Кӳкеҫри нумай хваттерлӗ хӑш-пӗр ҫуртра пурӑнакансем хваттерсенче сивӗ тесе «Контактри» «Кугеси | Общественный совет» (чӑв. Кӳкеҫ | Халӑх канашӗ) пабликра пӗлтернӗ.

Пост авторӗ Людмила Григорьева Совет урамӗнчи 78-мӗш ҫуртри хваттерсенче сивӗ тесе хыпарланӑ. «Йӗркеллӗ ӑшӑтма хӑҫан пуҫлӗҫ? Эпир Германире пурӑнмастпӑр вӗт. Газӗ Раҫҫейӗн, хваттерсене ӑшӑтнӑшӑн сахал мар тӳлетпӗр, пӗрех шӑнса ларма тивет», — пӑшӑрханса ҫырнӑ хӗрарӑм.

Ҫавӑн пек лару-тӑру ытти ҫуртра та иккен. Комментарисем тӑрӑх хакласан, Совет урамӗнчи 72-мӗш, 73-мӗш, 84-мӗш, Первомайски урамӗнчи 4-мӗш ҫуртсенче те хваттерсенче сулхӑн-мӗн.

minec.cap.ru сӑнӳкерчӗкӗ

Таджикистанра вырӑс чӗлхи вӗрентекен шкулсенче Чӑваш Енри оборудование вырнаҫтарнӑ.

Кӑҫалхи авӑн уйӑхӗн 1-мӗшӗнче Раҫҫей тата Таджикистан президенчӗсем Владимир Путин тата Эмомали Рахмон видеоҫыхӑну мелӗпе пилӗк шкул уҫнӑ. Вӗсенче вырӑс чӗлхине вӗрентӗҫ. Икӗ ҫӗршывӑн пӗрлехи проекчӗпе килӗшӳллӗн ӗҫлеттерсе янӑ шкулсем Душанбе, Бохтар, Худжанд, Турсунзаде тата Куляб хулисенче вырнаҫнӑ.

Виҫӗ шкулта столовӑй валли оборудование Шупашкартан ӑсатнӑ. Вӗсене «Чувашторгтехника», «ЭЛИНОКС», «ФРОСТО» тата «Торговая Механика» компанисем туса кӑларнӑ.

doorinworld.ru сайтри сӑн

Пӗлтӗр кӑрлач-юпа уйӑхӗсенче республикӑра 1310 арҫын хӑй ашшӗ пулнине йышӑннӑ. Кӑҫал вара 10 уйӑхра 1486 арҫын ашшӗ пулнине ҫирӗплетнӗ. Ҫапла пӗлтерет ЧР Юстици министерстви. Эппин, хӑй ашшӗ пулнине ҫирӗплетнӗ арҫынсен хисепӗ ӳснӗ.

Саккунпа килӗшӳллӗн, арҫын ашшӗ пулнине кирек хӑш вӑхӑтра та ҫирӗплетме пулать: ача кӗтнӗ чухне те, вӑхӑт самай иртсен те. Арҫынпа хӗрарӑм заявление пӗрле те, уйрӑм та пама пултараҫҫӗ. Иккӗмӗш тӗслӗхре пӗрле ҫырма татӑклӑ сӑлтав пулмасан кӑна заявление уйрӑм пама май пур.

ШӖМ тунӑ сӑн

Кӑҫал ака уйӑхӗнче Ҫӗнӗ Шупашкарти вӗрентекен ҫула май каякан машинӑра вырӑн йышӑнса хурас тенӗ. Анчах вӑл ултавҫӑсен серепине ҫакланнӑ.

Хӑйӗнпе водитель тесе паллаштарнӑ ҫын ссылка ярса панӑ, хӗрарӑма ун ҫине пусма ӳкӗте кӗртнӗ. Вӗрентекен ӑна итлесе хӑйӗн банк карттин реквизичӗсене те ҫырнӑ. Ҫапла унӑн счечӗ ҫинчен 6 пин тенкӗ ҫухалнӑ.

Ҫав ҫынна тытса чарнӑ. Вӑл - Мурманск облаҫӗнче ҫуралнӑ, халӗ Питӗр ҫывӑхӗнчи хулара пурӑнакан 25 ҫулти арҫын. Вӑл урӑх ҫынсем ҫине регистрациленӗ электронлӑ енчӗксемпе усӑ курнӑ.

t.me/novpulatov сӑнӳкерчӗкӗ

Ҫӗнӗ Шупашкарти "Атӑл" кинотеатра юсаса ҫӗнетме республика хыснинчен 20 миллион тенкӗ уйӑрӗҫ. Кун пирки ЧР Патшалӑх Канашӗн сессийӗнче культура министрӗ Светлана Каликова пӗлтернӗ.

Кинотеатра юсама пӗтӗмпе 40 млн тенкӗ кирлӗ. Проектпа смета документацийӗ экспертиза витӗр тухнӑ. Тепӗр 20 млн тенкине Финанс министерстви уйӑрӗ.

Аса илтерер: кинотеатра 4 ҫул каялла хупнӑ. Ҫав вӑхӑтра вӑл муниципалитет харпӑрлӑхӗнчен республикӑнне куҫнӑ, кайран - каялла. Министр пӗлтернӗ тӑрӑх, хула харпӑрлӑхӗнче чухне ҫынсем кинотеатр шӑпине хӑйсем татса пама пултарнӑ.

pravdapfo.ru сӑнӳкерчӗкӗ

Чӑваш патшалӑх оперӑпа балет театрӗнче ҫӗнӗ илемлӗх ертӳҫинче Пермь тӑрӑхӗнчи Андрей Попов тимлеме пуҫлани ҫинчен те, халӗ ку должноҫре ӗҫлеме килӗшекен ҫынна суйламалли конкурс иртесси пирки те Чӑваш халӑх сайчӗ хыпарласах тӑчӗ. Анчах эпир пӗр хыпара каярах юлса пӗлтӗмӗр иккен.

