t.me/pro_cheby каналтан илнӗ сӑнӳкерчӗк

Шупашкарта такамсем Атӑл хӗрринчи бинокле ватнӑ. Ӑна ватнипех ҫырлахман, унӑн линзине вӑрланӑ. Ҫакӑн пирки эпир Телеграмри каналсенчен пӗринче пӗлтернӗ тӑрӑх хыпарланӑччӗ. Паян асӑннӑ ҫӑлкуҫра урӑхларах пӗлтернӗ.

Бинокльсене пуҫтахсем ватман иккен. Яваплисем линзӑна тасатас тенӗ. Халӗ вӗсене хӑйсен вырӑнне вырнаҫтарса хунӑ. Хула ҫыннисемпе хӑнисем бинокль витӗр пӑхса Атӑл илемӗпе киленме пултараҫҫӗ.

«Творческий город» (чӑв. Пултарулӑх хули) автономи учрежденийӗнче пӗлтернӗ тӑрӑх, кивелнӗ линзӑсене утӑ уйӑхӗн 6-мӗшӗнче сӳтсе кайнӑ. Вӗсене тусантан тасатнӑ хыҫҫӑн утӑ уйӑхӗн 10-мӗшӗнче ҫӗнӗрен вырнаҫтарса хунӑ.

gcheb.cap.ru сӑнӳкерчӗкӗ

Шупашкар хулинче пӗрисем ҫӗре хӑйсем тӗллӗн ярса илнӗ.

Мате Залка урамӗнчи 12/3-мӗш ҫурт патӗнчи территори тавра тимӗр карта тытса ҫавӑрнӑ, шлагбаум вырнаҫтарнӑ. Ют ҫынсем ҫурт патне пырса кӗресрен карта ҫине «Частная территория» (чӑв. Уйрӑм ҫын территорийӗ) тесе ҫырса ҫапнӑ.

Тимӗр картана тытнӑ мӗнпур ҫӗр асӑннӑ ҫурт ҫумӗнчи лаптӑк та шутланмасть иккен. Ҫӗрӗн пӗр пайӗн хуҫи — муниципалитет.

Саккуна пӑсса ярса илнӗ ҫӗр тӗлӗшпе хула администрацийӗ суда ҫитнӗ. Чӑваш Енӗн Арбитраж сучӗн йышӑнӑвӗпе килӗшмесӗр ҫуртӑн управляющи компанийӗ Пӗрремӗш арбитраж аппеляци судне ҫитнӗ. Унтисем те малтанхи йышӑнӑвах вӑйра хӑварнӑ. Ҫывӑх вӑхӑтра управляющи компанин тимӗр картана сӳтме тивӗ.

«Шупашкарти хыпарсем» (выр. «Чебоксарские новости») хаҫата халӗ урӑх ҫын ертсе пырать. Вӑл – 30 ҫулти Елена Леонтьева.

Унччен унта Лариса Буланкина тӗп редактор пулнӑ. Ҫу уйӑхӗнче ӑна тивӗҫлӗ канӑва ӑсатнӑ.

Елена Леонтьева – Мусквран, Леонтьевсен продюсер центрӗнче ӗҫленӗ. Ку эрнекун тухнӑ хаҫатра тӗп редактор хаҫатран хальхи йышши медиацентр тӑвасси пирки пӗлтернӗ.

forum.na-svyazi.ru сӑнӳкерчӗкӗ

Шупашкар хулинчи тӳре-шара ҫамрӑксене мунча кӗртесшӗн. Тӗрӗсрех каласан, муниципалитетӑн мунчисем ҫинчен халӑх тетелӗсем урлӑ ытларах каласа кӑтартасшӑн.

Шупашкарта паян муниципалитетӑн 8 мунчи ӗҫлет. Вӗсенче пӗр харӑс 450 ытла ҫын ҫӑвӑнма пултарать.

«Сывлӑх» акционерсен обществи кӑҫалхи ҫур ҫулта 52,05 млн тенкӗ ӗҫлесе илнӗ, ку вӑл пӗлтӗрхи ҫав тапхӑртинчен 18 процент нумайрах.

«Мунча кӗмелли хаксене хӑйхаклӑхне кура йӗркелеҫҫӗ. Хальхи вӑхӑтра хак 300-310 тенкӗ тӑрать. 14 ҫула ҫитмен шкул ачисемшӗн 190 тенкӗ тӳлемелле, пенсионерсен — 290 тенкӗ (ку вӑл эрне варринчи хак). 7 ҫулчченхи ачасемшӗн — тӳлевсӗр.

lyubimiigorod.ru сайтри сӑн

Шупашкарта пурӑнакан 32 ҫулти хӗрарӑм мессенджерта пуҫлӑхӗнчен ҫыру килнӗ тесе ӗненнӗ те питӗ пысӑк укҫа ҫухатнӑ.

Ҫырура "пуҫлӑх" унӑн йӗрке хуралҫисемпе тата банк ӗҫченӗсемпе калаҫмаллине пӗлтернӗ. Хӗрарӑма номер пуҫлӑхӑн пулманни те, унӑн сӑнӳкерчӗкӗ ҫукки те иккӗлентермен.

Кӗҫех ун патне шӑнкӑравланӑ. Палламан ҫын пӗлтернӗ тӑрӑх, хӗрарӑмӑн счечӗсене такам тапӑннӑ, ҫавӑнпа кредит илсе укҫана "хӑрушсӑр счет" ҫине куҫармалла имӗш. Хӗрарӑм вӑл каланине итлесе кредит илнӗ 2 миллион тенке ултавҫӑ счечӗ ҫине куҫарнӑ.

ilinsk.ru сайтри сӑн

Улатӑрти 64 ҫулти хӗрарӑм пухнӑ 2 миллион та 950 пин тенкине кӑна мар, кредит илнӗ 200 пин тенке те ултавҫа куҫарса панӑ.

