Шупашкарта пурӑнакан Екатерина Киргизова Питӗр хулинчи Илья Репин ячӗллӗ художество академийӗнчи «Графика» уйрӑма вӗренме кӗнӗ.
Репин ячӗллӗ академи — Раҫҫейри ӳнер учрежденийӗсенчен чи авалхисенчен пӗри. Унӑн кун-ҫулӗ 1757 ҫулта уҫӑлнӑ Император академийӗнченех пырать.
Екатерина маларах Акцыновсем ячӗллӗ Шупашкарти 6-мӗш художество шкулӗнче Чӑваш Республикин культурӑн тава тивӗҫлӗ ӗҫченӗ Елена Карнаева класӗнче вӗреннӗ. Ҫамрӑк художник шкулӑн пултарулӑх пурнӑҫне ҫеҫ мар, хуланне те хастар хутшӑннӑ. Тӗрлӗ шайри конкурсра, куравсемпе пленэрсенче вӑл сахал мар дипломпа наградӑна тивӗҫнӗ. Шупашкарти художество училищине хӗр хӗрлӗ дипломпа вӗренсе пӗтернӗ. Унӑн диплом ӗҫӗ «Мой солдатик» (чӑв. Манӑн салтакӑм) ятлӑ пулнӑ.
Кӑҫал та, пӗлтӗрхи пекех, РФ Президенчӗ Владимир Путин шкул ачисене 10-шар пин тенкӗ пама йышӑннӑ. Ку укҫапа ашшӗ-амӑшӗ вӗсене тумлантарӗ, шкул хатӗрӗсем илсе парӗ.
Малтан 10 пин тенке ҫурлан 15-мӗшӗнче пама тытӑнасси пирки пӗлтернӗ. Анчах Президент ку ӗҫе хӑвӑртлатма ыйтнӑ – ашшӗ-амӑшӗ кирлӗ хатӗр-хӗтӗре, тумтире хыпаланса ан туянтӑр.
Утӑ уйӑхӗн 29-мӗшӗнче Владимир Путин ӗҫлев министрӗпе Антон Котяковпа тӗл пулсан шӑпах кун пирки калаҫнӑ. Владимир Владимирович тӳлеве маларах куҫармашкӑн сӗннӗ. Министр укҫана ҫурлан 2-мӗшӗнчен куҫармашкӑн пуҫлама хатӗр пулнине пӗлтернӗ.
Сӑмах май, Чӑваш Енре ку тӳлеве 158 пин ача тивӗҫӗ.
71 ҫулти Алексей Судленков Регионсем хушшинчи компетенци центрне — Шупашкарти электромеханика колледжне ертсе пыма пӑрахассине эпир ҫу уйӑхӗнче пӗлтернӗччӗ. Асӑннӑ вӗренӳ заведенийӗн директорӗ пулма 59 ҫулти Виктор Горбунова шаннӑ.
Ҫӗнӗ ертӳҫӗпе коллектива паян паллаштарнӑ. Ӗҫе Горбунов ыран, утӑ уйӑхӗн 27-мӗшӗнче, кӳлӗнӗ.
1962 ҫулта Пӑрачкав районӗнчи Любимовка ялӗнче ҫуралнӑ Виктор Александрович вӗренӳ сферинче нихӑҫан та ӗҫлемен. Хӑй вӑхӑтӗнче вӑл Раҫҫейӗн патшалӑхӑн ҫул-йӗр ҫыхӑнӑвӗн уҫӑ техника университетӗнче, Мускаври гуманитарипе экономика институтӗнче вӗреннӗ.
Ҫак тарана ҫитиччен Горбунов транспортпа ҫыхӑннӑ предприятисенче ӗҫлесе пурӑннӑ. 1993 ҫултанпа «Пӗрлештернӗ чукун ҫул хуҫалӑхӗ» тулли мар яваплӑ обществӑн гендиректорӗ пулнӑ. Асӑннӑ предприятин устав капиталӗ — 12,5 миллион тенкӗ, обществӑн пӗртен-пӗр учредителӗ — Горбунов хӑй.
