Пирӗн ентешӗмӗр, чӑваш биатлон шкулӗн воспитанници Татьяна Акимова асӑннӑ спорт енӗпе иртекен Тӗнче кубокӗн виҫҫӗмӗш тупхӑрне те хутшӑнӗ.
Виҫҫӗмӗш тапхӑр Чех Республикинче раштав уйӑхӗн 15–18-мӗшӗсенче иртмелле. Хӗрарӑмсенчен унта пирӗн ентешӗмӗрсӗр пуҫне Ольга Подчуфарова, Екатерина Глазырина, Анастасия Загоруйко, Светлана Слепцова хутшӑнмалла. Арҫынсенчен Раҫҫейӗн тренер йышӗ Антон Шипулина, Антон Бабикова, Максим Цветкова, Матвей Елисеева, Евгений Гараничева тата Дмитрий Малышкӑна кӗртнӗ.
Хальлӗхе чи пысӑк очколлисем — 288 баллӑ Мартен Фуркад хрантсус тата 277 очколлӑ Лаура Дальмайер нимӗҫ. Раҫҫей спортсменӗсенчен очко шучӗпе Антон Шипулин — 173 балпа виҫҫӗмӗш вырӑнта, 86 очколлӑ Екатерина Глазырина — 24-мӗш.
Ҫак вӑхӑтра Биатлон енӗпе тӗнче кубокӗ малалла пырать. Виҫӗмкун ӑмӑртӑвӑн иккӗмӗш тапхӑрӗ Словенири Поклюкӑра пуҫланчӗ. Эпир, чӑвашсем, хамӑр ентешӗмӗршӗн Татьяна Акимовашӑн ҫунма пултаратпӑр.
Татьяна медальсемпе савӑнтараймасть пулин те Раҫҫейӗн пӗрлештернӗ командине кӗнӗ ытти хӗрарӑм хушшинче хӑйне тивӗҫлипе кӑтартать. Пасьютра ӗнер, ав, 60 спортсменран финиша 20-мӗш ҫитрӗ. Паян биатлонисткӑсем, ҫав шутра Татьяна Акимова та, эстафетӑра тупӑшӗ. Вӑл Ольга Подчуфарова хыҫҫӑн старта тухӗ, унтан — Светлана Слепоцова, юлашкинчен — Анастасия Загоруйко.
Чӑваш биатлон шкулӗн воспитанници Тӗнче кубокӗнче тупӑшнин кӑтартӑвӗ тӑрӑх Раҫҫейӗн биатлонисчӗсен союзӗн танлаштарӑмӗнче иккӗмӗш йӗркене йышӑннӑ. Унӑн активӗнче хальлӗхе — 176 очко. Свердловск облаҫӗнчи Екатерина Глазырина пӗрремӗш вырӑнта. Унӑн пирӗн ентешрен 32 очко нумайрах. Лидерсенчен виҫҫӗмӗш вырӑнта — 131 очколлӑ Екатерина Шумилова (Ханты-Мансийск автономи округӗ).
Хальхи вӑхӑтра биатлон енӗпе Тӗнче кубокӗ пырать. Унӑн иккӗмӗш тапхӑрӗ ӗнер, раштавӑн 9-мӗшӗнче, Слловенири Поклюка хулинче пуҫланчӗ. 2016/2017 ҫулсенчи тапхӑрӑн хальхи ӑмӑртӑвӗнче ултӑ тупӑшу пӑхса хӑварнӑ: икӗ спринт (кӗске инҫӗшне чупасси), хӑваласа ҫитессишӗн тупӑшмалли икӗ ӑмӑрту тата икӗ эстафета.
Раҫҫейӗн пӗрлештернӗ ушкӑнне арҫынсенчен Антон Бабиков (Пушкӑртстан), Максим Цветков (Мускав), Матвей Елисеев (Мускав), Антон Шипулин (Свердловск облаҫӗ), Евгений Гараничев (Тӗмен облаҫӗ), Юрий Шопин (Чӗмпӗр облаҫӗ), хӗрарӑмсенчен Чӑваш Енри Татьяна Акимова, Анастасия Загоруйко (Тӗмен облаҫӗ), Ольга Подчуфарова (Мускав), Екатерина Глазырина (Свердловск облаҫӗ), Светлана Слепцова (Югра) кӗнӗ.
Пӗрремӗш тапхӑрти ӑмӑрту хыҫҫӑн Татьяна Акимова уйрӑм зачетпа Раҫҫей биатлонисчӗсенчен чи вӑйли: ун чухне вӑл 49 очко пухса тӗнчери ҫав ӑмӑртӑва хутшӑннӑ биатлонисткӑсем хушшинче 23-мӗш вырӑн йышӑннӑччӗ. Ӗнерхи спринтра пирӗн ентеш финишра 29-мӗш вырӑна тухнӑччӗ. Халӗ кӑна, темиҫе минут каялла вӗҫленнӗ пасьютра вӑл хӑйӗн позицине лайӑхлатрӗ — 20-мӗш тухрӗ. Пенӗ чухне Татьяна тӑватӑ хутӗнче те (иккӗ — выртса тата ҫавӑн чухлех — тӑрса) тӗрӗс лектерчӗ.
