nasrf.ru сӑн укерчӗкӗ

Республикӑри наркологи диспансерӗн тӗп тухтӑрӗ пулса тӑрӑшнӑ ҫын тӗлӗшпе пуҫиле ӗҫ пуҫарнине Чӑваш халӑх сайчӗ пӗлтернӗччӗ-ха.

Аса илтерер: тӗп тухтӑр йӗркене пӑсни электронлӑ аукциона тӗрӗсленӗ чухне тӑрӑ шыв ҫине тухнӑ. Тӗп тухтӑр пулнӑ вӑхӑтра хайхискер хаклӑ реагентсене учреждени валли туяннӑ. Анчах вӗсем пульницӑна кирлӗ те пулман. Ҫапла майпа усӑ курмасӑрах сая кайнӑ. Хыснана 6 миллион тенкӗ ытла тӑкак кӳнӗ.

Унсӑр пуҫне тата тӗп тухтӑр 2014 ҫулхи чӳк уйӑхӗнчен пуҫласа 2018 ҫулхи пуш уйӑхӗн 22-мӗшӗччен пӗр организацие кӳрсе килмен медицина продукцийӗшӗн 900 пине яхӑн тенкӗ куҫарса панӑ. Асӑннӑ учреждение хайхи тӗп врачӑн паллаканӗ ертсе пынӑ. Ҫав организаци хӑй тивӗҫне пурнӑҫламаншӑн 361 пин тенкӗ шыраса илмелле пулнӑ, ӑна та шыраса илмен.

Пуҫиле ӗҫе суда ярса парӗҫ.

Васкакан вакка сикнӗ теҫҫӗ. Пӗрне-пӗри ҫул парас мар тесе сӗмсӗрленнипе ҫул ҫинче сахал мар инкек пулса иртет.

Вӑрнар районӗнче, акӑ, икӗ машина ҫапӑннӑ. Инкеке Renault «Megan» тата «ВАЗ-21101» автомобильсем лекнӗ. Малтанласа шушӑшланӑ тӑрӑх, ют ҫӗршывра туса кӑларнӑ машина ВАЗ автомобиле тӗп ҫул ҫине тухнӑ чух ҫул паман.

Ҫапӑннӑ хыҫҫӑн ВАЗ водителӗ, 24 ҫулти ҫамрӑк арҫын, вилнӗ. Унӑн 22 ҫулти мӑшӑрӗ (вӑл йывӑр ҫын пулни паллӑ) тата вӗсен 2 ҫулти ывӑлӗ пульницӑна лекнӗ.

Инкекшӗн айӑплӑ тесе шухӑшлакан водителе тӗрӗсленӗ те ӳсӗррине палӑртман. Вӑл та халӗ пульницӑра сипленет.

Ҫул ҫинчи инкек мӗнле сӑлтавпа пулса иртнине специалистсем каярах татӑклӑн калӗҫ-ха. Халӗ тӗпчевҫӗсем малалла ӗҫлеҫҫӗ.

«Контактра» халӑх ушкӑнӗнчи «Цивильск и район» (чӑв. Ҫӗрпӳ тата район) пабликра пӗлтернӗ тӑрӑх, 27 ҫулти хӗрарӑм ҫухалнӑ. Килтен тухса кайса ҫӗтни — Григорьева (пӗлтерӳре ГригорьевНа тенӗ те, йӑнӑшнӑ курӑнать) Анна Андреевна. Вӑл чӳк уйӑхӗн 21-мӗшӗнче тухса кайнӑ иккен. Ҫӗтни Ҫӗрпӳре пурӑнать. Уншӑн пӑшӑрханса пӗлтерекенни — Ульяна Васильева.

Ҫухалнӑ хӗрарӑм мӗнле тумпа пулнине те, ытти паллӑна тс асӑнман.

Маларах Чӑваш халӑх сайчӗ Ҫӗнӗ Шупашкарта пурӑнакан 18 ҫулти хӗр ҫухалнине хыпарланӑччӗ. Тӑванӗсем ыйтнипе пикене Чӑваш Енри йӗрке хуралҫисем шырама пикеннӗччӗ. Ҫавна пӗлнӗ хыҫҫӑн хӗр сас панӑ. Вӑл килтен ятарласа тухса кайнине, хӑйне шырамалла маррине пӗлтернӗччӗ.

interfax.ru сайтри сӑн

Йӗпреҫ районӗнче пурӑнакан 29-ти арҫын, унччен судпа 5 хутчен айӑпланнӑскер, хальхинче ҫирӗп режимлӑ колоние 12 ҫуллӑх лекнӗ. Ӑна ҫынна асӑрханмасӑр вӗлернӗшӗн айӑпланӑ. Ҫав ҫын – унӑн 59 ҫулти ашшӗ.

