drama21.ru сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗ черетлӗ, 105-мӗш, сезона уҫма хатӗрленет. Чаршава авӑн уйӑхӗн 15-мӗшӗнче «Вӗри юнлӑ ҫемҫе чун» спектакльпе уҫма палӑртса хунӑ.

Аса илтерер: «Вӗри юнлӗ ҫемҫе чун» спектакле куракан патне ҫитерессишӗн театрӑн илемлӗ ертӳҫи, СССР халӑх артисчӗ Валерий Яковлев тӑрӑшнӑ. Ӗҫе И.С. Максимов-Кошкинскийӗн «Константин Иванов» драми тӑрӑх хатӗрленӗ. Асӑннӑ спектакле «Нарспи» поэмӑна ҫырнӑранпа 125 ҫул ҫитнине халалланӑччӗ.

Авӑн уйӑхӗн 3-мӗшӗнче Чӑваш Енӗн Наци вулавӑшӗнче поэзие юратакансене «Литература беседкине» йыхравлаҫҫӗ. Унта пухӑннисем «Семь поэтов» (чӑв. Ҫичӗ поэт) сӑвӑсен пуххине кӗнӗ хайлавсен авторӗсемпе тӗл пулайӗҫ. Поэзие юратакансен каҫӗ 14 сехетре пуҫланӗ.

«Ҫичӗ поэт» проект авторӗсем ку ярӑма тӑватӑ ярӑмран йӗркелеме палӑртнӑ. Вӗсене кашнине ҫутҫанталӑкӑн тӗрлӗ вӑхӑтне халаллӗҫ. Тӑваттӑмӗш кӗнекене ҫулла ҫинчен ҫырнӑ сӑвӑсем кӗнӗ. Ӑна кӗҫех пичете ӑсатӗҫ.

Ҫуркуннене халалланӑ кӑларӑма Светлана Гордеева, Наталия Носова, Марина Туманова, Людмила Шадрина, Александр Шпаннагель, Светлана Берёзкина, Иван Вершинин сӑввисем кӗнӗ.

cap.ru сӑнӳкерчӗкӗ

Чӑваш Енре «Чӑвашмультфильм» анимаци кластерӗ йӗркелеме палӑртнӑ.

Проекта Григорий Гладков композитор, Раҫҫей Федерацийӗн ӳнерӗн тава тивӗҫлӗ ӗҫченӗ, Раҫҫейри композиторсен союзӗн членӗ пуҫарса янӑ.

Йышра ҫавӑн пекех — Netflix валли Love, Death & Robots анимаци антологине йӗркеленӗ Виталий Шушко; Дмитрий Хаустов телеертӳҫӗ, артист, сасӑ актёрӗ тата «Мельница» (чӑв. Арман) анимаци киновӗн студийӗ валли мультфильмсем хатӗрлекен Олег Маркелов.

«Чӑвашмультфильм» коммерцилле мар организацин председателӗ Тахир Мирджапаров палӑртнӑ тӑрӑх, командӑра — пултаруллӑ гейм-дизайнерсем, графика, 3D ӑстисем.

2023 ҫулта Шупашкарти Пӗтӗм тӗнчери кинофестиваль хӑҫан иртесси паллӑ. ЧР Элтеперӗ хушӑва алӑ пуснӑ.

Кинофестиваль ҫу уйӑхӗн 26-мӗшӗнче пуҫланӗ те ҫу уйӑхӗн 31-мӗшӗнче вӗҫленӗ. Ҫитес ҫул вӑл 16-мӗш хут иртӗ.

Аса илтерер: йӑлана кӗнӗ кинофестиваль кӑҫал ҫӗртме уйӑхӗн 2-7-мӗшӗсенче пулнӑ.

culture.cap.ru сӑнӳкерчӗкӗ

Чӑваш кӗнеке издательстви чӑваш кӗнкине юратакансен конкурсне ирттерет. Регионсем хушшинчи «Чувашская книга. Юные таланты» (чӑв. Чӑваш кӗнеки. Ҫамрӑк талантсем) XI конкурса материалсене авӑн уйӑхӗн 1-мӗшӗнчен пуҫласа юпа уйӑхӗн 31-мӗшӗччен йышӑнӗҫ.

Пултарулӑх ӑмӑртӑвӗ ҫак номинацисемпе иртӗ: «Чӑваш кӗнеке издательствин кӗнеки ҫинчен чи лайӑх хаклав», «Юртанӑ кӗнекери эпизод» темӑпа ӳкерчӗк», «Ача аллипе хатӗрленӗ чи лайӑх кӗнеке».

Ӗҫсене Шупашкарти Иван Яковлев проспектӗнчи 13-мӗш ҫуртри 820-мӗш пӳлӗмре (Чӑваш кӗнеке издательствинче) йышӑнаҫҫӗ.

«Чӑваш хӗрарӑмӗ» хаҫат «Пӗр класрисем» ушкӑнра вырнаҫтарнӑ сӑнӳкерчӗк

Ҫывӑх вӑхӑтра пирӗн республикӑра чӑвашла хаҫатсенчен пӗри, «Чӑваш хӗрарӑмӗ», тухса тӑма пӑрахӗ. Кун пирки асӑннӑ кӑларӑм тӗнче тетелӗнчи хӑйӗн ушкӑнӗсенчен пӗринче ӗнер пӗлтернӗ.

