|
Хулара
 "Контактри" сӑн Ака уйӑхӗн 18-мӗшӗнче Ҫӗнӗ Шупашкарта Совет тата Винокуров урамӗсенчи суту-илӳ центрӗсенче мина хунӑ тесе хыпар килнӗ. Кинолог йытӑпа вырӑна тӗрӗслеме ҫитнӗ. Телее, нимӗнле мина та пулман. Ҫынсене те эвакуацилеме тивмен. Шӑнкӑравлакана тупнӑ. Вӑл – 34 ҫулти хӗрарӑм. Вӑл ӳсӗрле хӗр тусӗн телефонӗнчен шӑнкӑравласа мина хуни пирки пӗлтернӗ. Ун тӗлӗшпе пуҫиле ӗҫ пуҫарнӑ. Ӑна 700 пин тенкӗ таран штраф тӳлеттерме е 5 ҫул таран тӗрмене хупма пултараҫҫӗ. Хыпар ҫӑлкуҫӗ:
|
|
Пӑтӑрмахсем
 cheb-centr.soc.cap.ru сӑнӳкерчӗкӗ Шупашкар хулинче пӗр-пӗрне ӑнланман ҫемьесем хулари халӑхӑн социаллӑ ыйтӑвӗсене тивӗҫтерекен комплекслӑ центра пырса мирлешме пултараҫҫӗ. Асӑннӑ учрежденире йывӑр лару-тӑрури хӗрарӑмсене пулӑшакан уйрӑм пур. Кашӑк-тирӗк шӑкӑртатасси тӗрлӗ сӑлтавпа сиксе тухать. Кун пек чухне ҫемьесемпе центрӑн специалисчӗсем калаҫаҫҫӗ, пӗрне-пӗри ӑнланма вӗрентеҫҫӗ. «Специалистсем лару-тӑрӑва тӗрлӗ енчен пӑхма вӗрентеҫҫӗ», — каласа кӑтартать центр специалисчӗ Александра Макарова. Хыпар ҫӑлкуҫӗ:
|
|
Пӑтӑрмахсем
 "Контактри" сӑн Пӑрачкав округӗнчи Полибино ялӗнче харӑсах 6 ҫурт ҫунса кайнӑ. Юрать-ха, вӗсенче никам та пурӑнман. Ку паян 15 сехетре пулса иртнӗ. Ял ҫывӑхӗнче типӗ курӑк ҫунма тытӑннӑ, 2 гектар ытла лаптӑка ярса илнӗ. Унтан ҫулӑм юхӑнса ларакан ҫуртсем ҫине куҫнӑ. Улттӑшӗ ҫунса кайнӑ. Тепӗр саккӑрӑшне пушарнӑйсем ҫӑлма пуларнӑ. Ҫулӑмпа 2 сехет ҫурӑ кӗрешнӗ. Ҫынсем шар курни пирки хыпар пулман. Хыпар ҫӑлкуҫӗ:
|
|
Чӑвашлӑх
 culture.cap.ru сӑнӳкерчӗкӗ Ака уйӑхӗн 21-25-мӗшӗсенче Шупашкарти ача пахчисенче «Неделя народной культуры» (чӑв. Халӑх культурин эрни) фестиваль иртӗ. Шкул ҫулне ҫитменнисен учрежденийӗсенче ачасене чӑваш юмахӗсемпе, чӑваш юррисемпе тата халӑх ваййисемпе паллаштарӗҫ. Чӑваш тумӗпе паллаштаракан, ал ӗҫне хӑнахтаракан ӑсталӑх лаҫҫисем ӗҫлӗҫ. Ачасене хулари музейсене илсе кайса тӑван тӑрӑх историйӗпе паллаштарӗҫ. Хыпар ҫӑлкуҫӗ:
|
|
Пӑтӑрмахсем
 21.мвд.рф сайтри сӑнӳкерчӗк Пӗлтӗрхи кӗркунне Сӗнтӗрвӑрринче автошкулсенчен пӗрин директорӗ «зебрӑпа» ҫул урлӑ каҫакан хӗрарӑм ҫине пырса кӗнӗ. «Рено Дастер» рулӗ умӗнчи арҫын ӗнентернӗ тӑрӑх, ҫанталӑк условийӗ начар пулнӑ, ҫавӑнпа вӑл ҫул урлӑ каҫакан ҫынна курман. Йӗрке хуралҫисем палӑртнӑ тӑрӑх, водитель ҫынсем ҫул урлӑ каҫнине курма пултарнӑ, анчах машина хӑвӑртлӑхне чакарман. Хӗрарӑм сывлӑхне вӑл пысӑк сиен кӳнӗ. Автошкул директорне суд 1 ҫуллӑха ирӗкрен хӑтарма йышӑннӑ, анчах водитель правине туртса илмен. Хыпар ҫӑлкуҫӗ:
|
|
Пӑтӑрмахсем
