cap.ru сӑнӳкерчӗкӗ

Ҫӗрпӳсем Чӑваш Ен халӑхне тата республика хӑнисене Тихвин ярмӑрккине чӗнеҫҫӗ. Вӑл утӑ уйӑхӗн 6-мӗшӗнче хӗрарӑмсен Тихвин мӑнастирӗ ҫывӑхӗнче пуҫланать.

Ӑна 17 сехетре савӑнӑҫлӑ лару-тӑрура уҫӗҫ. Ярмӑрккӑра ача-пӑча Акатуйӗ, юрӑ фестивалӗ, фейерверк, ташӑ каҫӗ пулӗҫ. Ҫавӑн пекех Хусанти JUST BRASS ушкӑн тата "Звонница" ансамбль юрӑ-ташӑпа савӑнтарӗҫ.

Тихвин ярмӑркки утӑ уйӑхӗн 9-мӗшӗччен пулӗ.

"Песни от всей души" кӑларӑмӑн видео скринӗ

Чӑваш халӑх артистки Елена Иовлева паян тин кӑна "Россия 1" телеканалпа эфира тухнӑ "Песни от всей души" кӑларӑмра пулнӑ. Ӑна Андрей Малахов ертсе пырать.

Вӑл "Финн полькине" чӑвашла куҫарнӑ, ӑна эфирта куракансен умӗнче юрланӑ. Ҫавӑн пекех Елена Иовлева ташласа та кӑтартнӑ. Вӑл куракансене хӑйӗн пурнӑҫӗпе кӗскен паллаштарнӑ.

Газ пӑрӑхӗ. Google Map-ри скриншот

Ҫӗрпӳ районӗн прокуратури тӗрӗслев ирттернӗ те Ҫӗрпӳ муниципаллӑ округра хуҫасӑр газ пӑрӑхне асӑрханӑ. Ку тӗлӗшпе ҫитменлӗхе пӗтерме сӗнӳ янӑ.

Хуҫӑсӑр газ пӑрӑхӗ Тавӑшкассинче вырнаҫнӑ иккен. Ӑна 2014 ҫулта ҫӗр ӑшне чавса хурса вырнаҫтарнӑ. Унтанпа тӑхӑр ҫул иртнӗ пулин те ҫак газ пӑрӑхне ниҫта та учета тӑратман, куҫман пурлӑха регистрацилемен. Ҫак сӑлтава пула «Газпром газораспределение Чебоксары» акционерлӑ обществӑн Ҫӗрпӳ хулинчи филиалӗ ӑна тӗрӗслес е юсас тӗлӗшпе нимӗн те тӑваймасть. Кӗтмен ҫӗртен инкек сиксе тухрӗ пулсан ҫакӑ хӑрушлӑх кӑларса тӑратма пултарать.

Прокуратура муниципаллӑ округӑн администрацине ку ҫитменлӗхе пӗтерме сӗннӗ. Ҫӗрпӳри тӳре-шара халь ҫак сӗнӳпе ӗҫлеме тытӑннӑ.

Ҫӗнтерӳҫӗсем. Етӗрне тӑрӑхӗ тунӑ сӑн

Кӗҫнерникун, ҫӗртмен 29-мӗшӗнче, Етӗрне хулинчи пуҫламӑш пӗтӗмӗшле пӗлӳ паракан шкулта шахмат енӗпе ӑмӑрту иртнӗ, унта Етӗрне округӗнчисем хӑйсен ӑсне кӑтартса тупӑшнӑ.

Шахмат енӗпе муниципаллӑ округсенче ӑмӑртусем час-часах иртеҫҫӗ. Ку хутӗнче ҫак спорт тӗсӗпе Етӗрне тӑрӑхӗнче тупӑшнӑ.

Етӗрне муниципаллӑ округӗн сайчӗ хыпарланӑ тӑрӑх, арҫынсем хушшинче яланхи пекех Вячеслав Петров пӗрремӗш вырӑна йышӑннӑ. Иккӗмӗш Геннадий Иванов пулнӑ, виҫҫӗмӗш — Александр Альгешкин. Хӗрарӑмсем хушшинче малти вырӑна Диана Пушкарева йышӑннӑ, Иккӗмӗш Анастасия Игнатьева пулнӑ, виҫҫӗмӗш вырӑн вара Юлия Еремкинӑна лекнӗ. Ачасем те ӑмӑртӑва хутшӑннӑ. Арҫын ачасене илсен Савелий Антонова ҫитекенни пулман, хӗрачасене илсен — Валерия Ярабаевӑна.

Ҫӗнтерӳҫӗсене хисеп хучӗсем панӑ, ҫавӑн пекех ятарлӑ кӳлепесемпе те чысланӑ.

Инкелӗ лару-тӑру министерстви тунӑ сӑн

Ҫӗртме уйӑхӗн 29-мӗшӗнче Вӑрнар районӗнчи Хорнсор ялӗнче пурӑнакан 58 ҫулти арҫын ирхине пулла кайнӑ. Анчах каялла таврӑнма пӳрмен ӑна - вӑл путса вилнӗ.