Ун патне палламан хӗр шӑнкӑравланӑ. Вӑл Тӗп банк ӗҫченӗ имӗш. Хайхискер хӗрарӑма такам унӑн харпӑр кабинетне кӗнине, счет ҫинчи укҫа ҫухалма пултарассине каланӑ. Ӑна упраса хӑварас тесен урӑх счет ҫине куҫармалла-мӗн.

Хӗрарӑм банка кайса хӑйӗн укҫине, 2 млн та 950 пин тенке, илнӗ. Кунсӑр пуҫне хваттер юсама кирлӗ тесе банкран 200 пин тенкӗ илнӗ. Ҫапла вӑл ултавҫа 3 млн тенкӗ ытла куҫарса панӑ.

t.me/pro_cheby каналти видеоран илнӗ сӑнӳкерчӗк

Тӗнче тетелӗпе халӑх тетелӗсем вӑйлӑ аталаннӑ саманара ҫынсем йӑлтах кураҫҫӗ-илтеҫҫӗ, пӗлеҫҫӗ-вулаҫҫӗ ҫеҫ мар, хӑйсене тӗлӗнтерекен пулӑмсене тӳрех ӳкерсе е ҫырса илеҫҫӗ. Хӑйсем пӗлнипех ҫырлахмаҫҫӗ, халӑх тетелӗсем урлӑ ыттисем патне те ҫав хыпара ҫитерме васкаҫҫӗ.

Телеграмри каналсенчен пӗринче хыпарланӑ тӑрӑх, Шупашкарти 1-мӗш троллейбус водителӗ ҫула тухсан пирус туртса тата телефонпа калаҫса пынӑ.

...Хулари маршруткӑсен водителӗсем ҫул ҫинче телефонпа калаҫса пынинчен пирӗнтен чылайӑшӗ тӗлӗнме пӑрахнӑ пулӗ. Ялсене ҫӳрекен автобуссемпе маршруткӑсен водителӗсем руль умӗнче пирус туртса пынине те хӑнӑхрӑмӑр пулӗ. Анчах троллейбус водителӗсем пирус туртни тата телефонпа калаҫни тӗлӗнтерме пӑрахман иккен.

cheb-centr.soc.cap.ru сӑнӳкерчӗкӗсемпе усӑ курса курнӑ

Ырӑ кӑмӑллӑ ҫынсем ватӑлсан та ҫавӑн пекех тӑрса юлаҫҫӗ. Вӗсем шӳтлесе кулма, хавасланса савӑнма пӗлеҫҫӗ, кирлӗ-кирлӗ маршӑн тарӑхса ҫӳремеҫҫӗ. Шупашкарти халӑхӑн социаллӑ ыйтӑвӗсене тивӗҫтерекен центрӑн «кӗмӗл» волонтёрӗсем пирки те ҫавнах калама пулать.

Хастар ватӑсем паян хулари 127-мӗш ача пахчине ҫӳрекен шӑпӑрлансемпе тӗл пулнӑ. Центр ӗҫченӗсем ку тӗлпулу тӗллевне ачасене спортпа, сывӑ пурнӑҫ йӑли-йӗркипе паллаштарасси тесе палӑртнӑ-ха. Ватӑсем ҫак ӗҫе хӑйне май йӗркеленӗ. Вӗсем шӑпӑрлансемпе Сывлӑх сукмакӗ тӑрӑх утнӑ, тренажёрсем ҫинче тӗрлӗ хускану тунӑ. Унтан ачасемпе пӗрле асфальт ҫинче тӗрлӗ тӗслӗ пурӑпа ӳкернӗ.

«Тӗлпулу калама ҫук хаваслӑ иртрӗ», – тесе палӑртнӑ ушкӑнри чи аслӑ кинемей, 85 ҫулти Зинаида Васенёва. Вӑл, сӑмах май каласан, ӗмӗрӗпех учитель пулса ӗҫленӗ.

"Лиза Алерт" сайтри сӑн

Ҫӗнӗ Шупашкарта 15 ҫулти хӗрача килтен тухса кайнӑ та таврӑнман. Ӑна "Лиза Алерт" хастарӗсем те шыраҫҫӗ.

Хӗрача сывах мар, ӑна тухтӑрсен пулӑшӑвӗ кирлӗ. Килтен тухса кайнӑ чухне кӑвак кӗпе, хура футболка, сӑрӑ тӗслӗ джинс шӑлавар, ҫутӑ пушмак тӑхӑннӑ пулнӑ. Хӑйӗнпе хура сумка илнӗ.

Хӗрачана курнӑ е ун пирки мӗн те пулин пӗлетӗр тӗк ҫак номерсемпе шӑнкӑравламалла: : 8(800)700-54-52, 112 е 89520203557

ШӖМ тунӑ сӑн

Паян 12 сехет те 15 минутра Шупашкарти Ҫамрӑклӑх бульварӗнчи 2-мӗш ҫурт патӗнче ача «зебра» патӗнче ҫур урлӑ каҫма тӑнӑ та машина айне лекнӗ. Ку инкек 10 ҫулти хӗрачапа пулнӑ.

Суранланнӑскере пульницӑна илсе кайнӑ. ШӖМ пӗлтернӗ тӑрӑх, ача ҫине кроссовер, «Киа» машина, пырса кӗнӗ. Ведомство аслисене ачасемпе ку ыйтупа калаҫма ҫине тӑрсах ыйтать. «Хӑвӑр та тимлӗ пулӑр!» - асӑрхаттарнӑ ШӖМ.