сеспель.рф сӑнӳкерчӗкӗ

Паян, утӑ уйӑхӗн 4-мӗшӗнче, Чӑваш патшалӑх ҫамрӑксен театрӗнче черетлӗ сезон хупӑнӗ. Ӑна культура учрежденийӗ Михаил Лермонтовӑн «Мцыри» романтикӑлла поэми тӑрӑх лартнӑ спектакльпе вӗҫлеме йышӑннӑ.

Асӑннӑ ӗҫе театр «Культура малой Родины» (чӑв. Пӗчӗк тӑван ҫӗршывӑн культури) федераци программипе килӗшӳллӗн хатӗрленӗ. Режиссёрӗ – Калмӑк Республикин искусствӑсен тава тивӗҫлӗ ӗҫченӗ тата Калмӑк Республикин халӑх артисчӗ Сергей Бурлаченко. Ӗҫӗн исценировкине Элистари ҫав ӑста хатӗрленӗ. Художникӗ – Питӗрти Мария Шуплецова. Пластика енӗпе режиссёр – Мускавра ӗҫлесе пурӑнакан ӑста, Бурят Республикин тата Тыва Республикин тава тивӗҫлӗ артисчӗ Менгилен Сат. Ҫутӑ режиссёрӗ – Питӗрти Михаил Добрышин.

Мцыри ролӗнче – Николай Миронов, Старец – Сергей Никитин,

Дзанни, манахсем, каччӑсем – Никита Бондаренко, Александр Захаров, Никита Чукмарев, хӗрсем – Надежда Полячихина, Екатерина Чекушкина, Мария Благушина.

cap.ru сӑнӳкерчӗкӗ

Шупашкарӑн 555 ҫулхине халалласа «В поисках писателя» (чӑв. Ҫыравҫӑна шыраса) литература картти йӗркеленӗ.

Проекта Шупашкар хулин вулавӑшсен пӗрлешӗвӗ «Амбассадоры чтения» (чӑв. Вулав амбассадор) коммерци мар организаципе пӗрле йӗркеленӗ. Литература карттине йӗркелеме «Лукойл» обществӑн социаллӑ тата культура проекчӗсен грант конкурсӗнче ҫӗнтернӗ укҫа пулӑшнӑ.

Проекта пурнӑҫа кӗртнӗ вӑхӑтра 7 ҫултан аслӑрах ачасем литература классикӗсемпе ҫыхӑннӑ достопримечательноҫсемп, хулари литература вырӑнӗсемпе палалшнӑ. Видеороликсен конкурсӗ ирттернӗ, ӗҫсене Шупашкра хулинчи вулавӑшсен литература картти ҫинче вырнаҫтарнӑ.

Чӑваш патшалӑх академи драма театрӗн сӑнӳкерчӗкӗ

Чӑваш патшалӑх академи драма театрӗн артисчӗсем Суздаль хулинче иртекен Раҫҫейри наци театрӗсен ҫуллахи пӗрремӗш фестивальне хутшӑннӑ.

Пин ҫулхи хулана вӗсем ӗмӗр каялла Константин Иванов ҫырма пуҫланӑ, 1967 ҫулта Ухсай Яккӑвӗ вӗҫленӗ «Шуйттан чури» хайлавӗ тӑрӑх лартнӑ мистикӑллӑ драмӑпа кайнӑ. Спектакле вӗсем Йывӑҫ ӑсталӑхӗн музейӗн уҫӑ сцени ҫинче кӑтартнӑ.

«Хыпар» издательство ҫурчӗ халӑх тетелӗнче пӗлтернӗ тӑрӑх, «декорацисем вырӑнне – йывӑҫ чиркӳсем, тарасасемпе ҫил арманӗсем, ешӗл ҫеремпе кӑвак тӳпе, хӗвел ҫути, ӗмӗрхи йӑласемпе чӑваш чӗлхи. Спектакль куҫ умӗнче пулса иртекен чӑн-чӑн япала пек туйӑннӑ куракана».

cap.ru сайтри сӑн

Ҫӗрпӳ Тихвин ярмӑрккине йыхравлать. Унта республика ҫыннисемпе хӑнисене, суту-илӳ организацийӗсене, апатлану предприятийӗсене, усламҫӑсене, алӑ ӑстисене, пултарулӑх ушкӑнӗсене, спортсменсене тата ыттисене хаваспах кӗтеҫҫӗ.

Йӑлана кӗнӗ ярмӑрккӑ кӑҫал утӑ уйӑхӗн 4-7-мӗшӗсенче унчченхи вырӑнтах иртӗ. Утӑ уйӑхӗн 7-мӗшӗнче 17 сехетре ярмӑрккӑна театрализациленӗ постановкӑпа уҫӗҫ. Унтан Ҫӗрпӳ округӗнчи коллективсем юрӑ-ташӑпа савӑнтарӗҫ.

Программа пуян. Тӗслӗхрен, утӑн 5-мӗшӗнче наци кухнин «Пӳремеч» фестивалӗ иртӗ. Утӑ уйӑхӗн 7-мӗшӗнче ярмӑрккӑна театрализациленӗ постановкӑпа хупӗҫ.

Марина Тумаланова сӑнӳкерчӗкӗсемпе усӑ курса Таисия Ташней хатӗрленӗ коллаж

Чӑваш Енӗн Наци вулавӑшӗн галерейинче Виктор Аванмарт художник тата скульпторӑн куравӗ уҫӑлнӑ.

