Юрий Лаврентьев тренер

Ҫурлан 17-мӗшӗнче Орел хулинче ухӑран перессипе иртнӗ Раҫҫей чемпионачӗ вӗҫленнӗ. Ӑмӑртӑва 25 регионти 179 ухӑҫӑ хутшӑннӑ.

Тупӑшу икӗ дисциплинӑра иртнӗ. Чӑваш Ен чысне Юрий Лаврентьев тренер тата Олимп резервӗсен ачасемпе ҫамрӑксен сӗтелҫи теннисӗ енӗпе И.Солдатова ячӗллӗ спорт шкулӗн вӗренекенӗсем Марина Кирилловӑпа Елена Елизарова хӳтӗленӗ.

РФ тава тивӗҫлӗ спорт мастерӗ Юрий Лаврентьев кӑшт ҫеҫ ылтӑн медаль илеймен. 55 ҫын хушшинче вӑл кӗмӗл медаль ҫӗнсе илнӗ. Ылтӑн медале Мускаври Алексей Бородкин тивӗҫнӗ. Виҫҫӗмӗш вырӑна Бурятири Юрий Германов тухнӑ.

Чемпонат пӗтӗмлетӗвӗпе килӗшӳллӗн, Юрий Лаврентьев ҫитес ҫул тӗнче шайӗнче иртекен ӑмӑртӑва хутшӑнмашкӑн Раҫҫейӗн пӗрлештернӗ командине кӗрӗ.

Владимир Селенин

Патӑрьел районӗнче ҫуралнӑ Владимир Васильевич Селенин 1967–1979 ҫулсенче Хӗрлӗ Чутай шкулӗнче ачасене вырӑс чӗлхине тата вӑй-хал культурине вӗрентнӗ. Ҫак хушӑра вӑл сахал мар спортсмен хатӗрленӗ.

Вӗрентекен хӑй те футбол вылякансен пӗрлештернӗ район командин пайташӗ пулнӑ. Владимир Селенин районта хоккей вӑййине аталантарассине те пысӑк тӳпе хывнӑ. Унӑн тӑрӑшулӑхне пула Кивӗ центрти чиркӳ ҫумӗнчи пӗве ҫинче хоккей площадки ӗҫленӗ. Ун ҫинче час-часах республикӑри хуласемпе районсен хоккеисчӗсем тӗл пулнӑ. Владимир Селенин ял спортсменӗсем хушшинче ҫичӗ-сакӑр хутчен республика чемпионӗ пулнӑ, виҫӗ хутчен Чӑваш Республикин Кубокне тивӗҫнӗ. Шел пулин те, паллӑ спортсменӑн пурнӑҫӗ вунӑ ҫул каялла ҫурлан 14-мӗшӗнче йывӑр чире пула 57 ҫулта татӑлнӑ.

Районти спорт ветеранӗсен канашӗ паллӑ спортсмена асӑнса ҫурлан 15-мӗшӗнче Питӗркассинчи «Спартак» стадионта мини-футбол выляс енӗпе турнир ирттернӗ.

Ӗнер Цюрих хулинче ҫӑмӑл атлетика енӗпе иртекен Европа чемпионачӗн виҫҫӗмӗш кунӗ вӗҫленнӗ. Раҫҫейӗн пӗрлештернӗ командин пухматӗнче — 3 ылтӑн, 1 кӗмӗл, 2 пӑхӑр медаль.

Ылтӑн медальсенчен пӗрине Анжелика Сидорова шӑчӑпа ҫӳллӗшне сиксе тивӗҫнӗ. Вӑл чемпионатра Чӑваш Ен тата Мускав чысне хӳтӗлет. Анжелика 4,65 метр ҫӳллӗшне сикнӗ.

Виҫҫӗмӗш кун иртсен Раҫҫейӗн пӗрлештернӗ команди виҫҫӗмӗш вырӑна ҫитнӗ. Паян старта Чӑваш Ен спортсменӗ Александр Яргунькин тухнӑ. Вӑл 50 ҫухрӑма утнӑ. Раҫҫейӗн пӗрлештернӗ командинче чӑваш спортсменӗсем татах пур: Михаил Рыжов тата Иван Носков.

Сӗнтӗрвӑрринче Андриян Николаев космоса пӗрремӗш хут ҫӗкленнине халалласа Атӑл урлӑ ишнӗ. Андриян Николаевич Поповичпа орбитӑра «Течет река Волга» юрра юрланӑ. Ҫавна май сӗнтӗрвӑррисем Атӑл урла ишсе каҫассине ҫулсерен йӗркелеҫҫӗ.

Кӑҫал унта 32 ҫын хутшӑннӑ. Ӑмӑрту пиллӗкмӗш хут иртнӗ. Чылайӑшӗ парне илессишӗн мар, вӑйне тӗрӗслессишӗн ӑмӑртать.

