Инстаграмри @aerocheb сӑнӳкерчӗкӗ

«Победа» авиакомпани хӑйӗн 50 миллионмӗш клиентне чысланӑ. Ӑна лоукостер Мускаври Внуково аэропортӗнче сумлӑн кӗтсе илсе самолёта лартса янӑ. 50 миллионмӗш клиент Шупашкара вӗҫсе килнӗ. Унтан ӑна Чӑваш енӗн тӗп хулинчи аэропортра юрӑ-ташӑпа кӗтсе илнӗ.

«Победа» авиакомпани ҫавна кӑтартса паракан видеона Инстаграмри хӑйӗн страницинче вырнаҫтарнӑ. Шупашкарти аэропорт та юбилейлӑ клиента епле кӗтсе илнине кӑтартса паракан сӑнӳкерчӗсемпе Инстаграмра паян паллаштарнӑ.

Чӑваш Енпе Чулхула облаҫне пуйӑспа ҫыхӑнтарасшӑн. Ҫапла пӗлтерет Ҫӗмӗрле администрацийӗ.

Хальлӗхе ку ыйтӑва «Содружество» АО пӑхса тухать. Чукун ҫул маршрутне «Сергач – Ҫӗмӗрле – Канаш» ҫулпа хывасшӑн. Ҫавна май Ҫӗмӗрле ҫыннисене ыйтӑма хутшӑнма сӗнеҫҫӗ. «Контактра» халӑх тетелӗнче ирттерекен ыйтӑмра вӗсемшӗн мӗнле график меллӗ пулнине палӑртмалла.

Сӑмах май, унччен ҫак маршуртпа ҫӳрекен пуйӑс пулнӑ. Анчах ӑна 2013 ҫулта хупса лартнӑ.

Инстаграмри @aerocheb сӑнӳкерчӗкӗ

Шупашкарти аэропорт хӑйӗн историйӗнче кӑҫал пуҫласа 400 пин пассажира ҫӗршывӑн тӗрлӗ кӗтесне тата унтан Чӑваш Ене самолётпа ҫитме май туса панӑ. Юбилейлӑ пассажира Питӗре каякан рейс ҫине регистрациленӗ.

Кӑҫал Шупашкарти сывлӑш гаванӗ пассажирсене турттарассипе тата авиарейссен шучӗпе рекордла кӑтарту тунӑ. Ҫакӑн сӑлтавӗ вӗҫевсен географине анлӑлатнӑ, ҫавӑн пекех федераци тата республика пулӑшӑвӗсем май панӑ.

Кӑҫалтан, сӑмахран, аэропорт расписанийӗнче аэропорта ҫӗнӗ 4 маршрут хушӑннӑ. Вӗсем ҫаксем – Краснодар, Минеральные Воды, Екатеринбург тата Ҫӗнӗ Уренгой.

Ҫулталӑк вӗҫлениччен аэропорт авиапассажирсен шучӗ 450 пине ҫывхарасса шанать.

https://forum.zarulem.ws сайта вырнаҫтарнӑ видеоран илнӗ скриншот

Ҫӗнӗ Шупашкарта ҫуран ҫӳрекен ҫынсенчен пӗри машинӑран тарса ӳкме ӗлкӗрнӗ. Хӑй чӗрӗ те вӑр-вар пулни ҫеҫ ӑна инкекрен ҫӑлса хӑварнӑ.

Пӑтӑрмах чӳк уйӑхӗн 2-мӗшӗнче 16 сехет те 13 минутра пулса иртнӗ. Патшалӑхӑн ҫул-йӗр инспекцийӗнче пӗлтернӗ тӑрӑх, «Поло» водителӗ ҫул ҫине тухнӑ чухне «Ларгус Лада» автомобиле ирттерсе яман.

Икӗ машина ҫапӑннӑ хыҫҫӑн «Ларгус» ҫуран ҫӳрекен ҫын ҫине пырса кӗме тытӑннӑ. Арҫын машинӑран чупса тарма ӗлкӗрнӗ. «Ларгус» водительне вара пулӑшу кирлӗ пулса тухнӑ. Вӑл тухтӑрсем патне кайнӑ.

Инстаграмри @newrealnost сӑнӳкерчӗкӗ

Ҫӗмӗрле районне тата Чулхула облаҫӗнчи Пильна районне ҫулла тата хӗлле вӑхӑтлӑх кӗперпе ҫыхӑнтараҫҫӗ. Ҫапла вара хӗлле машинӑсем мар ҫийӗн сарнӑ кӗперпе каҫса ҫӳреҫҫӗ, ҫулла – понтонлӑ кӗперпе. Пӗлтӗр понтонлӑ кӗпер чӳк уйӑхӗн 9-мӗшӗччен ӗҫленӗччӗ, кӑҫал ӑна ҫак уйӑхӑн 4-мӗшӗнче сӳтӗҫ. Кун пирки Инстаграмри @newrealnos ушкӑнра пӗлтернӗ.

Хыпара вуланисем мӗншӗн чӳк уйӑхӗн 8-мӗшӗччен тӑхтамаҫҫӗ-ши тесе пӑшӑрханаҫҫӗ. Кӗпере тытса тӑракан организаципе тунӑ килӗшӳре ҫавӑн пек вӑхӑта пӑхса хӑварнӑ иккен. Вӑхӑтра сӳтмесен организацин явап тытма тивӗ.

21.мвд.рф сӑнӳкерчӗкӗ

Ӗнер, юпа уйӑхӗн 28-мӗшӗнче, Шупашкарта икӗ автомобиль пырса ҫаӑннӑ. Чӑваш Енӗн Шалти ӗҫсен министерстви малтанласа пӗлтернӗ тӑрӑх, «Мерседес» водителӗ хирӗҫ ҫул ҫине астумасӑр тухса кайнӑ.

