Шупашкарта 11 ҫулти арҫын ача ҫухални пирки пӗлтернӗччӗ. Ӑна ака уйӑхӗн 11-мӗшӗнченпе шыранӑ. Халӗ тупнӑ. Телее, вӑл чӗрӗ-сывах.

Арҫын ачана "Таможня" чарӑну ҫывӑхӗнчи "Пятерочка" лавккара тупнӑ.

Сӑмах май, вӑл ҫухалсан следстви органӗсем пуҫиле ӗҫ пуҫарнӑ.

orbsteppe.ru сайтри сӑн

Шупашкарта пурӑнакан хӗрарӑмӑн телефонӗ ҫинче реклама тухма пуҫланӑ. Пӗрре вӑл ӑна хупас тесе тӑнӑ та ун патне палламан арҫын шӑнкӑравланӑ. Вӑл пысӑк энергокомпанирен имӗш. Хайхискер инвестици хывма сӗннӗ. Икӗ кун ӳкӗтлесен хӗрарӑм килӗшнӗ - 1 пин куҫарнӑ. Ун хыҫҫӑн ун патне 8 пин куҫнӑ. Кун хыҫҫӑн хӗрарӑм ҫав ҫын ултавҫӑ мар тесе вӑл мӗн каланине пурнӑҫланӑ, темиҫе кредит илнӗ.

Тупӑш 300 пине ҫитсен хӗрарӑм ӑна илме шутланӑ. Анчах страховка тӳлемелле имӗш. Хӗрарӑм пӗлӗшӗнчен 1 млн та 630 пин кивҫен илнӗ, ӑна куҫарса панӑ. Ҫапла вӑл ултавҫӑсене 4 миллион та 200 пин панӑ.

psihoman.ru сайтри сӑн

Шупашкарти Ленин районӗн администрацийӗн ЗАС пайӗнче ӗҫлекенсем хӑйне евӗр ята регистрациленӗ. Ака уйӑхӗн 1-мӗшӗнче ҫуралнӑ хӗрачана ашшӗ-амӑшӗ икӗ ят хунӑ. Вӑл – Яра-Дея.

ЗАГС пайӗнче ӗҫлекенсем унччен кунашкал ятпа тӗл пулманнине палӑртнӑ. Сӑмах май, Шупашкарта Космос ятлӑ арҫын ача та пур.

Прокуратура тунӑ сӑн

Чантӑр ҫывӑхӗнчи пӗвере пулӑ виллисене асӑрханӑ. Ҫавна май Шупашкарти Мускав районӗн прокуратури тӗрӗслев пуҫарнӑ.

Пулӑ виллисем ҫыран хӗрринче те, пӗвере те пулнине асӑрханӑ. Халӗ специалистсем пулӑсем мӗншӗн вилнине уҫӑмлатаҫҫӗ. Айӑплисене тупсан прокуратура вӗсен тӗлӗшпе мерӑсем йышӑнӗ.

Шупашкарта 11 ҫулти арҫын ачана шыраҫҫӗ. Максим Марьин ӗнер ҫухалнӑ. «Лиза Алерт» хастарӗсем ӑна шырама тухнӑ.

Ача 130 сантиметр ҫӳллӗш, тӗреклӗ кӗлеткеллӗ, куҫӗ хӑмӑр, ҫӳҫӗ хура. Тӗттӗм кӑвак куртка, тӗттӗм хӗрлӗ шӑлавар, хура кроссовка тӑхӑннӑ пулнӑ.

Ун пирки пӗлетӗр пулсн шӑнкӑравлӑр: 8(800)700-54-52 е 112. «Лиза Алерт» инфоргӗсем: Елена Касатка, 89520203557, Татьяна Гюрза, 89282660548

"Лиза Алерт" ҫӑлавпа шырав службин ӗҫченӗсем 58 ҫулти Валерий Анинович Филиппова шыраҫҫӗ. Шупашкарта пурӑнакан арҫын килтен ака уйӑхӗн 8-мӗшӗнче тухса кайнӑ. Унтанпа унран хыпар ҫук.

