Санкт-Петербургра пурӑнакансем валли чӑваш наци апатне пӗҫерес енӗпе ӑсталӑх класӗ иртнӗ.
Ӑна хулари чӑваш чӗлхипе культурин клубӗ йӗркеленӗ. Унӑн ертӳҫи – Надежда Котельникова.
Ӑсталӑх класӗ кулинари студийӗнче иртнӗ. Унӑн хуҫисем Игорь Танцырев тата Венера Дасаева хӑнасене чӑваш сӑрипе кӗтсе илнӗ. Ӑсталӑх класне килнисем шеф-повар пулӑшнипе хуплу тата хуран кукли пӗҫернӗ.
Кӑмакара хуплу пиҫнӗ вӑхӑтра вырӑнти чӑваш артисчӗсем юрӑсем шӑрантарнӑ.
Чӑваш кӗнеке издательствинче Сӑкӑт Ваньккин «Кукаҫ туйӗ» поэми кун ҫути курнӑ.
Ҫӗнӗ кӑларӑм редакторӗ – Ольга Федорова, ӳнерҫи – Дарья Степанова.
Чӑваш кӗнеке издательствинче пӗлтернӗ тӑрӑх, хайлавра автор вирьял чӑвашӗсен туй йӑли-йӗркине ҫырса кӑтартнӑ, вирьял чӑвашӗсен калаҫӑвӗпе усӑ курнӑ, чылай сӑмах ҫаврӑнӑшӗн пӗлтерӗшне уҫса панӑ.
«Варкӑш» литература клубӗнче урӑх улах иртессине эпир унччен пӗлтернӗччӗ-ха.
Ытти чухне варкӑшҫӑсем пӗр-пӗр кӗнеке вуласа пырса ӑна сӳтсе явнипе ҫырлахнӑ пулсан хальхинче вӗсем Чӑваш Наци вулавӑшне улаха пуҫтарӑннӑ.
Уява литература клубӗн гимнӗнчен пуҫланӑ. Унӑн авторӗ – Ирӗк Килтӗш (Валерий Краснов) ӳнерҫӗ иккен. Ольга Австрийская Чӑваш кӗнеке издательствин сайтӗнче пӗлтернӗ тӑрӑх, юрӑҫа итленӗ май ҫыравҫӑсемпе журналистсем скетчсем ӳкернӗ, литературоведсемпе артистсем сӑвӑ шӑрҫаланӑ.
Ирӗк Килтӗшпе Чӑваш Республикин тава тивӗҫлӗ артисчӗ Геннадий Кириллов ӳнерҫӗн юптаруллӑ такмакӗсене вуланӑ. Урӑх улаха пухӑннисем сӑвӑсем вуланӑ, хӑйсем ӳкернӗ ӳкерчӗкӗсене кӑтартнӑ. Улах пурне те килӗшнӗ.
Чӑваш академи драма театрӗнче шкул театрӗсен «АСАМ» фестивалӗн ҫӗнтерӳҫисене палӑртма йӗркелӳ комитечӗ пуҫтарӑннӑ. Кун пек фестиваль пирӗн республикӑра кӑҫалхипе виҫҫӗмӗш хут иртет.
Тӳресем асӑрханӑ тӑрӑх, театр ӳнерӗпе кӑсӑкланакансен йышӗ кӑҫал самай ӳснӗ. Фестивале хутшӑнакансем репертуара та тӗплӗнрех суйласа илнӗ, спектакльте вылякансене те.
Кӑҫалхи фестивале 309 вӗрену учрежденийӗ 310 ӗҫпе хутшӑннӑ. Сцена ҫине 4031 ача тухнӑ.
Кӗҫех кам ҫӗнтерни паллӑ пулӗ.
Ӗнер, чӳк уйӑхӗн 26-мӗшӗнче, пирӗн республикӑра Чӑваш тӗррин кунне уявларӗҫ. Кӑҫал вӑл улттӑмӗш хутчен иртрӗ.
Тӗп мероприяти Шупашкарта, Чӑваш академи драма театрӗнче, пулнӑ. Унта пухӑннисене уявпа республика Элтеперӗ Олег Николаев саламланӑ.
Сумлӑ ытти хӑна та пулнӑ. Ҫав шутра — Раҫҫей Патшалӑх Канашӗн депутачӗ Алла Салаева, Чӑваш Енри хӗрарамсен канашӗн председателӗ Наталья Николаева, «Ӗҫлӗ Раҫҫей» общество организацийӗн республикӑри уйрӑмӗн ертӳҫи Алексей Ефимов.
Республикӑн культура министрӗ Светлана Каликова хӑнасене театрта ятарласа вырнаҫтарнӑ экспозиципе паллаштарнӑ. Унта пир тӗртмелли станок та, чӑваш тумне тӑхӑнтартнӑ манекенсем те, салтак тутри те тата ытти нумай япала пулнӑ.
