cap.ru сӑнӳкерчӗкӗ

Чӑваш Енӗн Цифра аталанӑвӗн, информаци политикин тата массӑллӑ коммуникацисен министерстви ачасемпе ҫамрӑксем валли ҫырнӑ алҫырусен конкурсне ирттессине пӗлтернӗ.

Унта уйрӑм авторсем те, авторсен ушкӑнӗсем те хутшӑнма пултараҫҫӗ.

Конкурса ӗҫсене ҫак номинацисемпе йышӑнӗҫ: шкул ҫулне ҫитмен тата кӗҫӗн шкул ҫулӗсенчи ачасем валли ҫырнӑ хайлавсем (конкурс ҫӗнтерӳҫине 50 пин тенкӗ тивӗҫӗ), вӑтам шкул ҫулӗнчи ачасем валли ҫырнӑ хайлав (75 пин тенкӗ премипе хавхалантарӗҫ), аслӑ ҫулсенчи шкул ачисем валли ҫырнӑ хайлав (ҫӗнтерӳҫӗне 75 пин тенкӗ лекӗ).

Конкурс материалӗсене маларах асӑннӑ ведомствӑна ҫу уйӑхӗн 15-30-мӗшӗсенче ҫитерсе памалла.

i.ytimg.com сайтри сӑн

Ака уйӑхӗн 10-мӗшӗнче каччӑ Атӑл ҫине, Шупашкарти Волжский-3 микрорайон ҫывӑхне, пулӑ тытма кайнӑ. Ларсан-ларсан хайхискер пӑр ҫурӑлнӑ сасӑ илтнӗ. Каччӑ ҫыран хӗррине утса тухма шикленнӗ, ҫавӑнпа ҫӑлавпа шырав службине шӑнкӑравланӑ.

Ҫалавҫӑсем ун патне аэрокимӗпе ҫула тухнӑ. Ун патне кайнӑ чухне вӗсем те пӑр ҫурӑлкаланине туйнӑ. Ҫӑлавҫӑсем каччӑна ҫыран хӗррине илсе тухнӑ.

Аса илтерер: нумаях пулмасть Шупашкар районӗнчи Ертукассинче арҫын пулла кайсан путса вилнӗ.

"Про Город" сайтӗнчи сӑн

Канаш районӗнчи Кивӗ Ахпӳрт ялӗ ҫывӑхӗнчи пӗвере пулӑсем, карассем, вилнӗ, вӗсем шыв ҫине тухса выртнӑ. Сӑмах май, халӑхра ҫак пӗвене Хура тинӗс теҫҫӗ. Унта пурӑнакансем пӗлтернӗ тӑрӑх, пулӑран хими шӑрши кӗрет. Малтанлӑха пӗлтернӗ тӑрӑх, карассем юхса тухакан шыва пула вилнӗ.

"Про Город" хаҫата халӑх корреспонденчӗ пӗлтернӗ тӑрӑх, кунашкалли пӗрремӗш хут пулман, виҫҫӗмӗш ҫул ӗнтӗ пӗвере пулӑсем вилеҫҫӗ. Унччен унти карассем ҫиме юрӑхлӑ пулнӑ. Халӗ вара палӑран хими тути калать-мӗн.

cheb.media сайтри сӑн

Паян каҫхи 6 сехетре Шупашкарти "Ярмӑрккӑ" суту-илӳ комплексӗнче пушар пулнӑ. Вырӑна пушарнӑйсем часах ҫитнӗ. Ҫулӑма 10-а яхӑн техника сӳнтернӗ. Ҫавӑнтах пушара сӳнтерес енӗпе ӗҫлекен оперштаб йӗркеленӗ.

Инкеклӗ лару-тӑру министерстви пӗлтернӗ тарӑх, ҫулӑм парковка енчи 8-9-мӗш ретсенче тухнӑ. Ӑна часах сӳнтернӗ. Малтанлӑха пӗлтернӗ тӑрӑх, ҫулӑм темиҫе контейнера сиенлетнӗ. Хальлӗхе пушар мӗнрен тухнине пӗлтермен.

Ӗнер каҫхине Мускавран вӗҫекен самолет Шупашкарта анса ларайман, ҫавна май унӑн Чӗмпӗре кайма тивнӗ. Мӗн пулнӑ-ха?

«Победа» авикомпани самолечӗ аэропорта тӗтреллӗ ҫанталӑка пула анса ларайман. Чӗмпӗре вӑл 23 сехет хыҫҫӑн ҫитнӗ, пассажирсене ҫур сехетрен ҫеҫ кӑларнӑ. Унтан автобус Шупашкара ирхи 5 сехетре ҫеҫ кайнине пӗлтернӗ.

Анчах чылайӑшӗн ӗҫе каймалла-ҫке-ха. Ҫавӑнпа такси чӗнме, куншӑн 6 пин тенкӗ тӳлеме тивнӗ.

Метеостанци пӗлтернӗ тӑрӑх, Шупашкарта каҫхи 8 сехет ҫурӑран пуҫласа ирхи 5-чен тӗтре тӑнӑ, 100 метр аякри ҫеҫ курӑннӑ.

Патшалӑхӑн ҫул-йӗр инспекцийӗн сӑнӳкерчӗкӗ

Шупашкар хулинче пӗр хӗрарӑм-водитель машинӑна хыҫалалла чакарма хӑтланса ватӑ хӗрарӑма таптанӑ. Ҫавӑн пек инкексенче кӑҫалхи 3 уйӑхра пирӗн республикӑра 14 ҫынна амантнӑ.

