ilinsk.ru сайтри сӑн

Улатӑрти 64 ҫулти хӗрарӑм пухнӑ 2 миллион та 950 пин тенкине кӑна мар, кредит илнӗ 200 пин тенке те ултавҫа куҫарса панӑ.

Ун патне палламан хӗр шӑнкӑравланӑ. Вӑл Тӗп банк ӗҫченӗ имӗш. Хайхискер хӗрарӑма такам унӑн харпӑр кабинетне кӗнине, счет ҫинчи укҫа ҫухалма пултарассине каланӑ. Ӑна упраса хӑварас тесен урӑх счет ҫине куҫармалла-мӗн.

Хӗрарӑм банка кайса хӑйӗн укҫине, 2 млн та 950 пин тенке, илнӗ. Кунсӑр пуҫне хваттер юсама кирлӗ тесе банкран 200 пин тенкӗ илнӗ. Ҫапла вӑл ултавҫа 3 млн тенкӗ ытла куҫарса панӑ.

vse42.ru сайтри сӑн

Паян ирхине Ҫӗнӗ Шупашкарта пӗчӗк ача чӳречерен тухса ӳкнӗ. Ку пысӑк инкек Селикат урамӗнчи 22-мӗш ҫуртра пулнӑ.

Ачана иртен-ҫӳрен асӑрханӑ та тӳрех васкавлӑ медпулӑшу чӗннӗ. Пӗчӗкскер ун чухне чӗрех пулнӑ. Шел те, васкавлӑ медпулӑшу ҫитиччен вӑл вилнӗ.

Аса илтерер: ҫӗртме уйӑхӗнче Шупашкарти Хусанкай урамӗнче 1 ҫулти ача 9-мӗш хутран ӳксе вилнӗ.

"Чӑваш Ен" ПТРК тунӑ видео скринӗ

Ҫанталӑк типӗ тӑнипе хальлӗхе Канаш,Вӑрмар, Тӑвай, Куславкка районӗсенче инкеклӗ лару-тӑру режимӗ. ЧР Ял хуҫалӑх министерстви лару-тӑрӑва сӑнаса тӑрать. Малашне те типӗ ҫанталӑк пулсан пур районта та ҫак режима йышӑнма хатӗр. Ҫапла ял хуҫалӑхӗсем патшалӑх пулӑшӑвӗпе усӑ курса тӑкака саплаштарма пултараҫҫӗ.

Сӑмах май, Удмурт Республикинче, Тутарстанра тата Пермь крайӗнче - инкеклӗ лару-тӑру режимӗ.

Палӑртса хӑвармалла: типӗ ҫанталӑка пула респубикӑри 9 пин гектар ҫинчи культура шар курнӑ.

Андрей Михайлов тунӑ

Паян кӑнтӑрла Атӑл ҫинчи утрав ҫунма пуҫланӑ. Сӑмах Муркаш районӗнчи Васильевка выҫҫӑлккине хирӗҫ вырнаҫнӑ Амоксар утравӗ пирки пырать.

Ҫак утрав ҫинче вӑрман та, хуралтӑ таврашӗсем те пур.

Ку хыпара "Про Город" хаҫата халӑх корреспоненчӗ Андрей Михайлов пӗлтернӗ. Вӑлах сӑнӳкерчӗксем янӑ.

t.me/nikamran каналтан илнӗ сӑнӳкерчӗк

Аякра пурӑнакан хастар чӑвашсем хӑйсен йӑли-йӗркине манасшӑн мар. Иркутск тӑрӑхӗнчи йӑхташӑмӑрсем те ҫавӑн пекех. Унта маттур чӑвашсем пӗр шухӑшлӑ пулса тӗрлӗ мероприяти ирттереҫҫӗ. Нумаях пулмасть унта чӑваш юррин «Кӗмӗл сасӑ» конкурс-фестивалӗ иртӗ.

Конкусра 15-35 ҫулсенчи ҫамрӑксем хутшӑннӑ май хӑйсен пултарулӑхне кӑтартса панӑ.

Чӑваш юррин «Кӗмӗл сасӑ» конкурс-фестивальтен Сергей Держерученко ҫентернӗ. Коновалово салинче пурӑнакан яш Гран-прие тивӗҫнӗ.

t.me/nikamran каналтан илнӗ сӑнӳкерчӗк

Ыран, утӑ уйӑхӗн 8-мӗшӗнче, Тутарстанри Элкел районӗнчи Сиктӗрме ялӗнче республика шайӗнчи Уяв иртӗ.

Уяв ирхи 8 сехетрех пуҫланӗ. Вӑл 16 сехетчен пырӗ. Ҫав вӑхӑтра Сиктӗрмере тӗрлӗ курав, ӑстлӑх лаҫҫисем ӗҫлӗҫ.

Телеграмри «Пуринчен малтан. Ҫывӑрса юлмасан» каналта пӗлтернӗ тӑрӑх, 10 сехетре «Янра хут купӑс» конкурс пуҫланӗ. Унта 75 купӑсҫӑ хутшӑнӗ.

