Стопкоронавирус.рф сайтри сӑн

Стопкоронавирус.рф сайт пӗлтернӗ тӑрӑх. Чӑваш Енре кӑшӑлвируспа чирлекенсем нумайланса пыраҫҫӗ. Юлашки эрнере 447 ҫыннӑн ҫак диагноз пулнине палӑртнӑ. Вӗсенчен 54-шне пульницӑна вырттарнӑ.

Танлаштарма: авӑнӑн 4-10-мӗшӗсенче 312 ҫын кӑшӑлвируспа чирленӗ. Юрать-ха, вилекенсем ҫук. Кун пек тӗслӗх утӑ уйӑхӗнченпе пулман. Юлашки эрнере 161 ҫын сывалнӑ.

Палӑртмалла: пандеми пуҫланнӑранпа республикӑра 116,5 пин ҫын кӑшӑлвируспа чирленӗ. Вӗсенчен 4740-шӗ вилнӗ.

pravmir.ru сайтри сӑн

Чӑваш Енре хӗрлӗхенпе (корь) чирлекенсем нумайланнӑ. Ҫулталӑк пуҫланнӑранпа 53 ҫын чирленине шута илнӗ. Вӗсенчен 50-шӗ - Шупашкарта, пӗрер - Комсомольски тата Шупашкар районӗсенче, Ҫӗнӗ Шупашкарта.

Кӑрлач-утӑ уйӑхӗсенче 35 тӗслӗх пулнӑ. Пӗр уйӑхра тепӗр 18 ҫын хӗрлӗхенпе чирленӗ. Пирӗн республикӑра ку чирпе чирленӗ тӗслӗх 2019 ҫултанпа пулман.

Хӗрлӗхенрен хӳтӗлекен вакцина чӳк уйӑхӗн 25-мӗшӗччен килмеллине пӗлтереҫҫӗ.

ГЭС архивӗнчи сӑн

Шупашкарти ГЭС ӗҫченӗсем ыркӑмӑллӑх ӗҫне хутшӑннӑ. Вӗсем ҫурӑм мимин донорӗ пулса тӑнӑ. Унта тӑрӑшакан 16 ҫын Ҫурӑм мимин донорӗсен федераци регистрне кӗнӗ. Кунсӑр пуҫне 39 ҫын юн панӑ. Пӗтӗмпе – 17,5 литр.

Раҫҫейри Хӗрлӗ Хӗресӗн Чӑваш Енри уйрӑмӗнче ӗҫлекенсем каланӑ тӑрӑх, «генетика йӗкӗрешне» тупма йывӑр Пӗр ҫын пуҫне 10 пин ҫын лекет. Ҫавна май Ҫурӑм мимин донорӗсен федераци регистрӗнче сахалтан та 500 пин донор клетки пулмалла. Хальлӗхе вара унта – 200 пин кӑна.

"Чӑваш Ен" ПТРК тунӑ видео скринӗ

Китайри тухтӑрсем Чӑваш Ене килни пирки унччен хыпарланӑччӗ. Вӗсене «Проект Панда» скрининг консультацине хутшӑнма чӗннӗ.

Китайри специалистсем сывлӑх енчен хавшак ачасен сывлӑхне тӗрӗсленӗ кӑна мар, пӗлтерӗшлӗ сӗнӳсем те панӑ. Акӑ 6 ҫулти Костя Ача-пӑча реабилитаци центрӗнче 6 ҫул ӗнтӗ сиплев курсӗ витӗр тухать. Ӑна массаж тата физиотерапи пулӑшаҫҫӗ. Анчах ку ҫителӗксӗр. Китай тухтӑрӗсем ӑна операци тума сӗннӗ. Капла ача часрах ура ҫине тӑрӗ-мӗн. Ӑна Китая реабилитацие чӗннӗ. Ҫул укҫине Раҫҫей ача-пӑча фончӗ тӳлӗ, сертификатпа пӗр ҫул усӑ курма май пур. Костьӑн ашшӗ-амӑшӗ халӗ кун пирки шутлать.

Китай тухтӑрӗсем темиҫе кунра 100 ытла ачана тӗрӗсленӗ. Вӗсем малашне те Шупашкарти реабилитаци центрӗсемпе ҫыхӑнса ӗҫлесшӗн.

cap.ru сӑнӳкерчӗкӗ

Чӑваш Енре юлашки вӑхӑтра кӑшӑлвируспа чирлекен нумайланнӑ. Кун пирки ЧР Элтеперӗ Олег Николаев телеграм-каналӗнче пӗлтернӗ. Иртнӗ эрнере 31 ҫынна пульницӑна вырттарнӑ.

