simplereceptik.ru сайтри сӑн

Шупашкарта ӗҫленӗ вӑхӑтра арҫын суранланнӑ. Вӑл вӑйлах аманнӑ, ӑна пульницӑна илсе кайнӑ.

Паян, юпа уйӑхӗн 7-мӗшӗнче, 12 сехетре Юханшывҫӑсене лапамӗнчи 5-мӗш ҫуртра юсавпа строительство ӗҫӗсем пынӑ вӑхӑтра 51 ҫулти арҫын ҫине стена йӑтӑнса аннӑ.

Халӑх корреспонденчӗ «Про Город» хаҫата пӗлтернӗ тӑрӑх, арҫын ҫине стенан пӗр пайӗ ӳкнӗ. Вырӑна васкавлӑ медпулӑшу машини килнӗ, пациента пӗрремӗш пулӑшу парса пульницӑна илсе кайнӑ. Арҫын комӑра та пулнӑ.

(«Чӗрӗ чӑваш. Чӗрӗ мар чӑваш» кӗнекерен)

2019 ҫулхи чӳк уйӑхӗн 20-мӗшӗнче Горький ячӗпе хисепленекен МХАТ-ра А.Г. Дугин «Метафизика Синей Птицы» лекци вулать (14 лекцирен тӑракан «Онтология и антропология театра» ярӑмран). Ӑна 1905 ҫулта ҫырнӑ бельги ҫыравҫын тата философӗн Морис Метерлинкӑн «Сенкер Кайӑк» пьесине халалланӑ. «Пьесӑсен пьеси. Кайнисен тӗнчи пирки, ӗмӗр чӗрӗ архетипсен тӗнчи пирки, хӑватсен чӗмӗсем вӑранни пирки каланӑ тарӑнран тарӑн, философилле, неоплатоникла халай/сӑмах» («Пьеса пьес. Глубинное, философское, неоплатоническое послание о мире мертвых, о мире вечных архетипов, о пробуждении духов стихий». – Дугин А.Г. Формирование нашего сознания через русский театр. Студия «Аврора», 2020 г.).

«Вилнисем ҫук, вилӗм те ҫук», — тесе ӗненнӗ Метерлинк.

А.Г. Дугин лекцийӗнчен:

«Тильтильпе Митиль вилнисен тӗнчине ҫитеҫҫӗ. Ку вӑл шаман тӗнчен тӗрлӗ сийӗсене ҫул ҫӳренин классикӑлла пуҫламӑшӗ. Малтан ачасем аслашшӗпе асламӑшӗ пурӑнакан ҫӗре лекеҫҫӗ. Кунтах ҫут тӗнчерен уйрӑлнӑ пиччӗшӗ-шӑллӗсем, аппӑшӗ-йӑмӑкӗсем.

Малалла...

"Лиза Алерт" архивӗнчи сӑн

Хӗрлӗ Чутай районӗнчи Штанаш ялӗнче пурӑнакан Римма Волкова юпа уйӑхӗн 2-мӗшӗнче килӗнчен тухса таҫта кайнӑ. Ҫакна никам та пӗлмест, ӑна шыраҫҫӗ.

Хӗрарӑма «Лиза Алерт» ҫӑлавпа шырав отрячӗн хастарӗсем те шыраҫҫӗ. 51 ҫулти Римма Волкова 150 сантиметр ҫӳллӗш, вӑтам пӳ-силлӗ. Ҫӳҫӗ ҫырӑ, куҫӗ сӑрӑрах тӗслӗ.

Римма Валерьевнӑна кам та пулин курнӑ тӑк ҫак номерсемпе шӑнкӑравлама ыйтаҫҫӗ: 8 800 700 54 52 е 112.

Шупашкар администрацийӗнче пӗлтернӗ тӑрӑх, юпа уйӑхӗн 16-мӗшӗнчен хулари 7-мӗш тата 22-мӗш номерлӗ автобуссене пӗрлештерӗҫ.

7-мӗш маршрута «4-мӗш лицей» чарӑну патне ҫити тӑсма палӑртнӑ, 22-мӗшне — пӑрахӑҫлама. Пӗрлештернӗ маршрутпа 18 автобус хутлӗ. Хальхи вӑхӑтра шӑп та лӑп ҫавӑн чухлӗ единица техника асӑннӑ икӗ маршрутпа ҫӳрет. Кирлех пулсан транспорт шутне ӳстерме шантараҫҫӗ.

