culture.cap.ru сӑнӳкерчӗкӗ

Иртнӗ эрнере хореографи ӑсталӑхӗн «Ташӑ эрешӗсем» республикӑри пӗрремӗш фестиваль-конкурсӗ иртнӗ. Пултарулӑх ӑмӑртӑвне Куславкка районӗнчи Тӗрлемесри культура ҫуртӗнче пуҫтарӑннӑ.

Аса илтерер: хореографи конкурсне «Куславккасем» ентешлӗх тата Куславкка районӗн администрацийӗ Людмила Нянина тата Владимир Милютин балетмейстерсен ячӗпе ирттерме йышӑннӑ. Пултаруллӑ хореографсем ҫав тӑрӑхран тухнӑ.

Конкурса Чӑваш Енри Куславкка, Патӑрьел, Комсомольски, Ҫӗрпӳ, Сӗнтӗрвӑрри, Шупашкар районӗсенчи, Ҫӗнӗ Шупашкарти тата Мари Элти Чикмери 9 коллектив 203 ташӑҫӑпа пырса ҫитнӗ.

Гран-прие Шупашкарти Тӗп культура тытӑмӗн «Сарпике» халӑх ташӑ ансамблӗ тата Шупашкар районӗнчи Тутаркассинчи «Белара» халӑх ташӑ ушкӑнӗ тивӗҫнӗ.

Чӑваш Енри хӗр «Третьяковская галерея-online» (чӑв. Третьяков галерейи-онлайн) конкурсра ҫӗнтернӗ.

Пултарулӑх ӑмӑртӑвне «Поколение М» федерацин ыркӑмӑллӑх проекчӗпе килӗшӳллӗн йӗркеленӗ.

Конкурс ҫӗнтерӳҫисен хушшинче — Шупашкарти ӳнер училищин студентки София Васильева. 18 ҫулти хӗрӗн ӗҫне цифра ботаника библиотекине кӗртӗҫ, ӳкерчӗке Мускаври Третьяков галерейинче кӑтартӗҫ. Унта валли ҫӗршывӑн тӗрлӗ кӗтесӗнчи художниксен 17 ӗҫне суйласа илнӗ. Шупашкарти София Васильева пион чечекне ботаника иллюстрацийӗ евӗр ӳкернӗ.

culture.cap.ru сӑнӳкерчӗкӗ

Иртнӗ эрне вӗҫӗнче «Трактор тӑвакансен культура керменӗ» халӑх пултарулӑхӗн ҫуртӗнче «Звуки музыки народной» (чӑв. Халӑх кӗввин сасси) ӑсталӑх сехечӗ иртнӗ.

Ал айӗнчи тӗрлӗ хатӗртен чӑваш халӑх музыка инструменчӗсене ӑсталакан маттур, краевед, чылай кӗнеке авторӗ, Николай Фомиряков ачасене чӑваш музыка инструменчӗсем пуҫланса кайни, вӗсен кашнин янӑравлӑхӗ ҫинчен каласа кӑтартнӑ.

Ӑстапа тӗл пулма Шупашкарти 20-мӗш тата 49-мӗш вӑтам шкулсенче 6-мӗш класра вӗренекенсем пырса ҫитнӗ. Вӗсем хӑмӑшран сӑрнай, шӑпӑр валли чӗлӗх хатӗрлеме май пуррине пӗлсе тӗлӗннӗ.

«Донбасс» юрӑпа ташӑ ансамблӗ Ҫӗнӗ Шупашкара килсен. Ака уйӑхӗ. cap.ru сӑнӳкерчӗкӗ

Донецк тата Луганск тӑрӑхӗнчи артистсем пирӗн ҫӗршывӑн тӗрлӗ регионӗнче кӑҫалхи пуш уйӑхӗнченпе гастрольпе ҫӳреҫҫӗ.

Ака уйӑхӗнче пирӗн тӑрӑхра «Донбасс» академи юрӑпа ташӑ ансамблӗ пулнӑччӗ: асӑннӑ уйӑхӑн 16-мӗшӗнче Ҫӗнӗ Шупашкарта, 17-мӗшӗнче Чӑваш патшалӑх филармонийӗнче концерт кӑтартнӑччӗ.

