Чӑваш Енӗн ШӖМӗн сайтӗнчи видеоран илнӗ скриншотсемпе хатӗрленӗ коллаж

2018 ҫулхи ака уйӑхӗн 19-мӗшӗнче Шупашкарти Университет урамӗнчи суту-илӳ центрӗ умӗнчи стоянкӑра «Ауди-А 4» автомашина ҫунса тытӑннӑ. Унпа юнашар ларнӑ «Мазда-3» тата «Бриллианс» автомобильсем те шар курнӑ. «Ауди» машина хуҫи Шупашкарта пурӑнакан 29 ҫулти арҫын пулнӑ.

Видеокамерӑна икӗ ҫын лекнӗ. Вӗсем автомобиле ҫунтармалли япала сапни унта аван курӑнать. Унтан ӑна чӗртсе янӑ.

Йӗрке хуралҫисем палӑртнӑ тӑрӑх, «Ауди» хыҫҫӑн темиҫе кун машина йӗрлесе ҫӳренӗ. Пакунлисем ҫине тӑнипе, чӗртсе яракансене те, ҫав ӗҫе тума хушнисене те тупса палӑртма май килнӗ.

Шупашкар хулинчи Мускав район сучӗ ҫынна сӑтӑр тӑвакансене суд тунӑ. Машинӑна чӗртекенсене ҫын пурлӑхне сиен кӳнӗшӗн явап тыттарма, саккасҫӑна престпулени тума хистенӗшӗн явап тыттарнӑ. Вӗсене тӗрмене хупса хумасӑр явап тыттарӗҫ. Унсӑр пуҫне машинӑсене шар курнине саплаштарма тивӗ.

vesti-aleksin.ru сайтри сӑн

Паян, хӗллен пӗрремӗш кунӗнче, Шупашкарта иртен-ҫӳрен ҫын пӑр айне анса кайнӑ пулӑҫа ҫӑлнӑ. Кун пирки «Про Город» хаҫата халӑх корреспонденчӗ каласа кӑтартнӑ.

Арҫын Атӑл ҫинче пулӑ тытса ларнӑ. Хайхискер кӑнтӑрла, 12 сехет ҫурӑра, ӑнсӑртран пӑр айне анса кайнӑ. 70 ҫулти арҫынпа мӗн пуласси пирки шутлама та хӑрушӑ.

Пулӑҫ кӑшкӑрашнине илтсен иртсе каякан ҫын пулӑшма васканӑ. Вӑл ӑна шывран туртса кӑларма пултарнӑ. Вырӑна васкавлӑ медпулӑшу машини ҫитнӗ. Пӑр айне анса кайнӑ арҫынна пульницӑна илсе кайнӑ.

orenburzhie.ru сӑнӳкерчӗкӗ

Ҫӗмӗрле хулинче урамра ҫутӑ хунарӗ вырнаҫтарассишӗн прокуратурӑн икӗ хутчен тӗрӗслев ирттерме тивнӗ. Малтан пӗрре тӗрӗсленӗ хыҫҫӑн хулари тӳре-шара ячӗпе хут ҫырнӑ-ха. Унтисем надзор органне вӑрах кӗттермен. Хуравланӑ. Унта ӑнлантарнӑ тӑрӑх, Ҫӗмӗрле хула администрацийӗн ҫурт-йӗрпе коммуналлӑ хуҫалӑх пайӗн пуҫлӑхне явап тыттарнине, урамра ҫутӑ хунарӗ вырнаҫтарнине ӗнентернӗ.

Сӑмах, хулари Володарский урамӗнчи 27-мӗш ҫуртпа Урицкий урамӗнчи 27-мӗш ҫуртсем хушшинчи тӑкӑрлӑк пирки пынӑ. Тӳре-шара хуравланӑ хыҫҫӑн прокуратура тепӗр хутчен тӗрӗсленӗ, анчах хунар ҫуккине асӑрханӑ. Ҫавӑн хыҫҫӑн суда тавӑҫпа тухнӑ. Вырӑнтисем тинех хускалнӑ. Суд йышӑну кӑларасса кӗтсе тӑман — урамри ҫутӑ хунарӗсем ӗҫлесе кайнӑ.

