Паян ирхи 7 сехет ҫурӑра Шупашкарти 9-мӗш пилӗкҫуллӑх проспектӗнчи 4-мӗш ҫуртра, общежитире, пушар тухнӑ. Унта виҫҫӗмӗш хутри пӳлӗм ҫунма тытӑннӑ.
Вырӑна ҫитнӗ пушарнӑйсем общежитире пурӑнакансене эвакуациленӗ. Тӗтӗмлӗ подъездран 50 ҫын хӑй тӗллӗнех тухнӑ.
Пушара ҫур сехетрен сӳнтернӗ. Ҫичӗ ҫынна, вӗсенчен пиллӗкӗшӗ ачасем, тухтӑрсене пулӑшӑвӗ кирлӗ пулнӑ. Вӗсене пульницӑна леҫнӗ. Халӗ общежитири пӳлӗмре пушар мӗнле майпа тухнине уҫӑмалатаҫҫӗ.
Каласа хӑварар: ӗнер Вӑрнар районӗнчи Вӑрман Кипек ялӗнче йывӑҫ сарай ҫуннӑ. Ҫулӑм кил хуҫи хӗрарӑмӗн 7-ри ывӑлӗ шӑрпӑкпа вылянӑран тухнӑ. Вӑрмар районӗнче пӗр тӑрӑ айӗнче пулнӑ ҫуллахи ҫурта, мунча тата гараж ҫунса кайнӑ. Шӑмӑршӑра вара ҫӗрле ҫурт ҫунса кӗлленнӗ. 60 ҫулти кил хуҫи, унӑн хӗрӗпе мӑнукӗсем ун чух ҫывӑрнӑ. Юрать-ха, чӳречерен тухса ӗлкӗрнӗ.
ЧР Вӗренӳ министерстви Шупашкарти электромеханика колледжне реорганизацилеме сӗнет. Постановлени проектне республикӑри нормативлӑ право акчӗсен порталӗнче пичетленӗ.
Документра палӑртнӑ тӑрӑх, асӑннӑ техникума Шупашкарти машиностроени техникумӗпе пӗрлештересшӗн. Ҫавна май пӗрешкел профессисене хатӗрлекен енсене пӗтересшӗн.
Икӗ вӗренӳ учрежденине пӗрлештерсен Машиностроени техникумӗнчи 11 педагог сокращение лекет. Профильлӗ мар специальноҫсене вӗрентекен педагогсемпе мастерсене Шупашкарти транспорт тата строительство технологийӗсен техникумне тата Экономикӑпа технологи колледжне ӗҫлеме куҫарӗҫ.
Икӗ техникума пӗрлештерни тӳлев фондӗнчи 2,8 миллион тенке перекетлеме май парӗ.
«Юрма» агрохолдинг ҫынсене ырӑ мар шӑршипе йӑлӑхтарсах ҫитернӗ пулмалла. Ара, ҫанталӑк ӑшӑтнӑ май Шупашкарта тӑтӑшах лайӑх мар шӑршӑ сарӑлать. Ҫынсен шухӑшӗпе, ку «Юрма» агрохолдинг айӑпӗ. Хапрӑкӑн чӑх-чӗп каяшне упрамалли вырӑн пур.
Ҫынсем ырӑ мар шӑршӑпа кӗрешмелли хӑйне евӗр мел тупнӑ: Шупашкарта агрохолдинга байкот тума чӗнсе калакан листовкӑсем ҫыпӑҫтарса тухнӑ. Унашкаллисене Воробьев композиторсен урамӗнче, Хулаҫум вокзалӗ ҫывӑхӗнче, МТВ-центра ҫӗр айӗн каҫмалли вырӑнта тата ытти ҫӗрте асӑрханӑ.
Листовка ҫине противогаз ӳкернӗ чӑх ӳкернӗ, «Нет Юрме» тесе ҫырнӑ.
Ҫӗртме уйӑхӗн 6-мӗшӗнче Чӑваш Енре «Остановись до переезда!» (чӑв. Ҫул урлӑ каҫнӑ чухне чарӑн!) акци иртӗ. Ӑна машинӑсем чукун ҫул урлӑ каҫнӑ чухне асӑрханччӑр, чарӑнса тӑччӑр тесе ирттерӗҫ.