Нумаях пулмасть Андрей Попов пирки ҫӑхав шӑрҫалакансем тупӑннӑ. Вӗсем палӑртнӑ тӑрӑх, Андрей Поповӑн ертсе пыракан должноҫра 5 ҫултан кая мар тӑрӑшнӑ опыт пулман, апла тӑк ӑна директор пуканне шанса пама май килмен. Прокуратура ҫӑхава республикӑн Правительство ҫуртне ярса панӑ. Кун пирки «Правда ПФО» интернет-кӑларӑмра чӳк уйӑхӗн 11-мӗшӗнче пӗлтернӗ.

Эпир тӗшмӗртнӗ тӑрӑх, ҫав ҫӑхав хыҫҫӑн республикӑн Культура министерстви театр валли ҫӗнӗ илемлӗх ертӳҫине суйласси ҫинчен пӗлтерӳ вырнаҫтарнӑ.

pravdapfo.ru сӑнӳкерчӗкӗ

Ҫак эрнере, чӳк уйӑхӗн 17-мӗшӗнче, Чӑваш Енӗн культура министрӗ Светлана Каликова республика парламенчӗн депутачӗсем умӗнче тухса калаҫнӑ. «Правительство сехечӗ» форматпа йӗркленӳ калаҫу вӑхӑтӗнче «халӑх тарҫисем» министр докладне итленипех ҫырлахман, ыйтусем те панӑ.

Игорь Моляков депутат, акӑ, Чӑваш патшалӑх оперӑпа балет театрӗн «Сурский рубеж» спектаклӗ пирки сӑмах хускатнӑ. Парламентари палӑртнӑ тӑрӑх, вӑл шкулта музыка пӗлӗвне ҫичӗ ҫул вӗреннӗ, унсӑр пуҫне унӑн килӗнче музыка хайлавӗсен пуян коллекцийӗ упранать. Игорь Моляков шухӑшланӑ тӑрӑх, опера пахалӑхӗ пысӑк мар.

Сӑмах май каласан, асӑннӑ ӗҫ пахалӑхӗ начар тесе шухӑшлани пирки унччен «Правда ПФО» интернет-кӑларӑмра та ҫырса кӑтартнӑччӗ.

Ӳнер ӑсталӑхне ӑнланакансем хакланӑ тӑрӑх, оперӑна лартма 5 миллион тенке тухӑҫлӑ усӑ курман.

Светлана Каликова вара урӑхларах шухӑшлать. Игорь Молякова вӑл хуравланӑ тӑрӑх, ҫӗнӗ музыка хайлавӗсене пур чухне те ырласа йышӑнмаҫҫӗ. Пётр Чайковскин «Лебединое озеро» балетне халӑх 20 ҫултан ҫеҫ йышӑннӑ тесе ӑнлантарнӑ министр. Вӑл хӑй вӑхӑтӗнче Шостаковича «Леди Макбет» оперӑшӑн тиркенине те, Ж.

Малалла...

culture.cap.ru сӑнӳкерчӗкӗ

Чӳк уйӑхӗн 25-мӗшӗнчен пуҫласа раштав уйӑхӗн 2-мӗшӗччен пирӗн республикӑра отрасльсем хушшинчи «Чувашия туристическая» (чӑв. Туризм Чӑваш Енӗ) пӗрремӗш форум иртӗ.

Унта вырӑнти хӑй тытӑмлӑх органӗсем хӑйсен маршручӗсемпе 9 лапамра паллаштарӗҫ: «Чӑваш Ен – реабилитаци центрӗ», «Нумай сӑнлӑ Чӑваш Ен», «Промышленность туризмӗ», «Чӑваш Ен ачасен куҫӗпе», «Туризм валли кадрсем», «Аслӑ Атӑл», «Хуласен туризм вӑй-халӗ», «Агротуризм» — «Ял туризмӗ» тата «Регионсенчи туризма аталантарма турист картти».

Хусанти культура институчӗ чӑваш артистки ҫинчен фильм ӳкерет.

«Деятели культуры Поволжья» (чӑв. Атӑлҫи тӑрӑхӗнчи культура ӗҫченӗсем) проект ушкӑнӗ хӑйӗн ӗҫне чӑваш артисткинчен пуҫлас тенӗ. Ҫапла вара фильмӑн пӗрремӗш серийӗ чӑваш халӑх артистки, Раҫҫей тава тивӗҫлӗ артистки, «Чӑваш Республики умӗнчи тава тивӗҫлӗ ӗҫсемшӗн» орден медальне тивӗҫнӗ Алевтина Сергеева-Зинкина ҫинчен пулӗ.

Фильм артисткӑн пурнӑҫӗпе пултарулӑхӗпе, студентсене вӑл академи вокалне вӗрентнипе тата ытти кӑсӑклӑ самантпа паллаштарӗ.

we18.ru сайтри сӑн

Ку эрнере васкавлӑ медпулӑшу тухтӑрӗсем 3311 ҫын патне медпулӑшу пама ҫитнӗ. Вӗсенчен 633-шӗ - ачасем.

Республикӑри катастрофа медицинин тата васкавлӑ медпулӑшу центрӗ пӗлтернӗ тӑрӑх, ку эрнере 26 ачан пуҫ мими чӗтреннӗ. Ку ҫанталӑк сивӗтсе юр ҫунӑ хыҫҫӑн шуҫлак пулнипе ҫыхӑннӑ.

Палӑртмалла: ыран тата сивӗрех пулӗ.