Ака уйӑхӗн 21-мӗшӗнче, каҫ енне, тата тӗрӗсрех каласан, 17 сехет тӗлӗнче, Шупашкара хӗвеланӑҫ енчен кӗнӗ тӗлте инкек пулса иртнӗ. Халӗ ҫав тӗслӗхпе пуҫиле ӗҫ пуҫарнӑ. Кун пирки Чӑваш Енӗн Шалти ӗҫсен министерствинче пӗлтернӗ.
Малтанласа шухӑшланӑ тӑрӑх, «Порше-Кайен» автомобиль водителӗ пӑрӑннӑ чухне хирӗс килекен ҫул ҫине тухса кайнӑ. Ҫулӑн ҫав енӗпе 58 ҫулти водитель тытса пыракан «Рено-Дастер» автомобиль пынӑ . Вӑл инкек вырӑнӗнчех вилсе кайнӑ. «Порше-Кайен» автомобильти виҫӗ ҫынна – икӗ арҫынпа хӗрарӑма — пульницӑна илсе кайнӑ.
Асӑннӑ машина водительне ҫул-йӗр правилине пӑснӑшӑн административлӑ майпа пӗлтӗр 24 хутчен явап тыттарнӑ. Машинӑри ҫынсенчен пӗри те эрех ӗҫнипе ӗҫменнине тӗрӗслеттерме килӗшмен.
Ҫӗрпӳ районӗнчи Виҫпӳрт ялӗнче пурӑнакан арҫынна хӗрарӑма мӑшкаллама тӑнӑшӑн айӑпласшӑн. Ҫавӑн пекех вӑл вӗлерессипе хӑратнӑ.
Следстви пӗлтернӗ тӑрӑх, кӑҫал ака уйӑхӗн 17-мӗшӗнче арҫын хӑйсен ялӗнче пурӑнакан хӗрарӑм патне килнӗ. Лешӗ ун чухне ҫывӑрнӑ. Хайхискер ӑна мӑшкӑллама шухӑшланӑ, минтер илнӗ те пичӗ ҫине хурса пӑвма пуҫланӑ, вӗлерессипе хӑратнӑ.
Арҫын хӗрарӑма ар ҫыхӑнӑвне кӗртме хӑтланнӑ, анчах усал шухӑшне пурнӑҫлайман. Ҫав вӑхӑтра киле хӗрарӑмӑн хӗре таврӑннӑ, вӑл полицие шӑнкӑравласа пӗлтернӗ.
Шупашкарта ҫӑлавҫӑсем 7 хутри балкон ҫинче ҫакӑнса тӑракан арҫынна пулӑшнӑ. Пӑтӑрмах Пролетари урамӗнче пулса иртнӗ. Арҫынна ҫӑлнӑ хыҫҫӑн медицина пулӑшӑвӗн бригадине панӑ.
Арҫын балкон ҫинче ҫакӑнса тӑни ҫинчен тата вӑл персе анма пултарасси пирки пӗлсенех ҫӑлавҫӑсем унталла ҫул тытнӑ.
Чӑваш республикин шыравпа ҫӑлав службин пресс-служби пӗлтернӗ тӑрӑх, инкеке лекнӗ ҫынна пулӑшма А. Данилов, А. Шатаев, В. Давыдов ҫӑлавҫӑсем кайнӑ.
Арҫынна пулӑшма пушар пусми кӑна мар, альпинист хатӗрӗсем те кирлӗ пулнӑ. Ведомство пӗлтернӗ тӑрӑх, пулӑшу ҫитнӗ хыҫҫӑн та арҫын анма васкаман — ӑна ӳкӗтлеме тивнӗ.
Шупашкар хулинче вӑйлӑ ҫиле тӳсеймесӗр темиҫе ҫӗрте тимӗр карта тӳнсе кайнӑ. Кун пирки «Руль умӗнче» портал Инстаграмра паян, пӗр сехет каярах пӗлтернӗ.