Раштав уйӑхӗн 9-мӗшӗнче Словенири Поклюка хулинче биатлон енӗпе Тӗнче кубокӗн иккӗмеш тапхӑрӗ старт илет. Унта пирӗн ентеш Татьяна Акимова та хутшӑнӗ.
Раҫҫейри биатлонистсен союзӗн сайчӗ пӗлтернӗ тӑрӑх, ҫӗршывӑн хӗрарӑмсен пӗрлештернӗ командине Ольга Подчуфарова, Екатерина Глазырина, Светлана Слепцова, Анастасия Загоруйко та кӗнӗ. Вӗсем малтан спринтра тупӑшӗҫ.
Палӑртмалла: Тӗнче кубокӗн пӗрремӗш тапхӑрӗн пӗтӗмӗшле зачечӗпе килӗшӳллӗн, Татьяна Акимова Раҫҫейри спортсменсен йышӗнче чи лайӑх кӑтартупа палӑрнӑ, 49 очко пухса 23-мӗш вырӑн йышӑннӑ. Екатерина Глазырина — 26-мӗш, Ольга Подчуфарова — 34-мӗш, Екатерина Шумилова — 38-мӗш, Анастасия Загоруйко — 46-мӗш, Светлана Слепцова 54-мӗш вырӑн йышӑннӑ.
Ҫак самантра Швецинче биатлон енӗпе арҫынсемпе хӗрарӑмсен хутӑш эстафети вӗҫленчӗ. Шел те, Раҫҫей ушкӑнӗ унта тӑваттӑмӗш вырӑн кӑна йышӑнайрӗ. Антон Шипулин выртса та, тӑрса та тӗл пенине кура самай вӑхӑт виҫҫӗмӗш вырӑнта (ӑна вӑл юлашкинчен пенӗ хыҫҫӑн йышӑнчӗ) пычӗ, анчах финиша темиҫе утӑм юлсан Итали спортсменӗ иртсе кайрӗ.
Хутӑш эстафетӑра пирӗн ҫӗршыв биатлонисчӗсенчен маларах асӑннӑ Антон Шипулинсӑр пуҫне Максим Цветков тата Ольга Подчуфаровапа Татьяна Акимова чупрӗҫ. Трансляци каярах юлса пуҫланнине кура хӗрарӑмсене пӑхма май килмерӗ те, анчах каярах тӳрӗ эфирта пӗлтернӗ тӑрӑх, Татьяна Акимова эстафетӑна кая юлса ҫитнӗ, ҫавна пула вӑл вӑхӑт ҫухатнӑ. Татьяна Акимова — пирӗн ентеш. Sports.ru сайтра ҫырнӑ тӑрӑх, ентешӗмӗр йӗлтӗр ҫаклатайманнипе Раҫҫей ушкӑнӗ темиҫе ҫеккунт ҫухатнӑ.
Чӳк уйӑхӗн 27-мӗшӗнчен пуҫласа раштавӑн 4-мӗшӗччен Швецири Эстерсунд хулинче биатлон енӗпе тӗнче кубокӗ иртет. Унта пирӗн ентеш Татьяна Акимова та хутшӑнӗ.
Раҫҫейӗн пӗрлештернӗ командине ҫавӑн пекех Светлана Сплепцова, Виктория Сливко, Ольга Подчуфарова кӗнӗ. Хальлӗхе пӗлтернӗ тӑрӑх, Татьяна Акимовӑпа Светлана Слепцова хутӑш эстафетӑра старта тухӗҫ. Ӑмӑрту шӑпах ҫак тупӑшуран пуҫланӗ. Спортсменсем старта 17 сехет ҫурӑра тухӗҫ.
Раҫҫейри биатлонистсен пӗрлӗхӗ пӗтӗм тӗнчери ӑмӑртусене хутшӑнакан спортсменсене ҫӗршывӑн пӗрлештернӗ командине кӗртнӗ. Ку чыса камсем тивӗҫнӗ-ха?
Йыша Мускаври политехника институчӗн Шупашкарти филиалӗнче вӗренекен Татьяна Акимова та кӗнӗ. Тӗменри тренировкӑра вӑл спринт чупса финиша иккӗмӗш ҫитнӗ.
Пӗтӗм тӗнчери биатлонистсен пӗрлӗхӗ Татьяа Акимова сезонра чи лайӑх ҫын тесе йышӑннӑ. Пӗрлӗхӗн Кубокне ҫӗнсе илессишӗн чӳкӗн 25-мӗшӗнчен пуҫласа раштавӑн 3-мӗшӗччен кӗрешӗҫ. Тӗнче кубокӗ Швецире ҫав тапхӑртах иртӗ, анчах пӗр кун маларах вӗҫленӗ.
