cap.ru сӑнӳкерчӗкӗ

Авӑн уйӑхӗн 12-мӗшӗнче Шупашкарти кӳлмекре урамра баскетболла вылямалли центра савӑнӑҫлӑ лару-тӑрура уҫнӑ. Ӑна пӗр банк пулӑшнипе хута янӑ.

ЧР Элтеперӗ Олег Николаев ҫак центр тӗнче шайӗнчипе килӗшсе тӑнине палӑртнӑ, ҫавна май унта кирек мӗнле ҫанталӑкра та ӑмӑртусем ирттерме пулать. Унашкал вырӑн Чӑваш Енре тек ҫук.

Кунашкал центрта кирек кам та Олимп вӑййисен спорт тӗсӗпе ӑсталӑхне туптама пултарать. Кунта классика баскетболӗпе те ӑмӑрту ирттерме май пур.

Шӑчӑпа сикекен Анжелика Сидоровӑна тата унӑн тренерне Светлана Абрамовӑна Чӑваш Енӗн Хисеп грамотине пама йышӑннӑ. Хушӑва авӑн уйӑхӗн 10-мӗшӗнче ЧР Элтеперӗ Олег Николаев алӑ пуснӑ.

Аса илтерер: Анжелика Токиора иртнӗ Олимп вӑййисенче кӗмӗл медаль ҫӗнсе илнӗ. Куншӑн ӑна Чӑваш Ен 1,2 миллион тенкӗ преми памалла. Тренерне Светлана Абрамовӑна – 600 пин тенкӗ.

Унччен спортсменкӑна «Тӑван ҫӗршыв умӗнчи тава тивӗҫлӗ ӗҫсемшӗн» орден медалӗпе чысланӑ. Мускав правительствинчен вӑл 2,5 миллион тенке тивӗҫӗ. Раҫҫей правительствинчен те ҫавӑн чухлех парӗҫ. Вӑл ӑмӑртусенче Мускав тата Чӑваш Ен чысне хӳтӗлет.

forum.na-svyazi.ru сӑнӳкерчӗкӗ

Денис Рощупкин биатлониста стипенди парса тӑма йышӑннӑ. Документа республика ертӳҫи Олег Николаев ӗнер алӑ пуснӑ.

Денис Рощупкин — Раҫҫей Федерацийӗн пӗрлештернӗ спорт командин пайташӗ, ӑна юниорсем хушшинче хӗллехи биатлон енӗпе ҫӗршвӑн пӗрлештернӗ командине илме резерва кӗртнӗ.

19 ҫулти каччӑн тренерӗ — Геральд Салдимиров. Денис кӑҫал Чехири Нове-Местӑра иртнӗ ҫуллахи биатлон ӑмӑртӑвне хутшӑннӑччӗ. Юниорсен суперспринтӗнче вӑл 14-мӗш вырӑн йышӑннӑччӗ.

Каччӑна кӑҫалхи авӑн уйӑхӗн 1-мӗшӗнчен тытӑнса 2021 ҫулхи ҫу уйӑхӗн 31-мӗшӗччен уйӑхсерен 10-шар пин тенкӗ преми парса тӑрӗҫ.

championat.com сӑнӳкерчӗкӗ

Швейцарире иртнӗ Бриллиант лигинче ҫӳллӗшне шӑчӑпа сикекен пирӗн ентешӗмӗр Анжелика Сидорова 5,01 метр ҫӳллӗшне ҫӗнме пултарчӗ. Ӑмӑртӑва ҫӗркаҫ спорт телеканалӗсенчен пӗри тӳрӗ эфирта кӑтартрӗ.

Бриллиант лигӑн финалти ӑмӑртӑвне тӗнчери чи вӑйлӑ спортсменсем хутшӑнчӗҫ. Америкӑри Кэти Нажотт, сӑмахран, 4,95 метра сиксе кӑҫал Олимп чемпионки пулса тӑнӑччӗ. Великобританри Холли Брэдшоу, Грецири Катерина Стефаниди те мӗне тӑраҫҫӗ! Пирӗн ентешӗмӗр кӑҫалхи Олимпиадӑра кӗмӗл медале тивӗҫнӗччӗ. Ӗнер вара вӑл Бриллинт лигӑра ҫӗнтерме пултарчӗ. Тӗнчипе илсен Анжелика Сидоровӑран хӑй вӑхӑтӗнче Елена Исинбаева ҫеҫ ирттерме пултарнӑ. Унӑн тӗнче рекорчӗ — 5,05 метр.

cap.ru сӑнӳкерчӗкӗ

Олимп резервӗсен А.И.Трофимов ячӗллӗ спорт шкулӗн самбисчӗсем Максим Иванов тата Татьяна Федорова Минск хулинче Беларуҫ президенчӗн парнисене ҫӗнсе илессишӗн иртекен пӗтӗм тӗнчери турнирта пысӑк кӑтартусемпе палӑрнӑ.

Максим Иванов 88 килограмм тайманнисене виҫе категорийӗнче ылтӑн медаль ҫӗнсе илнӗ. Спорт мастерӗ Татьяна Федорова 50 килограмм тайманнисен виҫе категорийӗнче пӑхӑр медаль илнӗ.

Палӑртса хӑварар: ӑмӑртӑва 11 ҫӗршыври 100 ытла спортсмен хутшӑннӑ.

Токиора иртекен Паралимп вӑййисенче Чӑваш Енри тепӗр спортсменка медаль илнӗ. Хальхинче Анна Кулинич-Сорокина 200 метра чупса пӑхӑр медаль ҫӗнсе илнӗ. Ку дистанцире куҫ япӑх куракан спортсменсем тупӑшнӑ.

