Юлашки вӑхӑтра пирӗн республикӑра этем правине ҫӗнӗ ҫын хӳтӗлеме тытӑннӑ. Вӑл тивӗҫе пурнӑҫлама Сергей Романова шаннӑ. Ӑна ҫак должноҫе ҫирӗплетме республикӑн Патшалӑх Канашӗн ларӑвӗнче раштав уйӑхӗн 10-мӗшӗнчех йышӑннӑ.

Ҫӗнӗ омбудсменпа паян Чӑваш Ен Элтеперӗ Олег Николаев Правительство ҫуртӗнче тӗл пулнӑ. «Этем прависене хӳтӗлекен уполномоченнӑйӑн ӗҫӗ тӗрлӗ енлӗ. Эпӗ хамран мӗн килнине йӑлтах тума тӑрӑшӑп. Ҫынсен прависене хӳтӗлессишӗн яваплӑха туйса тӑрӑшӑп», — ҫӗнӗ омбудсмен.

Этем правине хӳтӗлекен уполномоченнӑй Кӳкеҫре ҫуралнӑ. Юрист пӗлӗвне илнӗскер

2000-2003 ҫулсенче Шупашкарти Калинин районӗнчи шалти ӗҫсен пайӗн следстви пайӗнче, РФ Юстици министерствин Управленийӗнче дознани пайӗнче, 2003-2007 ҫулсенче Мари Элти прокуратурӑра, 2007-2020 ҫулсенче Атӑлҫи транспорт прокуратуринче тӗрлӗ должноҫре ӗҫленӗ.

Раштав уйӑхӗн 11-мӗшӗнче «Асамлӑ уй» кӑларӑм черетлӗ хут экран ҫине тухнӑ. Унта каллех пирӗн ентеш хутшӑннӑ. Хальхинче – Ҫатракасси ялӗнчи Валериан Григорьев.

Вӑйӑра ӑна «ключ» сектор лекнӗ, унта машина выляса илме май пур. Анчах ентеше ӑнман. Леонид Якубович Чӑваш Енре нумай хутчен пулнине, анчах Ҫатракассине ҫитменнине пӗлтернӗ. Валериан ӑна Атӑлта пӗрле пулӑ тытма шантарнӑ.

Ентеш вӑййа пушӑ алӑпа килмен. Мулкач ашӗ, юханшыв пулли, мӑйӑр тата панулми парнеленӗ. Валериан раундра ҫӗнтернӗ, анчах финалта вӑл мар, Красноярск ҫынни мала тухнӑ.

ЧР Элтеперӗ Олег Николаев «Чӑваш Ен» ПТРКна интервью панӑ. Журналиста ҫакӑн пек ыйту та кӑсӑклантарнӑ: Олег Алексеевич кӑшӑлвирусран прививка тӑвӗ-и?

«Республикӑна вакцинӑн пӗрремӗш партийӗ килнӗ, анчах вӑл чи малтанах тухтӑрсем тата вӗрентекенсем валли. Манӑн прививка тума май тупӑнсанах тухтӑрсем патне кайӑп. Сывлӑх енчен чару пулмасан прививкӑна тӑвӑп», - хуравланӑ Олег Алексеевич.

Палӑртмалла: ҫитес вӑхӑтра «122» хӗрӳ лини урлӑ кӑшӑлвирусран прививка тумашкӑн ҫырӑнма май пулӗ. Ӑна тӳлевсӗр, ҫын ирӗкӗпе тӑвӗҫ.

rostov.ru сӑнӳкерчӗкӗ

Чӑваш Енре пурӑнакансем кӑшӑлвируса пула ҫав-ҫавах шар кураҫҫӗ-ха. Паян, раштав уйӑхӗн 15-мӗшӗ тӗлне илсен, COVID-19 диагнозӗ лартнисен йышӗ 14436 ҫынна ҫитнӗ. Тепӗр майлӑ каласан, ӗнерхинчен 130 ҫын нумайланнӑ. Чире официаллӑ майпа шута илнисенчен 12915 ҫын сывалнӑ. Иртсе кайнӑ талӑкра тепӗр 4 ҫын пурнӑҫӗ татӑлнӑ. Ҫапла вара пандеми пуҫланнӑранпа кӑшӑлвирус ернӗ 379 ҫын пурнӑҫӗ татӑлнӑ.