Акци Лапсар патӗнчи чукун ҫул каҫҫи ҫинче ирхи 10 сехетрен пуҫласа 11 сехетчен иртӗ.
Чулхулари чукун ҫулӑн корпоратив службин пайташӗ Алена Чернышева ҫак йӗркесен авторне пӗлтернӗ тӑрӑх, ҫӗртме уйӑхӗн 6-мӗшне Чукун ҫул каҫҫисене тимлӗх уйӑрмалли пӗтӗм тӗнчери кун тесе йышӑннӑ. Капла йышӑнӑва Чукун ҫулӗсен пӗтӗм тӗнчери пӗрлӗхӗ, Европа союзӗн комиссийӗпе тата Пӗрлештернӗ нацисен организацийӗпе палӑртнӑ.
Водительсене чукун ҫул урлӑ каҫнӑ чух асӑрхануллӑ пулмаллине аса илтерӗҫ. Ятарлӑ памяткӑсемпе стикерсем валеҫсе парӗҫ.
Пӗрремӗш канал ӗҫченӗсем Пӗтӗм тӗнчери ачасене хӳтӗлемелли кун Шупашкара килни пирки пӗлтернӗччӗ. Хӑнасем Гладков урамӗнче вырнаҫнӑ Республикӑри ача-пӑча клиника пульницинче пулса курнӑ. Вӗсем пушӑ алӑпа килмен – тӗп тухтӑра Пӗрремӗш канал директорӗ Константин Эрнст алӑ пуснӑ 1 миллион тенкӗлӗх сертификат тыттарнӑ. Ку укҫапа пульница валли реанимаци уйрӑмӗ валли икӗ функционаллӑ медицина кравачӗ тата пӗр бинокулярлӑ лупа туянасшӑн.
Кунашкал кравать интенсивлӑ терапи валли питӗ кирлӗ. Бинокулярлӑ лупӑпа вара тӗрлӗ тытӑмра усӑ кураҫҫӗ: хирургире, дерматологире, нейрохирургире, офтальмологире, стоматологире. Ку хатӗр ачасене паракан медицина пулӑшӑвне пахалӑхлӑрах тума пулӑшать.
Йӑлана кӗнӗ тӑрӑх, ҫӗртме уйӑхӗнче «Ҫамрӑксен хули» ҫамрӑксен форумӗ иртет. Кӑҫал вӑл «Буревестник» кану базинче ҫӗртмен 8-13-мӗшӗсенче пулӗ.
Хальхинче форумӑн тӗп ыйтӑвӗ – Шупашкар 550 ҫул тултарни. Унта хутшӑнакансем наци проекчӗсене, хулари культурӑна, пултарулӑха пӑхса тухӗҫ.
Паянхи кун тӗлне форума хутшӑнмашкӑн 780 ҫынран заявка килнӗ. Кусем – форум вӑхӑтӗнче базӑра пурӑнакансем. Мероприятие хутшӑнакан ытти ҫынсене шута илсен 1500-е ҫитӗ. Палӑртмалла: форума лекес тесен 200 тенкӗ тӳлемелле.
Кӑҫал «Ҫамрӑксен хули» форума Ҫамрӑксен ӗҫӗсемпе ӗҫлекен федераци агентствин ертӳҫи Александр Бугаев килӗ.
Чӑваш Енӗн тӗп хулинче тата тепӗр прокуратура уҫӑлнӑ. Ҫавӑн ячӗпе савӑнӑҫлӑ мероприятиех йӗркеленӗ. Унта республика прокурорӗ Василий Пословский та пырса ҫитнӗ.
Шупашкар хулинче паянхи кун виҫӗ прокуратура ӗҫлет: Калинин, Мускав тата Ленин районӗсенче. Шупашкар хула прокуратури Байдуков урамӗнчи 23-мӗш ҫуртри «а» ҫуртра вырнаҫнӑ. Малашне, ав, хула прокуратури те надзор тивӗҫне пурнӑҫлӗ. Сӑмах май, унтах — Ленин тата Мускав районӗнчи надзор органӗсем. Тӗрмери йӗркелӗхе тӗрӗслесе тӑракан прокуратура та ҫавӑнтах.
