Кӑҫал пирӗн республикӑри шыв башнисене юсаса ҫӗнетӗҫ. Пӗтӗмпе 128 заявка йышӑннӑ. «Хыпар» издательство ҫурчӗ пӗлтернӗ тӑрӑх, «малтанхи тапхӑрта вӗсенчен 99-ӑшне суйласа илнӗ. Халь ҫак список» пысӑкланӗ.

Чӑваш Ен Элтеперӗ Олег Николаев ытти заявка тӗлӗшпе те йышӑну пуласси ҫинчен каланӑ.

Хӑш-пӗр чухне пур укҫа-тенкӗпе те вӑхӑтра усӑ курайман тӗслӗхсем те пулкалаҫҫӗ. Ҫавна май республика ертӳҫи хыснаран уйӑрнӑ укҫана вырӑнсенчи администрацисене вӑраха ямасӑр ҫитерес енӗпе ҫине тӑма хушнӑ. Юсав ӗҫне кӗркуннехи-хӗллехи тапхӑра кӗрсе кайиччен вӗҫлемелле-ҫке, кая юлсан май килмӗ.

Чӑваш Енре пурӑнакансенчен пӗр пайӗ республика тулашӗнче ӗҫлени вӑрттӑнлӑх мар ӗнтӗ. Ҫакӑн сӑлтавӗ темиҫе те. Пӗрремӗшӗнчен, ялсенче ӗҫ тупма йывӑр, иккӗмӗшӗнчен, пур ӗҫ вырӑнӗсенчи шалу шайӗ тивӗҫтермест.

Официаллӑ статистикӑна ӗненсен, кӑҫал ҫулталӑк пуҫланнӑранпа (цифрӑсене утӑ уйӑхӗн 28-мӗшӗ тӗлне илсе кӑтартнӑ) республика тулашне 643 ҫын ӗҫе вырнаҫнӑ, ҫав шутра 220 ҫынна Шупашкарти ӗҫлӗх центрӗ урлӑ республика тулашне ӗҫе вырнаҫтарнӑ.

Ют регионсенче ҫынсене ытларах чухне сезон вӑхӑтӗнче е вӑхӑтлӑха, ҫавӑн пекех вахта мелӗпе ӗҫ сӗнеҫҫӗ.

Чылай организаци Мускавпа Мускав облаҫӗнче, Тутарстанра, Чулхулара тата Мордва Республикинче вырнаҫнӑ.

Ҫулталӑк вӗҫлениччен вӑхӑтлӑх ӗҫе тата тепӗр 472 вырнаҫтармалла.

Ленинград облаҫӗнчи Халӑхсен туслӑхӗн ҫуртӗнчи «Чувашский мир» (чӑв. Чӑваш тӗнчи) Чӑваш культурин интерактивлӑ музейӗнче Уҫӑ алӑксен кунӗ иртнӗ. Экскурсие Питӗрти тата Ленинград облаҫӗнчи чӑваш хастарӗ Валериан Гаврилов ирттернӗ.

Интерактивлӑ музее 2018 ҫулхи кӑрлачӑн 218-мӗшӗнче уҫнӑ. Ун чухне асӑннӑ тӑрӑхра Чӑваш Енри, ҫавӑн пекех ҫӗршывӑн 12 регионӗнчи тата Эстони Республикинчи сумлӑ хӑнасем, пуртӗ 60 ҫын, пулнӑ.

Интерактивлӑ музее тата унти экспозицисене професси шайӗнче йӗркелеме вӗренме чӑвашсен ентешлӗхӗн хастарӗсем Валериан Гаврилов тата Валентина Пиличева Раҫҫейӗн этнографи музейӗнче вӗреннӗ, вӗсен ҫавна ҫирӗплетсе паракан сертификат та пур.

Питӗрти хастарсем Чӑваш культурин интерактивлӑ музейӗнче 20-50 ҫын тӑтӑшах пулать тесе ӗнентереҫҫӗ.

Элӗк халӑх театрӗ халӑх театрӗсен уҫӑ конкурсӗнче ятарлӑ диплома тивӗҫнӗ. «Здесь и сейчас» (чӑв. Кунта тата халӗ) пултарулӑх ӑмӑртӑвне Смоленскри халӑх пултарулӑхӗн облаҫри центрӗ Смоленск облаҫӗнчи культура департаменчӗ пулӑшнипе йӗркеленӗ.