Арҫын вилли шыв ҫине тухнине ывӑлӗ асӑрханӑ. Инкеклӗ лару-тӑру министерстви малтанлӑха пӗлтернӗ тӑрӑх, вӑл пулла кайсан шыв хӗрринче хӑрушсӑрлӑх йӗркине пӑхӑнман.

Инкеклӗ лару-тӑру министерстви ҫынсене шыв хӗрринче асӑрхануллӑ пулма ыйтать.

ufa1.ru сайтри сӑн

Вӑрнар районӗнче 42 ҫулти арҫынна полицейскисем те, "Лиза Алерт" хастарӗсем те шыранӑ. Ӑна тупнӑ. Шел те, виллине.

Ҫак арҫын килтен ҫӗртме уйӑхӗн 16-мӗшӗнче тухса кайнӑ. Унӑн виллине кӗтӳҫсем Ҫӗрпел ялӗ ҫывӑхӗнчи аэродромра тупнӑ. Вӑл ҫак ялтах пурӑннӑ.

Следстви комитечӗ пӗлтернӗ тӑрӑх, арҫын мӗншӗн вилнине судпа медицина экспертизи палӑртӗ.

Иркутск облаҫӗнчи чӑвашсен «Юлташ» наципе культура автономийӗн хастарӗсем вырӑнти ачасене чушкӑлла выляма вӗрентеҫҫӗ.

Общество организацийӗн ертӳҫи Вероника Тимофеева ӗнентернӗ тӑрӑх, Иркутскра пурӑнакан шӑпӑрлана чӑвашсен вӑййи питӗ килӗшнӗ.

Телеграмри «Пуринчен малтан. Ҫывӑрса юлмасан» каналтан пӗлтернӗ тӑрӑх, вырӑнти хастарсем ку вӑййа ачасем хушшинче сарасшӑн. Ҫывӑх вӑхӑтра ку вӑййа тепӗр урамра выляттарма палӑртса хунӑ.

t.me/nikamran каналтан илнӗ сӑнӳкерчӗк

Чӑваш Енре икӗ хутлӑ ҫурт тӑвакан нумайланнӑ тесе пӗлтерет Телеграмри «Пуринчен малтан. Ҫывӑрса юлмасан» каналта.

Кӑҫалхи ҫур ҫулта пирӗн республикӑра пурӑнакансем икӗ хутлӑ 763 ҫурта регистрациленӗ.

315 ҫемье пӗр хутлӑ ҫурт лартнӑ. 54 ҫын вара виҫӗ хутлӑ ҫурт ҫӗклеме вӑй ҫитернӗ.

astanatv.kz сӑнӳкерчӗкӗ

Чӑваш Ен прокурорӗ Андрей Фомин шывра ишнӗ чухне вилнӗ. Вӑл Атӑл урлӑ ишсе каҫакансен мероприятине ҫулсерен хутшӑннӑ. Кӑҫал та вӑл 2200 метра ишес тенӗ.

Прокурор ҫыран хӗрне 150 метр ишсе ҫитеймен. Арҫынна ҫӑлавҫӑсем ҫыран хӗрне илсе тухнӑ вӑхӑта вӑл тӑнне ҫухатма ӗлкӗрнӗ. Унӑн пурнӑҫне ҫӑлса хӑварассишӗн тухтӑрсем нумай тӑрӑшнӑ. Анчах пулӑшма май килмен. Унӑн чӗри тапма чарӑннӑ.

Чӑваш Ен прокурорӗ сарӑмсӑр вилсе кайнӑшӑн Раҫҫей генпрокурорӗ Игорь Краснов хурланнине пӗлтернӗ.

Андрей Фомин 1965 ҫулта Владимир облаҫӗнче ҫуралнӑ. Чӑваш Ен прокуратурине ертсе пыма ӑна 2020 ҫулхи ҫӗртме уйӑхӗнче шаннӑ.

foto-ram.ru сӑнӳкерчӗкӗ

Чӑваш Енре халӑх учителӗсем пулӗҫ.

Республикӑри чӑваш чӗлхипе литератури учителӗсен ассоциацийӗ сӗннипе кӑҫал пирӗн тӑрӑхра «Чӑваш Республикин халӑх учителӗ» хисеплӗ ят пама тытӑнассине эпир пӗлтӗр пӗлтернӗччӗ. Ҫав йышӑнӑва Раҫҫейре кӑҫал иртекен Вӗрентекен тата вӗрентӳҫӗ ҫулталӑкӗпе ҫыхӑнтарнӑ.

Тава тивӗҫлӗ ята учитель тата преподаватель пулса 25 ҫултан кая мар ӗҫленисене парӗҫ. Хисеплӗ ят парасси ҫинчен калакан хушӑва Учитель кунӗ умӗн ҫулсерен алӑ пусма палӑртса хунӑ.