regnum.ru сӑнӳкерчӗкӗ

Пӗрлештернӗ Нацисен Организацийӗн штаб-хваттерне чӑваш депутачӗ Антарктидӑра е Ҫурҫӗр полюсра вырнаҫтарма сӗннӗ. Кун пирки «СР — Патриоты России — За правду» (чӑв. «Тӗрӗслӗхшӗн Раҫҫей — Раҫҫей патриочӗсем — Тӗрӗслӗхшӗн») партин Чӑваш Енӗн Патшалӑх Канашӗнчи фракцийӗн ертӳҫи Владислав Солдатов «REGNUM» информаци агентствин корреспондентне каланӑ.

Политик палӑртнӑ тӑрӑх, ООН хӑйӗн функцине йӗркеллӗ пурнӑҫласа пыраймасть, унӑн ролӗ те ҫавна май чакнӑ. Ҫавӑнта Америкӑри Пӗрлешӳллӗ Штатсем хӑйсен тӳпине хывнӑ. Сӑмах май каласан, Пӗрлештернӗ Нацисен Организацийӗн штаб-хваттерӗ шӑпах АПШра вырнаҫнӑ та. Асӑннӑ организацин шучӗпе никама та пӑхӑнмалла мар. Анчах хальлӗхе апла мар. Штаб-хваттере нейтралитет-территорие вырнаҫтарсан ҫеҫ вӑл никама пӑхӑнмасса шанма пулать.

Ҫӗнӗ Шупашкарта кӑҫал 100 килсӗр йытта тытма палӑртнӑ. Пиллӗкӗшне промзонӑра тытнӑ ӗнтӗ. Пӗрин хуҫи те тупӑнма ӗлкӗрнӗ. Ыттисене Шупашкарти приюта ӑсатнӑ.

Приюта лекнӗ йытта мӗнле шӑпа кӗтет-ха? Унӑн хуҫи пулнӑ тӑк ун патне таврӑнӗ, текех ҫынсемшӗн хӑрушлӑх кӑларса тӑратмасть тӗк (стерилизациленӗ,вакцинациленӗ хыҫҫӑн/ малтанхи вырӑннех кайса ярӗҫ. Е йытӑн ҫӗнӗ хуҫа тупӑнма пултарӗ.

Ҫапкаланчӑк йытӑсене тытсан вӗсен сӑнӳкерчӗкӗсене Ҫӗнӗ Шупашкар хула администрацийӗн Телеграм-каналне вырнаҫтарнӑ. Пӗрин хуҫи ҫапла тупӑннӑ та. Чӗрчун хӑйӗн пулнине ӗнентерсен унӑн вакцинациленӗшӗн, ыттишӗн кӳнӗ тӑкака саплаштармалла.

Сӑмах май, пӗлтӗр Ҫӗнӗ Шупашкарта 202 йытта тытма палӑртнӑ. Чӳк уйӑхӗнче 22 чӗрчуна тытни пирки пӗлтернӗ.

maumediacenter.ru сӑнӳкерчӗкӗ

Шупашкар хулинче пуш уйӑхӗн 13-мӗшӗнче 71 ҫулта ҫынна ҫаратнӑ. Тӗттӗм кӗтесре те мар. Нумай хваттерлӗ ҫуртри подъездра.

Хулари П. Лумумба урамӗнче пурӑнакан арҫынна палламан ҫын тапӑннӑ.

Шар курнӑ ватӑ йӗрке хуралҫисене пӗлтернӗ тӑрӑх, палламан ҫын унӑн карас телефонне туртса илнӗ. Вӑрӑ-хурах ӗҫӗпе аппаланакан этем «Хӑрушсӑр хула» аппаратпа программа комплексӗн камери ҫине лекнӗ. Арҫына тытса чарас тесе полицин мӗнпур нарячӗ ура ҫине тӑнӑ.

