Чӑваш Ен спортсменкине Татьяна Акимовӑна Раҫҫейӗн пӗрлештернӗ командине кӗртмен. Кун пирки ТАСС пӗлтерет.
Ҫапла, Татьяна ҫитес сезонра ӑмӑртусене хутшӑнаймӗ. Тен, куншӑн кулянмалли те ҫук, мӗншӗн тесен вӑл амӑшӗ пулма хатӗрленет.
Ҫӗртме уйӑхӗн 1-мӗшӗнче Раҫҫейри биатлонистсен пӗрлӗхӗ пӗрлештернӗ командӑн тӗп тата резерв йышне пичетленӗ. Хӗрарӑмсен ушкӑнӗнче Татьяна Акимова ҫук. Ҫавӑн пекех Ирина Услугинӑн ячӗ те курӑнмасть.
Чӑваш спортсменкисем ӑмӑртусене мӗншӗн хутшӑнманни пирки хальлӗхе халӑха пӗлтерме ыйтман-мӗн. Ҫапах спортменкӑсем ӑмӑртусене хутшӑнманнине ҫынсем ҫавах сисӗҫ, ыйтусем парӗҫ. Ҫавна май наци командин тренерӗ Виталий Норицын ку вӑрттӑнлӑха уҫнӑ: Татьяна та, Ирина та командӑна ача кӗтнине пула кӗмен, вӗсем декрет отпускне кайнӑ.
Кӑҫал Корейӑри Пхенчханра иртнӗ Олимп вӑййисене Чӑваш Ен спортсменӗсем Татьяна Акимовӑпа Лана Прусакова хутшӑннӑ. Вӗсене тата тренерсене куншӑн преми пама йышӑннӑ.
Спортменкӑсем 50-шар пин тенке тивӗҫӗҫ. Вӗсен тренерӗсене Анатолий Акимовпа Никита Васильева вара 25-шер пин тенкӗ парӗҫ. Кунсӑр пуҫне Татьянӑпа Лана кӑҫалхи акан 1-мӗшӗнчен пуҫласа 2019 ҫулхи пушӑн 31-мӗшӗччен уйӑхсерен 8 пин тенкӗ стипенди илӗҫ.
Аса илтерер: Олимп вӑййисенче Татьяна Акимова биатлонра тупӑшнӑ, Лана Прусакова вара слоуп-стайлра вӑй виҫнӗ.
Австринчи Пиллерзееталь айлӑмӗнче ҫар ҫыннисен йӗлтӗр ӑмӑртӑвӗ енӗпе ыран тӗнчери 54-мӗш чемпионачӗ иртӗ. Унта пирӗн Чӑваш Енри Татьяна Акимова та хутшӑнӗ.
Аса илтерер, Кӑнтӑр Корейӑри хӗллехи Олимп вӑййисене хутшӑннӑ ентешӗмӗр кайран 2017-2018 ҫулсенчи Тӗнче кубокӗн виҫӗ тапхӑрне сиктерчӗ. Финлядинчи Контиолахтине юриех кайманнине, Норвегинчи Ослона ҫитме ӗмӗтленнине Татьяна Инстаграмра та ҫырчӗ-ха. Чӑваш биатлонистки ун чух чирлесе ӳкнӗ. Унта вӑл ҫӗршыв командине ӑнӑҫу суннӑччӗ. Татьяна Акимова Тӗнче кубокӗн Тӗменти иртнӗ тӑххӑрмӗш тапхӑрне те хутшӑнмарӗ.
Sports.ru сайтра ака уйӑхн 1-мӗшӗнче пӗлтернӗ тӑрӑх, Раҫҫей биатлонисчӗсенчен Австрири ӑмӑртӑва Антон Бабиков, Максим Цветков, Ульяна Кайшева тата Петр Пащенко хутшӑнӗ.
Раҫҫейӗн пӗрлештернӗ командинче пулнӑ чӑваш биатлонистки Татьяна Акимова биатлон енӗпе иртекен 2017/2018 ҫулсенчи тӗнче кубокӗн Норвегири тапхӑрне хутшӑнмассине эпир пӗлтернӗччӗ. Аса илтерер, ӑмӑртусем Холменколлентра пуш уйӑхӗн 15—18-мӗшӗсенче иртнӗччӗ. Чӑваш биатлонистки Инстаграмра чирленине пӗлтернӗччӗ. Унччен вӑл Финляндири Контиолахтинчи тапхӑра та кайманччӗ. Паян пуҫланакан Тӗнче кубокӗн Тӗменти тапхӑрӗнче те Татьяна Акимова пулмӗ.