Кунта тата халӗ. Ҫакӑ Станиславский тытӑмӗнче тӗп постулатсенчен пӗри пулса тӑрать.

Театр конкурсне хутшӑнакансен пултарулӑхне куҫӑнсӑр мелпе хакланӑ. Конкурс условийӗнче пӑхса хӑварнӑ тӑрӑх, спектакльсен 60 минутран вӑрӑм пулма юраман.

Конкурса Калмӑк, Коми, Тыва, Чӑваш республикисенчи, Донецк Халӑх Республикинчи, Ставрополь крайӗнчи, Калуга, Пенза, Рязань, Тула облаҫӗсенчи театрсем хутшӑннӑ. Элӗксене (режиссерӗ — Инна Афанасьева) «Культура эткерлӗхне упранӑшӑн» дипломпа чысланӑ.

https://www.facebook.com/mininform21 сӑнӳкерчӗкӗ

Чӑваш Енре Цифра трансформацийӗн центрне туса хума палӑртнӑ. Йышӑнура каланӑ тӑрӑх, центра республикӑн социаллӑ пурнӑҫӗпе экономика аталанӑвне цифра технологийӗсемпе усӑ курса аталантарма йӗркеленӗ.

Цифра трансформацийӗн центрне йӗркелеме республикӑн Цифра аталанӑвӗн, информаци политикин тата массӑллӑ коммуникацисен министерстви сӗннӗ. Ҫӗнӗ органӑн учредителӗ те ҫав ведомствах пулӗ. Апла пулсан йӗркелӳпе право ыйтӑвӗсене те Цифра аталанӑвӗн, информаци политикин тата массӑллӑ коммуникацисен министерстви татса парӗ.

ШӖМ тунӑ сӑн

Банкоматра тепӗр ҫын хӑварнӑ укҫана кӗсьене чикнӗ икӗ арҫынна шыраҫҫӗ. Кун пирки ШӖМ пӗлтерет.

Ҫӗртме уйӑхӗн 10-мӗшӗнче Шупашкарти 9-мӗш Пилӗкҫуллӑх проспектӗнчи чарӑнура пӗр ҫын банкоматра укҫа манса хӑварнӑ. Ун хыҫҫӑн икӗ арҫын кӗнӗ. 4 пин тенке шӑпах ҫавсем илсе кайнӑ тесе шутлаҫҫӗ. Вӗсен сӑнӗсем видеокамера ҫине лекнӗ.

Ку арҫынсене палласа илтӗр пулсан ҫак номерсемпе шӑнкӑравлӑр: 89176594360, 24-09-88.

Шупашкарта пурӑнакан арҫын 583 тӑваткал метр ҫӗр лаптӑкӗ илнӗ те ӑна 2,6 хутчен пысӑклатнӑ. Ҫакна вӑл ирӗк илмесӗрех тунӑ.

Ҫав ҫӗр ҫинче вӑл мунча, теплицӑсем туса лартнӑ. Шупашкар хула администрацийӗн специалисчӗсем Куйбышев урамӗнчи 1539 тӑваткал метра карта тытса ҫавӑрнине палӑртнӑ. Арҫыннӑн вара 956 тӑвтакал метр лаптӑкпа усӑ курма права пулман.

Мускав районӗн сучӗ утӑ уйӑхӗн 7-мӗшӗнче ҫав лаптӑк ҫинчен мунчана, теплицӑсене, картана сӳттерме йышӑннӑ. Ҫакна арҫыннӑн 30 кунра тумалла. Суд ыйтнине пурнӑҫламасан ку ӗҫе суд приставӗсене парӗҫ.

Следстви комитечӗн сайтӗнчи сӑн

Утӑ уйӑхӗн 29-мӗшӗнче 12 сехет ҫурӑра Канаш районӗнчи Ҫӗнӗ Ачча ялӗнче 64 ҫулти арҫынна вӗлернӗ. Ҫак ӗҫе Мускав облаҫӗнчен килнӗ 47 ҫулти хӗрарӑм тунӑ тесе шутлаҫҫӗ, ӑна тытса чарнӑ.

