ҪҪХПИ тунӑ сӑн

Электросамокатсем каллех Шупашкар урамӗсене тухса ларнӑ. Унпа ҫӳрекен ҫын нумай.

Ӗнер 22 сехет те 5 минутра Миттов бульварӗнчи 20-мӗш ҫурт картишӗнче 42 ҫулти водитель электросамокатпа пыракан 36-ри арҫын ҫине пырса кӗнӗ. Иккӗмӗшӗ аманнӑ. Ӑна медпулӑшу парсан киле янӑ.

Патшалӑх автоинспекцийӗ пӗлтернӗ тӑрӑх, ҫулталӑк пуҫланнӑранпа электросамокатсемпе ҫыхӑннӑ 6 авари пулнӑ. Вӗсенче 3 ҫын аманнӑ.

24newnews.ru сайтри сӑн

Пӗрре ирхине Ҫӗнӗ Шупашкарта хӗрача амӑшне вӑратнӑ: вӑл хӑйне япӑх туять-мӗн, хӑстарать. Хӗрарӑм пӳртре газ шӑрши кӗнине туйнӑ. Аялти хутра ҫывӑракан тепӗр 5 ачи те газпа наркӑмӑшланма пултарнине тӳрех шутласа илнӗ.

Чи малтан вӑл васкавлӑ медпулӑшу чӗннӗ. Хӗрарӑм тухтӑрсем ҫитиччен пӗтӗм чӳречене уҫнӑ. Анчах 4-14 ҫулсенчи хӗрачасем пурпӗрех газ сывласа ӗлкӗрнӗ. Вӗсен сывлӑхӗ йывӑр пулнӑ. Пӗррери хӗрача ыттисенчен сахалрах сиенленнӗ.

Халӗ ачасем хӑйсене лайӑхах туяҫҫӗ, Республикӑри ача-пӑча клиника пульницинче сипленеҫҫӗ.

cap.ru сӑнӳкерчӗкӗ

Ака уйӑхӗн 30-мӗшӗнче Шупашкарти "Байконур" микрорайонти Кӑкшӑм пӗви ҫывӑхӗнче хӑйне евӗр ӑмӑрту иртӗ. Унта хутшӑнакансем ҫӳп-ҫап пуҫтарса уншӑн балл илӗҫ. Ҫӗнтерӳҫӗсемпе призерсене парнесемпе хавхалантарӗҫ.

Конкурс "Таса вӑйӑ" ятлӑ. Унта хутшӑнас тесен 1-2 ҫынран тӑракан командӑна регистрацилемелле. Кӑкшӑм пӗвинчи ятарлӑ конкурса та хутшӑнма май пулӗ. "Крокодилсене тытни" ятлӑскерте пӗвере шинӑсем тытмалла.

Юлашкинчен вӗри апатпа хӑналӗҫ.

"Про Город" сайтӗнчи сӑн

Мускаври "Халӑх фрончӗн" хастарӗсем Шупашкара килнӗ. Вӗсем Чантӑр ҫывӑхӗнче тума хатӗрленнӗ крематори вырӑнне тӗрӗсленӗ. Аса илтерер: унта пурӑнакансем крематори тӑвассине хирӗҫ. Вӗсем каланӑ тӑрӑх, ку вӗсен сывлӑхӗшӗн сиенлӗ пулӗ.

Хастарсем вырӑнти влаҫпа пӗрле Шупашкарти кӑнтӑр-хӗвеланӑҫ районне те ҫитсе курнӑ. Унти халӑх унччен маларах РФ Президенчӗ Владимир Путин патне видеоҫӑхав янӑ: унта ҫӗнӗ ҫуртсем тӑвассишӗн ӗмӗрхи юмансене касаҫҫӗ.

"Про Город" сайтӗнчи сӑн

Ҫӗнӗ Шупашкарта ҫурт стени ҫине Совет Союзӗн Паттӑрӗн портретне ӳкереҫҫӗ. Спутник хулара пурӑнакансенчен чылайӑшне килӗшет вӑл.

Винокуров урамӗнчи 26-мӗш "а" ҫурт стени ҫинче Вячеслав Винокуровӑн портречӗ пулӗ. Вӑл — 30 метр ҫӳллӗш. Портрета кӗҫех ӳкерсе пӗтерӗҫ.

