Шупашкарти Чӑваш тӗррин музейне уҫнӑранпа ҫӗртме уйӑхӗн 23-мӗшӗнче 10 ҫул ҫитнӗ. Ҫав ятпа музея тӗрле хӑнана йыхравланӑ, ҫав шутра Шупашкарта декораципе прикладной ӳенерен ӑстисен пӗтӗм Раҫҫейри XXII конкурсне хутшӑнакансем те пулнӑ.
Культура учрежденийӗнче тӑрӑшакансем Чӑваш тӗррин музейӗ чӑваш тӗррипе халӑха кӑсӑклантарассинче самай пысӑк вырӑн йышӑннине палӑртаҫҫӗ. Совет саманиччен чӑваш тӗррилле япаласене сутса илес йӑла-йӗрке пулман. Ку вӑл тӗрӗн хӑйне евӗр асамлӑхӗ пулнине пӗлтерет. Паян чӑваш тӗрриллӗ ҫипуҫа сцена ҫинче ҫеҫ мар, ытти ҫӗрте те курма пулать.
Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрӗнче чӑваш йӑли-йӗркине упраса хӑварас енӗпе те тӗрлӗ ӗҫ пурнӑҫлаҫҫӗ. Унта чӑваш юррисене халӑх патне ҫитерекен ушкӑнсем пур, ал ӗҫӗсен ӑсталӑх лаҫҫисенче чӑваш пуканисене ӑсталаҫҫӗ. Унта ҫӳрекен ватӑсем масмак туса та тӑхӑннӑ. Пуҫа тӑхӑнмалли ҫак хатӗре кашни кун тӑхӑнса ҫӳремеҫҫӗ-ха, анчах уявсенче вӑл ватӑсене илем кӳрет.
Республика кунӗ умӗн ирттернӗ ӑсталӑх лаҫҫинче вӗтӗ шӑрҫаран илемлӗ чӑваш эрешӗсем ӑсталанӑ. Ӗҫе пурнӑҫлама Светлана Кириллова инструктор пулӑшса пынӑ. Светлана Леонидовна мӗнле тӗс килӗшсе тӑни, хӑш эреш мӗне пӗлтерни ҫинчен те каласа кӑтартнӑ.
Шупашкарти ватӑсем Республика кунӗпе хавхаланса республика гимнне шарантарнӑ.
Хулари халӑхӑн социаллӑ ыйтӑвӗсене тивӗстрекен комплекслӑ центрти стационарта пурӑнакан ватӑсем валли паян викторина ирттернӗ, республика кун-ҫулӗпе паллаштаракан документлӑ фильм кӑтартнӑ.
Викторинӑна ирттерекен Наталья Фадеева каласа кӑтартнӑ тӑрӑх, ватӑсем викторина ыйтӑвӗсене кӑсӑкланса хуравланӑ. Гимна юрлама ҫӑмӑлах пулман пулин те пурте тӑрӑшса шарантарнӑ.
Пенза облаҫӗнчи Неверкино районӗнчи Бикмурзино ялӗнче «Шурӑ ту» патӗнче чӑваш таврпӗлӳҫисен слечӗ иртнӗ. Ӑна Зинаида Чайко, Олег Жемчугов тата ял ҫыннисем тӑрӑшнипе йӗркеленӗ. Ялти чӑвашсем хӑйсен культурипе йӑли-йӗркине упрама тӑрӑшаҫҫӗ.
Слета Тольяттири, Чӗмпӗрти тата Шупашкарти таврапӗлӳҫӗсем килнӗ. Вырӑнти таврапӗлӳҫӗ Михаил Щербаков «Илемь» туризм сукмакӗпе ертсе кайса ҫак вырӑн пирки каласа кӑтартнӑ. Слета пухӑннисем вырӑнти ватӑ ҫынсемпе калаҫнӑ, ӗлӗкхи йӑла-йӗрке пирки материал пухнӑ. Ҫав вӑхӑтрах ӗлӗкхи юрӑсене юрланӑ.
Слет апатланупа вӗҫленнӗ. Сӗтел ҫинче чӑваш наци ҫимӗҫӗсем кӑна пулнӑ: салма яшки, 7 кӗрперен пӗҫернӗ пӑтӑ, хуплу, чӑкӑт, килте вӗретнӗ сӑра.
Паян ир-ирех Калининградри аэропортра Шупашкартан вӗҫсе килнӗ пӗрремӗш самолет пассажирӗсене ҫӑкӑр-тӑварпа, чӑваш юррипе кӗтсе илнӗ.
Самолет Шупашкартан ҫӗрле 23:50 сехетре рейса тухнӑ. Тепӗр 2 сехет те 5 минутран Храброво аэропортӗне анса ларнӑ.
Вӑхӑт ир еннелле кӑна сулӑннине пӑхмасӑр Чӑваш Енри пассажирсене «Балтийские чуваши» пултарулӑх ушкӑнӗ кӗтсе илнӗ.
Палӑртса хӑварар: рейса «Аэрофлот» компани пурнӑҫлать.
«Пуринчен малтан» телеграм-канал пӗлтернӗ тӑрӑх, Иркутск облаҫӗнчи тӗрлӗ районта пурӑнакан чӑвашсем пӗрле пухӑнса савӑннӑ. Унта Балаган районӗнчи Коновалово ялӗнче Акатуй пӗрремӗш хут иртнӗ.