Чӑваш Енӗн тӗп хулинче прокуратура уҫма Раҫҫейӗн тӗп прокурорӗ кӑҫалхи пуш уйӑхӗн 29-мӗшӗнче йышӑннӑ. Ҫӗнӗ тытӑмра 11 ҫын ӗҫлӗ. Ҫав шутра — тӑхӑр оперативлӑ ӗҫчен, пӗр специалист тата пӗр водитель.
Ачасене хӳтӗлемелли пӗтӗм тӗнчери кун, ҫӗртме уйӑхӗн 1-мӗшӗнче, Пӗрремӗш канал ӗҫченӗсем Шупашкарта пысӑк уяв ирттернине Чӑваш халӑх сайчӗ пӗлтернӗччӗ. Аса илтерер, пирӗн пата «Асамлӑ уй» кӑларӑм ертӳҫи Леонид Якубович та ҫитнӗччӗ. Вӑл Шупашкарти «Олимпийский» стадионта «Асамҫӑ» акци ирттернӗччӗ.
Ҫавӑн хыҫҫӑн паллӑ телеертӳҫӗ тата РФ халӑх артисчӗ Леонид Якубович Хӗрлӗ лапама машинӑпа ҫул тытнӑ. Унта вӑл ҫулпа мар, тротуарпа кайнӑ иккен. Ҫавна сӑн ӳкерекенсем пулнӑ. Сӑнӳкерчӗк ҫинче Якубович «Лексус» рулӗ умӗнче ларни курӑнать. Сӑнӳкерчӗксене «За рулем» паблика вырнаҫтарнӑ.
URA.ru кӑларӑма Леонид Якубович туман япалашӑн каҫару ыйтмассине пӗлтернӗ. Тротуар тӑрӑх ҫӳренӗ текен сӑмаха вӑл аташу тесе хакланӑ.
Паян Пӗрремӗш канал ӗҫченӗсем Шупашкарта пысӑк уяв ирттернӗ. Пирӗн пата «Асамлӑ уй» кӑларӑм ертӳҫи Леонид Якубович та ҫитнӗ. Вӑл Олимпийский» стадионта «Асамҫӑ» акци ирттернӗ. Кун хыҫҫӑн вӑл Хӗрлӗ лапама машинӑпа ҫул тытнӑ.
Анчах паллӑ телеертӳҫӗ ҫулпа мар, тротуарпа пынӑ. Ленинград урамӗнчи ҫул варринче автобус ларнӑ, вӑл машинӑсене ятарласа ирттерсе яман. Леонид Якубович вара унран тротуар урлӑ иртсе кайнӑ.
Ҫакна сӑн ӳкерекенсем пулнӑ. Сӑнӳкерчӗк ҫинче Якубович «Лексус» рулӗ умӗнче ларни курӑнать. Сӑнӳкерчӗксене «За рулем» паблика вырнаҫтарнӑ. Вӗсене ҫул-йӗр полицийӗ те асӑрханӑ.
ЧР ШӖМӗ пӗлтернӗ тӑрӑх, халӗ кун тӗлӗшпе тӗрӗслев иртет, водителе явап тыттарӗҫ.
Паян, ҫӗртме уйӑхӗн 1-мӗшӗнче, Ачасене хӳтӗлемелли пӗтӗм тӗнчери кун, пирӗн республикӑра Пӗрремӗш канал ирттерекен ыр кӑмӑллӑх акцийӗ иртессине Чӑваш халӑх сайчӗ пӗлтернӗччӗ те ӗнтӗ. Ирхи пӗрремӗш асра юлмалли пулӑмсенчен пӗри — Шупашкарти «Олимпийский» стадиона 10 сехетре Леонид Якубович Раҫҫейри паллӑ актер, хальхи вӑхӑтра «Поле чудес» (чӑв. Тӗлӗнтермӗш уйӗ) телекӑларӑм ертӳҫи тата ытти хӑш-пӗр телеҫӑлтӑр вертолетпа анса ларни.
Стадиона кӗме тивӗҫ пулнӑ ачасене (эпир пӗлнӗ тӑрӑх, унта пули-пулми лекеймен) мороженӑйпа чӑнах та хӑналанӑ.
Тӗлпулӑва пынӑ ачасемпе аслисем Леонид Якубовичпа, «Мужское/Женское» кӑларӑм ертӳҫисенчен пӗринпе Юлия Барановскаяпа ӑмӑртмалла сӑн ӳкерӗнме тӑрӑшнӑ.
+25.3 °C