Чӑваш ҫӗрӗн хальхи вӑхӑтри маттур хӗрӗ, халӗ Тӗмен облаҫӗшӗн ӑмӑртакан Татьяна Акимова биатлон енӗпе иртекен Тӗнче чемпионатне хутшӑнӗ. Спортсменсем нарӑс уйӑхӗн 10-21-мӗшӗсенче Словенири Поклюкӑра ӑмӑртӗҫ.
Раҫҫейӗн пӗрлештернӗ командине 6 хӗрарӑмпа 6 арҫын кӗнӗ: Светлана Миронова, Евгения Павлова, Ульяна Кайшева, Татьяна Акимова, Ирина Казакевич, Лариса Куклина, Александр Логинов, Матвей Елисеев, Эдуард Латыпов, Антон Бабиков, Евгений Гараничев, Карим Халили.
Италири Антхольцра биатлон енӗпе иртнӗ Тӗнче кубокӗн тапхӑрӗнче Раҫҫейӗн пӗрлештернӗ команди эстафетӑра пӗрремӗш вырӑна тухнине эпир пӗлтернӗччӗ. Аса илтерер: ылтӑн медале тивӗҫнӗ тӑватӑ биатлонисткӑран пӗри Чӑваш Енре ҫуралса ӳснӗ Татьяна Акимова пулнӑччӗ.
Паян, раштав уйӑхӗн 18-мӗшӗнче, Австрири Хохфильценра биатлон енӗпе Тӗнче кубокӗн спринт ӑмӑртӑвӗ иртӗ. Старта хӗрарӑмсем тухӗҫ. Раҫҫейӗн пӗрлештернӗ командине нумаях пулмасть кӗнӗ пирӗн ентешӗмӗр Татьяна Акимова та тупӑшӗ.
Тӗнче шайӗнчи ӑмӑртусене юлашки хут 2018 ҫулхи нарӑс уйӑхӗнче хутшӑннӑччӗ. Вӑл ун чухне Китайри Олимпиадӑра ӑмӑртнӑччӗ. Кайран чирленӗ, Тӗнче кубокӗн 2017/2018 ҫулсенчи тапхӑрӗнчи юлашки ӑмӑртусене хутшӑнайманччӗ. Унтан ача ҫуратрӗ, пӗчӗк Аделинӑн амӑшӗ кӗҫех каллех йӗлтӗр ҫине тӑчӗ. Михаил Вансяцкий журналист Фейсбукра пӗлтернӗ тӑрӑх, кӑҫалхи сезонта Раҫҫей кубокӗн ҫичӗ ӑмӑртӑвӗнче Татьяна Акимова ултӑ медаль ҫӗнсе илнӗ.
Паянхи спринтра ентешӗмӗр старта 90-мӗш тухӗ. Маларах асӑннӑ журналист шухӑшланӑ тӑрӑх, ҫакӑ лайӑхах мар. Чӑн та, Хохфильценра 6 градус ӑшӑ, спортсменсем ӑмӑртнӑҫемӗн йӗлтӗр йӗрӗ япӑхса каять. Ӗнер ҫавӑ арҫынсен спринтӗнче аван сисӗннӗ. Старта юлашки ушкӑнпа тӑнӑ хӑвӑрт чупакан спортсменсемех, Понсилуома тата Самуэльсон шведсем, чупас хӑвӑртлӑхпа ҫӗнтерӳҫӗсене 1 минут ытла выляса янӑ.
Пирӗн ҫӗршыври ытти спортсменкӑна илсен Ирина Казакевич 7-мӗш номерпе старта тухӗ, Светлана Миронова — 8-мӗш, Евгения Павлова — 40-мӗш, Ульяна Кайшева — 45, Анастасия Гореева — 60.
Чӑваш хӗрне, Раҫҫей кубокӗнче кӑҫалтан Тӗмен облаҫӗшӗн ӑмӑртакан 30 ҫулти Татьяна Акимовӑна ҫӗршывӑн биатлон енӗпе пӗрлештернӗ командине йыхравланӑ. Халӗ Татьяна — Австрире. Унта Тӗнче кубокӗн черетлӗ тапхӑрӗ иртет.
Иртнӗ эрне пуҫламӑшӗнче Раҫҫейӗн биатлон енӗпе хӗрарӑмсен пӗрлештернӗ командин аслӑ тренерӗ Михаил Шашилов ентешӗмӗре Ҫӗнӗ ҫулччен чӗнсе илмессине пӗлтернӗ. Анчах кайран шухӑша улӑштарнӑ, Акимова шӑматкун Австрие вӗҫсе кайнӑ. Хальлӗхе Татьяна туристсен йӗлтӗр ҫулӗ ҫинче ярӑнать. Урӑх климатлӑ вырӑна хӑнӑхма вӑхӑт кирлӗ. Паян унӑн 13 сехетре анализсем памалла, вӗсен результачӗ ыран паллӑ пулӗ.