Следстви пӗлтернӗ тӑрӑх, ҫав кун 47-ри хӗрарӑм тӑван мар ашшӗпе хирӗҫсе кайнӑ. Вӑл ӑна графинпа пуҫӗнчен 3 хутран кая мар ҫапнӑ. Ҫакна вӑл мӗншӗн тунӑ? Следстви версийӗ тӑрӑх, хӗрарӑм арҫынна тӑван хӗрӗ ҫумне кӗвӗҫнӗ.

Арҫын ҫавӑн чухнех вилсе кайнӑ. Хӗрарӑм тӗлӗшпе пуҫиле ӗҫ пуҫарнӑ.

«Чӑваш чӗлхин икчӗлхеллӗ корпусӗн» сайчӗ

Ак ҫитрӗ те ӗнтӗ ҫак самант — «Чӑваш чӗлхин икчӗлхеллӗ ҫӳпҫинчи» сӑмахсен йышӗ 10 миллионран иртрӗ. Чӑваш чӗлхин ҫак корпусне хатӗрленӗ май эпир икӗ тӗллев лартнӑччӗ: пӗри чӑвашла-вырӑсла мӑшӑрсене хатӗрлесси, тепри вара — чӑваш чӗлхин корпусне йӗркелесси. Пӗрремӗшне пурнӑҫланӑ май эпир 1 миллион мӑшӑр пухма тӗллев лартса. Ку тӗлӗшпе вӗҫне ҫитсе пыратпӑр та темелле — халь пирӗн корпусра 908 пин ытла мӑшӑр. Иккӗмӗш тӗллевӗ вара хальлӗхе хӑй тӗллӗн пурнӑҫланса пырать — ку тӗлӗшпе эпир ятарласа ӗҫлеместпӗр, сӑмахсен йышӗ мӑшӑрсем валли текстсем кӗртнипе ҫеҫ ӳссе пырать.

Чӗлхеҫӗсен шухӑшӗпе чӑн-чӑн корпус шутланмашкӑн унта 20 миллион ытла сӑмах пулмалла, вара тин вӑл чӗлхене туллин кӑтартма пултарӗ. Вӑт, майӗпен ӗҫлесех, эпир ҫак тӗллевӗн ҫуррине турӑмӑр та темелле.

Хальлӗхе чӑн та хамӑрӑн корпуса чӑваш чӗлхине туллин кӑтартса пама пултараканни теме йывӑртарах. Енчен те пуҫламӑшӗнче, Библие кӗртнӗ хыҫҫӑн, унта ытларах пайне тӗн тексчӗсем йышӑнатчӗҫ пулсан (калӑпӑр, тӑтӑшлӑх словарӗнче «Ҫӳлхуҫа» сӑмах чи тӑтӑш усӑ кураканнисенчен пӗриччӗ, халь вара 3-мӗш страница таран аннӑ), халь вара ку енчен вырӑсларан чӑвашла куҫарнӑ хайлавсем йышӑнаҫҫӗ.

Малалла...

после-уроков.рф сайтри сӑн

Кӑҫал та, пӗлтӗрхи пекех, РФ Президенчӗ Владимир Путин шкул ачисене 10-шар пин тенкӗ пама йышӑннӑ. Ку укҫапа ашшӗ-амӑшӗ вӗсене тумлантарӗ, шкул хатӗрӗсем илсе парӗ.

Малтан 10 пин тенке ҫурлан 15-мӗшӗнче пама тытӑнасси пирки пӗлтернӗ. Анчах Президент ку ӗҫе хӑвӑртлатма ыйтнӑ – ашшӗ-амӑшӗ кирлӗ хатӗр-хӗтӗре, тумтире хыпаланса ан туянтӑр.

Утӑ уйӑхӗн 29-мӗшӗнче Владимир Путин ӗҫлев министрӗпе Антон Котяковпа тӗл пулсан шӑпах кун пирки калаҫнӑ. Владимир Владимирович тӳлеве маларах куҫармашкӑн сӗннӗ. Министр укҫана ҫурлан 2-мӗшӗнчен куҫармашкӑн пуҫлама хатӗр пулнине пӗлтернӗ.

Сӑмах май, Чӑваш Енре ку тӳлеве 158 пин ача тивӗҫӗ.