29 ҫулти спортсменка медаль илме ӗмӗтленни пирки каланӑ, ҫапах ку уншӑн кӗтменлӗх пулнӑ. Вӑл сӑнӑ ывӑтса та тупӑшнӑ. Спортсменка унта малти вырӑнсенчен пӗрне йышӑнма ӗмӗтленнӗ. Анчах унта мар, 200 метра чупса вӑл медальлӗ пулнӑ. Анна ҫак медале хӗрне, упӑшкине халалланӑ. Мӑшӑрӗ пӗрлештернӗ командӑн массажисчӗ.

Сӑмах май, Анна 2012 ҫулта Паралимпиадӑна хутшӑннӑ. Ун чухне вӑл сӑнӑ ывӑтса кӗмӗл медаль илнӗ.

Японири Токио хулинче Паралимп вӑййисем пыраҫҫӗ. Раҫҫейӗн пӗрлештернӗ командин йышӗнче пирӗн ентешсем те пур.

РФ тава тивӗҫлӗ спорт мастерӗ Елена Иванова ҫӑмӑл атлетика турнирӗнче, 100 метра чупассинче, финала тухнӑ. Ку кӑна мар, вӑл кӗмӗл медаль ҫӗнсе илнӗ. Елена 100 метра 14,60 ҫеккунтра чупса тухнӑ. Ҫак ятпа ӑна ЧР Пуҫлӑхӗ Олег Николаев та шӑнкӑравласа саламланӑ.

Иккӗмӗш вырӑна Китайри Итин Ши йышӑннӑ. Пӑхӑр медале Ҫӗнӗ Зеланди спортсменки Даниэль Эйтчисон выляса илнӗ.

Токиора иртнӗ Олимп вӑййисенче Мускав тата Чӑваш Ен чысне хӳтӗленӗ Анжелика Сидорова шӑчӑпа сиксе кӗмӗл медаль илнӗ, куншӑн ӑна регионсен тата федераци тӳлевӗсем параҫҫӗ.

30 ҫулти спортсменкӑна Раҫҫей Правительстви 2,5 миллион тенкӗ преми парӗ, ҫавӑн чухлех Мускав уйӑрӗ. Тата Чӑваш Ен кӗмӗл медальшӗн 1,2 миллион тенкӗ парӗ. Ҫапла спортсменка пӗтӗмпе 6,2 миллион тенкӗлӗх премие тивӗҫӗ.

Аса илтерер: РФ Президенчӗ Владимир Путин Анжелика Сидоровӑна I степень «Тӑван ҫӗршыв умӗнчи тава тивӗҫлӗ ӗҫсемшӗн» орден медалӗпе чысласси пирки хушу алӑ пуснӑ.

Чӑваш Енре пурӑнакансене джампингпа паллаштарнӑ. Асӑннӑ хатӗр Ҫӗнӗ Шупашкарти А.Г. Николаев ячӗллӗ паркра пур-мӗн. Унта уҫӑ сывлӑшри ӑмӑрту иртнӗ. Ӑмӑртӑва тӗрлӗ ҫулхи 30-а яхӑн хӗрарӑм пуҫтарӑннӑ. Джампинга батут ҫине пуҫласа тӑракансем те ҫӑмӑллӑнах парантарнӑ.

Чӑваш Енӗн спорт министрӗ Василий Петров палӑртнӑ тӑрӑх, Раҫҫей Президенчӗ ҫӗршывра спортпа туслисен йышӗ 2024 ҫул тӗлне 55 процента ҫитмелле тесе тӗллев лартнӑ. Чӑваш Енре пӗлтӗр халӑхӑн 48,2 проценчӗ спортпа тусли пулнӑ.

Джампинг вӑл — мини-батут ҫинчи кардиотренировка. Ӑна Чехинчи фитнес-инструкторсем шухӑшласа кӑларнӑ.

zivizd.cap.ru сӑнӳкерчӗкӗ

Чӑваш Ен Элтеперӗ Олег Николаев ӗнер, утӑ уйӑхӗн 16-мӗшӗнче, республикӑри икӗ ҫемьене тата тӑхӑр амӑшне патшалӑх наградисемпе чысласси ҫинчен калакан хушӑва алӑ пуснӑ.

Ҫемье институтне ҫирӗплетессине пысӑк тӳпе хывнӑшӑн «Юратупа шанчӑклӑхшӑн» орденпа Ҫӗрпӳ районӗнчи Владимир Михайловичпа Галина Михайловна Ижедеровсене тата Елчӗк районӗнчи Петр Николаевичпа Марфа Михайловна Падуевсене чыслама йышӑннӑ.

Ачасене тивӗҫлӗ воспитани панӑшӑн «Анне» амӑш мухтавӗн паллипе Красноармейски районӗнчи пилӗк ача амӑшне Елена Леонидовна Владимировӑна, Куславкка районӗнчи пилӗк ача амӑшне Нина Павловна Кирилловӑна, Тӑвай районӗнчи пилӗк ача амӑшне Светлана Анатольевна Константиновӑна, Вӑрнар районӗнчи пилӗк ача амӑшне Людмила Геннадьевна Ксенофонтовӑна, Ҫӗнӗ Шупашкарти сакӑр ача амӑшне Ольга Викторовна Матлаша, асӑннӑ хулари пилӗк ача амӑшне Валентина Михайловна Мешковӑна, Ҫӗмӗрлери пилӗк ача амӑшне Татьяна Юрьевна Мотовӑна, Канаш районӗнчи пилӗк ача амӑшне Елена Николаевна Наумовӑна, Хӗрлӗ Чутай районӗнчи пилӗк ача амӑшне Валентина Николаевна Плисовӑна чыслӗҫ.