«Тӑванӑмӑрсем, вулаканӑмӑрсем! 25 ҫул тухса тӑнӑ хыҫҫӑн «Чӑваш хӗрарӑмӗ» хаҫат хупӑнать — 2023 ҫултанпа вӑл текех вулакан патне ҫитмӗ. Ҫак хаҫата упраса хӑварас тесессӗн сирӗн пулӑшу кирлӗ!» — чӗнсе ҫырнӑ хаҫатҫӑсем.

Асӑннӑ кӑларӑм — «Хыпар» хаҫат «пепкисенчен» пӗри. Ӑна «Хыпар» издательство ҫурчӗ кӑларса тӑрать.

Тӗнче тетелӗнчи халӑх ушкӑнӗнчи пабликра пӗлтернӗ тӑрӑх, Чӑваш Енри тата чӑваш диаспорисенчи хӗрарӑмсем хӑйсен кӑларӑмӗсӗр тӑрса юлӗҫ. Хаҫат кӑларма пӑрахас йышӑнӑва издательство ҫурчӗн администрацийӗ тунӑ.

culture.cap.ru сӑнӳкерчӗкӗ

Чӑваш Енӗн Культура, национальноҫсен ӗҫӗсен тата архив ӗҫӗн министерствин ӗҫне Общество канашӗ сӑнаса тӑрӗ. Унта кӗрес кӑмӑллисене ала витӗр кӑларӗҫ. Конкурса республикӑн Культура министерстви йӗркелӗ.

Общество канашӗнче 11 ҫын пулӗ. Кандидатсен Раҫҫей гражданинӗ, 21 ҫултан аслӑрах пулмалла. Вӗсен Культура министерствин сферинче ӗҫленӗ опыт ҫулталӑкран кая мар пулнине те шута илӗҫ. Общество ӗҫӗнче е ӗҫре ятлӑ-сумлӑ пулнине те пӑхӗҫ.

Общество канашне кӗрес кӑмӑллисен конкурсне хутшӑнас кӑмӑллисен материалӗсене паянтан тытӑнса авӑн уйӑхӗн 19-мӗшӗччен йышӑнӗҫ.

culture.cap.ru сӑнӳкерчӗкӗ

Чӑваш Республикин Ӳнер музейӗнче Художниксен союзӗн ҫулталӑкри ӗҫне пӗтӗмлетекен курав уҫӑлнӑ. Регионсем хушшинчи курава «t-21/22» ят панӑ.

Унта 100-е яхӑн художник, скульптор тата декораципе прикладной ӳнерӗн специалисчӗсен ӗҫӗсем вырӑн тупнӑ. Пултарулӑх ӑстисем хальхи вӑхӑтри ӳнерӗн тӗрлӗ жанрӗнче — абстракцирен пуҫласа реализм таранах — ӗҫлеҫҫӗ.

Курава мӗншӗн апла ят пани те кӑсӑклӑ. «t» — «Творчество» (чӑв. Пултарулӑх) сӑмахӑн пуҫламӑш саспаллийӗ, «21» — Чӑваш Республикин регион номерӗ, «22» 2022 ҫула пӗлтерет.

Курав авӑн уйӑхӗн 25-мӗшӗччен ӗҫлӗ.

culture.cap.ru сӑнӳкерчӗкӗ

Паян Мускаври «Коломенское» музей-заповедник территорийӗнче славян искусствин регионсем хушшинчи «Русское поле» (чӑв. Вырӑс уйӗ) XI пултарулӑх фестивалӗ иртет. Пултарулӑх мероприятине Раҫҫей халӑхӗсен культура эткерлӗхӗн ҫулталӑкне тата Мускав хулине йӗркеленӗренпе 875 ҫул ҫитнине халалланӑ.

Фестивале Чӑваш Енри пултарулӑх ушкӑнӗсем те хутшӑнӗҫ. Ҫав шутра – халӑх ташшин «Суварята» (чӑв. Суварҫӑсем) ача-пӑча халӑх ансамблӗ (ертӳҫи — Раҫҫей тата Чӑваш Республикин культурӑн тава тивӗҫлӗ ӗҫченӗ Анатолий Музыкантов) тата «Родные просторы» (чӑв. Тӑван тӑрӑх) халӑх фольклор ансамблӗ (ертӳҫи — Чӑваш Республикин культурӑн тава тивӗҫлӗ ӗҫченӗ Людмила Кондратьева).

culture.cap.ru сӑнӳкерчӗкӗ

Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче кино тӳлевсӗр кӑтартӗҫ. Ӑна культура учрежденийӗ «Ночь кино» (чӑв. Кино каҫӗ) пӗтӗм ҫӗршыври акцие хутшӑннӑ май йӗркелет.

«Ҫеҫпӗл» кинозалта кӗҫӗр, ҫурла уйӑхӗн 27-мӗшӗнче, пысӑк экран ҫинче 2021-2022 ҫулсенчи ӑнӑҫлӑ кинопремьерӑсене кӑтартӗҫ. Вӗсене хамӑр ҫӗршыври ӑстасем ӳкернӗ.

18 сехетре квест иртӗ. 19 сехетре «Последний Богатырь: Посланник Тьмы» (6+) приключени, 21 сехетре «Пара из будущего» (12+) камит, 23 сехетре «Чемпион мира» (6+) драма кӑтартӗҫ. Тӳлевсӗрех!