Чӑваш Ене кӑшӑлвирусран прививка тумалли вакцина 500 доза кӳрсе килнине эпир ӗнер пӗлтернӗччӗ. Хальлӗхе — 500 доза. «Гам-Ковид-Вак» препарата районсемпе хуласенчи пульницӑсене валеҫмелле. Прививкӑна икӗ ӑстрӑмпа тумалла.

Пасар пӗрле те телей уйрӑм тенӗ. Лотерея билечӗ те ҫавӑн пекех. Кама нимӗн те тухмасть, кама ӑнать.

Йӗпреҫ районӗнче пурӑнакан хӗрарӑм почта уйрӑмӗнче виҫӗ билет туяннӑ. Виҫҫӗшӗ те телейлӗ лекнӗ. Вӗсенчен пӗринпе хӗрарӑма хула тулашӗнчи пӳрт тивӗҫнӗ е аллӑн 500 пин тенкӗ илейӗ.

Хӑшӗсем асӑрханӑ тӑрӑх, телейлисем — ӑнсӑртран туяннисем. Ӳкӗте кӗртнипе е ӑҫта каймасть вак укҫа тенипе илнисем.

Сӑмах май каласан, кӑҫал Раҫҫей почтин Чӑваш Енри уйрӑмӗсенче 570 пине яхӑн лотерея билечӗ сутнӑ. Ку вӑл унчченхи ҫулхинчен 10 процент нумайрах. Вӗсемпе ҫынсем 29 миллион тенкӗ ытла выляса илнӗ.

Ҫӗршывӑн тӗрлӗ регионӗнче пурӑнакан хастар чӑвашсем вилни пирки эпир ҫак кунсенче ҫине-ҫинех хыпарларӑмӑр. Халӗ тата тепӗр йӑхташӑмӑр пурнӑҫран уйрӑлнӑ. Хальхинче — Мускавра пурӑннӑ Галина Кечайкина.

Вӑл раштав уйӑхӗн 9-мӗшӗнчех куҫне хупнӑ. Хурлӑхлӑ хыпара Чӑваш культурин Мускаври обществи Фейсбукра халӗ пӗлтернӗ.

Галина Николаевна ҫӗршывӑнтӗп хулинчи «Атӑл» чӑваш хорне ҫӳренӗ. Ансамбле пуҫарнӑ хыҫҫӑнхи малтанхи кунсенченех унта юрланӑ. Ялан хаваслӑ пулнипе, ҫынна ырӑ суннипе, пулӑшма хатӗррипе уйрӑлса тӑнӑ. Хора ҫӳрекенсене чӑваш наци тумне хатӗрлеме тата юсаса ҫӗнетме пулӑшнӑ.

Йӗрке хуралҫисем BI.ZONE эксперчӗсем пулӑшнипе банкри счетсенчен 20 миллион ытла тенкӗ вӑрланӑ хакерсен ушкӑнне тытса чарма пултарнӑ. Вӑрӑсем пилӗк ҫул хушши ӗҫленӗ, вӑрланӑ укҫа-тенке хӑйсен кӗсьине криптоукҫана куҫарса чикнӗ.

Хакерсем укҫана вӑрлама FakeToken сиенлӗ программӑпа усӑ курнӑ, вӑл Android системи ҫинче никӗсленекен кӗсье телефонӗсене вырнаҫса СМС-пӗлтерӳсене вулама май панӑ.

Ҫак ӗҫпе аппаланнисене тытса чарнӑ. Вӑрӑ-хурах ушкӑнӗн ертӳҫине хупса хунӑ, ытти ҫынсене килтен тухма юраманни пирки алӑ пустарнӑ. ШӖМ представителӗ пӗлтернӗ тӑрӑх преступниксем хӑйсен айӑпне йышӑннӑ. Хӑйсен ӗҫне хакерсем 2015 ҫулта пуҫланӑ. Юлашки пилӗк уйӑх хушшинче кӑна вӗсем пилӗк пинтен кая мар телефона ҫӗмӗрсе кӗнӗ, 2500 банк карттинчи укҫа патне ҫул уҫма пултарнӑ.