Авӑн уйӑхӗн 17-21-мӗшӗсенче Пукане театрӗсен пӗтӗм тӗнчери III фестивалӗ иртнӗ май Донецкри академи пукане театрӗ 2 спектакль лартнӑччӗ.

Чӳк уйӑхӗнче Чӑваш патшалӑх оперӑпа балет театрӗн сцени ҫине Донецкри А.Б. Соловьяненко ячӗллӗ оперӑпа балет театрӗ тухӗ. Ҫитес уйӑхӗн 8-мӗшӗнче «Тысяча и одна ночь» балет кӑтартӗҫ, 9-мӗшӗнче – «Малыш и Карлсон» тата «Пер Гюнт» балетсем.

Асӑннӑ тетара чӳк уйӑхӗн 20-мӗшӗнче Донецкри М.М. Бровун ячӗллӗ патшалӑх академи музыкӑпа драма театрӗ «Юнона и Авось» рок-оперӑпа килӗ.

Ҫӗнӗ Шупашкарти «Химик» культура ҫуртӗнче Донецкри ҫамрӑксен театрӗ чӳк уйӑхӗн 22-мӗшӗнче «Левша» спектакль кӑтартӗ, 23-мӗшӗнче — «Человек из Подольска».

drama21.ru сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗн сасӑ операторӗ Ирина Корнеева Мускавра пӗлӗвне ӳстернӗ.

Квалификацие ӳстермелли курса Раҫҫейӗн театр ӳнерӗн институчӗ ҫумӗнчи «Театрти сасӑ режиссури» курсра вӗреннӗ специалист тӗрлӗ дисциплинӑна ӑша илнине пӗлтернӗ.

Сӑмах май каласан, Чӑваш патшалӑх академи драма театрӗнче ӗҫлекенсенчен тӑххӑрӑшӗ кӑҫал тӗрлӗ курсра хӑйсен квалификацине ӳстернӗ.

t.me/nikamran каналтан илнӗ сӑнӳкерчӗк

Етӗрне районӗнчи Лапракасси ялӗнчи «Вирьял» фольклор ансамблӗ Ненец автономи округӗнчи Нарьян-Мар хулине ҫитнӗ.

Юпа уйӑхӗн 21-23-мӗшӗсенче Нарьян-Мар хулинче «Енава мюд» ятпа халӑх пултарулӑхӗн регионсен хушшинчи фестивалӗ иртнӗ. Унта Раҫҫейӗн 11 регионӗнчи фольклор ушкӑнӗсемпе юрӑҫсем хутшӑннӑ. Фестивалӗн кӑҫалхи теми — «Йӑлана кӗнӗ культурӑри арҫын вырӑнӗ».

Фестивале хутшӑнакан «Вирьял» фольклор ансамбльне Лев Иванов ертсе пырать. Пултарулӑх ушкӑнне йӗркелени 30 ҫултан та иртнӗ. Асӑннӑ ушкӑна ҫӳрекенсем халӑх кӗвӗ инструменчӗсемпе анлӑ усӑ кураҫҫӗ: шӑпӑр, сӑрнай, каккӑр, кавал, шӑхличӗ, параппан.

vk.com/chnmuseum сӑнӳкерчӗкӗ

Ҫеҫпӗл Мишши ячӗллӗ Литература музейӗнче ҫӑм арлама вӗрентекен ӑсталӑх класӗсем иртеҫҫӗ. Унта эрнере икӗ хутчен пухӑнаҫҫӗ: эрнекунсерен тата шӑматкунсерен. Эрнекун ӑсталӑх лаҫҫи 16 сехетрен пуҫласа 20 сехетчен ӗҫлет, шӑматкун — 15 сехетрен 18 сехетчен.

Ҫавӑн пек ӑсталӑх сехетӗнче Ҫӗнӗ Шупашкари 18-мӗш лицейра ачасене литературӑна вӗрентекен Ольга Кузьминова ҫӑм арлама вӗреннӗ, халӗ вӑл ҫав ӑсталӑха ыттисене хӑнӑхтарать. «Эпир ҫавӑн пек вӗренекенсене питӗ юрататпӑр», — теҫҫӗ музейра.

culture.cap.ru сӑнӳкерчӗкӗ

Паянпа ыран Чӑваш патшалӑх филармонийӗнче «Двенадцать стульев» мюзикл премьери пулӗ.