Стопкоронавирус.рф сайт хыпарланӑ тӑрӑх, авӑнӑн 11-17-мӗшӗсенче пирӗн республикӑра 312 ҫын кӑшӑлвируспа чирленӗ. Авӑнӑн 4-10-мӗшӗсенче вара 202 тӗслӗх пулнӑ. Ҫулла вӗҫӗнче 90 ҫыннӑн кӑшӑлвирус пулнине палӑртнӑ.

medicin.cap.ru сӑнӳкерчӗкӗ

Республикӑра санитари авиацийӗпе час-часах усӑ кураҫҫӗ. Вертолётпа чӗрепе юн тымарӗсен чирӗпе аптӑракансене ытларах чухне илсе каяҫҫӗ. Мӗншӗн тесен кун пек пациентсене вӑхӑтра операци тумалла.

Ҫак кунсенче Ҫӗмӗрле районӗнчи пӗр ялта пурӑнакан, 1959 ҫулта ҫуралнӑ арҫынна республикӑн тӗп хулине илсе килнӗ. Арҫыннӑн миокард инфаркчӗ пулнӑ.

Арҫын хӑнара пулнӑ чухне чӗри патӗнче ҫунтарма тытӑнса кайнине сиснӗ. Вӑл хӑех васкавлӑ пулӑшу машинине чӗнсе илнӗ. Шурӑ халатлисем ӑна Ҫӗмӗрлери медицина центрне илсе кайнӑ. Унта ӑна анестезиологипе реанимаци уйрӑмне вырттарнӑ. Кайран тухтӑрсем Республикӑри юн тымарӗсен центрӗпе канашланӑ хыҫҫӑн пациента Шупашкара куҫарма йышӑннӑ.

Республикӑн тӗп хулинче арҫынна коронарографи тунӑ, стент вырнаҫтарнӑ.

cap.ru сӑнӳкерчӗкӗ

Улатӑр районӗнчи 67 ҫулти хӗрарӑмӑн иккӗмӗш хут инфаркт пулнӑ. Ӑна пӗр тӑхатамасӑр операци кирлӗ пулнӑ. Юрать, пациента санавиаципе Шупашкара илсе ҫитернӗ.

Хӗрарӑм авӑнӑн 13-мӗшӗнче кӑкӑр тӗлӗнчен ыратнине туйнӑ. Анчах выртсан иртсе кайнӑ та эмел ӗҫмен, тухтӑрсене чӗнмен. Кайран вӑйлӑрах ыратма пуҫланӑ. Кун хыҫҫӑн мӑнукӗ васкавлӑ медпулӑшу чӗннӗ.

Санавиаципе ӑна Республикӑри клиника пульницин юн тымарӗсен центрне илсе ҫитернӗ, ҫийӗнчех операци тунӑ. Ҫапла тухтӑрсем унӑн пурнӑҫне ҫӑлнӑ. Халӗ хӗрарӑм хӑйне лайӑхах туять.

cap.ru cӑнӳкерчӗкӗ

Чӑваш Ене килсе ҫитнӗ Китай тухтӑрӗсем ачасене пулӑшӗҫ. Асӑннӑ ҫӗршыври делегаципе республикӑн ӗҫ тата социаллӑ хӳтлӗх министрӗ Алёна Елизарова тӗл пулнӑ.

Китайри тухтӑрсем сывлӑх енчен хавшак ачасене реабилитаци тухма пулӑшасшӑн. Аякри специалистсене республика Правительствипе Раҫҫейӗн ача-пӑча фончӗ алӑ пуснӑ килӗшӗве пурнӑҫланӑ май йыхравланӑ.

Ачасен реабилитаци центрӗнче сипленекенсене Ли Шенкунь профессор тата ытти специалист тӗрӗслӗҫ. Сывлӑхне кура хӑш-пӗр ачана Китайра сиплеме направлени парӗҫ. Унта кайса килме хӑтланса ҫул ҫинче тӑкакланнине Раҫҫейӗн ача-пӑча фончӗ саплаштарӗ.

stylishbag.ru сӑнӳкерчӗкӗ

Етӗрне районӗнчи фельдшерпа акушер пункчӗсенчен пӗринче кирлӗ оборудовани те ҫук иккен. Ҫакна вырӑнти прокуратура тӗрӗслевӗ вӑхӑтӗнче тупса палӑртнӑ.

Ильина Гора ялӗнчи фельдшерпа акушер пунктӗнче юн кайнине чарса лартмалли жгут та ҫук, эмелсене упрамалли термоконтейнер та, тата ытти те пулман.

Прокуратура Етӗрне районӗн тӗп пульницин тӗп врачӗ ячӗпе асӑрхаттару хучӗ ҫырса панӑ.

omutinsk1.ru сайтри сӑн

Кӗркунне чир-чӗр сезонӗ пуҫланать. Ҫавна май республикӑна гриппран хӳтӗленмелли 241 пин те 320 доза вакцина кӳрсе килнӗ.

159910 дози аслисене прививка тумалли «Совигрипп», 19350 дози - аслисене вакцинацилемелли «Ультрикс Квадри». Ҫакнашкаллинех ачасем валли 62060 доза илсе килнӗ.

Тухтӑрсем грипп ОРВИ йышӗнче чи хӑрушшисенчен пӗри шутланни пирки аса илтереҫҫӗ. Вакцина вара йывӑр чирлесрен, чир шала каясран сыхлать.