Красноярск тӑрӑхӗнчи чӑвашсен автономийӗн ертӳҫи Геннадий Храмов хӑйсем патӗнчи хастар йӑхташ Валентина Разманова вилнӗ пирки Фейсбукра хурланса пӗлтернӗ.

Валентина Разманова 1944 ҫулхи авӑн уйӑхӗн 7-мӗшӗнче Чӑваш Енри Вӑрмар районӗнчи Карӑкҫырминче ҫуралнӑ. 1991 ҫултанпа вӑл Красноярск тӑрӑхӗнчи чӑвашсен автономийӗн правленицӗн пайташӗ, правлени ертӳҫин ҫумӗ, 2001 ҫултанпа Красноярскри наципе культура автономийӗн вице-президенчӗ пулнӑ. Асӑннӑ тӑрӑхри чӑвашсене пӗрлештерес тесе нумай тӑрӑшнӑ. Тӗрлӗ районпа хулари чӑвашсене тӑван тӑрӑхпа ҫыхӑну тыттарассишӗн ҫине тӑнӑ. Шупашкарта иртекен чӑвашсен съездне ӑна делегата темиҫе те суйланӑ. Вӑлах «Акатуй», «Чӳклеме» уявӗсене, ӳкерчӗксен, наци апат-ҫимӗҫӗн, чӑваш тумӗн куравӗсене куравӗсене йӗркеленӗ.

Красноярски хастар чӑваш тӗрлӗ Тав ҫырӑвне, Хисеп грамотине тивӗҫнӗ.

Пирӗн ҫӗршывра тухтӑрсене яла илӗртес тӗллевпе «Земство тухтӑрӗ» программӑна 2012 ҫулта йышӑнчӗҫ. Ҫавӑнтанпа республикӑра 518 врач ӗҫе вырнаҫнӑ. 2020 ҫулта ялсенче 47 врач ӗҫе пуҫӑннӑ.

«Земство фельдшерӗ» 2018 ҫулта вӑя кӗчӗ. 2020 ҫулта вӑл програмӑпа 78 фельдшер ӗҫлеме тытӑннӑ.

Чӑваш Енӗн Сывлӑх сыхлав министерствинче пӗлтернӗ тӑрӑх, аякри ялсене ӗҫе вырнаҫнӑ земство тухтӑрӗсемпе земство фельдшерӗсене пӗр хутчен паракан виҫеве пирӗн тӑрӑхра пысӑклатса тӳлеҫҫӗ: врачсене — 1,5 млн. тенкӗ, фельдшерсене — 0,75 млн. тенкӗ.

Земство тухтӑрӗсем Канаш, Шупашкар тата Патӑрьел районӗсене ытларах кайнӑ.

Ӗнер Чӑваш Республикин Элтеперӗ темиҫе ҫынна хисеплӗ ятсем пама йышӑннӑ.

Федерацин травматологи, ортопеди тата эндопротезировани центрӗн аслӑ медицина сестрине Светлана Архиповӑна «Чӑваш Республикин сывлӑх сыхлавӗн тава тивӗҫлӗ ӗҫченӗ» ят панӑ, Шупашкарти электроаппаратура савучӗн пахалӑх службин бюровӗн пуҫлӑхне Владимир Бахарева, Шупашкарти электроаппаратура савучӗн автомат цехӗн участок мастерне Валерий Максимова — «Чӑваш Республикин промышленноҫӑн тава тивӗҫлӗ ӗҫченӗ», Шупашкарти юханшыв порчӗн электрооборудование юсакан тата тытса тӑракан электромонтера Олег Григорьева — «Чӑваш Республикин транспортӑн тава тивӗҫлӗ ӗҫченӗ».