«Спорт-Экспресс» хаҫатра ӗнер ентешӗмӗрӗн унчченхи тренерӗпе Виталий Норицынпа интервью пичетленнӗ. Унта чӑваш биатлонстки Раҫҫейӗн хӗрарӑм биатлонистсен пӗрлештернӗ командине таврӑнассине каланӑ. Тренерсемпе спортсменка пӗр чӗлхе тупасса шаннине пӗлтернӗ. Аса илтерер, Кӑнтӑр Корейӑри Олимп вӑййинчи масс-стартра тӑрса пенӗ чух Татьяна пилӗк хутчен йӑнӑшнӑччӗ. Кайран «Спорт-Экспресс» хаҫата панӑ интервьюра вӑл тренерсене кӳренсе калаҫнӑччӗ.
Чӑваш Енӗн биатлон шкулӗнче ӑсталӑха туптаса Раҫҫейӗн пӗрлештернӗ командине лекнӗ Татьяна Акимова Биатлон енӗпе иртекен 2017/2018 ҫулсенчи тӗнче кубокӗн Норвегинчи Холменколлента пуш уйӑхӗн 15—18-мӗшӗсенче иртекен тапхӑрне те хутшӑнаймӗ. Тӳрер пӗлтерер: хальхинче биатлонистсемшӗн ку вӑл — саккӑрмӗш тапхӑр.
Кӑнтӑр Корейӑри Пхенчханта иртнӗ Хӗллехи Олимп вӑййинче тупӑшнӑ ентешӗмӗр Финляндинчи Контиолахтинчи ӑмӑртӑва хутшӑнманччӗ. Татьяна Инстаграмри хӑйӗн страницинче ҫырнӑ тӑрӑх, унта вӑл юриех кайман. Черетлӗ тапхӑра тӗплӗнрех хатӗрленес тенӗ. Анчах шаннӑ кайӑк йӑвара пулман. «Эпӗ чирлерӗм. Температурӑна пула тренировкӑсене темиҫе кун та сиктертӗм. Темӗнле вирус курӑнать. Пирӗн ушкӑна чунтан ӑнӑҫу сунатӑп», — ҫырнӑ чӑваш спортсменки.
Чӑваш Ен биатлонистки Татьяна Акимова Раҫҫейӗн пӗрлештернӗ командинчен кайнӑ. Пӑшӑханса ан ӳкӗр, яланлӑхах мар, вӑхӑтлӑха кӑна.
Татьяна Акимова Кӑнтӑр Корейӑри Пхёнчханра иртнӗ Олимп вӑййисем хыҫҫӑн кӑштах канасшӑн. Ҫавӑнпа вӑл Ҫурҫӗр Карелире (Контиолахтире) иртекен Тӗнче кубокне хутшӑнмӗ.
«Халӗ эпӗ килте, Шупашкарта, тренировка ирттеретӗп. Тренерпа шухӑшларӑмӑр та: Олимп ваййисем хыҫҫӑн канса илмелле манӑн. Вӑй-хал хушмалла, психологи тӗлӗшӗнчен ҫирӗпленмелле. Тӗнче кубокне хутшӑнмашкӑн вӑй пухса ӗлкӗреймӗп», — тенӗ Татьяна Акимова.
Ҫак уйӑхӑн пуҫламӑшӗнче Финляндири Контиолахти поселокӗнче биатлон енӗпе 2017—2018 ҫулсенчи Тӗнче кубокӗн черетлӗ, ҫиччӗмӗш, тапхӑрӗ пуҫланассине эпир пӗлтернӗччӗ. Маларах эпир унта пирӗн ентешӗмӗр Татьяна Акимова хутшӑнма пултарассине систернӗччӗ. Анчах Татьяна Акимова Финляндине каймӗ.
