Нумаях пулмасть Шупашкарти Ленин районӗн администрацийӗн ЗАГС пайӗ йӗкӗреш хӗрачасене хӑйне евӗр ятпа ҫыртарнӑ. Амӑшӗ вӗсене Фелиция тата Флоренция ятсем хунӑ. Икӗ хӗр пӗрчине килте пиччӗшӗ тата аппӑшӗ кӗтеҫҫӗ.
ЧР Юстици ӗҫӗсен патшалӑх служби пӗлтернӗ тӑрӑх, республикӑра ҫулталӑк пуҫланнӑранпа пилӗк йӗкӗреш ҫуралнӑ. Пӗлтӗр Чӑваш Енре 112 йӗкӗреш тата 1 виҫӗреш кун ҫути курнӑ.
Республикӑри ача-пӑча клиника пульницинчи тухтӑрсем ток ҫапнӑ икӗ ачана пулӑшнӑ. Вӗсене халӗ киле янӑ ӗнтӗ.
3-ри арҫын ача тройнике пӑта чикнӗ. Унӑн пӳрнисем пиҫсе кайнӑ. Ачана пульницӑна илсе ҫитернӗ. Юрать-ха, вӑл вӑйлах суранланманни палӑрнӑ.
4 ҫулти хӗрача вара Ҫӗнӗ ҫулта чӑрӑш капӑрлатнӑ чухне шар курнӑ. Юсавсӑр гирляндӑна пула ӑна ток ҫапнӑ.
Тухтӑрсем кун пек чухне пиҫсе кайнӑ вырӑна шыва чикме сӗнеҫҫӗ. Аллерги ҫук пулсан ачана ыратнине ирттерекен эмел пама юрать. Паллах, ҫийӗнчех васкавлӑ медпулӑшу чӗнмелле.
ЧР Элтеперӗ Патшалӑх Канашне янӑ ҫырура республикӑра ҫуралнӑ ачасене парне пама сӗннӗ. Вӑл – чӑваш тӗрриллӗ тум.
«Телейлӗ ачалӑх ҫулталӑкӗнче тахҫантанпах сӳтсе явакан пулӑшу мерине пурнӑҫламалла тесе шутлатӑп. Ку – тин ҫуралнӑ ачана наци символикиллӗ парне парасси», - тенӗ Олег Николаев Элтепер.
Палӑртмалла: унччен республикӑра чӳк уйӑхӗн 26-мӗшӗнче, Чӑваш тӗррин кунӗнче, ҫуралнӑ пепкесене кӑна кунашкал парне панӑ.
Кӑрлач уйӑхӗн пуҫламӑшӗнче Шупашкарта пӗр хӗрарӑм васкавлӑ медпулашӑва шӑнкӑравланӑ: унӑн 7 уйӑхри ачи япӑх сывлама пуҫланӑ, ӳтне кӑвак тӗс ҫапнӑ. Пепке 40 ҫеккунт сывламанни те пулнӑ.
Васкавлӑ медпулӑшу вырӑна 7 минутран ҫитнӗ. Ҫав вӑхӑтра амӑшне Галина Евдокимова аслӑ тухтӑр телефонпа мӗн тумаллине вӗрентнӗ. Ҫапла тухтӑрсем ҫитиччен ачан сывлав ҫулне кӗрсе ларнӑ япала тухса ӳкнӗ.
Шурӑ халатлисем пепкене тӗрӗсленӗ те Республикӑри ача-пӑча клиника пульницине илсе ҫитернӗ.
Шупашкарти вулавӑшсем ҫыравҫӑсемпе тӗлпулусем час-часах ирттереҫҫӗ. Калем ӑстисемпе курнӑҫма ачасене йыхравлаҫҫӗ. Чӑваш Республикин Л.Н. Толстой ячӗллӗ ятарлӑ вулавӑшне нумаях пулмасть Раиса Воробьева поэта чӗннӗ.
Мероприятие хулари 2-мӗш ача-пӑча пахчине ҫӳрекенсем пырса ҫитнӗ. Пӗчӗкскерсем поэтӑн шкул ҫулне ҫитмен ачасем тата кӗҫӗн классенче вӗренекенсем валли ҫырнӑ «Лера теттисем: сӑвӑсем. Игрушки Леры: стихи» кӗнекине аслисем пулӑшнипе тишкернӗ.
Поэт шӑпӑрлансене хӑйӗн ҫинчен те каласа кӑтартнӑ, хӑйӗн «Асамлӑ вӑрманта. В волшебном лесу», «Чарусӑр ҫерҫисем. Шумные воробушки», «Чи лайӑх тетте. Самая лучшая игрушка» сӑввисене вуласа панӑ.
Шупашкарти Калинин районӗн администрацийӗн ЗАГС пайӗн ӗҫченӗсем Евника ятлӑ хӗрачана регистрациленӗ. Ача нумаях пулмасть кун ҫути курнӑ.
