҫпа тухнӑ. Суд тавӑҫпа килӗшнӗ, предприятие ҫулталӑкра тротуар сарма хистекен хушу кӑларнӑ.

Ӗнер, раштав уйӑхӗн 11-мӗшӗнче, Сӑр юханшывӗ урлӑ ҫул тунӑ. Вӑл Чулхула облаҫӗнчи Пильна районӗнчи Наваты ялӗпе ҫыхӑнтарать.

Ҫул тӑршшӗ — 150 метр. Пӑр ҫийӗн каҫмалли ҫула транспорт тата ҫуран ҫӳрекенсем валли сарнӑ. Транспорт виҫи 3 тоннӑран ытла пулмалла мар. Пассажирсене лартма юрамасть.

Юханшыв урлӑ каҫмалли ҫула ҫуркунне сӳтӗҫ.

«Сӑр» автоҫулӗ ҫинче йывӑр тиевлӗ машинӑсене виҫмелли пункт вырнаҫтарнӑ. Вӑл — Муркаш районӗнчи Нискасси ялӗ тӗлӗнче. Хальлӗхе тытӑм сӑнавлӑ мелпе ӗҫлӗ, кайран, виҫӗ уйӑх иртсен, штатлӑ режим ҫине куҫӗ.

Машинӑсене автоматизациленӗ мелпе виҫекен пункт транспортӑн пӗтӗмӗшле виҫине, кашни тӗнӗлне тивекен йывӑрлӑха палӑртаҫҫӗ. Электрон информацие кӑтартакан табло ҫине пӑхсан водитель хӑйӗн машини епле тайнине курӗ. Тытӑм правӑна административлӑ майпа пӑснине шута илекен центра хӑех пӗлтерет.

Йывӑр тиевлӗ машинӑсене виҫмелли пӗрремӗш пункт «Шупашкар-Сурски» автомобиль ҫулӗ ҫинче Улатӑр районӗнче уҫӑлнӑ. Ӑна пӗлтӗр, ҫулталӑк вӗҫӗнче, вырнаҫтарнӑ.