/www.cheboksary.ru сӑнӳкерчӗкӗ

Шупашкар хулинчи 1-мӗш клиника пульницинче йышӑнупа диагностика уйрӑмне юсаса пӗтернӗ. Сывлӑх сиплев учрежденийӗнче пӗлтернӗ тӑрӑх, ҫынсемшӗн пӗлтерӗшлӗ уйрӑм халӗ самана ыйтнине тивӗҫтерет.

Чирлисене васкавлӑ пулӑшу кӳме «врач пациент патне» ҫӗнӗ меле ӗҫлеттерсе янӑ. Ун пеккипе усӑ курнин тухӑҫлӑхне тӗп медицина центрӗсенче ҫирӗплетсе панӑ ӗнтӗ.

Йышӑну уйрӑмӗ талӑкӗпех ӗҫлет. Кунсерен унта 250-300 ҫынна илсе пыраҫҫӗ. Вӗсем — терапи, хирурги, травматологи енӗпе чирлисем. Йышӑну уйрӑмӗнче тӗплӗн тӗрӗслеҫҫӗ, унтан вӑл е ку ҫынна ӑҫта вырттарассине палӑртаҫҫӗ.

Андрей Власов тӗп врач пӗлтернӗ тӑрӑх, чире кура пациентсем валли «хӗрлӗ», «сарӑ», «симӗс» коридорсем пӑхса хӑварнӑ. Чирлисене васкавлӑ тата планпа пынине шута илсе ҫеҫ мар, чир профилӗпе те — терапи тата хирурги — уйӑраҫҫӗ.

Йышӑну уйрӑмӗнче администратор должноҫне ҫирӗплетнӗ. Шӑпах вӑл пациентсене ӑҫта ямаллине йӗркелесе тӑрать те.

www.cheboksary.ru сӑнӳкерчӗкӗ

Шупашкар хули кӑҫал 555 ҫул тултарассине эпир унччен пӗлтернӗччӗ-ха. Аса илтерер: паллӑ куна хатӗрленсе кӗтсе илессипе ӗҫлекен ятарлӑ ушкӑн та туса хунӑ.

Кӑҫал хулара 65 объект уҫма палӑртнӑ. Ҫав шутра «Хӗвеллӗ», «Садовӑй», «Университетский-2» микрорайонсенче шкулсем хута ямалла, «Берёзка» уйлӑхра — ҫӗнӗ корпус, Спортӑн хӗллехи тӗсӗсен центрӗнче — йӗлтӗр роллер трасси, футбол енӗпе ӗҫлекен спортшкулта — футбол манежӗ тата футбол уйӗ, Ҫӗнӗ хулара — искусствӑлла пӑртан каток, «Труд» стадион тата ытти те.

cap.ru сӑнӳкерчӗкӗ

Кӑҫал федераци проекчӗпе килӗшӳллӗн Сӗнтӗрвӑрри тата Канаш хулисене хӑтлӑх кӗртӗҫ. Ку тӗллевпе 229,8 миллион тенкӗ уйӑрӗҫ.

Канаш хулине 135,5 миллион тенкӗ лекӗ. Ку укҫапа чукун ҫул вокзалӗ тата автовокзал хушшинчи территорие хӑтлӑлатӗҫ. Сӗнтӗрвӑрринче вара Патшалӑх тӑвне тата ун патне илсе ҫитерекен ҫула илем кӳрӗҫ. Кун валли 94,3 миллион тенкӗ уйӑрӗҫ.

"Контактри" сӑн

Ҫӗмӗрле муниципаллӑ округӗнчи Егоркино ялӗнче ҫуралса ӳснӗ Илья Сафонов Пӗтӗм Раҫҫей шайӗнче иртнӗ «Сырӑш» конкурсра ҫӗнтернӗ. Экологи конкурсне йывӑҫпа ӗҫлекен 1500 ытла ӑста хутшӑннӑ. Ӑна «Экологи» наци проекчӗн «Таса ҫӗршыв» федераци проекчӗпе килӗшӳллӗн ирттернӗ.

Финала 10-шӗ кӑна тухнӑ. Вӗсен йышӗнче - Илья Сафонов та. Вӑл - ЧР Культура министерствин специалисчӗ.

Илья юманран пӗр пӑтапа та усӑ курмасӑр сырӑш ӑсталанӑ. Ун ҫине вӑл «Пашалӑх сыхлать» тесе ҫырнӑ.

ШӖМ тунӑ сӑн

Ӗнер Ҫӗнӗ Шупашкарти кафе умӗнче икӗ арҫын ҫапӑҫса кайнӑ. Палламан арҫын 30-ти арҫынна пуҫӗнчен ҫапнӑ. Лешӗ тӳнсе кайнӑ. Хайхискер унӑн сумкине йӑтса кайнӑ. Унта документсем, банк картти пулнӑ.

Шар курнӑ арҫын кун пирки полицие пӗлтернӗ. Палламан ҫыннӑн номерне часах шыраса тупнӑ. Патрульпе пост службин ӗҫченӗ чееленме шутланӑ: ун патне ӳсӗр пӗлӗшӗ пек шӑнкӑравланӑ, тӗл пулма ыйтнӑ. Лешӗ ӑна-кӑна чухламасӑр хӑй ӑҫтине каланӑ. Ҫапла ярса тытнӑ та ӑна. Вӑл ют ҫын карттипе усӑ курма та ӗлкӗрне.

