Нарӑс уйӑхӗн 22-мӗшӗнче Шупашкарти кӳлмекре «Пӑр кубокӗ» ӑмӑрту иртнӗ. Ипподрома ҫаврӑннӑ кӳлмеке Чӗмпӗртен тата Тутарстанран та пуҫтарӑннӑ.

Ӑмӑртӑва хутшӑннӑ 17 лашаран финала пиллӗккӗшӗ ҫеҫ тухнӑ. Ҫӗнтерӳҫӗсене палӑртма виҫӗ ӑмӑрту май панӑ. Пӗчӗк пӑр кубокне Марина Никольская

ӑйӑрӗ тивӗҫнӗ. Вӑтам пӑр кубокне Петр Макаров тытса пыракан ӑйӑр ҫӗнсе илнӗ. Пысӑк пӑр кубока Владимир Пайдютов тивӗҫнӗ.

Лаша спорчӗн ӑмӑртӑвӗ пӑр ҫинче пуҫласа иртнӗ. Рысаксен урисене ятарлӑ шиппа таканланӑ.Каннӑ вӑхӑтра вӗсен урисене ӑшӑтнӑ.

Лаша спорчӗн ӑмӑртӑвне курма халӑх йышлӑ пуҫтарӑннӑ. Шупашкарти кӳлмеке 3 пин ытла ҫын пухӑннӑ. Хула администрацийӗн пресс-службинче пӗлтернӗ тӑрӑх, вӗсене сырникпа тата вӗри чейпе сӑйланӑ.

Халӑха спорта явӑҫтарассипе Чӑваш Ен лидерсен шутӗнче.

Ӗнер Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев федерацин Атӑлҫи регионӗнче регионсен пайташӗсен Тольяттире иртнӗ ларӑвне хутшӑннӑ. Унта Атӑлҫи тӑрӑхӗнчи регионсенче спорта аталантарас ыйтӑва сӳтсе явнӑ.

Раҫҫей спорт министрӗн ҫумӗ Марина Томилова Чӑваш Ене спортпа туслӑ регионсенчен лидерсен шутӗнче тесе каланӑ.

Республика Раҫҫей Президенчӗ лартнӑ тӗллевсене пурнӑҫлас тӗлӗшпе «Спорт – пурнӑҫ норми» проекта пурнӑҫа кӗртессипе пӗлтӗртенпех хастар ӗҫлет.

2019 ҫул Чӑваш Ен спортсменӗсене Раҫҫейӗн пӗрлештернӗ командисене кӗртессипе рекордлӑ ҫул пулса тӑнӑ. Ҫав списока пирӗн республикӑри 202 спортсмен кӗнӗ, 2018 ҫулхипе танлаштарсан 19 ҫын ытларах.

Йӑлана кӗнӗ «Раҫсей йӗлтӗр йӗрӗ» ӑмӑртӑва кӑҫал каярах вӑхӑта куҫарнине Чӑваш халӑх сайчӗ маларах пӗлтернӗччӗ-ха. Спорт мероприятине нарӑс уйӑхӗн иккӗмӗш вырсарникунӗнче йӗркелекенччӗ. Анчах юр ҫуманнине пула РФ Спорт министерстви ӑмӑртӑва каярах ирттерме сӗннӗ. Пирӗн тӑрӑхра ӑна хӑҫан йӗркелесси халӗ паллӑ. Спортӑн ҫак енӗпе туслисем йӗлме йӗлтӗр йӗрӗ ҫине ҫитес шӑматкун, нарӑс уйӑхӗн 22-мӗшӗнче, тӑрӗҫ.

«Раҫҫей йӗлтӗр йӗрӗ» ӑмӑртӑва пирӗн ҫӗршывра 1982 ҫултанпа йӗркелеҫҫӗ. Пӗлтӗр унта ҫӗршыври 1,5 млн ҫын хутшӑннӑ. Йӗлтӗрҫӗсен шучӗпе Тутарстан рекордсмен пулнӑ. Унта старта тӑма 172 пин ҫын регистрациленнӗ. Чӑваш Енре 65 пин ҫын ӑмӑртӑва хутшӑннӑ. Ҫӗршыври чи аслӑ ҫын пӗлтӗр Хусантан пулнӑ. Вӑл — 93 ҫулхи пенсионер. Чӑваш Енре вара чи ваттисем 89 ҫулхи Пимен Петров тата 87 ҫулхи Вера Орлова пулнӑ.