Ҫӗнӗ йышӑну ҫынсене Введени соборӗ тата хулари П.Н. Осипов ячӗллӗ пӗрремӗш больница патне ҫитме май парӗ тата Алькеш поселокне хулан кӑнтӑр-хӗвеланӑҫ тата ҫурҫӗр-хӗвеланӑҫ районӗсемпе ҫыхӑнтарӗ.

Ранее «Правда ПФО» писала о трудностях с проведением в Чувашии конкурсов на перевозки по маршруту «Чебоксары-Новочебоксарск».

Ҫӗнӗ Шупашкарта уйрӑм ҫыннӑн хурал организацийӗсенчен пӗринче ӗҫлекен 65 ҫулти арҫын палламан ҫынсемпе эрех ӗҫнӗ. Унтан вӑл банк картти ҫӗтнине асӑрханӑ.

Хуралҫӑн банк картти ҫине кӑштахран тӗрлӗ суту-илӳ точкинче тавар туяннине пӗлтерекен ҫырусем килме пуҫланӑ. Карттӑ ҫинчен пӗтӗмпе 9 пине яхӑн укҫа катӑлнӑ.

Карттӑпа тавар туяннине пӗлтерекен черетлӗ ҫыру ҫитнӗ вӑхӑтра ватӑ ҫын йӗрке хуралҫисем патӗнче пулнӑ ӗнтӗ. Винокуров урамӗнчи супермаркет патне йӗрке хуралҫисем васкавлӑн тухса кайнӑ. Вӗсем 46 ҫулти арҫынна тытса чарнӑ. Судпа унччен темиҫе хутчен те айӑпланнӑскер тӗлӗшпе пуҫиле ӗҫ пуҫарнӑ.

Владимир Ярайкин. krchet.cap.ru сӑнӳкерчӗкӗ

Паян, юпа уйӑхӗн 7-мӗшӗнче, Хӗрлӗ Чутай районӗнче VII созыври Депутатсен пухӑвӗ черетлӗ 13-мӗш ларӑва пухӑннӑ. Унта республика шайӗнчи тӳре-шара та хутшӑннӑ.

Пухӑва Чӑваш Енӗн ял хуҫалӑх министрӗн ҫумӗ Инна Волкова, Чӑваш Ен Элтеперӗн Администрацийӗн Шалти политика управленийӗн консультанчӗ Юрий Ямсков пырса ҫитнӗ. Ҫакӑ ахальтен мар. Депутатсем пӑхса тухнӑ ыйтусенчен пӗри район пуҫлӑхне — Депутатсен пухӑвӗн пуҫлӑхне суйласси пулнӑ. Ку должноҫе Владимир Ярайкина шанса панӑ.

Владимир Ярайкин 2020 ҫулхи авӑн уйӑхӗнче районти Депутатсен пухӑвӗн депутатне суйланнӑ, «Фармаци» унитарлӑ предприятин гендиректорӗн заместителӗ.

Районта ҫӗнӗ пуҫлӑха суйлани унчченхи пуҫлӑх, Владимир Мурайкин, Чӑваш Республикин Патшалӑх Канашӗн депутачӗн мандатне тивӗҫнипе ҫыхӑннӑ.

Чӑваш Енӗн промышленность тата энергетика министрӗ пулнӑ Юрий Волошин паян 80 ҫул тултарнӑ.

Юрий Петрович Харьков хулинче ҫуралнӑ, унтах вӑл ӗҫ биографине пуҫӑннӑ. 1983 ҫулта вӑл Шупашкара куҫса килсе Промышленность тракторӗсен заводӗнче ӗҫлеме тытӑннӑ. 1998 ҫулта ӑна Ҫӗмӗрлери ятарлӑ автомобильсен заводне ертсе пыма шаннӑ. Каярах вӑл Чӑваш Енӗн Правительствинче ӗҫленӗ. Унта Министрсен Кабинечӗн Председателӗн ҫумӗ — промышленность тата энергетика министрӗ пулнӑ.

