Чӑваш Енре килсӗр-ҫуртсӑр чӗрчунсен ыйтӑвӗ ҫивӗч. Хальхи вӑхӑтра хуҫасӑр кушаксемпе йытӑсене тытасси, вӗсене сиплесе унччен пурӑннӑ вырӑна ярасси – муниципалитетсен тивӗҫӗ.

Шупашкарта кун пек чӗрчусене усрамалли пункт пур-ха, анчах вӑл ҫителӗксӗр. Пунктсем татах кирлӗ. Ҫавна май республикӑра ҫӗнӗ пункт тума палӑртнӑ.

Шупашкар хула администрацийӗн пуҫлӑхӗ Алексей Ладыков пӗлтернӗ тӑрӑх, ӑна ҫитес ҫул тума тытӑнӗҫ. Вӑл Лапсар поселокӗ ҫывӑхӗнче, промзонӑра, пулӗ. Кун пирки Алексей Ладыков нумаях пулмасть ирттернӗ тӳрӗ линире пӗлтернӗ.

Пуш уйӑхӗн 26-мӗшӗнче каҫхине Ҫӗнӗ Шупашкарта «Химпромра» пушар тухнӑ. Чӑваш Ен прокуратури пӗлтернӗ тӑрӑх, ҫулӑм полимер савӑтсен тата хатӗр продукци складӗнче алхаснӑ.

Пушара сӳнтернӗ, никам та шар курман. Предприятире сиенлӗ япаласен сывлӑшри виҫине тӗрӗсленӗ. Хлор тата углерод оксичӗн виҫи нормӑран иртмен. Эппин, ҫынсен сывлӑхӗпе пурнӑҫӗшӗн хӑрушлӑх ҫук.

Ҫӗнӗ Шупашкар прокуратури ку ӗҫ тӗлӗшпе тӗрӗслев ирттерӗ, пушар мӗнрен тухнине уҫӑмлатӗ.

Чӑваш халӑх поэчӗ Валери Туркай, кӑҫалхи ака уйӑхӗн 17-мӗшӗнче хӑй ҫуралнӑранпа 60 ҫул ҫитнине паллӑ тума хатӗрленекенскер, поэзие юратакансене ҫӗнӗ кӗнеке парнелерӗ. Ку вӑл — сӑвӑҫӑн вырӑсла куҫарнӑ «Навсегда я выбрал этот путь» ятлӑ пуххи.

Чӑваш поэчӗн сӑввисене вырӑсла куҫаракансен йышӗнче паллӑ ту сумлӑ сӑвӑҫсем: Аристарх Дмитриев, Виктор Овчаров, Анатолий Смолин, Владимир Грибанов, Рита Кириллова (пурте Чӑваш Енрен), Юрий Щербаков (Аҫтӑрхан), Сергей Бирюковпа Евгений Степанов (иккӗшӗ те Тамбовран), Николай Михин (Питӗр), Анастасия Ермаковапа Анатолий Парщиков (иккӗшӗ те Мускавран).

Кӗнеке тиражӗ — 500 экземпляр. Унӑн хуплашкине Раҫҫей художникӗсен союзӗн пайташӗ Сусанна Григорян ӳкернӗ «Валери Туркай. Чӑваш халӑх поэчӗ» портрет илем кӳрет.

«Навсегда я выбрал этот путь» кӗнекене вулакан патне ҫитерме Комсомольски райӗнӗнчи Тукайра ҫуралса ӳснӗ паллӑ предприниматель тата меценат Геннадий Шурбин укҫа-тенкӗпе пулӑшнӑ.

Канаш тӑрӑхӗнчи «Канаш» тата «Канаш Ен» хаҫатсене тӗнче тетелӗнчи халӑх ушкӑнӗсенче йышлӑ вулаҫҫӗ. «Контактра» вӗсен 7,3 пин тус, «Пӗркласрисем» ушкӑнра — 5,6 пин, «Instagram»-ра — 5,3 пин. Унсӑр пуҫне «Яндекс Дзен»-ра тата Фейсбукра каналсем уҫнӑ. «ТикТокра» та хӑйсен тусӗсене шыраҫҫӗ.