Олимп резервӗсен 2-мӗш спорт шкулӗнче фристайл уйрӑмӗнче ӑсталӑхне туптакан Лана Прусакова тата Дмитрий Мулендеев каллех ҫитӗнӳпе савӑнтарнӑ. Вӗсем Польшӑра иртекен Европа Кубокӗнче ылтӑн медаль ҫӗнсе илнӗ.

Нарӑс уйӑхӗн 15-мӗшӗнче биг-эйр дисциплинӑпа ӑмӑрту иртнӗ. Дмитрий Мулендеев Швейцарири Эмиль Грабпа тата Финляндири Миик Виккипе тупӑшнӑ. Пирӗн ентеш вӗсене ҫӗнтерсе мала тухнӑ.

Лана Прусакова вара чи лайӑх кӑтартупа палӑрнӑ: 168.34. Раҫҫей спортсменки Ксения Орлова тата Украинӑри Диана Дьякова призерсем пулса тӑнӑ.

Спорт гимнастики енӗпе иртекен кӑҫалхи Тӗнче кубокӗн пӗрремӗш тапхӑрне Чӑваш Ен спортсменӗ те хутшӑнӗ. Ӑмӑртӑва кайма Шупашкарти олимп резервӗллӗ 6-мӗш спорт шкулӗнчи Владислав Поляшов тивӗҫнӗ. Вӑл — Раҫҫейӗн тӗнче класлӑ спорт мастерӗ.

Спорт гимнастики енӗпе тӗнче шайӗнче ӑмӑртма спортсменсем Австралири Мельбурн хулине пуҫтарӑнӗҫ. Тӗнче кубокӗн пӗрремӗш тапхӑрӗ нарӑс уйӑхӗн 15-мӗшӗнче пуҫланса 27-мӗшӗччен пырӗ.

Владислав Поляшов Раҫҫей командин йышӗнче ҫӗршыв чысне хӳтӗлӗ. Ӑмӑртӑва Ҫӗр чӑмӑрӗ ҫинчи чи вӑйлӑ атлетсем пухӑнӗҫ. Ентешӗмӗр пӗлтӗр те ҫитӗнӳпе пӗрре кӑна мар палӑрнӑччӗ. Владислав Поляшова спортри ҫитӗнӳшӗн Раҫҫей Президенчӗ Владимир Путин саламлӑ телеграммӑпах хавхалантарнӑччӗ.

Канмалли кунсенче Италири Азиаго ятлӑ вырӑнта хӗллехи триатлон енӗпе тӗнче чемпионачӗ иртнӗ. Унта Чӑваш Енри спортсменсем те хутшӑннӑ, лайӑх кӑтартусемпе палӑрнӑ.

Светлана Соколова 23 ҫул тултарман хӗрсен йышӗнче ылтӑн медаль ҫӗнсе илнӗ. Евгений Евграфов вара ҫак ӳсӗмри арҫынсен хушшинче иккӗмӗш вырӑна тухнӑ. Данила Егоров юниорсемпе тупӑшнӑ, вӑл вара виҫҫӗмӗш пулнӑ.

Палӑртмалла: Евгений Евграфов пӗлтӗр кросс-дуатлон енӗпе иртнӗ Европа первенствинче кӗмӗл медаль ҫӗнсе илнӗ. Вӑл – триатлон енӗпе Раҫҫей спорт мастерӗ.

vesti.kg сайтри сӑн

Шупашкар районӗн администрацийӗ пӗлтернӗ тӑрӑх, Кӳкеҫре тата Ишлейре искусственнӑй сийлӗ футбол уйӗ тума палӑртнӑ. Унта ҫутҫанталӑкӑн кирек хӑш вӑхӑтӗнче те выляма май пулӗ.

Футбол уйӗ 60х100 метр калӑпӑшлӑ пулӗ. Уҫӑ трибуна ҫинче 100 ҫын вырнаҫӗ. Хутса ӑшӑнакан вырӑнта тренер пӳлӗмӗ, хывса тӑхӑнмалли пӳлӗм тата душ пулӗҫ. «Ҫӗнӗ футбол уйӗсем спортӑн ҫак тӗсне пирӗн районта аталантарма ҫӗнӗ хӑват парӗҫ», - тенӗ район администрацийӗн пуҫлӑхӗ.

Сӑмах май, кӑҫал Чӑваш Енре искусственнӑй сийлӗ 10 футбол уйӗ тума палӑртнӑ. Ку тӗллевпе 500 миллион тенкӗ тӑкаклӗҫ.