Ханты-Мансире биатлон енӗпе Раҫҫей чемпионачӗ иртет. Унта Чӑваш Енри виҫӗ спортсмен хутшӑнать.
Атӑлҫи федераци округӗн пӗрлештернӗ командине Татьяна Акимова, Светлана Бочкарева, Валентина Телицина тата Ульяна Кайшева кӗме пултарнӑ. Чӑваш спортсменки Татьяна Акимова эстафета чупӑвне хутшӑнса ылтӑн медале тивӗҫнӗ.
Эстафетӑна 15 команда хутшӑннӑ. Атӑлҫи федераци округӗн пӗрлештернӗ команди чи маттурри пулнӑ, финиша пӗрремӗш ҫитнӗ. Кӗмӗл медале Новосибирск облаҫӗнчи спортсменсем йышӑннӑ. Тӗмен облаҫӗн команди вара виҫҫӗмӗш пулнӑ.
Ӑмӑртӑва Чӑваш Енри биатлон шкулӗнче вӗренекен Павел Магазеев, Вячеслав Акимов тата Евгений Петров та хутшӑнаҫҫӗ.
Биатлона юратакансем чӑваш биатлон шкулӗн воспитанникӗн Татьяна Акимован спортри юлашки вӑхӑтри утӑмне сӑнасах тӑраҫҫӗ пулӗ. Тӗнче чемпионатӗнче пирӗн хӗрарӑмсем те, арҫынсем те савӑнтараймарӗҫ пулин те шанчӑк паракан спортсменсем пуррине шанма пулать. Ҫавсенчен пӗри — маларах асӑннӑ Татьяна Акимова.
25-ри Чӑваш Енри спортсменкӑна Пӗтӗм тӗнчери биатлонистсен союзӗ сезонти чи лайӑх ҫӗнӗ ҫын тесе хакланӑ. Кун пирки Раҫҫейӗн биатлонисчӗсен пӗрлешӗвӗ хыпарланине тӗпе хурса республикӑн Спорт министерстви пӗлтерет.
Раҫҫейӗн пӗрлештернӗ командин йышне Татьяна Акимова кӑҫалхи сезонта лекрӗ. Тӗнче кубокӗн шайӗнче вӑл 12 хутчен тупӑшрӗ тата тӗнче чемпионатӗнче — виҫӗ хут. Ханты-Мансийскра иртнӗ Тӗнче кубокӗнче спринтра Татьяна Раҫҫей биатлонистскисенчен чи лайӑххи пулнине, финиша 12-мӗш ҫитнине, эпир пӗлтернӗччӗ.
Хальхи вӑхӑтра Ханты-Мансийскра биатлонистсен тӗнче чемпионачӗн тӑххӑрмӗш тапхӑрӗнче иртет. Халӗ кӑна хӗрарӑм спортсменсем спринт енӗпе тупӑшрӗҫ. 7,5 километра пӗрре выртса, тепре тӑрса персе ҫӗнмелли инҫӗше Раҫҫей командинчен ҫиччӗн старта тӑчӗҫ, ҫав шутра Чӑваш Енри биатлон шкулӗн воспитанникӗ Татьяна Акимова та пулчӗ. Пирӗн биатлонисткӑсем ҫӗнтерӳҫсӗсен пьедесталӗ ҫине хальхинче те (Норвегире иртнӗ тӗнче чемпионатӗнче Раҫҫей спортсменӗсем пӗр медаль те ҫӗнсе илейменчччӗ) лекеймерӗҫ. Ҫапах та хальхинче пирӗн ҫӗршыври хӗрарӑм-спринтерсенчен ентешӗмӗр чи лайӑх кӑтартупа финиша тухрӗ. Вӑл пенӗ чухне йӑнӑшмарӗ. Ҫӗнтерӳҫӗрен, Финляндири Кайса Мякяряйненран, 45,7 ҫеккунт юлса 12-мӗш вырӑн йышӑнчӗ. Раҫҫейӗн ытти биатлонисткисенчен Анастасия Загоруйко — 18-мӗш (старта +1.00,7 минут кая юлса ҫитрӗ, перессипе 1 йӑнӑшрӗ); Дарья Виролайнен — 20-мӗш (+1.07,0 (1); Екатерина Юрлова — 32-мӗш (+1.35,5 (2); Екатерина Шумилова — 35-мӗш (+1.39,0 (1); Анна Щербинина — 62-мӗш (+2.37,3 (2); Светлана Слепцова — 67-мӗш (+2.56,2 (2).
Чехири чиперкке Габриэла Соукалова та перессипе пӗртте йӑнӑшмарӗ, анчах финиша пӗрремӗш тухма ӑна 3,1 ҫеккунт ҫитеймерӗ.
-10.7 °C