Килтен кайнӑ чухне тӗттӗм кӑвак футболка, сӑрӑ жилет, кӑвак трико, хура пушмак, хура калпак тӑхӑннӑ пулнӑ.

Ҫак арҫынна куракансене ҫак номерсемпе шӑнкӑравлама ыйтаҫҫӗ: 8(800)700-54-52 е 112. «Лиза Алерт» инфоргӗ: Елена Касатка, 89520203557.

"Про Город" сайтӗнчи сӑн

Паян кӑнтӑрла, 13 сехетре, Ҫӗнӗ Шупашкарта Атӑл хӗрринче сумка тупнӑ. Унта вара ҫар припасӗсем пулнӑ: патронсем, обрез.

Сумкӑна арҫынсем асӑрханӑ. Вӗсем пӗр тӑхтамасӑр полици ӗҫченӗсене чӗннӗ. Оперативлӑ ушкӑн вырӑна ҫийӗнче ҫитнӗ, ҫав лаптӑка карса илнӗ.

Халӗ ӗҫ-пуҫа уҫӑмлатаҫҫӗ, сумка хуҫине шыраҫҫӗ.

orbsteppe.ru сайтри сӑн

Шупашкарти арҫын патне мессенджерта "банкӑн хӑрушсӑрлӑх службин ӗҫченӗ" шӑнкӑравланӑ. Хайхискер такам унӑн ячӗпе кредит илме пуҫланине пӗлтернӗ. Вӑл ӑна кредита маларах илме, укҫана хӑрушсӑр счет ҫине куҫарма сӗннӗ. Ҫавӑнтах "йӗрке хуралҫи" калаҫӑва хутшӑннӑ, информацие ют ҫынсем пӗлнине каланӑ.

Арҫын телефон номерне ведомство сайтӗнчипе танлаштарнӑ. Унтан кредит илнӗ. Укҫана куҫарма кайсан хайхискер йӗрке хуралҫине тӗл пулма сӗннӗ. Лешӗ ӗҫ нумай тесе килӗшмен.

Кун хыҫҫӑн арҫын иккӗленме тытӑннӑ, сайтри номерпе шӑнкӑравланӑ. Вӑл тинех ултавҫӑсемпе калаҫнине ӑнланнӑ. Хайхискер палламан ҫынна чутах 1 миллион та 782 пин тенкӗ куҫарса паман вӗт.

ШӖМ тунӑ сӑн

Шупашкарта пурӑнакан ҫемье халӑх тетелӗнче инвестицисемпе укҫа ӗҫлесе илме пулӑшакан реклама курнӑ. Кун хыҫҫӑн вӗсем 800 пин тенкӗсӗр юлнӑ.

Рекламӑна курсан хӗрарӑм телефон номере хӑварнӑ. Кӗҫех унпа суя брокер ҫыхӑннӑ. Вӑл каланипе хӗрарӑм темле счетсем ҫине укҫа куҫарнӑ. Хайхискерӗн тупӑшӗ те ӳснӗ. Паллах, ку суя пулнӑ. Хӗрӑм тупӑша илме тӑрсан паллламан ҫын тепӗр 800 пин тенкӗ куҫарнӑ.

Шупашкарти 35-мӗш маршрутпа ҫӳрекен автобус ҫулне вӑрӑмлатӗҫ. Ҫакна хула ҫыннисем тума ыйтнӑ.

Шупашкарти транспорт сетьне аталантарас тата ҫул-йӗр хӑрушсӑрлӑхӗ енӗпе ӗҫлекен комисси ыйтӑва тивӗҫтернӗ. Ҫапла "Унивеситет" микрорайонта автобус "Вӑрман" ятлӑ чарӑну таран ҫитӗ. Интервал пысӑк ан пултӑр тесе маршрута ытларах автобус кӑларӗҫ.