Cap.ru сӑнӳкерчӗкӗ

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаева Григорий Дрозд боксер «Бей первым» кӗнеке парнеленӗ. Раҫҫей Общество палатин пайташӗпе тӗл пулу паян ЧР Правительство ҫуртӗнче иртнӗ. Автобиографилле кӗнекере боксерӑн пурнӑҫӗнчи ҫитӗнӗвӗсемпе ҫухатӑвӗсем ҫинчен ҫырса кӑтартнӑ.

Григорий Дрозд — ҫӗршыври профессилле паллӑ боксер, тӗнче тата Европа чемпионӗ, тай боксӗ енӗпе спортӑн тава тивӗҫлӗ маҫтӑрӗ. Халӗ Григорий Дрозд Кемӗр облаҫӗнче тата Раҫҫейре бокс тата тай боксӗ аталантарссипе тӑрӑшать.

Икӗ ҫул каялла Григорий Дрозд Чӑваш Ене килсе кайнӑ. Ун чухне хӑна боксерсем валли ӑсталӑх сехечӗ ирттернӗ. Хальхинче вӑл, РФ Общество палатин пайташӗ пулнӑ май, пирӗн тӑрӑхра «Трезвая Россия» (чӑв. Урӑ Раҫҫей) федераци проектне пурнӑҫа кӗртме сӗннӗ. Ку проект ҫамрӑксем хушшинче алкоголизма хирӗҫле меропирятисем ирттерессипе ҫыхӑннӑ.

Нарӑс уйӑхӗн 3-4-мӗшсенче Шупашкарта Раҫҫейӗн допинга хирӗҫ агентстви (РУСАДА) семинар ирттернӗ.

Икӗ кунлӑх вӗрентӗвӗн малтанхи кунӗнче Республикӑн медицина профилактикин, сиплев физкультурин тата спорт медицинин центрӗ ӗҫченӗсене йыхравланӑ, тепрехинче — спорт шкулӗсен ертӳҫисене, вӗсен вӗренӳпе спорт енӗпе ӗҫлекен ҫумӗсене, тренерсене тата спортсменсене.

Республикӑн Спорт министерствинче пӗлтернӗ тӑрӑх, РУСАДА специалисчӗсем усӑ курма юраман препаратсен списокӗпе паллаштарнӑ, тухтӑрсен яваплӑхӗ ҫинчен каласа кӑтартнӑ, допинга хирӗҫ правилӑсене пӑснипе ҫыхӑннӑ йӗркене уҫӑмлатнӑ. Семинара пирӗн республикӑри 600-е яхӑн ҫын, ҫав шутра 400 ытла спортсмен, хутшӑннине пӗлтерет ЧР Спорт министерствин пресс-служби.

sportgymrus.ru сӑнӳкерчӗкӗ

Чӑваш Енри гимнаста тата унӑн тренерне пӗлтӗрхи ҫитӗнӳшӗн кӑҫал преми пама йышӑннӑ. Сӑмах Владислав Поляшов спорт гимнасчӗпе Анатолий Васильев тренер пирки пырать.

Иртнӗ ҫулхи чӳк уйӑхӗн 21-24-мӗшӗсенче Германири Котбус хулинче Спорт гимнастики енӗпе иртнӗ тӗнче кубокӗнче Владислав ҫӗнтернӗччӗ. Уншӑн ӑна республика хыснинчен 75 пин тенкӗ преми парӗҫ, Анатолий Васильева — 37500 тенкӗ.

Йышӑнӑва паян, нарӑс уйӑхӗн 4-мӗшӗнче, Чӑваш Ен премьер-министрӗн тивӗҫӗсене пурнӑҫлакан Иван Моторин алӑ пуснӑ.

Пӗлтӗрхи юпа уйӑхӗнче Владислав Поляшова Михаил Игнатьев Элтепер тӗл пулӑва чӗннӗччӗ. Раҫҫейри арҫынсен команди (йышра ентешӗмӗр те пулнӑччӗ) пӗлтӗрхи кӗркунне тӗнче чемпионатӗнче ҫӗнтернӗ май Михаил Игнатьев В. Поляшова саламланӑччӗ. Ылтӑн медале тивӗҫнӗ ятпа спортсменсем патне ҫӗршыв Президенчӗ Владимир Путин телеграмма янӑччӗ.