«Ҫавал» ансамбль солисчӗ-вокалисчӗ Чӑваш Енӗн Патшалӑх Канашӗн Председателӗнчен Леонид Черкесовран пулӑшу ыйтнӑ.
Республикӑн влаҫ органӗсен официаллӑ порталӗнчи кӗске хыпарта йышӑнӑва пынӑ ҫын епле ыйтӑва хускатнине пӗлтермен. Халӑх пултарулӑхне аталантарассине сӳтсе явнӑ тесе типпӗн ҫеҫ палартса хӑварнӑ.
«Хӑйне евӗр чӑваш культурине упракан коллективсене пур енлӗн пулӑшмалла», - тесе каланӑ иккен Леонид Черкесов.
Чӑваш тӗррин ӑсти Роза Степанова шкул ачисене чӑваш тӗрри ҫинчен каласа кӑтартнӑ.
Республикӑн ача-пӑчапа ҫамрӑксен наци вулавӑшӗнче хулари 46-меш гимназире 6-меш класра вӗренекенсемпе тӗлпулу йӗркеленӗ. Унта Роза Степановӑна, Чӑваш Республикин культурӑн тава тивӗҫлӗ ӗҫченне, йыхравланӑ.
Вулавӑшӑн пай пуҫлӑхӗ Эвелина Малеева хӑна пирки хавхаланса каласа кӑтартнӑ. Унтан ачасем видеоролик пӑхнӑ, ятарлӑ куравпа паллашнӑ. Роза Степанова ирӗк панипе вӗсем чӑваш эрешеллӗ япаласене те тӑхӑнса пӑхнӑ.
Чӳк уйӑхӗн 18-мӗшӗнче Самар облаҫӗнчи Сызрань хулинчи чӑвашсен «Атӑл» наципе культура обществи 10 ҫулхине уявланӑ. Унта Чӑваш Енри хастарсем те хутшӑннӑ. Асӑннӑ йышра Наукӑпа искусство чӑваш наци академийӗн пайташӗсем Валентина Телей, Эльза Тарасова, Елизавета Долгова тата Щар Владимыч фотограф пулнӑ.
Чӑвашсен «Атӑл» обществине аппӑшӗпе йӑмӑкӗ ертсе пыраҫҫӗ. Председателӗ — Александра Казакова, унӑн ҫумӗ — Надежда Назарова.
Обществӑн юбилейне халалланӑ уяв Сызрань хулинчи тӗп вулавӑшра иртнӗ. Алевтина Долгова вулавӑша хӑйӗн темиҫе кӗнекине парнеленӗ: «Байдеряков род», «Сказка о волчонке Айваре», «Воробушек Чик-чирик», «Летописец», «Зов предков».
Чӳк уйӑхӗн 26-мӗшӗнче пирӗн республикӑра Чӑваш тӗррин кунне уявлаҫҫӗ. Ҫавна май республикӑн Культура министерстви кӑҫал та ҫав кун ӗҫе е вӗренме чӑваш тӗрриллӗ ҫипуҫпа, эрешпе кайма сӗнет.
Сӑнӳкерчӗксене сайтсенче тата халӑх тетелӗсенче вырнаҫтарма, вӗсене #Деньчувашскойвышивки2025, #наработусвышивкой, #научебусвышивкой хештгесемпе палӑртмалла.
«Ӗҫе е вӗренме чӑваш тӗррипе» акцие пирӗн республикӑра 2023 ҫултанпа ирттереҫҫӗ.
Чӑваш патшалӑх культура тата ӳнер институтӗнче чӳк уйӑхӗн 18-мӗшӗнче «Чувашская вышивка – достояние народа» (чӑв. Чӑваш тӗрри – халӑх пуянлӑхӗ) пӗтӗм тӗнчери V ӑслӑлӑхпа практика конференцийӗ ирттернӗ.
Ҫамрӑксене чӑваш тӗррипе тата Евгения Жачева ӑстан пуян эткерлӗхӗпе паллаштарас тӗллевпе ирттерекен мероприятире сумлӑ ҫынсем тухса калаҫнӑ: Чӑваш тӗррин музейӗн заведующийӗ Алина Иванова, халӑх художество пултарулӑхӗн кафедрин заведующийӗ Раиса Васильева, Николай Балтаев художник тата доцент.
Конференцие Беларуҫ тата Узбекистан ҫӗршывӗсем те хутшӑннӑ. Унсӑр пуҫне — Иркутскри, Пензӑри, Питӗрти тата Ленинград облаҫӗнчи чӑвашсем, Чӑваш Енри таджик культурин центрӗ.
+1.3 °C