Ҫак арҫынна тытса чарнӑ. Ун тӗлӗшпе пуҫиле ӗҫ пуҫарнӑ.

pokayadoma.ru сайтри сӑн

«Балтика» компани «Русский император стаут» ятлӑ сӑра туса кӑларнӑ. Ял хуҫалӑх министрӗ Сергей Артамонов пӗлтернӗ тӑрӑх, унта Чӑваш Енре туса илнӗ хӑмлапа, «Подвязный» сортпа, усӑ курнӑ.

Ҫак хӑмла Чӑваш Енри чи йӳҫӗ сортсенчен пӗри шутланать. Ҫакна та палӑртмалла: Раҫҫейри селекци ҫитӗнӗвӗсен патшалӑх реестрне хӑмлан ҫӗнӗ икӗ сорчӗ кӗнӗ: «Ароматный» тата «Сувар». Вӗсемпе республикӑра ҫичӗ ҫул ӗҫленӗ.

Ӳнер музейӗн архивӗнчен

Нарӑс уйӑхӗн 16-мӗшӗнче Чӑваш патшалӑх ӳнер музейӗнче «Синяя птица» (чӑв. Кӑвак кайӑк) курав уҫӑлӗ. Ӑна чӑваш халӑх художникӗн Раиса Терюкалован юбилейне халалланӑ. Экспозицире ӳнерҫӗн килӗнче тата музейре упранакан ӗҫсем пулӗҫ.

Раиса Фоминична 1939 ҫулхи кӑрлач уйӑхӗн 8-мӗшӗнче Улатӑр районӗнчи Кувакино ялӗнче ҫуралнӑ. Ӳкерессипе хӗрачана ашшӗ кӑсӑклантарса янӑ. Ҫавӑнпа та вӑл пӗчӗкренех художник пулма ӗмӗтленнӗ. 1961 ҫулта Шупашкарти ӳнер училищинчен вӗренсе тухсан пӗлӗвне Ленинградри ӳнерпе промышленность училищинче туптанӑ. Унта вӑл сӗтел-пукан пусмине хитрелетме вӗреннӗ.

Алла диплом илсен Раиса Терюкалова Шупашкарти пир-авӑр комбинатӗнче виҫӗ ҫул ытларах тӑрӑшнӑ хыҫҫӑн Ӳнер фондне куҫнӑ, кӑштахран каллех пир-авӑр комбинатне таврӑннӑ. Художник ытларах гобеленпа ӗҫленӗ.

Чӑваш кӗнеке издательствин сӑнӳкерчӗкӗ

Раҫҫейӗн Патшалӑх Думин вице-спикерне Анна Кузнецовӑна чӑваш юмахӗсен кӗнекине парнеленӗ.

Аса илтерер: нарӑс уйӑхӗн 9-мӗшӗнче Чӑваш патшалӑх филармонийӗнче Ҫемье ҫулталӑкне савӑнӑҫлӑ лару-тӑрура уҫнӑ. Унта республикӑри 300 ытла ҫемье пуҫтарӑннӑ. Тӳре-шара та пулнӑ: Чӑваш Ен Элтеперӗ Олег Николаев, ӗҫ тата социаллӑ хӳтлӗх министрӗ Алёна Елизарова, Раҫҫейӗн Патшалӑх Думин вице-спикерӗ Анна Кузнецова.

Мероприятие хутшӑннӑ Чӑваш кӗнеке издательстви Анна Кузнецовӑна чӑваш халӑх юмахӗсен «Ключи от счастья» кӗнекине парнеленӗ.

t.me/spirincheb сайтри сӑн

Паян республикӑра «Йӗлтер йӗрӗ» старт иртнӗ. Шупашкарта йӗлтӗр сырса чупма юратакансем Олимп резервӗсен 2-мӗш спорт шкулне пухӑннӑ.

Шупашкарта старта 1700 ытла спортсмен тухнӑ. Сивӗ ҫанталӑк та хӑратман вӗсене.

Палӑртмалла: «Йӗлтӗр йӗрӗ» спорт уявӗ кӑҫалхипе 42-мӗш хут иртнӗ. Паян республикӑри мӗнпур муниципаллӑ округра йӗлтӗр сырса старта тухнӑ.

culture.cap.ru сӑнӳкерчӗкӗ

Кӑҫалхи авӑн уйӑхӗн 5-мӗшӗнче чӑваш ҫӗрӗн мухтавлӑ ывӑлӗ, тӗнчери виҫҫӗмӗш космонавт, Совет Союзӗн икӗ хут Геройӗ, авиацин генерал-майорӗ Андриян Николаев ҫуралнӑранпа 95 ҫул ҫитет. Паллӑ куна халалласа республикӑра тата космонавт ҫуралнӑ ялта, Шуршӑлта,тӗрлӗ мероприяти иртӗ.

Чӑваш академи драма театрӗ «Эп – Кӑйкӑр!» спектакль хатӗрлет. Ӑна калмӑк режиссёрӗ, Раҫҫейӗн искусствӑсен тава тивӗҫлӗ ӗҫченӗ Борис Манджиев хатӗрлет. Вӑл тата театрӑн артисчӗсем СССР лётчик-космонавчӗн А.Г. Николаевӑн мемориал комплексӗнче пулнӑ.

Спектакле ака уйӑхӗн 5-мӗшӗнче кӑтартӗҫ.