Следстви тата суд палӑртнӑ тӑрӑх, кӑҫал авӑнӑн 2-мӗшӗнче вӑл пиччӗшӗ патӗнче пулнӑ, вӗсем эрех ӗҫнӗ. Кайран хайхискер ашшӗне тискеррӗн хӗненӗ, тумтирӗнчен тытса бетон урайне пуҫӗпе ҫапнӑ. Лешӗ пуҫӗ суранланнӑран, аяк пӗрчисем хуҫӑлнӑран васкавлӑ медпулӑшу машини ҫинчех вилсе кайнӑ.

Палӑртмалла: арҫын тӗрмерен 2018 ҫулхи авӑн уйӑхӗнче тухнӑ. Унӑн татса пӗтермен айӑплав та пулнӑ.

ҪҪХПИ тунӑ сӑн

Чӳк уйӑхӗн 20-мӗшӗнче 14 сехет те 15 минутра Етӗрне районӗнчи Тури Ачак ялӗнче арҫын трактортан тухса ӳкнӗ. Шел те, 65 ҫулти арҫын вилнӗ.

Урапаллӑ трактор асфальт сарман ҫулпа пынӑ. Арҫын урапа ҫинче ларса пынӑ. Вӑл ӑнсӑртран ҫул ҫине тухса ӳкнӗ. Арҫын тухтӑрсем киличчен сывлама пӑрахнӑ.

Руль умӗнче 45 ҫулти арҫын ларнӑ. ҪҪХПИ малтанлӑха пӗлтернӗ тӑрӑх, вӑл ӳсӗр пулнӑ.

Ҫӗнӗ Шупашкарта пурӑнакан 18 ҫулти хӗре йӗрке хуралҫисем шыранине Чӑваш халӑх сайчӗ ӗнер пӗлтернӗччӗ. Аса илтерер: Валерия Вадимовна Вяткина чӳк уйӑхӗн 16-мӗшӗнче килтен тухса кайнӑ та таврӑнман.

Хӗр хыпарсӑр ҫухалнӑ тесе унӑн ҫывӑх ҫыннисем йӗрке хуралҫисене пӗлтернӗ. Пакунлисем шыранине пӗлнӗ хысҫӑн пике республикӑри МИХсенчен пӗринпе ҫыхӑннӑ. Вӑл хай таса сывах иккенне видео урлӑ пӗлтернӗ. Валерия пӗлтернӗ тӑрӑх, вӑл ют хулана хӑйӗн ирӗкӗпе тухса кайнӑ. Вӑл кукамӑшӗпе (тен, асламӑшӗ-тӗр. Вырӑсла хыарта «бабушка» тенӗ) ӑнланманлӑх сиксе тухнӑ. Валерия килтисене пӗлтерсе кайнине ӗнентернӗ. Хӑйне вӑл шырамалла маррине пӗлтернӗ. Хӗр шухӑшланӑ тӑрӑх, тӑванӗсем ӑна киле ирӗксӗр илсе каясшӑн.

labirint.ru сӑнӳкерчӗкӗ

Тина Канделаки журналистка тата телеведущи Чӑваш Енри ашшӗсен канашӗ пирки хӑйӗн шухӑшне пӗлтернӗ. Ун пирки вӑл хӑйӗн Telegram-каналӗнче ҫырнӑ.

«Чӑваш Енри ашшӗсен канашӗ ашшӗсен ҫемьери витӗмне ӳстерес тесе пӗтӗм вӑйран тӑрӑшать, тӗрӗс ҫемье мӗнле пулмалли ҫинчен шкулсенче ҫутта кӑларакан лекцисем вулать», — ҫырнӑ Канделаки.

Телеведущи Ашшсен канашӗн шухӑшлавӗпе килӗшмест, ку вӑл 19-мӗш ӗмӗрти йӑнӑшсене ҫӗнӗрен туса ирттерни тесе шухӑшлать.

Арҫыннӑн укҫа-тенкӗпе хуҫаланмалла, хӗрарӑма ун пек ирӗк те памаҫҫӗ тесе пӗтӗмлетнӗ май Чӑваш Енри хӗрарӑмсене хӗрхеннине пӗлтернӗ.

Чӑваш Енри ашшӗсен канашне пирӗн республикӑра темиҫе ҫул каялла йӗркелерӗҫ. Халӗ ӑна Алексей Мурыгин ертсе пырать.

ptzgovorit.ru сӑнӳкерчӗкӗ

Ҫул-йӗр инспекторӗнче ӗҫленӗ арҫынна ӗҫ кӑтартӑвне лайӑхлатма хӑтланнӑшӑн айӑпласшӑн. Ун тӗлӗшпе маларах РФ Пуҫиле кодексӑн икӗ статйипе пуҫиле ӗҫсем пуҫарнӑ. Ӗҫ вырӑнӗпе усӑ курнӑ тесе шухӑшлакан инспекторпа ҫыхӑннӑ ӗҫе Ҫӗмӗрле район судне ярса панӑ ӗнтӗ.

