cap.ru сайтри сӑн

Шӑмӑршӑ районӗнче «Исток» агрофирмӑн сунар вырӑнӗнче тытнӑ хир сыснин Африка мурӗ пулнине палӑртнӑ.

Тытнӑ хир сыснине Чӑваш Республикин ветлабораторине тӗрӗслеме ӑсатнӑ. Унӑн Африка мурӗ пулни чӑнах та ҫирӗпленӗ. Ҫавна май Патшалӑх ветеринари служби ҫав вырӑнта карантин йышӑнма хушу проектне хатӗрленӗ. Ӑна йышӑнсан блок-постсем вырнаҫтарӗҫ. Хальхи вӑхӑтра Африка мурне тупнӑ вырӑнта ятарлӑ отряд ӗҫлет.

mincult12.ru сайтри сӑн

Муркаш районӗнчи Амоксар утравӗнче, Атӑл варринче, Мари Элти археологсем шырав ирттернӗ те 11-мӗш ӗмӗрти вилтӑприсене тупнӑ. Ку ӗҫе Мари археологи экспедицийӗ тата нимеҫӗсем пурнӑҫланӑ.

Вӗсем вилтӑприсенче алка-эреш, хӗҫ-пӑшал, ӗҫ хатӗрӗ, антропологи материалӗсем тупнӑ. Археологсем палӑртнӑ тӑрӑх, инвентаре тата виле пытарнин йӑли-йӗркине пӑхсан вилтӑприсем марисенни пек. Ҫапах урӑхлараххисем те пур.

Аса илтерер: утӑ уйӑхӗн 8-мӗшӗнче кӑнтӑрла Амоксар утравӗ ҫинче пушар тухни курӑннӑ.

"Ҫыхӑнура" форумри сӑн

Шупашкарти 4-мӗш гимнази валли директор пӗлтӗрхи авӑн уйӑхӗнченпех шыраҫҫӗ. Унтанпа Шупашкар хула администрацийӗн вӗренӳ управленийӗ виҫӗ конкурс ирттернӗ. Анчах виҫҫӗшӗ те пулса ҫитеймен. Мӗншӗн тесен 2 заявкӑран сахалрах килнӗ.

Палӑртмалла: гимназире юлашкинчен директорта ӗҫленӗ Андрей Михайлов пӗлтӗрхи авӑн уйӑхӗнче отставкӑна кайнӑ. Хальхи вӑхӑтра директор тивӗҫӗсене Фея Захарова пурнӑҫлать.

vk.kugesionline пабликран илнӗ сӑнӳкерчӗк

И.Н. Ульянов ячӗллӗ Чӑваш патшалӑх университечӗн преподавателӗ, профессор, техника наукисен докторӗ, Геннадий Свинцов пурнӑҫран уйрӑлса кайнӑ.

Геннадий Петрович 75 ҫулта пулнӑ. Вӑл Шупашкар районӗнчи Кӳкеҫре ҫуралнӑ.

Эпир маларах асӑннӑ аслӑ шкулта Кӳкеҫ ҫынни 1972 ҫултанпа ӗҫленӗ. 1980 ҫулта техника наукисен кандидачӗ ята хӳтӗленӗ, унтан ӑна преподаватель пулма шаннӑ. Малтан ассистентра тӑрӑшнӑ, тепӗр виҫӗ ҫултан кафедра доцентӗнче ӗҫлеме пуҫланӑ.

Геннадий Свинцов ӗҫленӗ те, хӑйӗн пӗлӗвне те пӗрмай тарӑнлатса-анлӑлатса пынӑ. Вӑл тӗрлӗ наградӑна тивӗҫнӗ.

t.me/ntrk21nactv видеовӗнчен илнӗ сӑнӳкерчӗк

Чӑваш Енре чирлӗ ҫынсене вертолётпа та больницӑсене илсе ҫитерни пирки эпир пӗлтернӗччӗ-ха. Санитари авиацийӗ валли ятарлӑ лапамсем кирлӗ. Ҫулталӑк вӗҫлениччен ун пеккисене Патӑрьелте тата Етӗрнере тумалла.

Ҫын пурнӑҫне ҫӑлса хӑварассинче тепӗр чухне кашни ҫеккунт хаклӑ. Тухтӑрсем патне вӑхӑтра илсе ҫитерме хӑш чухне вертолётсем пулӑшаҫҫӗ.

Ун пек тӗслӗхсенчен пӗри пирки Софья Савнеш ӗнер пӗлтернӗччӗ. Аса илтерер: Хӗрлӗ Чутай районӗнчи 70 ҫулти арҫынӑн кӑкӑрӗ тӗлӗнче ыратма пуҫласан ӑна васкавлӑ медпулӑшупа Ҫӗмӗрлери медицина центрне илсе кайнӑ. Унти тухтӑрсем тӗрӗсленӗ хыҫҫӑн пациентӑн миокард инфаркчӗ пулни палӑрнӑ. Кун хыҫҫӑн ватӑ ҫынна Республикӑн клиника пульницине коронографи операцийӗ тума вертолётпа ӑсатнӑ.

cheb-centr.soc.cap.ru сӑнӳкерчӗкӗ

Шупашкар хулинчи ӳрӗк ватӑсен ватӑсен ватӑлма та вӑхӑт ҫук. Вӗсенчен хӑшӗсем Шупашкар хулинчи халӑхӑн соцаллӑ ыйтӑвӗсене тивӗҫтерекен центрӗнчи Ӑс-тӑн арпашасран пулӑшакан центра (вырӑсла ӑна Центр профилактики когнитивных расстройств теҫҫӗ) ҫӳреҫҫӗ.