Канаш район хаҫачӗн тӗп редакторӗ Людмила Шурекова тӗнче тетелӗсӗр хальхи вӑхӑтра май ҫук тесе шухӑшлать, ҫавӑнпа мӗнпур майпа тулли усӑ курма тӑрӑшнине пӗлтерет.

«Пичет кӑларӑмӗсен, сайтӑн, халӑх ушкӑнӗсен аудиторийӗ пачах расна. Апла пулин те эпир хыпарсене кашни патне ҫитерме тӑрӑшатпӑр. Ҫавӑн валли тӗрлӗ ҫӑлкуҫпа усӑ куратпӑр», — тенӗ Людмила Шурекова «Чувашинформ.рф» сайта.

Сӗнтӗрвӑрри районӗнчи Хуракасси шкулӗнче 60 ҫул каялла пулнӑ инкеке паян «Россия 1» телеканалта сӳтсе яврӗҫ. Андрей Малахов ертсе пыракан «Прямой эфир» передачӑн черетлӗ кӑларӑмне «Под грифом «секретно» ят панӑ. Унта федераци эксперчӗсем ҫеҫ мар, Чӑваш Енри ҫынсем те хутшӑнчӗҫ.

Пушарта 110 ҫын, ҫав шутра 106 ача, пурнӑҫӗ татӑлнӑ пулин те шӑв-шав кӑларман. Районтисем те пурте пӗлмен. Ҫӗршыв ятне ярас килмен тӗр. Ара, Совет Союзӗ тӗнче уҫлӑхне космос карапӗ вӗҫтернӗ саманапа пӗр килнӗ-ҫке ҫав тапхӑр.

Кӑларӑма хутшӑннисен йышӗнче Олег Залогин журналист, Сӗнтӗрвӑрри район администрацийӗн вӗренӳ тата ҫамрӑксен политикин пайӗн пуҫлӑхӗ Светлана Арсентьева, инкек вӑхӑтӗнче шкул директорӗнче ӗҫленӗ ҫыннӑн мӑнукӗн хӗрӗ тата ыттисем пулчӗҫ. Физика учителӗн ывӑлӗ каласа кӑтартнӑ истори те чуна ҫӳҫентермелле янӑрарӗ.

Вырӑнтисем шкул вырӑнӗнче часовня лартасшӑн. Ку енӗпе Виктория Лазич ресторатор пулӑшма шантарчӗ. Кӑҫалхи чӳк уйӑхӗн 5-мӗшӗччен (инкек 60 ҫул каялла ҫав кун пулнӑ) ӑна туса пӗтересшӗн.

elektro-sadovnik.ru сайтри сӑн

Ҫуркунне хӑҫан килет? Синоптиксем савӑнтараҫҫӗ: часах! «Чӑваш Енри ҫанталӑк» проект авторӗсем пӗлтернӗ тӑрӑх, ыран хӗвеллӗ, ӑшӑ пулӗ. Вырсарникун вара йӗпе юр, кӗрпе ҫӑвӗ.

Тунтикун каллех хӗвел пӑхӗ. Юнкун ҫил вӑйланӗ. Анчах кулянма кирлӗ мар, вӑл ӑшӑ ҫанталӑк илсе килет. Кун хыҫҫӑн ҫӗрлесерен те вӑйлах сивӗтмӗ.

Пушӑн 31-мӗшӗнче тата акан 1-мӗшӗнче ҫумӑр ҫӑвӗ. Вӑл канмалли кун тӗлне ҫеҫ ҫума чарӑнӗ. Кун хыҫҫӑн хӗвеллӗ ҫанталӑк пулӗ, термометр 15 градус таранах ӑшӑ кӑтартӗ. Ҫавна май ҫитес икӗ эрнере юр ирӗлсе пӗтӗ.

Синоптиксем пӗлтернӗ тӑрӑх, кӑҫал ейӳ вӑйлӑ пулма пултарать.