Ӗҫтешӗсем хакланӑ тӑрӑх, Юрий Волошин — принципа пӑхӑнакан, ҫирӗп ыйтакан, тӗрӗслӗхшӗн ҫунакан тата хӑйӗн ӗҫне парӑннӑ ҫын.

Чӑваш Енре хӑш-пӗр учреждение юпа уйӑхӗн 11-мӗшӗнчен QR-кодпа кӗртме тытӑнассине Чӑваш халӑх сайчӗ унччен темиҫе хутчен те пӗлтернӗччӗ-ха. Халӗ пирӗн республикӑра асӑннӑ кода тӗрӗслеме май паракан ресурса хатӗрлесе ҫитернӗ.

Ҫынсене ҫӗнӗ йӗркепе йышӑнма тивӗҫ организацисен qr.cap.ru сайта кӗрсе регистрациленмелле. Унта ятарлӑ мобильлӗ приложение уҫласа илмелли каҫӑ пур тата епле ӗҫлемеллине вӗрентнӗ.

Ҫӗнӗлӗхпе ҫыхӑннӑ мӗнпур ыйтӑва 122 телефон номерӗпе йышӑнаҫҫӗ. Техника енчен пулӑшакансем патне 8 сехетрен пуҫласа 20 сехетчен шӑнкӑравлама май пур.

Кӑшӑлвирусран иммунитет пуррине тӗрӗслесе кӗртме тивӗҫ организацисем шутне ҫаксем кӗреҫҫӗ:

— кинотеатрсем (кинозалсем), театрсем, театрпа концерт учрежденийӗсем, культурӑпа кану учрежденийӗсем, ҫавӑн йышши ытти организаци;

— СПА-салонсем, массаж салонӗсем, солярисем;

— мунчасем, саунӑсем, ҫавӑн йышши пулӑшу кӳрекен ытти объект;

— шыва кӗмелли бассейнсем, фитнес-центрсем, физкультурӑпа спортӑн ытти объекчӗ;

— ресторансем, кафесем, столовӑйсем, буфетсем, барсем, хупахсемпе общество апатланӑвӗн ытти предприятийӗ.

Малалла...

@cson_cheb сӑнӳкерчӗкӗ

Шупашкарти халӑха социаллӑ пулӑшу кӳрекен комплекслӑ центр ӗҫченӗсем професси шайне ӳстерес тӗллевпе Тӗмене вӗренме тухса кайнӑ. Унта вӗсем пӗлӗве «Ҫемье диспетчерскийӗ» социаллӑ службӑна йӗркелес ыйтупа анлӑлатнӑ.

Унти пули-пулми лекеймӗн. Маларах центр «Ҫемье контакт-центрӗ» проектпа Йывӑр лару-тӑрури ачасене пулӑшакан фондӑн грант конкурсӗнче ҫӗнтернӗ. Асӑннӑ проект учрежденире пӗлтӗрхи ака уйӑхӗн 1-мӗшӗнчен тытӑнса пурнӑҫа кӗме тытӑннӑ, вӑл енӗпе центрта 2022 ҫулхи авӑн уйӑхӗн 30-мӗшӗччен тимлӗҫ.

Маларах асӑннӑ фонд конкурсра ҫӗнтернисем валли вӗренӳ йӗркеленӗ. Тӗменри «Ҫемье» социаллӑ реабилитаци центрӗ (вӑл ҫул ҫитменнисемпе ӗҫлет) фондӑн стажировка лапамӗ шутланать.

i3vestno.ru сайтри сӑн

Чӑваш Енри шкулсенче те кӑшӑлвируспа чирлеҫҫӗ. Роспотребнадзор пӗлтернӗ тӑрӑх, ачасен хушшинче чирлесси 1,6 хут ӳснӗ.

Юпа уйӑхӗн 4-мӗшӗ тӗлне 7 ача пахчинче, 12 шкулта тата 1 техникумра кӑшӑлвируспа чирленине палӑртнӑ. Вӗсенче дезинфекци тунӑ. Чирлисемпе хутшӑннӑ ҫынсене те сӑнаса тӑраҫҫӗ.

12 шкулта тата професси пӗлӗвӗ паракан организацири икӗ ушкӑнра дистанци мелӗпе вӗрентеҫҫӗ.