ШӖМ тунӑ сӑн

Раштавӑн 7-мӗшӗнче ирхи 4 сехетре Патшалӑх автоинспекцийӗн инспекторӗсем Шупашкарта Вӑрнар ҫулӗпе пынӑ чухне ҫӑва патӗнче арҫын утнине асӑрханӑ. Мӗн туса ҫӳренӗ-ха вӑл тӗттӗмре масар ҫывӑхӗнче?

Инспекторсем чарӑннӑ. Ҫак 32 ҫулти арҫын наркотик витӗмӗнче пулни палӑрнӑ. Ун ҫумӗнче 450 грамм наркотик тупнӑ. Вӑл ӑна тин кӑна вӑрттӑн вырӑнтан илнӗ. Ун ҫумӗнче тупнӑ наркотик - 1,3 миллион ытла тенкӗлӗх.

Арҫын темиҫе уйӑх наркотик тутаннине каланӑ. Ун тӗлӗшпе пуҫиле ӗҫ пуҫарнӑ. Пысӑк виҫепе наркотик туяннӑшӑн 20 ҫул таран ирӗксӗр хӑварма пултараҫҫӗ.

cap.ru сӑнӳкерчӗкӗ

Ҫемьене ҫӗнӗ кайӑк килсен ӑна кашниех илемлӗ ят пама тӑрӑшать. Шупашкар хулинчи Мускав районӗн ЗАГСӗнче пӗлтернӗ тӑрӑх, хӑйсен ачисене Араслан тата Леван ят паракансем те тупӑннӑ.

Пӗтӗмӗшле илсен ҫапах та хӑйсен-ывӑл-хӗрне ытларахӑшӗ Анастасия тата Александра, Михаил тата София тесе чӗнме кӑмӑллать.

Маларах асӑннӑ Арасланпа Леван вара ҫак кунсенче ҫут тӗнчене килнӗ. Чӳк уйӑхӗн 24-мӗшӗнче — Леван, чӳк уйӑхӗн 30-мӗшӗнче — Араслан.

"Википиедия" сайтри сӑн

Шупашкарти Ленин районӗн администрацийӗнчи ЗАГС пайӗнче хӑйне евӗр ята регистрациленӗ. Ӑна ашшӗ-амӑшӗ тин ҫуралнӑ ывӑлне панӑ. Арҫын ачана Эней тесе чӗнеҫҫӗ.

«Эней» Авалхи Греци чӗлхинчен куҫарсан «паттӑр» тенине пӗлтерет. Авалхи Греци мифологийӗнче Эней Троян вӑрҫин паттӑрӗ пулнӑ.

Ҫак ят питӗ сайра тӗл пулать. Шупашкарти Ленин районӗн администрацийӗн ЗАГС пайӗнче кунашкаллине пӗрремӗш хут регистрациленӗ.

t.me/nikamran каналта вырнаҫтарнӑ сӑнӳкерчӗк

Шупашкарти ҫурма ротондӑна историпе культура палӑкӗсен йышне кӗртнӗ. Кун пирки Телеграмри каналсенчен пуринчен хыпарланӑ.

Сӑмах Юрату сӑмсахӗнче вырнаҫнӑ архитектура сооруженийӗ пирки пырать. Телеграмри «Пуринчен малтан. Ҫывӑрса юлмасан» каналта пӗлтернӗ тӑрӑх, ҫурма ротондӑна чӑваш архитекторӗ Феофан Сергеев 1955 ҫулта хӑпартнӑ.

Инкеклӗ лару-тӑру министерстви сайтри сӑн

Паян Шупашкарта ҫӑлавҫӑсем Атӑлта пӑр айне анса кайнӑ арҫынна пулӑшнӑ. Ку пӑтӑрмах юханшывӑн сылтӑм енче 10 сехетре насос станцийӗнчен инҫех мар пулса иртнӗ.

Арҫын ҫыран хӗрринчен 300 метр аякра пӑр айне анса кайнӑ. Ҫакна курнӑ ҫынсем тӳрех ҫӑлав службине шӑнкӑравланӑ. Вырӑна чи малтан Сергей Орлов тата Павел Самочков ҫитнӗ. Вӗсем Инкеклӗ лару-тӑру министерствин ГИМС центрӗн инспекторӗсем.

Пӑрлӑ шывран туртса кӑлариччен арҫын шӑнса кӳтнӗ, вӑйран кайнӑ. Ӑна ҫӑлсан тухтӑрсен аллине панӑ.

nsk.rbc.ru сайтри сӑн

Шупашкарта пурӑнакан 33 ҫулти арҫын пӗлтӗр раштав уйӑхӗнчен пуҫласа кӑҫалхи кӑрлаччен халӑх тетелӗнче страница уҫнӑ та унта арӑмӗн ҫарамасланса ӳкерӗннӗ сӑнӳкерчӗкӗсене вырнаҫтарнӑ. Хӗрарӑм ҫав вӑхӑт тӗлне унран уйрӑлма хут ҫырнӑ пулнӑ.