Виктор Горбунов — «Пӗрлӗхлӗ Раҫҫей» парти пайташӗ, Шупашкар хулинчи Депутатсен пухӑвне юлашки виҫӗ созывра кашнинчех суйланнӑ, юлашки икӗ созывӗнче асӑннӑ пухӑвӑн председателӗн ҫумӗ шутланнӑ.
И.Н. Ульянов ячӗллӗ Чӑваш патшалӑх университетӗнче вӗренес кӑмӑллӑ абитуриентсем кӑҫал та медицина факультетне нумай заявка тӑратнӑ: сиплев ӗҫӗ енӗпе — 1021 ҫын, педиатрипе стоматологие суйланисем — 608-шар.
Ҫав вӑхӑтрах информатика енӗпе аслӑ пӗлӳ илес кӑмӑллисем — 565 ҫамрӑк, экономикӑпа менеджмент — 402, юридици — 259 ҫын. «Хыпар» хаҫат ӗнентернӗ тӑрӑх, искусство специальноҫӗсемпе вара 3-8 ҫын кӑна.
«ЧПУра студент пулас текенсене хавхалантармалли майсем те тупнӑ. Акӑ абитуриентӑн харпӑр кабинечӗ урлӑ документсене тӑратнисен хушшинче лотерея ирттернӗ. Фотоаппарат, рюкзак, флешка, термокурка тата ытти парнене выляттарнӑ. «Инженер класӗсем» проекта хутшӑннисене, шкул ачисен олимпиадисенче мала тухнисене аслӑ шкула вӗренме кӗрсен хушма стипенди тӳлеҫҫӗ~~~~», — пӗлтернӗ эпир маларах асӑннӑ МИХра.
Муркаш районӗнчи Кашмашри шкула ҫӗнӗ вӗренӳ ҫулӗ пуҫланнӑ вӑхӑта туса пӗтермелле. Кун пирки район администрацийӗнче пӗлтернӗ.
Кашмашри шкулта 108 ача вӗренмелӗх вырӑн пӑхса хӑварнӑ. Строительство ӗҫӗн пӗтӗмӗшле хакӗ – 147 миллион тенкӗ ытла.
Строительство епле шайра пынине нумаях пулмасть ЧР Вӗренӳ тата ҫамрӑксен политикин министерствин тата район администрацийӗн специалисчӗсем тӗрӗсленӗ. Пулас вӗренӳ учрежденийӗнче халӗ ҫивиттие витеҫҫӗ, ҫутӑ кӗртеҫҫӗ, шалти ӗҫсем пыраҫҫӗ, алӑксем лартаҫҫӗ, нӳхрепе йӗркене кӗртеҫҫӗ.
Шкул патне Яриков урамӗпе ҫитме ҫул сарма палӑртнӑ. Шкул умӗнче стоянка пулӗ, урама ҫутатмалла тӑвӗҫ. Ку ӗҫ валли 11,8 миллион тенкӗ уйӑрӗҫ.
Чӑваш Енри вӗрентекенсене професси ӑсталӑхӗн конкурсӗнче ҫӗнтернӗшӗн укҫан хавхалантарӗҫ. Педагогсен республика шайӗнчи конкурсӗ ҫакӑн пек номинацисенче иртнӗ: «Чӑваш Енӗн ҫулталӑкри педагог-психологӗ», «Чӑваш Енӗн ҫулталӑкри социаллӑ педагогӗ», «Чи пултаруллӑ класс ертӳҫи», «Чӑваш Енӗн ҫулталӑкри воспитателӗ», «Чӑваш Енӗн ҫулталӑкри учителӗ».
Педагог-психологсенчен конкурсра Шупашкарти 65-мӗш вӑтам шкулти Ксения Яранова ҫӗнтернӗ, социаллӑ педагогсенчен — Ҫӗнӗ Шупашкарти 12-мӗш вӑтам шкулти Светлана Шемякина, класс ертӳҫисенчен — Шупашкарти 1-мӗш гимназири Ксения Коллэ. Вӗсене 50-шер пин тенкӗ тивӗҫӗ.
