Чӑваш Ене Донбаспа Херсон тӑрӑхӗнчен куҫса килнӗ 20 ҫемье хваттерлӗ пулнӑ. Пирӗн патра ҫапла майпа 20 ҫемьери 31 ҫын тӗпленнӗ. Патшалӑх вӗсене ҫурт-йӗр сертификачӗсем валеҫсе панӑ. Ҫурт-йӗр сертификатне туянма вӗсем хӑйсем кӑмӑл тунӑ. 20 ҫемьене ҫурт-йӗр сертификачӗ илме хыснаран 63,5 млн тенкӗ уйӑрса панӑ.
Сертификат илме заявленисене нумай ӗҫ пурнӑҫлакан центрсенче те, патшалӑх пулӑшӑвӗсен порталӗнче йышӑнаҫҫӗ.
Ют регионта 14 миллион тенкӗ сертификат илнисенчен 5 ҫемье пирӗн патра хваттер туянма кӑмӑл тунӑ.
Чӑваш Ен парламенчӗн депутачӗсем Раҫҫейӗн Бюджет кодексӗн 78-мӗш статйине улшӑну кӗрттересшӗн. Ҫапла тусан этил спирчӗ 0,5 процент таран сӑра туса илекенсене субсидипе пулӑшма май килӗ.
«Паянхи куна илсен Раҫҫейре хӑмла тата салат туса илекенсем рынока хӑйсен продукцийӗпе тивӗҫтерсе пыраймаҫҫӗ. Ҫӗршывра хӑмла кирлинчен 5 процентне ҫеҫ туса илеҫҫӗ. Ют ҫӗртен кӳрсе илнине саплаштарма самай вӑхӑт кирлӗ», — палӑртнӑ парламентарисем.
Хӑмла туса илессине тата унӑн пахалӑхне ӳстерме патшалӑх пулӑшӑвӗ кирлӗ. Ҫав шутра техника тата хунав туянма та.
Патшалӑх тата муниципалитет пулӑшӑвӗсен порталӗпе усӑ куракансем асӑннӑ ҫӑлкуҫ урлӑ илекен тӗрлӗ тӳлевшӗн хальхи вӑхӑтра сахалтарах тӑкакланаҫҫӗ. 30 процент йӳнӗрех.
Сӑмахран, 10 ҫуллӑха тутаракан ют ҫӗршыв паспорчӗшӗн 5 пин тенкӗ тӳлемелле пулсан, портал урлӑ саккас парсан тӳлевӗн 30 процентне перекетлеме май килетчӗ. Е тата водитель правишӗн. Кунта сӑмах электрон мелпе тӳлени пирки пырать-ха.
Ҫӗнӗ ҫул хыҫҫӑн, 2023 ҫулхи кӑрлачӑн 1-мӗшӗнчен, ун пек ҫӑмӑллӑха пӗтерӗҫ.
Чӑваш Енри нумай хваттрелӗ ҫуртсенче ҫутӑ счётчикӗсене ылмаштарасси малалла пырать. Ҫавӑн пек тума 2018 ҫулхи раштав уйӑхӗнче йышӑннӑ 522-мӗш номерлӗ федераци саккунӗ хистет.
Нумай хваттерлӗ ҫуртсенчи электросчётчиксене кӑҫалхи ҫулталӑк вӗҫне ылмаштарса пӗтермелле.
Республикӑри мӗнпур районпа хулара уйрӑм ҫынсене 5 пин счётчик лартса памалла, кунсӑр пуҫне тата нумай хваттерлӗ ҫуртсенчи ҫутӑ тӑкакне шутлакан 850 ытла приборпа трансформатор токне виҫекен 600 комплект вырнаҫтарӗҫ.
Ӗҫшӗн хваттер хуҫисен укҫа тӳлемелле мар. Ҫӗнӗ йышши счётчиксем ҫутӑ мӗн чухлӗ ҫуннине хӑйсемех кирлӗ ҫӗре ҫитерӗҫ.
Чӑваш Енре патшалӑх тата муниципалитет пулӑшӑвне кӳрессипе яваплине палӑртнӑ. Асӑннӑ йышӑнӑва республика ертӳҫи Олег Николаев алӑ пусса ҫирӗплетнӗ.
Маларах, кӑҫалхи ҫу уйӑхӗн 25-мӗшӗнче, Раҫҫей Правительстви патшалӑх тата муниципалитет пулӑшӑвне кӳнин пахалӑхне тӗрӗслесе тӑрасси ҫинчен ятарлӑ йышӑну кӑларнӑ.
Чӑваш Енре асӑннӑ ӗҫшӗн явапли пулма республикӑн Министрсен Кабинечӗн Председателӗн ҫумне — экономика аталанӑвӗн тата пурлӑх хутшӑнӑвӗсен министрне Дмитрий Краснова ҫирӗплетнӗ.
Чӑваш Енӗн тӗп хулинче ӳсӗр ҫынсене йышӑнмалли учреждени (хӑй вӑхӑтӗнче вӗсене урӑлтаркӑч тенӗ) ҫывӑх вӑхӑтра уҫма палӑртаҫҫӗ. Республика Элтеперӗ Олег Николаев ун пек учреждение 2023 ҫулхи пӗрремӗш кварталтан кая юлмасӑр уҫма хушнӑ.