«Мерседес» машина «Киа Рио» автомобильпе пырса ҫапӑннӑ. «Мерседес» рулӗ умӗнче 28 ҫулти хӗрарӑм-водитель пулнӑ. Вӑл ӗнер кӑнтӑрла Ленин проспекчӗпе Карл Маркс урамӗ енне аннӑ. Икӗ машина ҫапӑннӑ хыҫҫӑн хӗрарӑм-водитель аманнӑ. Вӑл тата йывӑр ҫын пулнӑ иккен. Ӑна васкавлӑ пулӑшу машинипе пульницӑна ӑсатнӑ.

news.myseldon.com сӑнӳкерчӗкӗ

Мари Элти водитель Чӑваш Ен тӑрӑх суя удостоверенипе ҫӳренӗ. Ӑна юпа уйӑхӗн 4-мӗшӗнче ҫул-йӗр патрулӗн инспекторӗсем тытса чарнӑ.

Йӗрке хуралҫисем «Шевроле Лачетти» автомобиле тытса пыракан водитель пиҫиххи ҫыхманнине асӑрханӑ. Вӗсем машинӑна чарнӑ, водителе автомобиль докуменчӗсене тата водитель удостоверенине кӑтартма ыйтнӑ. Водитель удостоверенийӗ суя пулни ҫиеле тухнӑ.

Мари Элте пурӑнакан 32 ҫулти водитель тӗлӗшпе пуҫиле ӗҫ пуҫарнӑ. Арҫын ӑнлантарнӑ тӑрӑх, 10 ҫул каялла автошкулта вӗреннӗ, анчах права илеймен. Ҫавӑнпа суя удоствоеренипе ҫӳренӗ. Ун пек хӑтланнишӗн пуҫиле майпа явап тыттарма юрать.

Чӑваш Енре «Хӑрушлӑхсӑр пахалӑхлӑ ҫулсем» наци проектне пурнӑҫланӑ май Ҫӗмӗрле районӗнчи Паланлӑ юханшыв урлӑ хывнӑ кӗпере тӗпрен юсаҫҫӗ.

Объектри ӗҫсем вӗҫленсе пыраҫҫӗ. Юпан 24-мӗшӗнче подрядчик чи яваплӑ тапхӑра — асфальт-бетонӑн финиш сийне сарас ӗҫе — ирттерӗ.

Ҫавна май 13:00 сехетрен пуҫласа 17:00 сехетчен асӑннӑ объект тӑрӑх транспорта ҫӳреме чарӗҫ.

Объектри ӗҫсем, 2020 ҫулта пуҫланнӑскерсем, 2 тапхӑрта иртеҫҫӗ. Транспорт ҫӳреме юрӑхлӑ пулма эксплуатаци уйрӑмлӑхӗсене юсаса ҫӗнетес тата ҫул урлӑ каҫмалли вырӑна сыхласа хӑварас тӗллевпе кӗперӗн конструкцине, тӗрев пайӗсене туллин улӑштарнӑ, пролетлӑ хуралтӑсен ҫыхӑну тытӑмӗсене вӑйлатнӑ. Ҫавӑн пекех хӑрушсӑрлӑх валли кӗперпе ун патне илсе пыракан ҫул ҫинчи тимӗр картасене вырнаҫтарнӑ.

Объектри ӗҫсем пӗтӗмпех юпа уйӑхӗн вӗҫӗччен вӗҫленӗҫ.

21.мвд.рф сӑнӳкерчӗкӗ

Ӗнер, юпа уйӑхӗн 1-мӗшӗнче, ватӑ хӗрарӑм машина айне пулса вилнӗ.

Инкек 18 сехет те 30 минут тӗлӗнче Хӗрлӗ Чутай районӗнчи «Сӑр» автоҫул ҫинче пулса иртнӗ. Ҫав вӑхӑтра ҫулпа 82 ҫулти хӗрарӑм утса пынӑ. Унӑн ҫипуҫӗ те тӗттӗмре аякранах курӑнакан йышшискер пулман. Инкек ҫири кӗперен ҫывӑх ҫав. Кинемей ҫине «Лада-Калина» автомбиль пырса кӗнӗ. Руль умӗнче 46 ҫулти арҫын пулнӑ. Автомобиль ҫапса хӑварсан хӗрарӑм инкек вырӑнӗнчех вилсе кайнӑ.

Ку пӑтӑрмаха халӗ специалистсем тишкереҫҫӗ, вӗсемех татӑклӑ йышӑну тӑвӗҫ.

www.cap.ru сӑнӳкерчӗкӗ

Федераци пӗлтерӗшлӗ «Атӑл» М-7 ҫулӑн 637-643-мӗш километрӗсене юсаса ҫӗнетес ӗҫ малалла пырать. Асӑннӑ лаптӑк – Шупашкар районӗнчи Хыркасси тата Явӑш ялӗсем хушшинче.

«Дорисс» строительство организацийӗ ӗҫе 2019 ҫулта пуҫӑннӑ, палӑртнине 2023 ҫул тӗлне вӗҫлемелле.

Проектра пӑхса хӑварнӑ тӑрӑх, унта транспорта иртсе ҫӳреме икӗ хутлӑ ҫул пулӗ, ҫул сарлакӑшӗ 4 йӗртен тӑрӗ.

Хальхи вӑхӑта илсен, 6 километр тӑршшӗ ҫултан 4,9 километрне юсаса ҫӗнетнӗ. Апла пулин те пурнӑҫламалли паянхи кун тӗлне самай-ха.