Чӑваш Енре вӑрҫӑ ачисене епле пулӑшасси пирки шухӑшлаҫҫӗ.

Паян, юпа уйӑхӗн 29-мӗшӗнче, Чӑваш Ен Элтеперӗ ҫумӗнчи Общество канашӗн пӗрремӗш ларӑвӗ иртнӗ.

Аса илтерер: Чӑваш Ен Элтеперӗ ҫумӗнче канаш туса хурасси ҫинчен калакан хушӑва Олег Николаев юпа уйӑхӗн 16-мӗшӗнче алӑ пуснӑ. Йышра – 25 ҫын. Канашӑн ертӳҫи пулма Наталия Партасовӑна шаннӑ.

Общество канашӗн пӗрремӗш ларӑвӗнче унӑн пайташӗсем тӗрлӗ комисси ӗҫне пӑхса тухнӑ, вӗсен ертӳҫисене палӑртнӑ.

Вӑрҫӑ ачисене социаллӑ пулӑшу памалли мерӑсене пӑхса тухмалли пирки те калаҫнӑ.

Тӑван ҫӗршывӑн аслӑ вӑрҫине хутшӑннӑ ветерансен федераци хысни шучӗпе хваттер туянма май пур. Юпа уйӑхӗн 1-мӗшӗ тӗлне пирӗн республикӑра 11 ватӑ хваттер черетӗнче тӑрать. Вӗсем валли хыснара 15,7 миллион тенкӗ укҫа пӑхса хӑварнӑ.

Ҫурт-йӗр условине лайӑхлатас шухӑшлӑ ветерансене 1,4-шар миллион тенкӗлӗх свидетельство парӗҫ. Вӑл укҫапа ватӑсем е хваттер, е пӳрт туянайӗҫ. Ҫитменнине, паллах, хушма тивӗ.

Ветерансемпе ҫурт-йӗрпе тивӗҫтересси ҫинчен калакан саккуна 2008 ҫулхи ҫу уйӑхӗнчи 8-мӗшӗнче йышӑннӑранпа 6034 ветерана хваттерпе тивӗҫтернӗ.

Раҫҫейӗн Ҫутӗҫ министерстви тата «Ворлдскиллс Россия» пӗрлешӳ кӑшӑлвируса пула шар курнисене тӗрлӗ профессие тӳлевсӗр алла илме пулӑшӗ.

Ятарлӑ программӑна кӑҫалхи пуш уйӑхӗн 28-мӗшӗ хыҫҫӑн ӗҫсӗр юлнисем; ҫурма ставкӑпа, тулли мар сменӑпа ӗҫлекенсем е ӗҫ ҫукран хӑйсен шучӗпе канма тивекеннисем; 2020 ҫулта вӗренсе тухнисем лекейӗҫ. Тӳлевсӗр курссем юпа уйӑхӗнчен пуҫласа раштав вӗҫӗччен пырӗҫ.

Заявкӑсене https://express.worldskills.ru сайтра йышӑнаҫҫӗ. Тӗрлӗ енпе вӗренме пулать. Сӑмахран, веб-дизайн, геодези, графика дизайнӗ, кирпӗч хурасси, кондитер ӗҫӗ, лабораторире хими анализӗ тӑвасси, маляр ӗҫӗ, плитка хурасси, экскурсисем йӗркелесси, парикмахер, повар, кӗҫӗн классенче вӗрентесси, усламҫӑ ӗҫӗ, промышленность автоматики, промышленность робототехники, ресторан сервисӗ, ҫӑмӑл автомобильсене юсасси тата пӑхса тӑрасси...

Хӗрлӗ Чутай районӗнчи Тӑван ҫӗршывӑн аслӑ вӑрҫин ветеранӗсене карас телефонӗсемпе тивӗҫтернӗ. Унсӑр пуҫне вӗсене тӳлевсӗр калаҫма май туса панӑ.