Тимӗр хӳме Модӑсен ҫурчӗ тӗлӗнчи парковкӑра тата «Мега Молл» суту-илӳ центрӗ ҫывӑхӗнче хӑпартакан нумай хваттерлӗ ҫуртсем патӗнче чалӑшса кайнӑ.
Ҫак хыпара вуланисенчен шухӑшӗ тӗрлӗрен. Пӗрисен шучӗпе паян ҫанталӑк, чӑн та, алхасса кайнӑ. Теприсен шучӗпе строительсем айӑплӑ – вӗсем ӗҫе ҫиелтен тӑваҫҫӗ, тӗплӗн пурнӑҫламаҫҫӗ. Виҫҫӗмӗшӗсем строительсене хӳтӗлеҫҫӗ. «Епле тӳлеҫҫӗ – ҫавӑн пек ӗҫлеҫҫӗ», – тесе шухӑшлаҫҫӗ.
Ӗнер кӑнтӑрла Йӗпреҫ районӗнче пысӑк инкек пулнӑ. Унта икӗ ҫурт ҫунса кайнӑ, тепри ҫулӑмпа сиенленнӗ. Шел те, вилекенсем те пулнӑ. Кун пирки Чӑваш Енри Инкеклӗ лару-тӑру министерстви пӗлтерет.
12 сехет те 20 минутра ҫӑлав службине усал хыпар ҫитнӗ: Ҫӗнӗ Пурнӑҫ поселокӗнче пушар тухнӑ. Унта виҫӗ ҫуртра «хӗрлӗ автан» ташланӑ. Вӗсенчен иккӗшӗ тӗппипех ҫунса кайнӑ.
Ҫуртсен хуҫисем вилнӗ. Арҫын 1959 ҫулта ҫуралнӑскер пулнӑ, хӗрарӑм 1932 ҫулта кун ҫути курнӑскер. Вӗсен виллисене пушара сӳнтернӗ хыҫҫӑн тупнӑ.
Малтанлӑха пӗлтернӗ тӑрӑх, пушар ҫӳп-ҫапа асӑрханмасӑр ҫунтарнӑран тухнӑ.
Ака уйӑхӗн 20-мӗшӗнче Куславкка районӗнчи Карцев-Починок ялӗнче пушар алхаснӑ. Ку ҫӗрле пулса иртнӗ.
Ҫак ялта харпӑр ҫурт ҫунса кайнӑ. Регионти Инкеклӗ лару-тӑру министерстви пӗлтернӗ тӑрӑх, пушарта икӗ ҫын вилнӗ. Ҫулӑма сӳнтерсен 32 ҫулти арҫыннӑн тата 24-ри хӗрарӑмӑн виллисене тупнӑ. Ведомство халӗ пушар мӗншӗн тухнине уҫӑмлатать.
Аса илтерер: нумаях пулмасть Шупашкарта ҫӗрле виҫӗ харпӑр ҫурт ҫунни пирки сайтра пӗлтернӗччӗ.
Краснодар крайӗнчи Армавир шкулӗнче мачча ишӗлсе аннӑ, ҫавна пула икӗ ача пульница лекнӗ, — кун пирки Краснодар крайӗн прокуратура пресс-служби пӗлтерет.
«Армавир хулари шкулта турлукран тунӑ 10 тӑваткал метр мачча йӑтӑнса аннӑ, икӗ ачана пульница леҫнӗ», — пӗлтернӗ пресс-службӑра.
Сиенленнӗ ачасен сывлӑхӗ тӗлӗшпе хӑрушлӑх ҫук тесе палӑртнӑ. Прокуратура тӗрӗслев пуҫланӑ. Прокуратура пӗлтернӗ тӑрӑх, ку шкулти маччана юлашкинчен 2018 ҫулта юсанӑ.
Ҫавӑн пекех РФ СК Краснодар крайӗнчи следстви управленийӗн пресс-службинче хыпарланӑ тӑрӑх вӗсен ведомстви следстви умӗнхи тӗрӗслев пуҫарнӑ. Следователь пӑтӑрмах сиксе тухнӑ вырӑна ҫитнӗ.