Мускаври Игорь Зубков композитор тата Александр Вулых поэт классикӑна пачах та урӑхла, ҫӗнӗллӗ, кураҫҫӗ. Ҫавна май вӑл аслисемшӗн те, шкул ачисемшӗн те кӑсӑклӑ пуласса шанаҫҫӗ.

Мюзикла хатӗрлессипе аякран чӗнсе илнӗ ӑстасем тимленӗ. Юрӑ-кӗвӗшӗн явапли — ҫӗршыври паллӑ продюсерӑн Тимур Ведерниковӑн вокал проекчӗсене хутшӑннӑ юрӑҫ тата педагог Елена Максимова, актер ӑсталӑхӗшӗн – театрпа кино ҫӑлтӑрӗ Янина Мелехова.

culture.cap.ru сӑнӳкерчӗкӗ

Чӑваш патшалӑх оперӑпа балет театрӗнче юпа уйӑхӗн 28-мӗшӗнчен пуҫласа чӳк уйӑхӗн 6-мӗшӗччен М.Д. Михайлов ячӗллӗ Пӗтӗм тӗнчери опера фестивалӗ иртӗ. Унта тӗрлӗ театр коллективӗнче тӑрӑшакан 170 ытла артист хутшӑнӗ.

Фестиваль Екатерина Иванова-Блинован «Сӑр чикки» оперӑпа уҫӑлӗ. Культура программинчи тепӗр премьера – М.М. Ипполитов-Ивановӑн «Ася» оперине ҫӗнетсе куракан патне ҫитерни. «Асьӑн» сцена ҫинчи ҫӗнӗ версине икӗ аслӑ шкул студенчӗсемпе преподавателӗсем «Росконцерт» организаци пулӑшнипе хатӗрленӗ. Ӑна юпа уйӑхӗн 29-мӗшӗнче курма май килӗ.

Куракансем гала-концерта уйрӑмах кӑмӑлланине кура ун пирки те каласа хӑварас килет. Концерт программине Екатерина Фенина, Иван Васильев, Дамир Закиров, Виктория Войтенкова, Михаил Журков, Алиса Шалгинова, Алексей Сазонов, Регина Рустамова тата Маргарита Финогентова хутшӑнӗҫ. Дирижёрӗ – Михаил Леонтьев.

culture.cap.ru сӑнӳкерчӗкӗ

Чӑваш патшалӑх академи юрӑпа ташӑ ансамблӗ черетлӗ сезона чӳк уйӑхӗн 2-мӗшӗнче уҫӗ.

«Чечеклен тата юрла, манӑн Чӑваш Ен» программӑна Герман Лебедевӑн, Григорий Хирпӳн, Филипп Лукинӑн, Юрий Жуковӑн, Юрий Кудаковӑн тата ытти пултаруллӑ ӑстан хайлавӗсене кӗртӗҫ. Куракансене ансамблӗн ылтӑн фондӗнчи вокалпа хореографи композицийӗсемпе те, ҫӗнӗ постановкӑсемпе те савӑнтарма палӑртаҫҫӗ.

Премьерӑна Кирилл Кассович илемлӗх ертӳҫи, ансамблӗн тӗп балетмейстерӗ, Раҫҫей Федерацийӗн культурӑн тава тивӗҫлӗ ӗҫченӗ Анатолий Музыкантов хатӗрлеҫҫӗ. Сцена ҫине ансамблӗн мӗнпур цехӗн ӑстисем (пурӗ 50 артист) тухӗ.

Ыран, юпа уйӑхӗн 21-мӗшӗнче, ансамбль хор, оркестр тата балет ҫӗнӗ пултарулӑх сезонне епле хатӗрленнине массӑллӑ информаци хатӗрӗсенче ӗҫлекенсене уҫӑ репетици вӑхӑтӗнче кӑтартса парасшӑн.