Воспитательсенчен Ҫӗмӗрлери «Рябинушка» 16-мӗш ача пахчинчи Екатерина Чимрова логопед ҫӗнтернӗ. Ӑна 100 пин тенкӗ парса хавхалантарӗҫ. Учительсенчен Ҫӗнӗ Шупашкарти 12-мӗш вӑтам шкулти Василиса Егорова мала тухнӑ. Ӑна 150 пин тенкӗ тивӗҫӗ.
Чӑваш Енре 65 яш-хӗр Патшалӑхӑн пӗрлехи экзаменӗнче 100 балл пухнӑ. Вӗсенчен улттӑшӗ икӗ экзаменра 200 балл илнӗ.
Пӗр ҫамрӑк аппеляцире хушма 1 балл илнӗ. Аса илтерер, икӗ предметпа 200 балл пухакансем ҫак шкулсенче вӗреннӗ ҫамрӑксем пулнӑ: Шупашкарти 3-мӗш лицей (физика тата математика), Шупашкарти 5-мӗш гимнази (хими тата вырӑс чӗлхи), Шупашкарти 2-мӗш гимнази (вырӑс чӗлхи тата обществознани), Шупашкарти 61-мӗш шкул (вырӑс чӗлхи тата информатика), Ҫӗнӗ Шупашкарти 12-мӗш шкул (вырӑс чӗлхи тата обществознани), Канашри 8-мӗш шкул (истори тата обществознани).
Чӑваш Ен хыснинче нумай ачаллӑ ҫемьере ҫитӗнекен шӑпӑрлансене шкулта тӳлевсӗр ҫитерме укҫа тупӑннӑ. Сӑмах май, унччен ку укҫана муниципалитет уйӑрнӑ.
Ку ыйтӑва Правительство ҫуртӗнче иртнӗ планеркӑра сӳтсе явнӑ. ЧР вӗренӳ министрӗ Алла Салаева пӗлтернӗ тӑрах, республикӑра ку категорие кӗрекен 11800 ача шутланать. Вӗсене хула е район хыснинчи укҫапа тӳлевсӗр ҫитермелле, анчах пур чухне те укҫа ҫитмест-мӗн.
Нумаях пулмасть республика тухӑҫлӑ ӗҫленӗшӗн 455 миллион тенкӗ гранта тивӗҫнӗ. Шӑпах ку укҫа ачасене тӳлевсӗр ҫитермешкӗн кайӗ. Ҫапах район-хула хыснисем те ку тӗллевпе укҫа уйӑрӗҫ.
Шкутан вӗренсе тухакансен экзаменсем вӗҫленнӗ. Палӑртма кӑмӑллӑ: тӑватӑ ҫамрӑк икӗ предметпа 100-шер балл пухнӑ.
Ҫак маттур яш-хӗр Шупашкарти 3-мӗш лицейра, 5-мӗш гимназире вӗреннӗ. Ҫӗнӗ Шупашкарти 12-мӗш шкултан вӗренсе тухнӑ ҫамрӑк обществознанипе тата вырӑс чӗлхипе 100-шер балл пухнӑ. Канашри 8-мӗш шкулта ӑс пухнӑ ҫамрӑк та маттур: вӑл обществознанипе тата историпе чи нумай балл пухнӑ.
Сӑмах май, патшалӑхӑн пӗрлехи экзаменӗсен хушма тапхӑрӗ утӑ уйӑхӗн 12-17-мӗшӗсенче иртӗ.
Чӑваш Енре Патшалӑхӑн пӗрлехи экзаменӗсен малтанхи кӑтартӑвӗсем паллӑ. Кӑҫал миҫе яш-хӗр экзаменра 100 балл пухнӑ?
ЧР Вӗренӳ министерстви пӗлтернӗ тӑрӑх, кӑҫал, пӗлтӗрхипе танлаштарсан, ҫамрӑксем экзаменсене лайӑхрах тытнӑ. Хальлӗхе 46 ҫын ППЭре 100-шер балл пухнӑ. Шупашкарти икӗ выпускник икӗ экзаменра 200 балл пухнӑ. Вӗсем 5-мӗш гимназире тата 3-мӗш лицейра вӗренеҫҫӗ. Пӗри химипе тата вырӑс чӗлхипе чи нумай балл пухнӑ. Тепри – математикӑпа тата физикӑпа.
+7.3 °C