2016 ҫулта Чехири тӗнче чемпионачӗ вӑхӑтӗнче спринтра Татьяна Акимова ылтӑн медаль ҫӗнсе илнӗччӗ, 2017 ҫулта тӗнче чемпионатӗнче бронзӑна тивӗҫнӗччӗ, 2018 ҫулта Пхёнчханти Олимпиадӑна хутшӑннӑччӗ.
Биатлона юратакансене ҫак кунсем чӑннипех те савӑнтараҫҫӗ. Пӗрремӗшӗнчен, биатлон енӗпе Раҫҫей Кубокӗн иккӗмӗш тапхӑрӗ пырать; иккӗмӗшӗнчен, Тӗнче кубокӗн черетлӗ тапхӑрӗ.
Пирӗн биатлон ҫӑлтӑрӗ, Татьяна Акимова, ҫӗршывӑн кубокӗнче ҫитӗнӳ хыҫҫӑн ҫитӗнӳпе палӑрать. Чӑваш Енре ҫуралнӑ, Тӗменшӗн ӑмӑртакан Татьяна Акимова спринт ӑмӑртӑвӗнче пӗрремӗш вырӑна тухнӑ.
Тупӑшӑва пӑхнӑ Михаил Вансяцкий журналист Фейсбукра пӗлтернӗ тӑрӑх, ентешӗмӗр кашнинчех тӗл пенӗ, финиша 40 ҫеккунт маларах ҫитнӗ.
Тӗлӗнмелле те, анчах ӑна Тӗнче кубокӗн виҫҫӗмӗш тапхӑрне чӗнмен.
Сӑмах май каласан, Акимовсем хӑйсен пӗчӗк хӗрӗ валли йӗлтӗр туяннӑ. Вӑл ун ҫине тӑрса пӑхнӑ та ӗнтӗ. «Кӗҫех амӑшӗнчен иртсе кайӗ», — ӑшшӑн шӳтлесе пӗлтернӗ Михаил Вансяцкий. Сӑмах май аса илтерер: Татьянӑн мӑшӑрӗ Вячеслав Акимов та биатлонист, вӑл тренер.
Раҫҫейри биатлонистсен танлаштарӑмӗнче халӗ Чӑваш Енре ҫуралса ӳснӗ спортсменка малта пырать. Вӑл – Татьяна Акимова. Аса илтерер: нумаях пулмасть вӑл Чӑваш Ен чысне хӳтӗлеме пӑрахнӑ, Тӗмен облаҫне кайнӑ. Халӗ вӑл ҫав регионшӑн тӑрӑшать. Чӑваш Енрен кайнине Татьяна пирӗн регион ӑна тренировкӑсем ирттерме укҫан пулӑшманнипе ҫыхӑнтарнӑ.
Татьяна Акимовӑн – 159 очко. Унӑн – пӗрремӗш вырӑн. Иккӗмӗш вырӑнта – Екатерина Носкова, виҫҫӗмӗшӗнче – Наталья Гербулова.
Тӗмен облаҫӗн чысне хӳтӗлекен Татьяна Акимова паян каллех черетлӗ медале тивӗҫнӗ.
Аса илтерер: ҫак кунсенче Тӗменте биатлон енӗпе Раҫҫей кубокӗн пӗрремӗш тапхӑрӗ иртет. Хӗрарӑмсем паян масс-стартра тупӑшнӑ. Ентешӗмӗр, ӗнер пасьютра ҫӗнтерӳпе савӑнтарнӑ Татьяна Акимова, паян каллех мала тухнӑ. Биатлонисткӑсем 12,5 километра ӑмӑртнӑ.
Татьяна Акимова ӑмӑртусене ку сезонта Тӗмен облаҫӗшӗн хутшӑнать. Унӑн мӑшӑрӗ Вячеслав каланӑ тӑрӑх, спортсменкӑна кӑҫал Чӑваш Ен пулӑшман.
Чӑваш Енӗн хальхи вӑхӑтри мухтавлӑ спортсменӗсенчен пӗри, Татьяна Акимова биатлонистка, Раҫҫей кубокӗн пӗрремӗш тапхӑрӗнчи пасьютра ҫӗнтернӗ.
Хальхи вӑхӑтра Тӗмен хулинче хӗрарӑмсен биатлонӗн Раҫҫей кубокӗ иртет. Унта Татьяна Акимова та ӑмӑртать.
Аса илтерер: вӑл пысӑк спортран вӑхӑтлӑха кайнӑччӗ, мӗншӗн тесен ентешӗмӗр ача ҫуратрӗ. Сӑмах май каласан, пъедестал ҫине паян вӑл хӗрӗпе тухса сӑн ӳкерӗннӗ. Татьянӑн сылтӑм аллинче – пӗчӗк хӗр пӗрчӗкӗ, сулахаййинче – чечек ҫыххи.