Йӗрке хуралҫисен аллине ҫакланнӑ этем судпа унччен темиҫе хутчен те айӑпланнӑскер иккен. 35 ҫултискер телефона ломбарда вырнаҫтарнӑ. Арҫын тӗлӗшпе пуҫиле ӗҫ пуҫарнӑ.

mintrud.cap.ru сӑнӳкерчӗкӗ

Ачасене каникул вӑхӑтӗнче кантарма путёвка туяннишӗн мӗн чухлӗ тӳлемелли паллӑ.

Йывӑр лару-тӑрури ҫемьесен путёвка хакӗн 5 процентне тӳлемелле. Укҫа ҫине куҫарсан вӑл 855 тенкӗ те 55 пус пулӗ. Ҫуллахи вӑхӑтра ачасем 21 кун канма, ҫуркуннехи, кӗркуннехи тата хӗллехи вӑхӑтра 7 кун канайӗҫ.

Ҫемьен тупӑшӗ пурӑнма кирлӗ чи пӗчӗк виҫерен 150 процентран иртмесен 20 процент, е 3422 тенкӗ те 20 пус, тӳлемелле.

Ҫемьен тупӑшӗ пурӑнма кирлӗ чи пӗчӗк виҫерен 150-200 процент таран пулсан путёвка хакӗн 30 процентне, е 5133 тенкӗ те 30 пус, тӳлемелле.

Ҫемьен тупӑшӗ пурӑнма кирлӗ чи пӗчӗк виҫерен 200 процент иртсен 50 процент, е 8555 тенкӗ те 50 пус, тӳлемелле.

Пилӗк е ытларах ача ӳстерекен ҫемьесенчи ачасене, тӑлӑх ачасене путёвкӑсене тӳлевсӗр парӗҫ.

im0-tub-ru сайтри сӑн

Шупашкарта пурӑнакан арҫын Тӑван ҫӗршыв хӳтӗлевҫин кунӗ умӗн лотерея билечӗ туяннӑ та пысӑк парне выляса илнӗ : машина!

Анчах арҫын парне патне хӑй каяйман, Мускавра пурӑнакан тӑванӗн хӗрне кайса илме хушнӑ."Вӑл ман пата шӑнкӑравларӗ те пӗлтерӗшлӗ задани пурри пирки каларӗ. Хӑнана килсен лотерейӑра машина выляса илни пирки хавхаланса каласа кӑтартрӗ. Халӗ ӑна кура пӗтӗм тӑван лотерейӑна хутшӑнма пуҫлӗ", - каласа кӑтартнӑ Ольга Фомина.

Выляса илнӗ машина 800 пин тенкӗ тӑрать. Анчах вӑл ӑна мар, укҫан илме килӗшнӗ. Нухрачӗпе вара хальлӗхе мӗн тӑвассине пӗлмест.

Сӑмах май, Шупашкарта пурӑнакан ҫын лотерейӑра 4,7 миллион тенкӗ выляса илни те пулнӑ.

Шупашкарта 81 ҫулти старике шыраҫҫӗ. Вӑл иртнӗ каҫ ҫухалнӑ.

Тӑванӗсем каланӑ тӑрӑх, Кульпин Владимир Михайловича юлашки хутчен "Шупашкар" чарӑну патӗнче курнӑ. Ку 23 сехет ҫурӑсенче пулнӑ. Владимир Михайлович ун чухне капюшонлӑ кӑвак куртка, тӗттӗм симӗс шӑлавар тӑхӑннӑ пулнӑ. Калпакӗ пулман.

Ватӑскер уксахлать, япӑх илтет, хӑш чухне ӑс-тӑнӗпе арпашӑнса хӑй ӑҫта иккенне ӑнланмасть. Ӑна "Лиза Алерт" ҫӑлавпа шырав отрячӗн хастарӗсем те шыраҫҫӗ.

Мӗн те пулин пӗлетӗр тӗк ҫак номерсемпе шӑнкӑравлама ыйтаҫҫӗ: 89176716090, 89053797600.