Тӗпчевҫӗсем шухӑшланӑ тӑрӑх, Ҫӗмӗрле районӗнче ҫул-йӗр инспекторӗнче ӗҫленӗ ҫын кӑҫалхи пуш, ҫу, ҫӗртме уйӑхӗсенче водительсене урӑх статьяпа явап тыттарнӑ. Лешсем ҫул-йӗр правилине пӑснӑ: хӑрушсӑрлӑх пиҫиххине ҫыхӑнман, чарӑнма юраман ҫӗрте чарӑннӑ, страхламан машинӑпа ҫула тухнӑ. Вӑл вара вӗсене ҫуран ҫӳрекен ҫын ҫул-йӗр правилине пӑснӑ евӗр ҫырса панӑ. Ҫавӑншӑн лешсене 500-шер тенкӗ штраф ҫырса панӑ.

Шанчӑкран тухнӑ хыҫҫӑн инспектора ӗҫрен кӑларнӑ.

novorosinform.org сайтри сӑн

Йӗпреҫ поселокӗнче пурӑнакан 43 ҫулти арҫын киле часах таврӑнаймӗ – суд ӑна ҫирӗп режимлӑ колоние 20 ҫуллӑха ӑсатма йышӑннӑ.

Следстви тата суд палӑртнӑ тӑрӑх, кӑҫал ака уйӑхӗн 4-мӗшӗнче Йӗпреҫ поселокӗнче хайхискер 30 ҫулти арҫынпа калаҫса татӑлса «ӗҫленӗ» (теприн тӗлӗшпе уйрӑм производство уҫнӑ, вӑл следствипе ӗҫлеме киклӗшнӗ). Вӗсем эрех ӗҫмешкӗн укҫа илме 74 ҫулти хӗрарӑмӑн килне кӗнӗ, ӑна хӗненӗ. Унтан икӗ телефон йӑкӑртнӑ, хӗрарӑмран укҫа ыйтнӑ. Ватӑскер 750 тенкӗ кӑларса панӑ, анчах ку лешсене ҫитмен – каллех ыйтнӑ. Хӗрарӑм хӑранипе вӗсене 4 пин тенкӗ тыттарнӑ.

Арҫынсем ку вӗсемшӗн япӑх вӗҫленӗ тесе шутланӑ, ҫавӑнпа хӗрарӑма вӗлерме шут тытнӑ. Малтан вӗсем ватӑскере ҫиппе пӑвма тытӑннӑ, анчах татӑлса кайнӑ. Унтан 43-ри арҫын хачӑ илнӗ те ӑна мӑйӗнчен темиҫе хутчен чикнӗ. Лешӗ ҫавӑнтах вилнӗ.

Хӗрарӑм виллине пӗлӗшӗ темиҫе сехетрен курнӑ, кун пирки полицие пӗлтернӗ. Арҫынсене часах тытса чарнӑ. Вӗсем кинемейрен йӑкӑртнӑ телефонсене кӑмакара ҫунтарнӑ, анчах кӑмрӑк ашӗнче пайӗсене тупнӑ. Хваттерте вӑрланӑ укҫан пӗр пайӗ пулнӑ.

Ӗнер, чӳк уйӑхӗн 19-мӗшӗнче, каҫхи 10 сехет тлӗнче Шупашкарти Гладков урамӗнчи пӗр хваттерте пушар тухнӑ. Унти 26-мӗш ҫуртри пурӑнакан хӗрарӑм килӗнче ҫулӑм алхасма пуҫланӑ.

Тӑххӑрмӗш хутри пӗр пӳлӗмлӗ хваттерте пурӑнаканскер патне подъездра асли шутланакан Павел Тихонов тата 8-мӗш хутра пурӑнакан Сергей Ефимов чупса хӑварнӑ. Вӗсем хваттере вирхӗнсе кӗнӗ. Тӗтӗм сарӑлнӑскерте нимӗн те курӑнман. Кил хуҫи хӗрарӑмне хунар ҫутипе шыраса тупнӑ. Вӑл кӑритурта выртнӑ. Хваттертен тухас тенӗ пулинех. Дмитрий Артемьев пулӑшнипе арҫынсем хӗрарӑма пӗрремӗш хута антарнӑ. Унтан ӑна, пиҫсе кайнӑскерне, тухтӑрсем пульницӑна илсе кайнӑ.

Хӗрарӑм пирус туртнӑ чух асӑрханман пуль тесе шухӑшлаҫҫӗ. Пушарта хваттер сиенленнӗ.