Хӗрлӗ Чутай район администрацийӗнче хыпарланӑ тӑрӑх, «Телефоны — фронтовикам» (чӑв. Фронтовиксене — телефонсем) пӗтӗм Раҫҫейри акци иртет. Ӑна Тӑван ҫӗршывӑн аслӑ вӑрҫинче ҫӗнтернӗренпе 75 ҫул ҫитнине халалланӑ. Ҫавна май «Волонтеры Победы» (чӑв. Ҫӗнтерӳ нимеҫисем) халӑх юхӑмӗн хастарӗсем Хӗрлӗ Чутай районӗнчи тӑватӑ ветерана: Кузьма Аргандейкина, Клавдия Ижетниковӑна, Вера Петровӑна, Арсентий Вадейкина — телефонсем тата тӳлевсӗр калаҫма ирӗк панине ӗнентерекен сертификатсем панӑ.

Чӑваш Енри ялсенче пурӑнакансем ӗне тытнишӗн патшалӑхран субсидие илеҫҫӗ.

Авӑн уйӑхӗн 9-мӗшӗ тӗлне пирӗн тӑрӑхри 32 пин ҫын 48,3 пин ӗнешӗн субсидие тивӗҫнӗ. Укҫана ӗне хуҫисен 88,9 проценчӗ илнӗ те ӗнтӗ.

Патшалӑх паракан ҫӑмӑллӑхпа усӑ курас тесен заявленипе вырӑнти ял тӑрӑхӗсене каймалла. Вӗсене ҫулталӑк вӗҫлениччен йышӑнаҫҫӗ.

Тӗплӗнрех ыйтса пӗлес тесен Чӑваш Ен Ял хуҫалӑх министерствипе ҫыхӑнма пулать. Телефон номерӗ — 8 (8352) 64-22-41.

Хушма хуҫалӑх тытакансене Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев хушнипе пулӑшаҫҫӗ.

Чӑваш Енри нумай ачаллӑ ҫемьесене (5 е ытларах ача ӳстерекеннисене) апат-ҫимӗҫ парса пулӑшнӑ. Ыр кӑмӑллӑх акцине «Русь» апат-ҫимӗҫ фончӗ» ыр кӑмӑллӑх фончӗ тата республикӑн Ӗҫ тата социаллӑ хӳтлӗх министерстви йӗркеленӗ.

Республикӑна 1000 апат-ҫимӗҫ пуххи килнӗ. Унта куллен кирлӗ таварсем: консерва, ҫӑнӑх, кӗрпе, сахӑр песукӗ, пахча ҫимӗҫ — пулнӑ.

Ҫак эрнере министерствӑн ҫемьепе ачасене пулӑшу кӳрекен центрӗн ӗҫченӗсем нумай ачаллисем патне ҫитсе 754 апат-ҫимӗҫ пуххине ҫемьесене панӑ. Вӗсене кӑмӑлтан йышӑннӑ, чунтан тав тунӑ. Ҫывӑх вӑхӑтра пулӑшу ыттисем патне те ҫитӗ.

Анатолий Киселев тӗпчевҫӗ

Чӑваш Енри тӗпчевҫӗ-криминалист 80 ҫулти ҫынна ҫӑлнӑ. Ҫурла уйӑхӗн 5-мӗшӗнче РФ Следстви комитечӗн Чӑваш Енри управленийӗн тӗпчевҫӗ-криминалисчӗ Анатолий Киселев тата Чӑваш Енри Шалти ӗҫсен министерствин ӗҫченӗсем Горьки чукун ҫул хӗрринчи вырӑна, Вӑрнар поселокӗ тӗлӗнче, тӗпченӗ. Унта вӗсем 1951 ҫулхи хӗрарӑм хыпарсӑр ҫухалнӑ тенӗрен йӗр ҫине ӳкес тӗллевпе кайнӑ.

Анатолий Киселев — опытлӑ тӗпчевҫӗ тесе пӗлтереҫҫӗ РФ Следстви комитечӗн Чӑваш Енри управленийӗнче. Вӑл курӑк ҫинчи карас телефонне асӑрханӑ. Ҫав вырӑнтан темиҫе метрта вӑл ватӑ арҫын выртнине курнӑ. Арҫын аран сывланӑ. Тӗпчевҫӗ хӑвӑртрах васкавлӑ пулӑш машинине чӗнсе илнӗ.