_/news/28397.html|Аса илтерер__: Чӗмпӗрте пурӑнать. Вӑл Етӗрне тӑрӑхӗнчи Ирҫе ялӗнче ҫуралнӑ. Иртнӗ ӗмӗрӗн 90-мӗш ҫулӗсенчи чӑваш наци юхӑмӗн хастарӗ 1989 ҫулта Чӗмпӗр облаҫӗнче чӑвашсен И.Н. Ульянов ячӗллӗ культурӑпа ҫутӗҫ обществине йӗркеленӗ, ӑна хӑех темиҫе ҫул ертсе пынӑ.

Халӗ Шупашкарта унӑн «Таса - инҫе - ҫынсӑр» куравӗ уҫӑлнӑ. Куравпа паллашнӑ Марина Тумаланова журналист халӑх тетелӗнчи хӑйӗн страницинче пӗлтернӗ тӑрӑх, «ӑна Геннадий Айхи ҫуралнӑранпа 90 ҫул ҫитнипе ҫыхӑнтарнӑ».

culture.cap.ru сайтран илнӗ сӑнӳкерчӗк

<

Чӑваш патшалӑх академи драма театрӗнче ҫӗнӗ оборудовани вырнаҫтарса пӗтернӗ. Ӑна «Культура» наци проекчӗпе килӗшӳллӗн туяннӑ.

«Театрсене асӑннӑ проектпа килӗшӳллӗн пуянлатма май килнипе усӑ курса эпир те заявка патӑмӑр. Ӑна ырларӗҫ, эпир 13 миллион тенкӗ ытла тенкӗллӗ пултӑмӑр. Кирлӗ оборудование ҫу пуҫламӑшӗнче туянтӑмӑр, вырнаҫтарса пӗтертӗмӗр. «Хӗрлӗ кӗпеллӗ телей» спектакль лартнӑ чухне ҫав оборудованипе усӑ куртӑмӑр», – пӗлтернӗ театр директорӗ Елена Николаева.

Ольга Фёдорова страницинчен илнӗ сӑнӳкерчӗк

Чӑваш Енӗ Наци вулавӑшӗнче литература пикникӗ иртнӗ. Кун пирки Ольга Фёдорова ҫыравҫӑ халӑх тетелӗнчи хӑйӗн страницинче пӗлтернӗ. Унта сӑвӑҫсем, поэзие юратакансем пухӑннӑ.

Литература пикникӗнче Марина Карягина вырӑс ҫыравҫисен чӑвашла хӑй куҫарнӑ сӑввисене вуланӑ, Мальвина Петрова, Ольга Австрийская, Елизавета Долгова хӑйсен сӑввисемпе паллаштарнӑ, Геннадий Кириллов артист чӑваш ҫыравҫисен юптарӑвӗсене каласа кӑмӑла ҫӗкленӗ, Надежда Кириллова Геннадий Айхи хайлавне шӑрантарнӑ. Чӗмпӗртен килсе ҫитнӗ Виктор Аванмарт сӑввисем те янӑранӑ. Елчӗк округӗнчи Ҫирӗклӗ Шӑхаль ялӗнче пурӑнакан Ирӗк Килтӗш (Валерий Краснов) гитара каласа хӑй ҫырнӑ юрӑсене юрланӑ. Ольга Фёдорова Анатолий Смолин сӑввине вуланӑ.

chgign.ru сӑнӳкерчӗкӗ

Ҫак кунсенче, ҫӗртме уйӑхӗн 24-26-мӗшӗсенче, Чӑваш Енре «Славяно-тюркский мир: история и современность» (чӑв. Славянсемпе тӗрӗксен тӗнчи: истори тата хальхи вӑхӑт) ӑслӑлӑхпа практика конференцийӗ иртнӗ.

Мероприятие Чӑваш Енӗн Вӗренӳ министерстви, Чӑваш Республикин гуманитари ӑслӑлӑхсен институчӗ, И.Н. Ульянов ячӗллӗ Чӑваш патшалӑх университечӗ, И.Я. Яковлев ячӗллӗ Чӑваш патшалӑх педагогика университечӗ тата «Знание» Раҫҫейри обществӑн регионти уйрӑмӗ.

Конференцие республика Элтеперӗ Олег Николаев та хутшӑннӑ.

"Контактри" сӑн

Куславкка округӗнчи Тӑвай ялӗнче пурӑнакан Зоя Белоусова «Чӗмсӗр чикӗсен строителӗсене» музея хӑйӗн ӗҫне парнеленӗ. Вӑл – хӑй тӗрленӗ панно, ӑна тыл ӗҫченӗсен паттӑрлӑхне халалланӑ.

Зоя Белоусова – педагогика ветеранӗ. Ялти клубра йӗркеленӗ ал ӗҫ кружокне ҫӳреме пуҫласан вӑл тӗрлеме тытӑннӑ. Хӑйӗн черетлӗ ӗҫне асламӑшне /е кукамӑшне/ Клавдия Павловна Петровӑна халалланӑ. Вӑл окоп чавнӑ ҫӗре хутшӑннӑ.

"Контактри" сӑн

Ҫӗрпӳ хулинче пурӑнакансем, унта килнӗ хӑнасем ҫак кӳлепесене асӑрхамасӑр иртменех пулӗ. Хулари 7-мӗш ача пахчи умӗнче («Солнечный город» ятлӑ вӑл) чӑвашла тумланнӑ ҫемье вырнаҫнӑ.

Паллах, чӑн-чӑнни мар. Кӳлепесене улӑмран ӑсталанӑ, вӗсене чӑваш наци тумне тӑхӑнтартнӑ.

Ҫак илемлӗ композицин авторӗ – Екатерина Швецова. Вӑл ӑна ача пахчи 10 ҫул тултарнӑ ятпа ӑсталанӑ.