Улатӑрта пурӑнакан хӗрарӑм ашшӗн пистолетне полицие пырса панӑ. Пӑшала 1955 ҫул хыҫҫӑн туса кӑларнӑ.

Хӗрарӑм Руслан Думчев участковӑя килте ашшӗнчен юлнӑ Марголин пистолечӗ упранни пирки пӗлтернӗ. Вӑл саккуна пӑсса хӗҫ-пӑшал упранӑшӑн уголовлӑ майпа явап тыттарни пирки пӗлнӗ, ҫавӑнпа ӑна полицие пама шутланӑ.

Эксперт пӗтӗмлетнӗ тӑрӑх, Марголин пистолетне 1955 ҫул хыҫҫӑн туса кӑларнӑ. Колибрӗ – 5,6 миллиметр. Унпа халӗ те усӑ курма пулать.

Канаш районӗнчи хаҫатра ӗҫлекен Артемий Мясников журналиста «ТикТокра» аван пӗлеҫҫӗ. Халӗ унӑн — 89,5 пин подписчик. Цифра кунсерен ӳсет тесе пӗлтерет «Чувашинформ.рф» сайт. Артемий ку эрнере вырнаҫтарнӑ видеоролика ҫынсем 6,1 миллион хутчен пӑхнӑ.

Артем сюжетлӑ роликсем вырнаҫтарма кӑмӑллать. Чылай чухне юлташӗсемпе пӗрле ӳкерет. Унӑн видеороликӗсене хамӑр тӑрӑхри ҫынсем ҫеҫ мар, Казахстанри, Беларуҫри, Украинӑри тусӗсем те пӑхаҫҫӗ. Комментари ҫыракансем хушшинче Индонезири, Африкӑри, араб тата Ази ҫӗршывӗсенчи ҫынсем пур.

Хӑйӗн страниципе пӗрлех Артем «TikTok» хаҫат редакцийӗн аккаунтне те тытса пырать.

Чӑваш Енре пурӑнакансем ҫӑмӑллӑхлӑ ипотекӑпа усӑ курайӗҫ. Ҫӗнӗ программӑн условийӗпе каярах паллаштарӗҫ. Хальлӗхе ҫакӑ паллӑ. «ДОМ.РФ» акционер обществин генеральнӑй директорӗпе Виталий Муткопа тӗл пулнӑ хыҫҫӑн Чӑваш Ен Элтеперӗ Олег Николаев ҫӗнӗлӗх ҫак уйӑх вӗҫӗччен уҫӑмланассине пӗлтернӗ.

Регионти ҫӑмӑллӑхлӑ ипотека программи валли республика тата «ДОМ.РФ» ҫур миллиарда яхӑн тенкӗ уйӑрма хатӗр иккен. Пӗр ҫулта мар. 2024 ҫулччен. Программӑпа уйрӑм ҫурт-йӗр хӑпартма та усӑ курма май килессине шантараҫҫӗ.

Хальхи вӑхӑтра ҫӑмӑллӑхлӑ ипотекӑна 6,5 процент ставкипе параҫҫӗ.

cap.ru сайтри сӑн

Чӑваш Енре ҫурату сертфикатне электронлӑ формӑна куҫарма хатӗр. ЧР Сывлӑх сыхлавӗн министерстви пӗлтернӗ тӑрӑх, кунашкал сертификатсем тухтӑрсен, пациентсен пурнӑҫне ҫӑмӑллатаҫҫӗ.

Документа ача кӗтекен тата пепке ҫуратакан хӗрарӑмӑн электронлӑ харпӑр карттӑран хатӗрлӗҫ. Ку ҫурату сертфикачӗсен талонсен реестрне автомат режимӗпе тума май парать.

Кун пек документа пульницӑна пӗрле илсе каймалла мар. Сведенисем Социаллӑ страхлав фондӗнче, медицина организацийӗнче, страхланӑ ҫыннӑн харпӑр кабинетӗнче упранаҫҫӗ.