Ӗнер, ака уйӑхӗн 1-мӗшӗнче, Чӑваш Республикин пуҫлӑхӗ ҫумӗнче йӗркелекенӗ право йӗркине тивӗҫтерес енӗпе ӗҫлекен координаци канашлӑвӗн ларӑвӗ иртнӗ. Унта Олег Николаев алкогольпе, наркотикпа е урӑх ҫавӑн пек япаласемпе айкашакан ҫынсене пулӑшу памалли специализациленӗ учрежденисем тӑвас ӗҫе васкатма чӗнсе каланӑ.
Чӑваш Республикинчи граждансен сывлӑхне сыхласси ҫинчен калакан саккуна ҫывӑх вӑхӑтра улшӑну кӗртмелле.
«Саккун проектне Патшалӑх Канашӗн ҫитес сессийӗн кун йӗркине кӗртмелле», — тенӗ Олег Николаев.
Кӑҫал ҫулталӑк пуҫланнӑранпа пирӗн республикӑна ют ҫӗршывсенчен 10 ҫемье пурӑнма куҫса килнӗ. Кунта сӑмах ентешӗмӗрсем пирки пырать. Хамӑр тӑван ҫӗршыв ҫыннисемех вӗсем. Тӗрлӗ сӑлтава пула пӗр вӑхӑт чикӗ леш енче пурӑннӑ. Халӗ вара тӑван ҫӗршыва таврӑнма шут тытнӑ.
Тӑван ҫӗршыв ҫыннисене чикӗ леш енчен куҫса килме пулӑшакан программа Раҫҫейре 2014 ҫултанпа ӗҫлет. Ҫав вӑхӑтранпа пирӗн тӑрӑха 2637 ҫын куҫса килнӗ.
Кӑҫалхи чӳк уйӑхӗн вӗҫне илсен Чӑваш Енре тавар тата пулӑшу хакӗн индексӗ ҫулталӑк пуҫламӑшӗнчипе танлаштарсан 107,79 процент пулнӑ, 2020 ҫулхи чӳк уйӑхӗн пуҫламӑшӗнчипе пӑхсан — 108,53 процент. Цифрӑсене Чӑвашстат илсе кӑтартнӑ.
Ҫулталӑк пуҫланнӑранпа апат-ҫимӗҫ хакӗ пирӗн патра 8,93 процент ӳснӗ, апат-ҫимӗҫ мар япаласен хакӗ – на 8,84%, тӗрлӗ пулӑшу – 4,69%.
Апат-ҫимӗҫрен аш-пӑш, кӗрпе тата пӑрҫа йышшисем, ҫӑкӑр, макарон, услам ҫу, сахӑр песукӗ, пулӑ тавраш, тип ҫу, сӗт-турӑх, ҫӑмарта хакланнӑ.
Стройматериалсен хакӗ 26,14% ӳснӗ, телерадиотовар 16,35% хакланнӑ.
«Ҫыхӑнура» портал Чӑваш энергосбыт компанийӗ хыпарлани тӑрӑх пӗлтернӗ тӑрӑх, ҫитес ҫул пирӗн республикӑра инвестици программипе 3 пин счетчик ылмаштарӗҫ. Электросчетчиксене ылмаштарнишӗн ҫынсен укҫа тӳлемелле мар.
Компанин пресс-служби пӗлтернӗ тӑрӑх, ку тӗллевпе 45 миллион тенкӗ уйӑрӗҫ. Программӑна пурнӑҫласа электроэнерги тӑкакне шута илекен ӑслӑ приборсем вырнаҫтарӗҫ. Вӗсене вырнаҫтарсан ҫынсен счетчик мӗн кӑтартнине энергетиксене пӗлтерме тивмӗ.
Шупашкартан инҫех мар вырнаҫнӑ «Солнечный берег» (чӑв. Хӗвеллӗ ҫыран) кану бази ҫывӑхӗнче пӗрисем инкеке лекнӗ. Вӗсем асӑннӑ база ҫывӑхӗнчи «Смоленский» утрав ҫинче пулнӑ. Унта ҫемье пӗчӗк ачапа вӗрсе карӑнтармалли кимӗпе кайнӑ. Каялла килме тӑрсан вӗсен кӗсменӗ хуҫӑлса кайнӑ.
Аптӑранӑ ҫемье Республикӑн ҫӑлавпа шырав службине 16 сехет иртсен шӑнкӑравланӑ. Ҫӑлавҫӑсене вӗсем утрав ҫитсе кӗтсе илнӗ. Анчах утрав тӗлӗнче Атӑлта ӑшӑх вырӑн пулнӑран ҫӑлавҫӑсем караппа унта ишсе пырайман. Ҫуран утса кайса малтан ачана йӑтса каҫарнӑ, унтан ачан ашшӗпе амӑшне пулӑшнӑ. Шупашкара ҫемье 19 сехет тӗлӗнче ҫитсе пӗтнӗ.
-0.7 °C