Иркутск облаҫӗнчи чӑвашсен наципе культура автономине йӗркеленнӗренпе 35 ҫул ҫитнӗ. Ҫак ятпа «Сирӗнпе пӗрле» чӑваш юррин фестивальне ирттернӗ. Чи лайӑх наци тумне те палӑртнӑ: Ольга Смирновӑн (Залари районӗнчи Тагна ялӗ) костюмӗ ҫӗнтернӗ. Вӑл 5 ҫул каялла чӑваш тумӗсем ҫӗлеме тытӑннӑ. Сӑра конкурсӗнче вара Зима районӗнчи Новолетники ялӗнчи Валентина Ягшимурадова мала тухнӑ.
Ҫеҫпӗл Мишши ячӗллӗ Чӑваш патшалӑх ҫамрӑксен театрӗ тӗрӗк халӑхӗсен пӗтӗм тӗнчери «Науруз» фестивалӗнчен таврӑннӑ. Унта вӑл Марина Карягина пьесипе лартнӑ «Ҫӗн Кун Ачи» спектакльпе хушӑннӑ. Фестиваль Хусанта иртнӗ.
Спектакль умӗн иртнӗ пресс-конференцире театр директорӗ Ольга Иванова тата Борис Манджиев режиссёр спектакле епле хатӗрлени ҫинчен каласа кӑтартнӑ. «22 ҫул ҫеҫ пурӑнса ҫавӑн чухле ӗҫ туса хӑварма пултарнӑ ҫын чухлӗ эпир хамӑр ӗмӗрте тӑваймӑпӑр. Чӑваш Ен ун пек ҫын пуррипе мӑнаҫланать. Спектакль урлӑ манӑн ҫамрӑк кураканран 25 ҫулта вӑл тӑван ҫӗршывшӑн хӑйӗн ҫине ҫавӑн чухлӗ яваплӑх илме тата уншӑн пурнӑҫне пама пултарассине ыйтас килчӗ», — каласа кӑтартнӑ рассказал Борис Наминович.
Тӗрӗк халӑхӗсен XVII «Науруз» пӗтӗм тӗнчери фестивалӗн ҫӗнтерӳҫисене ҫӗртме уйӑхӗн 22-мӗшӗнче палӑртӗҫ тата чыслӗҫ.
Чӑвашсене кӑҫал та Уява чӗнеҫҫӗ.
Тутарстанра йӑлана кӗнӗ Уяв кӑҫал утӑ уйӑхӗн 5-мӗшӗнче иртет. Ҫав, вырӑнтах: Элкей районӗнчи Сиктӗрме ялӗнче. Ҫитсе курӑр!
Уява кашни ҫулах ирттересси йӑлана кӗнӗ. Унта Раҫҫейри тӗрлӗ кӗтесре тӗпленнӗ чӑвашсем хутшӑнаҫҫӗ
Шупашкарти 40-мӗш вӑтам шкулта ӗҫлекен Алекснадр Степанов шкул ачисем валли «Хевте» уйлӑх (лагерь) йӗркелессине пӗлтернӗ. Уйлӑха «Хавал» ушкӑнпа пӗрле пуҫарса янӑ.
Вӑл кӑҫалхи утӑ уйӑхӗн 25-мӗшӗнчен пуҫласа ҫурла уйӑхӗн 1-мӗшӗччен «Алый парус» ача-пӑча санаторийӗнче иртӗ. Унта 20-25 ачана кӗтеҫҫӗ. Ку — тӳлевлӗ мероприяти. Пӗр ачашӑн 18,7 пин тенке тӳлемелле). Унта 8-16 ҫултисем хутшӑнма пултарӗҫ .
«Ертӳҫисен ушкӑнне хальлӗхе 4 ҫын кӗрет: Алпарух (Александр Блинов, пуҫлӑх), Айтар (Александр Степанов), Уйӑхпи (Вероника) тата Анна (Хусан федераци университечӗн студентки)», — пӗлтернӗ Александр Марсович халӑх тетелӗнчи хӑйӗн страницинче.
Программа вара ҫӑпларах пулӗ: кашни кун пӗрер сехет чӑваш чӗлхи тата ҫавӑн чухлех кашни кун пӗрер сехет пӗр-пӗр ют чӗлхе (тӗслӗхрен, акӑлчан, турккӑ, итальян чӗлхисем - ачасем хӑйсем суйлӗҫ) вӗренӗҫ.
Унсӑр пуҫне ачасем валли чӗлхе вӑййисем, ӑсталах лаҫҫисем ирттерӗҫ.
«Хавал» университетри пек эпир те ачасене кунӗпех чӑвашла калаҫтарма тӑрӑшӑпӑр», — хыпарлана Александр Степанов.
Ҫыхӑнмалли телефон: +7 952 022 9054. Телеграмри контакт: @cv_haval21 е @alparuh.
Раҫҫейри артистка Юлия Переверзева Канн фестивалӗнче «Паха тӗрӗ» фабрика тумӗпе тухнӑ. Вӑл ку тума Япони режиссерӗн RENOIR ятлӑ фильмӗн премьерине тӑхӑннӑ.
Юлия Переверзева – 35 ҫулта, вӑл Алтай крайӗнче ҫуралнӑ. Унӑн ашшӗ – чӑваш. Юлия ВГИК пӗтернӗ, халӗ Мускавра пурӑнать. Вал 6 фильмра ӳкерӗннӗ.
Ҫакна та палӑртмалла: Юлия кӑҫал «Мускав тата Мускав облаҫӗн королеви» илем тата амӑшлӑх конкурсӗн гран-прине илнӗ.
+5.3 °C