«Уяв пики» конкурсра 12 хӗр ӑмӑртӗ, вӗсенчен виҫҫӗшӗ Чӑваш Енрен кайӗ.

Кӑҫалхи Уявра «Ача-пӑча вӑйӑ карти» те пулӗ.

trn-news.ru сӑнӳкерчӗкӗ

Раҫҫейре Краснодарти аэропорта уҫас ыйтӑва сӳтсе яваҫҫӗ. Авиагавань самолётсене ҫулталӑк ытла ӗнтӗ йышӑнмасть. Ҫакӑн пек йышӑнӑва ятарлӑ ҫар операцийӗ пуҫӑнсан тунӑччӗ.

Краснодар аэропорчӗ ӗҫлеменрен ҫынсен пуйӑспа, «Дон» М-4» автоҫулпа кайма е урӑх хуласем урлӑ вӗҫме тивет.

Сочинчи аэропорт авиапассажирсене виҫерен 4 хут ытларах йышӑннӑ.

Экспертсем шухӑшланӑ тӑрӑх, Краснодар аэропортне хупӑ тытма кирлех те мар. Ҫитменнине унта самолётсем вӗҫме тытӑнасса миллионшар ҫын кӗтет.

Урамра чӑннипех те ҫуллахи шӑрӑх хуҫаланать. Ӗнер термометр 29,4 градус кӑтартнӑ, паян – 30 градус. Шӑматкун тата шӑрӑхрах пулӗ – кӑнтӑрла термометр 30-35 градус кӑтартӗ.

Ҫитес кунсенче ҫӗрлесерен те 17-22 градус ӑшӑ пулӗ. Вырсарникун тӳпене пӗлӗтсем карса илӗҫ, вырӑнӑн-вырӑнӑн ҫумӑр ҫукалӗ. Ҫак кун шӑрӑх мар, сывлама ҫук пӑчӑ пулӗ ахӑртнех.

Вырсарникун каҫхине лайӑх ҫумӑр ҫумалла. Тунтикун каҫхине те синоптиксем ҫумӑр кӗтме калаҫҫӗ. Темиҫе кунра ҫур уйӑхри норма тулма пултарӗ.

Ҫиетс эрне 21-26 градус ӑшӑран пуҫланӗ, ҫил вӑйланӗ. Аслати чухне пушшех те вӑйлӑ пулӗ. Эрне варринче кӑнтӑрла термометр 20 градус кӑтартӗ. Ҫил ҫурҫӗр, ҫурҫӗр-хӗвеланӑҫ енчен вӗрӗ.

Тепӗр эрнере канмалли кунсем тӗлне 25 градус таран ӑшӑтӗ. Малтанлӑха пӗлтернӗ тӑрӑх, утӑ уйӑхӗ малалла хӑтлӑ ҫанталӑкпа савӑнтарӗ.

Инкеклӗ лару-тӑру министерстви архивӗнчи сӑн

Ӗнер, утӑ уйӑхӗн 6-мӗшӗнче, Шупашкар районӗнчи Вӑрманкасра ҫамрӑк арҫын путса вилнӗ. Инкеклӗ лару-тӑру министерстви пӗлтернӗ тӑрӑх, вӑл шыва кӗме юраман вырӑнта чӑмпӑлтатма шутланӑ. Ҫитменнине, хӑй ӳсӗр пулнӑ.

Ку инкек 18 сехет те 10 минутра пулнӑ. Путнӑ арҫын 35 ҫулта пулнӑ, Шупашкарта пурӑннӑ.

Палӑртмалла: ҫулталӑк пуҫланнӑранпа республикӑра 14 ҫын путса вилнӗ, вӗсенчен 5-шӗ – ачасем.

ЧАССР тата РСФСР тава тивӗҫлӗ тухтӑрӗ, ЧР сывлӑх сыхлавӗн министрӗ пулнӑ Николай Григорьев ӗнер пурнӑҫран уйрӑлнӑ. Вӑл 90 ҫула кайнӑ пулнӑ.

Канаш тӑрӑхӗнче ҫуралнӑскер Хусанти медицина институтне пӗтернӗ, унтан Тӑвайри тӗп пульницӑра хирургра ӗҫлеме пуҫланӑ, кайран тӗп тухтӑр пулнӑ. Кун хыҫҫӑн Канаш хулин пульницинче, Республикӑри пульницӑра ӗҫленӗ. 1979-1994 ҫулсенче вӑл ЧР сывлӑх сыхлавӗн министрӗ пулнӑ. Унта 15 ҫул тӑрӑшнӑ.

Николай Григорьевпа утӑн 8-мӗшӗнче 11 сехетре Шупашкарти Граждан урамӗнчи 19-мӗш ҫуртра сывпуллашӗҫ. Ӑна хӑйӗн тӑван ялӗнче, Кайӑкъялӗнче, пытарӗҫ.