Краснодар крайӗн оперативлӑ штабӗнче уҫӑмлатса каланӑ тӑрӑх пӑтӑрмах 1956 ҫулта хута янӑ Армавирти 2№ шкулта урок вӑхӑтӗнче пулса иртнӗ. Шкул ачисене халь пушӑ кабинета куҫарнӑ, шкулӗ яланхилле ӗҫлет.
«Армавир хулин вӗренӳ управленийӗ тӗрӗслев ирттерет. Вырӑнта комисси ӗҫлет, унӑн пӑтӑрмах сӑлтавне тупса палӑртма, шкул вӗренекенӗсен сывлӑхӗшӗн хӑрушлӑх кӑларса тӑратма пултаракан пулӑмсенчен сыхланмалли мерӑсем йышӑнма тивӗ», — ҫапларах палӑртнӑ оперштабра.
Канмалли кунсенче васкавлӑ медпулӑшу ҫӳллӗшӗнчен ӳкнӗ виҫӗ ҫын патне вырӑна ҫитнӗ. Шел те, пӗри вилмеллех суранланнӑ.
Пӗр арҫын ялта пӳрт тӑрринчен ӳкнӗ, тепри – нумай хваттерлӗ ҫурт чӳречинчен. Вӑл вилнӗ.
Шар курнӑ тепӗр ҫын – 8 ҫулти арҫын ача. Вӑл Ҫӗнӗ Шупашкарти нумай хваттерлӗ ҫуртӑн пӗрремӗш хут чӳречинчен ӳкнӗ. Ача москитлӑ сетка ҫине таяннине иртен-ҫӳрен курнӑ та васкавлӑ медпулӑшу чӗннӗ. Сетка чӑтайман, арҫын ача аялалла ӳкнӗ. Тухтӑрсем ачана пульницӑна илсе ҫитернӗ. Унӑн пуҫ мими чӗтреннӗ, пуҫӗ тата чӗркуҫҫи суранланнӑ. Ачана аслисем асӑрхаса ҫитерейменни паллӑ.
Ака уйӑхӗн 18-мӗшӗнче Хӗрлӗ Чутай районӗни ялта пушар тухнӑ. Унта 93 ҫулти кинемейӗн пурнӑҫӗ татӑлнӑ.
Пушар пӳртӗн шалти отделкине, пурлӑха тӗп тунӑ. Ҫавӑн пекех тӑрри сиенленнӗ. Пушар сӳнтернӗ хыҫҫӑн 1928 ҫулта ҫуралнӑ хӗрарӑмӑн виллине тупнӑ.
Следстви комитечӗ кун тӗлӗшпе следстви умӗнхи тӗрӗслев ирттерет. Малтанлӑха пӗлтернӗ тӑрӑх, ҫулӑм электрохатӗрпе тӗрӗс усӑ курманран тухнӑ.
| АКА | 19 |
Ҫӗрпӳ районӗнче пурӑннӑ вӑйпитти амӑшӗн пуҫне ҫинӗ. 45 ҫулхи арҫынна суд ҫирӗп режимлӑ колоние 8 ҫуллӑха ӑсатма йышӑннӑ.
Ӳсӗр арҫын пӗр кунхине Ҫӗрпу районӗнчи пӗр ялти килӗнче тӑван амӑшне хӗнесе пӗтернӗ. Ҫулне кура тата чире пула вӑйсӑрланнӑ амӑшне арҫын пӗтӗм вӑйран тӗксе ярсан хӗрарӑм персе аннӑ, пуҫӗпе кӑмакана ҫапӑннӑ.
Ывӑл тени унпах лӑпланман-ха. Урайӗнче выртакан ватӑ амӑшне алӑпа ҫапса, урапа тапса пӗтернӗ. Пурӗ 36 хутран кая мар. Йывӑр суранланнӑ ватӑ тепӗр кунне куҫне ӗмӗрлӗхе хупнӑ.
+25.3 °C