Атӑл Сӗнтӗрвӑрри ҫывӑхӗнче 1 ҫухрӑм сарлакӑш. Анчах юхӑмӗ вӑйлӑ. Ҫавӑнпа ӑмӑртуҫӑсен диагональпе ишме тивет.

Кӑҫал ӑмӑртуна триатлонпа туслӑ ҫамрӑк спортсменсем те хутшӑннӑ. Ҫӗнӗ Шупашкарти Евгений Степанов Атӑла 19 минут та 20 ҫеккунтра ишсе каҫнӑ. Ку — чи лайӑх кӑтарту. Михаил Андропов чи паттӑррисен йышне кӗнӗ. Протезпа ҫӳрекенскер Атӑла пӗрре мар ишсе каҫнӑ.

РФ Президенчӗ Владимир Путин халӑхсем хушшинче иртекен «Раҫҫей — спорт ҫӗршывӗ» спорт канашлӑвне Шупашкарта ирттерме йышӑнса Хушу алӑ пуснӑ. Кун пирки ЧР Элтеперӗ Михаил Игнатьев ҫурлан 7-мӗшӗнче пӗлтернӗ.

— Пирӗн тӗллев — ҫак мероприятие ҫӳллӗ шайра ирттересси, малашне хушма инвестицисем илсе спорт инфратытӑмне аталантарасси, — тенӗ Михаил Васильевич.

Канашлу Чӑваш Енре кӑҫалхи юпа уйӑхӗн 9–11-мӗшӗсенче иртӗ. Халӗ республикӑра Раҫҫейри пысӑк, пӗлтерӗшлӗ мероприятие — «Раҫҫей — спорт ҫӗршывӗ» спорт канашлӑвне — хатӗрленме тытӑннӑ.

Канашлу иртнӗ кунсенче Чӑваш Ене Раҫҫей правительствин пайташӗсем, Патшалӑх Думин депутачӗсем, министерство тата спорт управленийӗн ертӳҫисем, регионсен пуҫлӑхӗсем, Олимп комитечӗн, спорт федерацийӗсен элчисем, пысӑк компанисен директорӗсем, спорт «ҫӑлтӑрӗсем» килӗҫ.

Вӑрнарти каток ҫурчӗ

Физкультурниксен кунӗ умӗн Вӑрнар поселокӗнче «Кристалл» пӑр катокӗ уҫӑлнӑ.

Ӑна уҫнӑ ҫӗре ЧР Элтеперӗ Михаил Игнатьев, ЧР Патшалӑх Канашӗн комитет председателӗ Николай Малов, ЧР спорт министрӗ Сергей Мельников хутшӑннӑ. Михаил Васильевич пӑр катокӗ спортӑн хӗллехи тӗсӗсене аталанма пулӑшасса шанать. Ӑна хута ямашкӑн 135 миллион тенкӗ тӑкакланӑ. Йӑлтах — ачасемшӗн, ҫамрӑксемшӗн, аслӑ ӳсӗмрисемшӗн. Элтепер кунта ветерансем те сывлӑхне ҫирӗплетме килессе шанать.

Катока 2012 ҫул вӗҫӗнче тума тытӑннӑ. Унӑн лаптӑкӗ — 1800 тӑваткал метр. Вӗренӳ ҫулӗ пуҫлансан кунта хоккей тата эрешлесе ярӑнакансен уйрӑмӗсене уҫма палӑртнӑ. Секцисене Вӑрнар районӗнчи ачасем кӑна мар, ҫывӑхри районсенчисем те ҫӳреме пултарӗҫ.

Пӑр ҫине пӗрремӗш республикӑри хоккей воститанникӗсем, «Спартак» спорт шкулӗн вӗренекенӗсем тухнӑ. «Сокол — 2001» команда вара хоккей вылянӑ. Ыран вара, Пӗрлехи спорт кунӗнче, катока конькипе ярӑнма юратакансене чӗнеҫҫӗ.

Сӑнсем (36)

Чемпионат арени

Ҫӑмӑл атлетикӑн пӗтӗм Раҫҫейри федерацийӗ Швейцаринчи Цюрих хулинче иртекен Европа чемпионатне хутшӑнмалли наци ушкӑнне палӑртнӑ. Унта Раҫҫейӗн 92 спортсменӗ кӗнӗ. Йышра Чӑваш Енри 6 спортсмен та пур.

Наци комнадине лекнисем хушшинче — Александр Яргунькин (вӑл 50 километра хӑвӑрт утассипе тупӑшӗ), Вера Соколова (20 километра утӗ), Елена Наговицына (10 пин километра чупӗ), Анжелика Сидорова (шӑччӑ ҫинче сикӗ), Наталья Пучкова тата Альбина Майорова (иккӗшӗ те марфона чупӗҫ).

Европа чемпионачӗ ҫурлан 12-мӗшӗнчен пуҫласа 17-мӗшӗччен пырӗ.