Инкеке лекнӗ арҫын кӳршӗ ялтан пулнӑн. Вӑл киле таврӑнма тӑнӑ. Ҫул ҫинче унӑн вӑйӗ пӗтнӗ, тӑн ҫухатнипе ӳкнӗ.

edu.vgsa.ru сӑнӳкерчӗкӗ

Федераци хыснинчен Чӑваш Ене укҫа килсе ҫитнӗ. Кун пирки республикӑн Финанс министерстви паян пӗлтернӗ.

Мускавран 1,3 миллиард тенкӗ килнӗ. Вӑл тупрана кӑшӑлвирус инфекцине пула илеймен тӑкаксене саплаштарма уйӑрнӑ. Асӑннӑ укҫаран 192,2 миллион тенкине муниципалитетсене уйӑрса парӗҫ.

Чӑваш Ен Финанс министерстви районсемпе хуласем кӑҫалхи пӗрремӗш ҫур ҫулта илнӗ тупӑша тишкернӗ те, хушма укҫана 19 муниципалитета пама йышӑннӑ. Уйрӑмах пысӑк сумма Шупашкар хулипе Етӗрне районне тивӗҫӗ.

Маларах каланӑ тӗллевпе кӑҫалхи кӑрлач-ака уйӑхӗсенче 13 муниципалитета 64,1 миллион тенкӗ уйӑрнӑ.

Ҫапла вара хӑйсен тупӑшӗ чакнине пула муниципалитетсене кӑҫал хыснаран 256,3 миллион тенкӗ хушма укҫа панӑ.

Ыран, ҫурла уйӑхӗн 1-мӗшӗнче, Чӑваш Енре пурӑнакансем юн паракансен кунне хутшӑнма пултараҫҫӗ. «Суббота доноров» (чӑв. Донорсен шӑматкунӗ) пӗтӗм Раҫсейри акцие эрне варринче юн пама каяйманнисем пуррине шута илсе йӗркеленӗ.

Юн памалли республикӑри станцире пӗлтернӗ тӑрӑх, донорӑн 18 ҫултан аслӑрах пулмалла, 50 килограмран кая мар таймалла, юн парас умӗнхи кун тата панӑ кунхине диетӑна пӑхӑнмалла, йӗркеллӗ апатланмалла.

Юн паракансене Шупашкар урамӗнчи Пирогов урамӗнчи 9-мӗш ҫуртра кӗтеҫҫӗ. Унта ирхи 8 сехетрен пуҫласа 12 сехетчен каймалла. Хӑвӑрпа пӗрле паспорт чикме тата маска тӑхӑнма манмалла мар.

Кӑшӑлвируса пула пандеми тесе йышӑннӑ тапхӑрта экономикӑн тӗрлӗ отраслӗ йывӑрлӑха кӗрсе ӳкрӗ. Усламҫӑсене пулӑшас тесе ҫӗршыв тата регионсен шайӗнче тӗрлӗ мера йышӑнчӗҫ. Паллах, пур ҫӗрте те пӗр пек мар. Кашни регионӑн экономикин хӑйне евӗрлӗхне шута илсе.

Наци рейтингӗн агентстви пандеми вӑхӑтӗнче бизнеса хӑш регионта еплерех пулӑшнине тишкернӗ. 15 регион лидерсен шутне лекнӗ. Пуринчен ытла пулӑшу кӳнисен йышне Мускав, Бурят Республики, Крым Республики, Тула, Иркутск облаҫӗсем, Пермь тӑрӑхӗ, Челябинск облаҫӗ, Чукотка автономи округӗ лекнӗ.

Тепӗр ҫичӗ регионта: Амур облаҫӗнче, Кабарда-Балкар, Адыгея, Тува, Рязань облаҫӗсенче, Удмурт Республикинче тата Чӑваш Енре — пулӑшу мерине тӗрлӗ енлӗн палӑртнӑ.