Хӗрарӑмсенчен Раҫҫейӗн пӗрлештернӗ ушкӑнне Екатерина Юрлова-Перхт, Дарья Виролайнен, Ульяна Кайшева, Виктория Сливко тата Светлана Миронова кӗнӗ. Контиолахтинче биатлонистсем тӑватӑ енпе: спринтра, хутӑш эстафетӑра, сингл-микстра тата масс-стартра — тупӑшӗҫ. Ҫакна sportbox.ru сайтра ҫырнӑ. Хӗрарӑмсен пӗрлештернӗ ушкӑнӗн аслӑ тренерӗ Татьяна Акимова хӑйне кантарма ыйтнине пӗлтернӗ.
Ҫитес уйӑхӑн 8-мӗшӗнче Финляндири Контиолахти поселокӗнче биатлон енӗпе 2017—2018 ҫулсенчи Тӗнче кубокӗн черетлӗ, ҫиччӗмӗш, тапхӑрӗ пуҫланӗ. Унта Раҫҫей команди хутшӑнассине ӗнер «Спорт-Экспресс» кӑларӑм пӗлтернӗ. Вӑл хыпарта пирӗннисенчен кам каяссине пӗлтерменччӗ-ха. Ҫав вӑхӑтрах Тӗнче кубокӗн черетлӗ тапхӑрне хатӗрленме ҫак спортсменсене кӗртни паллӑ: хӗрарӑмсенчен — Татьяна Акимовӑна, Ульяна Кайшевӑна, Екатерина Юрлова-Перхта, Дарья Виролайнена, Виктория Сливкона, Светлана Мироновӑна; арҫынсенчен — Антон Бабикова, Матвей Елисеева, Евгений Гараничева, Александр Логинова, Антон Шипулина, Максим Цветкова.
Аса илтерер, Чӑваш Енри Татьяна Акимова Кӑнтӑр Корейӑри хӗллехи Олимп вӑййине хутшӑнчӗ.
Кӑнтӑр Корейӑри Олимпиада малалла пырать. Биатлона юратакансем паян хӗрарӑмсен масс-стартне пӑхса киленчӗҫ. Унта Чӑваш Ен спортсменки Татьяна Акимова та лекме пултарнӑ. Старта вӑл 22-мӗш номерпе тухрӗ. Пӗрремӗш пенӗ чух ентешӗмӗр кашни мишенех лектерсе старта 18-мӗш кайрӗ. Ӑнман самант пӗрремӗш хут тӑрса пенӗ чух сиксе тухрӗ. Спортсменка пилӗк хут персе пиллӗкӗшӗнче те йӑнӑшрӗ. Финиша Татьяна 6 минут та 9,4 ҫеккунт юлса чи кайран ҫитрӗ.
Иртнӗ ӑмӑрту хыҫҫӑн журналистсемпе калаҫнӑ чух Татьяна Акимова наци командинчи тренерсем хӑйӗнпе сӑмахламаншӑн кӳреннине пӗлтернӗччӗ. Раҫҫейӗн биатлон командин аслӑ тренерӗ Сергей Коновалов та хутшӑну ҫителӗклех пулманнине йышӑннӑ. Кун пирки паян Пӗрремӗш каналпа масс-старта тӳрӗ эфирта кӑтартнӑ чух пӗлтерчӗҫ.
Кӑнтӑр Корейӑра ҫак кунсенче иртекен Олимпиадӑна пирӗн ҫӗршыври тӑватӑ биатлонист — Ульяна Кайшева, Татьяна Акимова, Антон Бабиков тата Матвей Елисеев — хутшӑннине Чӑваш халӑх сайтне вулакансем пӗлеҫҫех ӗнтӗ. Аса илтерер, сумлӑ ҫак йышри Татьяна Акимова — Чӑвашран.
Раҫҫейӗн биатлонистсен пӗрлештернӗ командин тренерӗсем пирӗн ентешӗмӗр патне пачах та шӑнкӑравламан иккен. Ҫакна вӑл паянхи ӑмӑрту хыҫҫӑн журналистсене пӗлтернӗ.
Сӑмах — Олимпиадӑна кайма ирӗк паман тренерсем пирки. Ульяна Кайшеван тренерӗ урӑх-мӗн те, вӑл унпа калаҫать иккен. Анчах Татьяна Акимовӑпа тренерсем телефонпа пӗртте ҫыхӑнман.
Чӑваш биатлонисткин Пхенчханри Олимпиадӑри кӑтартӑвӗ, сӑмах май, Ульяна Кайшевӑран аванрах.
+3.3 °C