2016 ҫулта Бразилири Рио-де-Женейро хулинче ҫуллахи Олимпиада иртӗ. Унта Чӑваш Ени 38 спортсмен — ҫӑмӑл атлетсем, йывӑр атлетсем, ирӗклӗ кӗрешӳҫӗсем, спорт гимнасчӗсем, велосипедистсем — кайма пултарӗҫ.

Республикӑра спортсменсене ҫитес Олимп тата Паралимп вӑййисене хатӗрлес ыйтӑва сӳтсе явнӑ. ЧР спорт министрӗ Сергей Мельников пӗлтернӗ тӑрӑх, хальлӗхе унта хутшӑнма пултаракан спортсменсен списокне Чӑваш Енри 38 ҫын кӗнӗ. Ӑна РФ Спорт министерстви 2013 ҫулхи кӑтартусемпе килӗшӳллӗн ҫирӗплетнӗ.

Лондонра иртнӗ Олипиадӑра пирӗн атлетсем икӗ тӗсре — ҫӑмӑл атлетикӑра тата маунтинбайкра — ҫеҫ тупӑшнӑ-тӑк ҫитессинче спортӑн 5 тӗсне хутшӑнма пултарӗҫ.

Ларура Раҫҫейӗн пӗрлештернӗ командине кӗнӗ 15 спортсмен 2015 ҫулхи кӑрлачран пуҫласа 30 пин тенкӗ стипенди илме тытӑнӗҫ. Резерври 10 спортсмен вара 15 пин тенкӗ илсе тӑрӗ. Паралип вӑййисене хутшӑнма пултаракансене те стипенди парӗҫ.

Вера Соколова спортсменка

Чӑваш Ен спортсменкине Вера Соколовӑна хисеплӗ ят панӑ. Халӗ Вера — РФ тава тивӗҫлӗ спорт мастерӗ. Хушӑва ҫак кунсенче РФ спорт министрӗ Виталий Мутко алӑ пуснӑ.

Вера Соколова Муркаш районӗнчи Анаткас Апаш ялӗнче ҫуралса ӳснӗ. Хӑвӑрт утассипе шкулта вӗреннӗ чухнех кӑсӑкланма тытӑннӑ. Ун чухне ӑна Аверкий Васильев тренер вӗрентнӗ.

Вера Соколова Тӗнче тата Европа кубокӗсенче пӗрре мар ҫӗнтернӗ. Чылай вӑхӑт юниорсем хушшинче тӗнче рекордсменӗ пулнӑ. Юлашки вӑхӑтра вӑл хӑйӗн ӑсталӑхне Олимп хатӗрленӗвӗн В.Чегин ячӗллӗ центрӗнче туптать.

Халӗ Вера ҫӑмӑл атлетика енӗпе иртекен Европа чемпионатне хатӗрленет. Вӑл кӑҫал ҫурла уйӑхӗнче Швейцарири Цюрих хулинче пулӗ.

Шупашкарта хӑпартакан пӑр керменне черетлӗ хут Чӑваш Енӗн Премьерӗ Иван Моторин тата Стройминӗн министрӗ Олег Марков тӗрӗслесе кайнӑ. Ӑна юпа уйӑхӗнче туса ҫитерме планлаҫҫӗ пулин те ӗҫӗ кунта пайтах мӗн.

Хальхи вӑхӑтра тимӗр каркаса туса ҫитернӗ, ҫурт сийӗсене вырнаҫтарса тухнӑ, тӑррине витнӗ. Унсӑр пуҫне подрядпа ӗҫлекен организацисем шыв тата пӑх-шӑк пӑрӑхӗсене хурса тухнӑ, ҫутӑ кӗртнӗ. Ӑшӑпа тивӗҫтерекен пӑрӑхсене вырнаҫтарассин пӗтӗм ӗҫ калӑпӑшӗнчен 95% тунӑ. Котельнӑйпа трансформатор подстанцине туса ҫитернӗ, урапасем лартмалли лаптӑкра асфальт сараҫҫӗ. Уйрӑмах нумай тумалли ӗҫсем шутне пӑр керменӗ ҫывӑхӗнчи лаптӑка хӑтламаллине кӗртмелле — ӑна хальлӗхе 20% кӑна пурнӑҫланӑ.

Юпа уйӑхӗнче пӑр керменӗ ӗҫлеме пуҫламаллине шута илсе тӗрӗслев хыҫҫӑн ӗҫе хӑвӑртлатас тесе хушма строительство организацийӗсене явӑҫтарма йышӑннӑ. Рабочисен йышне те пысӑклатмалла. Хальхи вӑхӑтра пӑр керменне тӑвассипе 22 организаци ӗҫлет, рабочисен йышӗ — 382 ҫын.

Пӑр керменӗ «Олимп» стадионӗнче вырнаҫнӑ, вӑл 7 300 вырӑнлӑ пулӗ.

Малалла...