Арҫын ҫак сӑнӳкерчӗксене арӑмӗн пиччӗшӗ патне те ярса панӑ. Ҫакна вӑл, ахӑртнех, кӗвӗҫнипе, куҫман пурлӑх пайланӑ чухне кӳреннипе тунӑ. Сӑнӳкерчӗксене ӑҫтан илнӗ-ха вӑл? Арӑмӗпе иккӗшӗ ҫырӑннӑ чухне ярса панисем пулнӑ.

Тӗнче тетелӗнче порнографи материалӗсене сарнӑшӑн 2-6 ҫул таран тӗрмене лартма пултараҫҫӗ.

big-rostov.ru сайтри сӑн

Ҫӗнӗ Шупашкарта пурӑнакан арҫын, слесарьте ӗҫлекенскер, мессерджерта килнӗ хыпара ӗненсе 1 миллион ытла тенкӗсӗр тӑрса юлнӑ. Вӑл укҫана ултавҫӑсене куҫарса панине виҫӗ кунран тин ӑнланнӑ. Арҫын полицие кайса кун пирки каласа кӑтартнӑ. Йӗрке хуралҫисем ку тӗслӗх тӗлӗшпе пуҫиле ӗҫ пуҫарнӑ.

Шупашкарти 20-ри студент вара пӗлтӗр чӳк уйӑхӗнче мессенджерти хыпара ененсе «пысӑк биржӑна» инвестици хывнӑ. Вӑл ун чухне 300 ытла пин тенкӗ куҫарнӑ. Студент тупӑш килессе кӗтнӗ. Анчах нимӗнле укҫа та пулман. Вӑл халь тин, ҫулталӑк ҫитсен, полицие пырса заявлени ҫырнӑ.

www.cap.ru сӑнӳкерчӗкӗ

«Чӑваш Енӗн спорт легендисем» музей ҫӗнӗ экспозиципе пуянланнӑ. Асӑннӑ музей «Шупашкар Арена» пӑр керменӗнче вырнаҫнӑ.

Спорткомплексӑн иккӗмӗш хутӗнче республикӑн тӗп спорт ведомствин ертӳҫисенче ӗҫленӗ ҫынсен сӑнӗсен портрет галерейине вырнаҫтарнӑ. Спорт ведомствине пирӗн республикӑра, сӑмах май каласан, 1923 ҫулхи ҫӗртме уйӑхӗн 27-мӗшӗнче йӗркеленӗ. Ӑна физкультурӑн облаҫри канашӗ тенӗ.

Чӑваш Енӗн Спорт министрествинче пӗлтернӗ тӑрӑх, музей кӑҫал спортсменсен спорт экипировкисемпе тата наградисемпе пуянланнӑ.

Шупашкар хулин халӑхӑн социаллӑ ыйтӑвӗсене тивӗҫтерекен комплекслӑ центрта йывӑр лару-тӑрӑва лекнӗ хӗрарӑмсене те пулӑшаҫҫӗ. Унта упӑшкисемпе уйрӑлма тӑнӑ, анчах ниҫта кайма аптӑракан хӗрарӑмсем те, ҫул ҫитмен амӑшӗсем те пулӑшу ыйтса пыраҫҫӗ.

Центрӑн психологӗ тренингсем ирттерет, ытти енӗпе пулӑшать. Хӗрарӑмсем центрта виҫӗ уйӑх аран пурӑнма пултараҫҫӗ.

Йывӑрлӑхри хӗрарӑмсене пулӑшакан уйрӑм Шупашкарти Хусанкай урамӗнчи 29а ҫуртра вырнаҫнӑ. Унӑн телефон номерӗ +7 (8352) 53-42-94.

skidki-2023.ru сӑнӳкерчӗкӗ

Шупашкарти ача пахчисенчен пӗринпе юнашар пирус туртмалли сутакан лавкка ӗҫленӗ. Хулари Гагарин урамӗнчи 36-мӗш ҫуртра вырнаҫнӑскерпе юнашарах тенӗ пек ача пахчи пур.

Табак таврашне, никотинлӑ япаласене, чӑмламалли табак сутакан точкӑсене ача пахчисемпе шкулсен ҫывӑхӗнче уҫма юрамасть. Асӑннӑ лавкка 74-мӗш ача пахчинчен 39 метрта вырнаҫнӑ. Нормӑпа килӗшӳллӗн 100 метртан ҫывӑхра пулмалла мар.

Усламҫӑ тӗлӗшпе прокуратура административлӑ ӗҫ пуҫарнӑ, ӑна 5 пин тенкӗ штраф тӳлеттернӗ. Ҫывӑх вӑхӑтра лавккана хупасшӑн. Ӗҫе суда ярса панӑ.