Республикӑн клиника больници умӗнчи инкек ака уйӑхӗн 10-мӗшӗнче кӑнтӑрла пулса иртнӗ. 28 ҫулти хӗрарӑм-водитель больница умӗнчи парковкӑра «Opel Corsa» автомбильпе каялла чакса пынӑ чухне 58 ҫулти хӗрарӑм ҫине пырса кӗнӗ. Инкеке лекнине тухтӑрсем тӗрӗсленӗ хыҫҫӑн хӗрарӑм килне кайнӑ.

Водитель урах пулнӑ, анчах ҫын сывлӑхне сиен кӳнӗшӗн ун тӗлӗшпе административлӑ ӗҫ пуҫарнӑ.

Александр Блинов полиглот, «Хавал» пуҫару ушкӑнӗн хастарӗ эсперанто чӗлхин курсӗ пуҫланассине пӗлтернӗ. Курс интерактивлӑ 10 занятирен тӑрӗ. Занятие «ЗУМ» палтформӑра ирттерме палӑртнӑ.

Чӗлхе практики валли тӗрлӗ ҫӗршыври хӑнасене чӗнме шантарнӑ. Вӗсем — чӗлхе ыйтӑвӗпе ӗҫлекен специалистсем.

Эсперанто – пӗтӗм тӗнчери чӗлхе. Ӑна тӑван чӗлхе хыҫҫӑнхи иккӗмӗш чӗлхе тесе шухӑшласа кӑларнӑ. Эсперанто — нейтараллӑ чӗлхе. Лексика интернационаллӑ пулнине кура вӑл чӗлхене вӗренме ҫӑмӑл тесе ӗнентереҫҫӗ.

Пӗрремӗш лекци ыран, ака уйӑхӗн 12-мӗшӗнче, 20 сехет те 30 минутра пуҫланӗ.

Вести курс будет Александр Блинов, полиглот, активист чувашской инициативной группы "Хавал"

Ссылку на zoom направим на указанные при регистрации контакты

Ссылка для регистрации: https://forms.gle/TEJUi4pj2AXLJuf37

Ака уйӑхӗн 8-мӗшӗнче "Раҫҫейри чи лайӑх таксист" Пӗтӗм Раҫҫейри конкурсӑн регионти тапхӑрӗ иртнӗ. Кӑҫал унта 12 таксист хутшӑннӑ.

Конкурс икӗ пайран тӑнӑ. Теори пайӗнче водительсем ҫул-йӗр правилисемпе, хулари паллӑ вырӑнсемпе ҫыхӑннӑ ыйтусене хуравланӑ, аманнисене пӗрремӗш медпулӑшу панӑ. Практика пайӗнче таксистсем машинӑпа ҫӳрес ӑсталӑха кӑтартнӑ.

Пӗрремӗш вырӑна "Движок" таксопарк водителӗ Артур Михайлов йышӑннӑ. Вӑл регион шайӗнчи конкурсра пӗрре мар мала тухнӑ, 2019 ҫулта вара Раҫҫей шайӗнчинче кӗмӗл призер пулнӑ. Иккӗмӗш вырӑна Евгений Мурзин тухнӑ, виҫҫӗмӗшне - Дмитрий Осипов. Мала тухнисене 15, 10 тата 5 пин тенкӗ преми панӑ.

Кӑҫал конкурс финалӗ Чечняра ҫу уйӑхӗн 16-18-мӗшӗсенче иртӗ.

Чӑваш Енри патшалӑх тата хысна учрежденийӗсем пӗрле офис хутне туянма аукцион ирттернӗ. Пӗтӗмпе - 43 учреждени. Вӗсем 43 пине яхӑн пачка хут туянасшӑн пулнӑ. Анчах палӑртнӑ хакпа, 14,1 миллион тенкӗпе, хут сутакан тупӑнман. Аукциона хутшӑнма пӗр заявка та пулман.

Ҫӗнӗ Шупашкар хула администрацине 1600 пачка хут кирлӗ, Мускав полпредствине - 120 пачка, Республика клиника пульницине - 7800 пачка. Аукционра хут туянма палӑртнӑ учрежденисен йышӗнче Муркаш, Улатӑр, Элӗк район администрацийӗсем те пур.

culture.cap.ru сӑнӳкерчӗкӗ

Ака уйӑхӗн 9-мӗшӗнче Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче «Аркадий Айдак: романтик, пассионарий, созидатель» кӗнекене хӑтланӑ. Кӑларӑма Аркадий Айдак тӗрлӗ ҫӗрте тухса калаҫнисене, вӑл дневниксенче ҫырса пынисене пухса пичетленӗ. Хӑтлава Етӗрне ентешлӗхӗ йӗркеленӗ.

Мероприятие хутшӑнакансене республикӑн культура министрӗ Светлана Каликова саламланӑ: «Етӗрне районӗнче пирӗн республикӑна Раҫҫейӗпе мухтава кӑларнӑ ҫынсем ҫуралнӑ. Эпир Николай Мордвиновпа, Николай Ашмаринпа, Тани Юнпа мухтанатӑр. Тата, паллах, Аркадий Айдакпа».

Кӗнекене кӑларма Николай Малов (вӑл Патшалӑх Думин депутачӗ пулнӑччӗ) пулӑшнӑ иккен. Кӗнеке авторӗ — Алексей Леонтьев.