76 ҫулти Эльвира Зеленцова (сӑнӳкерчӗкре — сытӑм енче, кӗрен футболкӑпа) центра пӗр вӑхӑт ҫӳренӗ, кайран пӑрахнӑ, халӗ вӑл каллех кунта кӑмӑлтан ҫӳрет. Кинемей каланӑ тӑрӑх, ватӑсене психолог занятийӗсем уйрӑмах килӗшеҫҫӗ. Вӗсем кашни тӗлпулӑва кӑсӑклӑ йӗркелеме тӑрӑшаҫҫӗ, занятисен формачӗ те тӗрлӗрен.

rosdrevo.ru сӑнӳкерчӗкӗ

Муркаш районӗнчи Ильинкӑри ватӑ юманшӑн сасӑлама Чӑваш халӑх сайчӗ унччен чӗнсе каланӑччӗ-ха.

Аса илтерер: 372 ҫул кашласа ларакан чӑваш юманӗ «Раҫҫейри ҫулталӑк йывӑҫҫи» конкурса (ӑна 2017 ҫулта ирттерме тытӑннӑ) хутшӑнать. 2020 ҫулта вӑл иккӗмӗш вырӑн йышӑннӑ.

Ҫав йывӑҫ ҫутҫанталӑкӑн хаклӑ объекчӗ шутланать, вӑл культурӑпа истори тата ӑслӑлӑх пӗлтерӗшӗллӗ.

Асӑннӑ йывӑҫа Раҫҫейри ватӑ йывӑҫсен наци реестрне кӗртнӗ, «Йывӑҫ – чӗрӗ ҫутҫанталӑкӑн палӑкӗ» пӗтӗм ҫӗршыври ят панӑ.

Конкурс https://rosdrevo.ru сайтра пырать. Чӑваш юманӗн конкурсри номерӗ — 42-мӗш.

Гелия Гемалиева. cap.ru сайтри сӑн

Чӑваш Енри икӗ тухтӑр Раҫҫейри чи лайӑх медиксен йышне кӗнӗ. Вӗсем тӗрлӗ номинацире 3-мӗш вырӑн йышӑннӑ.

«Чи лайӑх инфекционист» номинацире Республикӑри ӳтпе венерологи диспансерӗн дерматовенерологӗ Гелия Гемалиева 3-мӗш пулнӑ. «Чи лайӑх офтальмолог» номинацире Улатӑр районӗн тӗп пульницинче ӗҫлекен 59 ҫулти Наталья Кононцева 3-мӗш вырӑна тухнӑ. Вӗсене иккӗшне те 200-шер пин тенкӗ парса хавхалантарӗҫ.

Палӑртмалла: конкурсра 1-мӗш вырӑншӑн – 500 пин, иккӗмӗшӗшӗн 300 пин тенкӗ параҫҫӗ.

Чӑваш кӗнеке издательстви аслӑ вӗрентекенӗмӗрӗн Иван Яковлевӑн халалне пичетлесе кӑларнӑ. Ҫӗнӗ кӑларӑма «Чӑваш халӑхне панӑ халал. Завещание чувашскому народу» ят панӑ. Халала икӗ чӗлхепе кун ҫути кӑтартнӑ.

Иван Яковлев хӑйӗн халалне 1921 ҫулта Чӗмпӗрте, Алексей тата Николай ывӑлӗсемпе пӗрле, ҫырнӑ. Халала шӑрҫалама патриарх 1918 ҫултах шухӑшланӑ. Амаланса аталаннӑ шухӑша виҫӗ ҫултан хут ҫине куҫарнӑ.

1955 ҫулччен документ Иван Яковлевсен килӗнчи архивра, СССР наукӑсен академийӗн член-корреспонденчӗ, истори наукисен докторӗ Алексей Иванович патӗнче упраннӑ. Иван Яковлевӑн мӑнукӗ, истори наукисен кандидачӗ Ольга Алексеевна 1955 ҫулта аслашшӗн архивӗн тӗп пайне В.И. Ленин ячӗллӗ СССР Патшалӑх библиотекин (халӗ вӑл — Раҫҫейӗн патшалӑх библиотеки) алҫырусен пайне панӑ.

gcheb.cap.ru сӑнӳкерчӗкӗ

Шупашкар хулинче пӗрисем ҫӗре хӑйсем тӗллӗн ярса илнӗ.

Мате Залка урамӗнчи 12/3-мӗш ҫурт патӗнчи территори тавра тимӗр карта тытса ҫавӑрнӑ, шлагбаум вырнаҫтарнӑ. Ют ҫынсем ҫурт патне пырса кӗресрен карта ҫине «Частная территория» (чӑв. Уйрӑм ҫын территорийӗ) тесе ҫырса ҫапнӑ.

Тимӗр картана тытнӑ мӗнпур ҫӗр асӑннӑ ҫурт ҫумӗнчи лаптӑк та шутланмасть иккен. Ҫӗрӗн пӗр пайӗн хуҫи — муниципалитет.

Саккуна пӑсса ярса илнӗ ҫӗр тӗлӗшпе хула администрацийӗ суда ҫитнӗ. Чӑваш Енӗн Арбитраж сучӗн йышӑнӑвӗпе килӗшмесӗр ҫуртӑн управляющи компанийӗ Пӗрремӗш арбитраж аппеляци судне ҫитнӗ. Унтисем те малтанхи йышӑнӑвах вӑйра хӑварнӑ. Ҫывӑх вӑхӑтра управляющи компанин тимӗр картана сӳтме тивӗ.