ЗАГС ӗҫченӗсем палӑртнӑ тӑрӑх, кунашкал ята вӗсем юлашки икӗ ҫулта тӗл пулман.
Евника Авалхи Греци ячӗ, «ырӑ ҫӗнтерӳ» тенине пӗлтерет. Ку ята Библире те асӑннӑ. Вӑл иудеянка, Павӑл апостолӑн Тимофейӑн амӑшӗ.
Журналист шухӑшӗ
Пушӑ вӑхӑт нумай та пенсире, тепӗр чух Интернета кӗрсе тӗрлӗ хыпарпа паллашатӑп. Ӗлӗкрех алран кӗнеке каймастчӗ, халӗ эрнере пӗрре тытатӑп-и ӑна, ҫук та-и...Хам юратакан кӗнекесене темиҫе хут та вуласа тухнӑ, хальхи нумай ҫыравҫӑн хайлавӗ вара чуна пырсах пӗтмест. Тӑван ҫӗршыва, атте-аннене, хамӑр ҫуралса ӳснӗ тавралӑха юратма хистекен —хавхалантаракан произведенисем питӗ сахал. Патриотизм теми халӗ «модӑра» мар: чӑн малти вырӑнта—укҫа, укҫа, укҫа... Ас тӑватӑп-ха, журналистсемпе ирттерекен тӗл пулусенче те пире: «Ҫамрӑксене укҫа тума вӗрентекен статьясем ытларах ҫырмалла, паян тӗп вырӑнта предприниматель пулмалла», — тетчӗҫ. Пӗр пысӑк пуҫлӑх вара шавах хӑй ача чух пасарта ҫырла сутса укҫа тунипе мухтанатчӗ. Пуҫларӑмӑр вара ҫырма: районти пӗр предприниматель те хаҫатра вырӑн йышӑнмасӑр юлмарӗ пулмалла. Пӗрремӗш страницӑра— суту-илӳҫӗсен пысӑк портречӗ, иккӗмӗшӗнче — ун ҫинчен мухтаса ҫырнӑ очерк е тӗрленчӗк, виҫҫӗмӗшӗнче — интервью...
Капла хирӗҫлесе ним те калас теместӗп-ха эпӗ: хальхи саманара укҫа патша вырӑнӗнче пулни вӑрттӑнлӑх мар.
Шупашкарти 20-мӗш шкулта вӗренекенсемпе паллӑ чӑваш халӑх писателӗн Денис Гордеевӑн хӗрӗ Светлана Гордеева тӗл пулнӑ. Ӑна республикӑн Ача-пӑчапа ҫамрӑксен вулавӑшӗ йӗркеленӗ.
Светлана Денисовна — поэт, художник тата журналист. Вӑл ачасем валли ҫырма юратать. Унӑн кӗнекисенчен ҫаксене асӑнса хӑвармалла: «Верить в чудеса = Тӗлӗнтермӗшсен тӗнчи», «Веселая карусель = Хаваслӑ карусель», «Карҫинкари кӑмпасем = Корзинка с грибами», «Элик и его друзья», «Буквы в букете».
Икӗ чӗлхепе пичетленнӗ ҫав кӗнекесене хитре ӳкерчӗксемпе илемлетнӗ.
Поэт ачасен нумай ыйтӑвне хуравланӑ.
Вӑрнар районӗнчи Пӑртас ялӗнче ачасем урамра конькипе ярӑнаҫҫӗ. Ҫавна видео ӳкерсе илсе халӑх тетелӗнчи ушкӑнсенче лартса тухнӑ.
Чӑн та, пӗр енчен, ачасем урамра, уҫӑ сывлӑшра уҫӑлса ҫӳренӗшӗн, савӑнмалла. Анчах, тепӗр енчен, урам каток пулса ларни ятарлӑ организацисем ҫав ҫула епле тытса тӑнине кӑтартса парать.
Сывлӑш температури улшӑнса тӑнӑ чухне ҫул-йӗр пӑрланса ларать-ха, анчах урамри ҫула яваплисем хӑйӑр-тӑвар тавраш пӗртте сапмаҫҫӗ-ши? Пӑрланса ларнӑ ҫулпа утса иртме те, транспорта ҫӳреме те хӑрушӑ.
Шупашкарти Калинин районӗн прокуратурине сусӑр ачана кирлӗ препаратсемпе тивӗҫтерменни пирки ҫӑхав ҫитнӗ. Ачана кашни кун инсулин ямалли йӗп тата юнри глюкоза шайне тӗрӗслемелли тест кирлӗ. Анчах ӑна вӗсемпе тивӗҫтермен.
Прокуратура тӗрӗслев пуҫарсан пӑр вырӑнтан тапраннӑ. Ведомство Хулари ача-пӑча клиники тӗлӗшпе представлени ҫырнӑ.
Хальхи вӑхӑтра ачан пӗтӗм препарат пур.
-0.7 °C