Элӗк районӗнче шкул автобусӗ ҫаврӑнса ӳкнине Чӑваш халӑх сайчӗ ӗнер пӗлтернӗччӗ. Аса илтерер: автобус инкеке ӗнер 15 сехет те 50 минутра Пиҫенер ялӗ ҫывӑхӗнче пулнӑччӗ.

Чӑваш Енӗн Шалти ӗҫсен министерствинче паян уҫӑмлатнӑ тӑрӑх, инкекре автобус водителӗ тата 4 пассажир (ҫав шутра 9-16 ҫулсенчи виҫӗ ача пулнӑ) суранланнӑ. Вӗсене тухтӑрсем пулӑшнӑ хыҫҫӑн килӗсене янӑ. Салонта пурӗ 9 ача пулнӑ. Вӗсем – 3-11-мӗш классенче вӗренекенсем. Ачасемпе пӗр педагог ҫула тухнӑ.

Инкек хыҫҫӑн административлӑ ӗҫ пуҫарнӑ. Автобусӑн кайри ураписенчен пӗри кивелнине палӑртнӑ. Кунсӑр пуҫне водитель ҫул-йӗр условине шута илмен тесе шухӑшлаҫҫӗ.

Инкеклӗ лару-тӑру министерстви тунӑ сӑн

Чӳк уйӑхӗн 26-мӗшӗнче «Дубки» коттедж поселокӗнче пушар тухнӑ. Халӗ кун тӗлӗшпе Следстви комитечӗ следстви умӗнхи тӗрӗслев ирттерет, тӗрлӗ экспертиза тӑваҫҫӗ.

Куприянов инженер урамӗнче вырнаҫнӑ икӗ хутлӑ ҫурт 21 сехетре ҫунма тытӑннӑ. Пӳрт вӑйлах сиенленнӗ. Пуша сӳнтернӗ хыҫҫӑн икӗ виле тупнӑ. Вӗсем – 80 ҫулти кил хуҫи тата унӑн 71 ҫулти мӑшӑрӗ.

Малтанлӑха палӑртнӑ тӑрӑх, пушарюсавсӑр пралука пула тухнӑ. Упӑшкипе арӑмне пусмӑрласа вӗлернӗ йӗрсем ҫук.

Элӗк районӗнче шкул автобусӗ ҫул-йӗр ҫинче аварие лекнӗ. Ку паян 15 сехет те 50 минутра Пиҫенер ялӗ ҫывӑхӗнче пулнӑ.

ҪҪХПИ малтанлӑха пӗлтернӗ тӑрӑх, ПАЗик водителӗ руле итлеттереймен – кювета чӑмнӑ. Автобус хӑяккӑн ҫаврӑнса ӳкнӗ.

Авари вӑхӑтӗнче салонра ачасемпе педагог пулнӑ. Ачасем – Тавӑт шкулӗнче 2-11-мӗш классенче вӗренекенсем. Тухтӑрсен пулӑшӑвӗ водителе тата вӗрентекене кирлӗ пулнӑ.

"Про Город" сайтран илнӗ сӑн

Ӗнер 17 сехетре Шупашкарта Алькеш поселокӗнче хӗрарӑм виллине тупнӑ. Ку инкеке курнӑ ҫынсем каланӑ тӑрӑх, хӗрарӑм пӗр 30 ҫулсенче пулнӑ.

Хӗрарӑм виллине Алькеш поселокӗнче Гоголь урамӗнчи 5 мӗш ҫуртӑн 1-мӗш корпусӗ умӗнче тупнӑ. Малтанлӑха палӑртнӑ тӑрӑх, вӑл ҫав ҫуртра пурӑннӑ.