Инкелӗ лару-тӑру министерстви тунӑ сӑн

Пуш уйӑхӗн 14-мӗшӗнче Шупашкарти Трактор тӑвакансен проспектӗнчи 63/21-мӗш ҫуртри икӗ пӳлӗмлӗ хваттерте пушар пулнӑ. Вырӑна пушарнӑйсен 5 машини ҫитнӗ, ҫулӑма 20 минутран сӳнтернӗ. Шел, хваттер хуҫи, 1965 ҫулта ҫуралнӑскер, вилнӗ.

Тепӗр кунхине ирхи 6 сехетре Кӳкеҫри Совет урамӗнчи лавкка ҫуннӑ. Пушара ҫур сехетрен сӳнтернӗ. Лавккари икӗ холодильник, стеллаж ҫунса кайнӑ, шалти отделка хӑрӑмланса ларнӑ.

Сӑмах май, ҫулталӑк пуҫланнӑранпа 204 пушар пулнӑ, вӗсенче 17 ҫын вилнӗ.

news.myseldon.com сӑнӳкерчӗкӗ

Вӑрнар районӗнчи Ҫарӑклӑ ялӗ ҫывӑхӗнче полицейски виллине тупнӑ. Пӑтӑрмах пирки малтанласа тӗнче тетелӗнчи халӑх ушкӑнӗсенче пӗлтернӗ, каярах ку хыпара Чӑваш Енӗн Шалти ӗҫсен министерствинче ҫирӗплетсе панӑ.

Лейтенант ӗҫ хыҫҫӑн пистолета ӗҫре парса хӑвӑрман иккен. Ҫавӑн хыҫҫӑн ӑна шырама тытӑннӑ. Ӗҫри сӗтел ҫинче вӑл хут ҫырса хӑварнӑ, унта вӑл тӑван тӑрӑхӗнче пулассине пӗлтернӗ иккен. Полицейски виллине, чӑн та, ҫавӑнта тупнӑ.

Пӑтӑрмах сӑлтавне халӗ йӗрке хуралҫисем тӗпчеҫҫӗ.

culture.cap.ru сӑнӳкерчӗкӗ

Пуш уйӑхӗн 18-мӗшӗнче, 16 сехетре, Чӑваш патшалӑх ӳнер музейӗнче Владимир Агеев художникӑн юбилейлӑ куравӗ уҫӑлӗ. Вӑл графика тата живопись енӗпе нумай ӗҫленӗ. Ҫав ӳкерчӗксенче чӑваш халӑхӗн историне тата мифологине кӑтартса панӑ.

Владимир Агеев 1932 ҫулхи ака уйӑхӗн 2-мӗшӗнче Елчӗк районӗнчи Аслӑ Елчӗк ялӗнче ҫуралнӑ. Шупашкарти ӳнер училищинче вӗреннӗ. Унӑн педагогӗсем Н.К. Сверчков, В.М. Макаров, П.Г. Григорьев-Савушкин тата Е.Е. Бургулов пулнӑ. Художникӑн пултарулӑхне А. Дюрер, Э. Греко, П. Рубенс, Д. Веласкес художниксем пысӑк витӗм кӳни те сисӗнет.

chuvrdub.ru сӑнӳкерчӗкӗ

Чӑваш Республикин ача-пӑчапа ҫамрӑксен вулавӑшӗ сӑвӑ-калав ҫыракансене кӑҫал та конкурса хутшӑнма йыхравлать.

Пултарулӑх ӑмӑртӑвне ӗҫсене «Проза», «Поэзи», «Драматурги» номинацисемпе йышӑнаҫҫӗ. Вӗсене чӑвашла та, вырӑсла та ҫырма юрать. Ӗҫсене Шупашкар хулинчи Иван Яковлев проспектӗнчи 8-мӗш «А» ҫурта ҫитерсе памалла. Сӑвӑ-калавпа драма хайлавӗсене вулавӑшӑн краеведенпе наци литературинчен пайӗнче йышӑнаҫҫӗ.

Тӗрлӗ кӗнекере е литература альманахӗнче унччен пичетленсе тухнӑ ӗҫсене йышӑнмӗҫ.