Сӑмах май, Шупашкарти Хевеш урамӗнчи ҫурт ҫинче Андриян Николаевӑн портретне ӳкернӗ.

Шупашкарта кӗҫех фонтансем ӗҫлеме тытӑнӗҫ. Урамсене илем кӳрекен тата халӑха савӑнтаракан ҫав вырӑнсем ҫу уйӑхӗн 1-мӗшӗнче ӗҫлесе кайӗҫ. Кун пирки хула администрацийӗнче пӗлтернӗ. Атӑл кӳлмекне вара акӑшсем илсе кайса ярӗҫ.

Иртнӗ ҫул хулара 14 фонтан ӗҫленӗ, вӗсене юпа уйӑхӗн 1-мӗшӗнче ӗҫлеме чарнӑ.

Шупашкар хули ҫывӑх вӑхӑтра татах та илемленсе кайӗ. Вӑл республика хӑнисене те килӗшет.

Шупашкарта ака уйӑхӗн 29-мӗшӗнче «Йытӑсен парачӗ» социаллӑ мероприяти ирттереҫҫӗ. Ӑна килсӗр чӗрчунсен ҫивӗч ыйтӑвне ҫӗклес тесе йӗркелеҫҫӗ.

Мероприяти кӳлмекре «Юрӑ уйӗнче» пулӗ. Парада хутшӑнас тесе проект сайтӗнче регистрациленмелле.

Мероприяти пуҫланиччен, 10 сехетре, регистраци пуҫланӗ. Кайран йытӑсемпе хуҫисем «Юрӑ уйне» кайӗҫ. 10 сехет ҫурӑра концерт пуҫланӗ.

cap.ru сӑнӳкерчӗкӗ

Шупашкарта паянтан нумай хваттерлӗ ҫуртене ӑшӑ парса тӑма пӑрахӗҫ. Кун пирки хула администрацийӗн пуҫлӑхӗ Денис Спирин пӗлтернӗ, ҫавӑн ҫинчен калакан ятарлӑ йышӑнӑва алӑ пусса ҫирӗплетнӗ.

Ӑшӑ пама пӑрахнӑ хыҫҫӑн ӑшӑпа тивӗҫтерекен организацисем черетлӗ сезона хатӗрленме тытӑнӗҫ. Ҫавна май вӗри шыва вӑхӑтлӑха сӳнтерӗҫ.

Вӗри шыва хӑш-пӗр ҫуртра ҫу уйӑхӗн 10-мӗшӗ хыҫҫӑнах сӳнтерӗҫ, ятарлӑ графика хатӗрлесе хунӑ ӗнтӗ.

Амӑшӗпе ачи Шупашкарти Граждан урамӗнчи 5-мӗш ҫурт ҫывӑхӗнче уҫӑлса ҫӳренӗ чухне чутах инкеке лекмен. Вӗсене пирӗштисем сыхланӑ тейӗн.

Вӗсем акан 18-мӗшӗнче каҫхине уҫӑлса ҫӳренӗ. Тӑрук вӗсенчен темиҫе сантиметрта кирпӗч катӑкӗсем ӳкнӗ. Хӗрарӑм часрах ачана подъезд тӑрри айне, хӳтте, йӑтса кайнӑ.

Ҫав ҫуртра 12-мӗш хутра специалистсем кондиционер вырнаҫтарнӑ иккен.

news.1777.ru сайтри сӑн

Шупашкарта пурӑнакан 89 ҫулти кинемей те ултавҫӑсен серепине лекнӗ. Вӑл пӗтӗм уҫине палламан ҫынна куҫарса панӑ. Укҫине вара вӑл самаях пухнӑ - 1,5 миллион тенкӗ.

Ун патне банк ӗҫченӗ шӑнкӑравланӑ имӗш. Вӑл пӗлтернӗ тӑрӑх, такам кинемейӗн счечӗпе усӑ курасшӑн. Палламан ҫын ватӑскере ҫав нӗрсӗре тытма пулӑшмашкӑн ыйтнӑ. Кинемейӗн укҫине урӑх счет ҫине куҫармалла-мӗн. Пӗтӗм укҫине куҫарса парсан тин ватӑ ҫын ултавҫӑпа калаҫнине ӑнланнӑ.

Кун тӗлӗшпе пуҫиле ӗҫ пуҫарнӑ.