Татьяна Акимова Раҫҫейӗн хӗрарӑмсен пӗрлештернӗ командинче мар-ха. Вӑл унта татах лекессе тем пекех шанас килет.
Сӑмах май каласан, ентешӗмӗр Тӗмен облаҫӗшӗн ӑмӑртать. Ҫавӑншӑн Дмитрий Губерниев спорт комментаторӗ Чӑваш Ен Элтеперне «Матч» телеканалӑн тӳрӗ эфирӗнче ӳпкелесе каланӑ. Ун пек спортсменсене пулӑшмаллах тенӗ вӑл.
Чӑваш Енӗн спортсменки Татьяна Акимова биатлон ӑмӑртӑвӗсенче Тӗмен облаҫӗшӗн тупӑшассине Чӑваш халӑх сайчӗ пӗлтернӗччӗ. «Сезона хатӗрленнӗ чухне пире регион пулӑшасса шаннӑччӗ. Анчах хамӑр шутран хатӗрленме тиврӗ. Чӑваш Енре пирӗн пӗр услови те пулман. Республика ку сезонра пӗр тенкӗ те уйӑрман. Сборсем, экпировка, патронсем, оборудовани – йӑлтах хамӑр шутран пулчӗ», – тенӗччӗ биатлонисткӑн мӑшӑрӗ Вячеслав Акимов.
Чӑваш Енӗн влаҫ органӗсен порталӗнче паян республикӑн Спорт министерстви Татьяна Акимова пирки ӑнлантарса ҫырнине пичетленӗ. Унта споросменкӑна 2016-2019 ҫулсенче мӗншӗн тата мӗн чухлӗ укҫа панине пӗлтернӗ. Пурӗ 880 пин тенкӗ тенкӗ ытларах тӳленӗ-мӗн. Ҫав шутра Олимп ӑмӑртӑвне хутшӑннӑшӑн панине те кӗртнӗ.
Татьяна Акимова 2018 ҫултанпа ӑмӑртусене хутшӑнманран тата Раҫҫейрен пӗрлештернӗ командине кӗменрен ӑна кӑҫал стипенди пама май ҫук иккен. Аса илтерер: биатлонистка ача амӑшӗ пулса тӑчӗ, ҫав вӑхӑтра вӑл ӑмӑртусене хутшӑнаймарӗ.
Малашне Татьяна Акимова биатлонистка Чӑваш Ен чысне хӳтӗлемӗ. Вӑл урӑх регионшӑн тупӑшӗ. Татьяна Чӑваш Енӗн пӗрлештернӗ командинчен тухса кайнӑ.
Татьяна Акимова Тюмень облаҫӗн пӗрлештернӗ командине кӗнӗ. Унӑн мӑшӑрӗ Вячеслав Акимов акӑ мӗн каланӑ: «Сезона хатӗрленнӗ чухне пире регион пулӑшасса шаннӑччӗ. Анчах, ахӑртнех, финанс тӗлӗшӗнчен пулаймарӗ пулмалла. Хатӗрленӳ хамӑр шутран тухрӗ. Чӑваш Енре пирӗн нимӗнле услови те пулман. Республика ку сезонра пӗр тенкӗ те уйӑрман. Сборсем, экпировка, патронсем, оборудовани – йӑлтах пирӗн хулпуҫҫи ҫине выртрӗ».
Вячеслав Акимов ку йышӑну ӑнсӑртран пулманнине, кун пирки тахҫанах шутланине, пысӑк регионсем спортсменсене лайӑх пулӑшнине пӗлтернӗ. Ку шухӑша тренерӗ те, Вячеславӑн ашшӗ, Анатолий Акимов ырланӑ. Ывӑлӗ уншӑн кӑна республика чысне нумай ҫул хӳтӗленӗ-мӗн.
Раҫҫейӗн хӗрарӑмсен биатлонӗн шанчӑкӗ, Лапсар хӗрӗ Татьяна Акимова пысӑк спорта таврӑннӑ. Ку хыпара Михаил Вансяцкий журналист Фейсбукра пӗлтернӗ.
Ентешӗмӗр Тӗмен хулинче иртекен ҫуллахи биатлон ӑмӑртӑвне хутшӑнать. Раҫҫей шайӗнчи ӑмӑртӑва пирӗн республикӑран Татьяна Акимова ҫеҫ хутшӑнать. Кун пирки ҫак йӗркесен авторне республикӑн Спорт министерствин пресс-службинче ҫирӗплетрӗҫ.
Татьяна Акимова пӗлтӗрхи ҫурла уйӑхӗнче амӑшӗ пулса тӑчӗ. Ҫавна май пӗр вӑхӑтра спортран кайнӑччӗ.
https://www.facebook.com/permalink.php?story_fbid=3998638776829634&id=100000506539988
+1.3 °C