Вырӑна полицейскисем ҫитнӗ, иртен-ҫӳренрен ыйтса пӗлнӗ. РФ Следстви комитечӗ пӗлтернӗ тӑрӑх, ку тӗслӗх тӗлӗшпе следстви умӗнхи тӗрӗслев иртет.

«Вилене витсе хунӑччӗ, полицейскисем унтахчӗ. Хӗрарӑм пӗр 30 ҫулсенчи пек курӑнать», - пӗлтернӗ «Прог Города» иртен-ҫӳрен.

Кӑшӑлвирус сарӑласран йышӑннӑ мерӑсене епле пӑхӑннине тӗрӗслеме Шупашкар хулинче кунсерен 18 ушкӑн тӗрӗслеве тухать. Ӗнер кӑна 54 вырӑна ҫитни пирки пӗлтереҫҫӗ, ҫав шутра ваккӑн суту-илӳ тӑвакан 44 точкӑра, 4 обществӑлла апаталну предприятийӗнче, 3 парикмахерскинче, йӑла пулӑшӑвӗ кӳрекен 3 предприятире пулнӑ.

Шупашкарти М. Горький урамӗнчи «Itech» сервис-центр, Калинин урамӗнчи «Продукты» лавкка, Калинин урамӗнчи «Мята Лаундж» кафе, 9-мӗш Пилӗкҫуллӑх урамӗнчи 5-мӗш ҫуртри косметика тата килте кирлӗ тавар сутакан уйрӑмсем йӗркене пӑснӑ.

Общество транспортӗнчен маскӑсӑр анакан ҫынсене те тытса чарнӑ. Вӗсен тӗлӗшпе 4 акт тата 2 протокол ҫырнӑ.

Чӳк уйӑхӗн 8-мӗшӗнче Шупашкарти Максим Горький урамӗнчи 7-мӗш ҫуртра пушар тухнӑ. Инкеке лекнисене Андрей Николаев фельдшер пулӑшнӑ.

Тӗтӗм тухса тулнӑ пӳлӗмрен 21 ҫулхи хӗре тухма пулӑшнӑ.

Инкеклӗ ӗҫсен министерствин Чӑваш Енри управленийӗ пӗлтернӗ тӑрӑх, пушар 23 ҫулти каччӑ пӳлӗмӗнче тухнӑ. Ҫулӑма сӳнтерме ятарлӑ сакӑр техника пырса ҫитнӗ. Пушара ҫур сехетрен сӳнтернӗ. Подъездри ҫынсене урама кӑларса тӑратма тивнӗ.

Хӗре пулӑшнӑшӑн ҫынсем Андрей Николаев фельдшера ҫынсем тав тӑваҫҫӗ.

Паян 13 сехет те 45 минутра Шӑмӑршӑ районӗнчи Виҫпӳрт Шӑмӑршӑ ялӗ ҫывӑхӗне хӑрушӑ авари пулнӑ. Унта пӗчӗк ачан пурнӑҫӗ татӑлнӑ.

ЧР ШӖМӗ малтанлӑха пӗлтернӗ тӑрӑх, «Фиат» рулӗ умӗнче Шӑмӑршӑ районӗнче пурӑнакан 24 ҫулти хӗрарӑм пулнӑ. Вӑл руле итлеттереймен, транспорт хирӗҫ килекен ҫул ҫине тухнӑ та «Приорӑпа» ҫапӑннӑ.

Хӗрарӑмӑн 3 ҫулти ывӑлӗ ятарлӑ ларкӑчра ларнӑ-ха, анчах вӑл ӑна пиҫиххипе ҫаклатман. Машинӑсем ҫапӑнсан ача салонран тухса ӳкнӗ. Шел те, пульницӑна илсе кайнӑ чухне арҫын ача вилнӗ.

«Приорӑра» пулнӑ водительпе пассажира тухтӑрсен пулӑшӑвӗ кирлӗ пулнӑ.