 21.мвд.рф сайтри сӑнӳкерчӗк Ака уйӑхӗн 12-мӗшӗнче Ҫӗнӗ Шупашкарти лавккасенчен пӗринчен ҫипуҫ ҫухалнӑ. Унта ӗҫлекенсем пӗлтернӗ тӑрӑх, лавккана виҫӗ хӗрарӑм кӗнӗ. Вӗсем ача кӳмипе пулнӑ. Лавккари ҫипуҫа вӗсем кӳмене хурса тӳлемесӗр тухса кайнӑ. Пурӗ 25 пин тенкӗлӗх вӑрланӑ. Вӗсене Улатимӗр облаҫӗнче тытса чарнӑ. Вӗсем «Тойота» автомобильпе пынӑ. Вӑрасем пурте Мускавран, 23-37 ҫулсенче. Вӗсенчен пӗрин ача пур, тепри ҫывӑх вӑхӑтра амӑшӗ пулма хатӗрленет. Хыпар ҫӑлкуҫӗ:
|
|
Пӑтӑрмахсем
 21.мвд.рф сайтри сӑнӳкерчӗк Ака уйӑхӗн 19-мӗшӗнче Шупашкарти суту-илӳ точкисенчен пӗрин парковкине халӑх йышлӑ пуҫтарӑннӑ. Кун пирки йӗрке хуралҫисене систерекен тупӑннӑ. Ҫав вырӑна пакунлисем пырса ҫитнӗ. Вӗсем палӑртнӑ тӑрӑх, унта пухӑнма 31 ҫулти хӗрарӑм-блогер йыхравланӑ иккен. Пыракансене пӗр-пӗринпе паллашма тата хӑйӗн машини патӗнче сӑн ӳкерӗнме шантарнӑ иккен. Саккуна пӑсса пуҫтарӑннисен тӗлӗшпе административлӑ 23 ӗҫ пуҫарнӑ. Йышра ҫул ҫитмен икӗ ача та пулнӑ иккен. Хыпар ҫӑлкуҫӗ:
|
|
Персона
 Вера Иванова сӑнӳкерчӗкӗ Шупашкарта пурӑнакан 100 ҫулхи Зинаида Канова патӗнчен ҫак кунсенче халӑх татӑлма пӗлмест. Ун патне журналистсем те пӗрмай пыраҫҫӗ, ӑна шкул ачисем те саламлаҫҫӗ. Паян вара кинемей патӗнче Чӑваш Ен Элтеперӗ Олег Николаев тата Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн директорӗ Светлана Милкина пулнӑ. Зинаида Андреевна Мордва Республикинчи Смольково ялӗнче ҫуралнӑ, Улатӑрта ӳснӗ, унта нумай ҫул пурӑннӑ. Халӗ вӑл Шупашкарта пурӑнать. Тӑван ҫӗршывӑн аслӑ вӑрҫи вӑхӑтӗнче Зинаида Канова радиотелеграфист пулна, Берлина ҫитнӗ. Зинаида Андреевна – питӗ кӑмӑллӑ ҫын. Унпа темччен калаҫма пулать. Ун патне хӑнана пыракансем кинемее пурте Ҫӗнтерӳ кунӗпе саламлаҫҫӗ. Хыпар ҫӑлкуҫӗ:
|
|
Ҫутҫанталӑк
 Синоптиксем пӗлтернӗ тӑрӑх, республикӑра ака уйӑхӗн 24-мӗшӗччен ӑшӑ ҫанталӑк тӑрӗ. Эрне варринче ҫил кӑштах лӑпланӗ. Ытларикун кӑнтӑрла хыҫҫӑн вырӑнӑн-вырӑнӑн ҫумӑр ҫума, аслати авӑтма пултарать. Юнкун уяр тӑрӗ. Кӗҫнерникун каҫ енне ҫумӑр ҫӑвӗ, хушӑран – вӑйлах. Ҫапла ҫуллахи ҫанталӑк вӗҫленӗ. Эрнекунран кӑшт сивӗтӗ, кӑнтӑрла 15-20 градус ӑшӑ пулӗ. Шӑматкун ҫил вӑйланӗ, вырсарникун ҫурҫӗр енчен вӗрӗ. Кӑнтӑрла 6-11 градус кӑна ӑшӑ пулӗ, ҫӗрле – 0 патнелле. Акан 27-мӗшӗнче йӗпе юр ҫума пултарать. Уйӑх вӗҫӗччен 9-14 градус ӑшӑ тӑрӗ. Малтанлӑха пӗлтернӗ тӑрӑх, ҫу уйӑхӗнчи канмалли кунсенче ҫанталӑк питех савӑнтармӗ. Хыпар ҫӑлкуҫӗ:
|
|
Республикӑра
 "Контактри" сӑн Канашри чӑх-чӗп фабрики шкул ачисен хушшинче ирттернӗ пултарулӑх конкурсне пӗтӗмлетнӗ. Конкурса ҫӑмарта упаковки ҫинчи логотип хатӗрлес тӗллевпе ирттернӗ. Унта округри шкул ачисем хутшӑннӑ. Ҫӗнтерӳҫӗсене хаклӑ парнепе хавхалантарнӑ. Пӗрремӗш вырӑншӑн – ноутбук, иккӗмӗш вырӑншӑн – планшет, виҫҫӗмӗш вырӑншӑн смартфон панӑ. Кунсӑр пуҫне 15 лауреата «Канаш» ӑратлӑ чӑх-чӗп фабрикин грамотипе чысланӑ. Хыпар ҫӑлкуҫӗ:
|
+4.3 °C