Ҫӗнӗ Шупашкарта спорт комплексне ӗҫлеме чарнӑ. Унти «Солнечный» комплекс республикӑра санитарипе эпидемиологи лару-тӑрӑвӗ япӑхнине пӑхмасӑрах ӗҫленӗ. Аса илтерер: кӑшӑлвирус сарӑлнӑ саманара чылай предприяти-организацие хупрӗҫ. Вӗсенче халӑх йышлӑ пухӑннӑран чир сарӑлас хӑрушлӑх пысӑк тесе шухӑшлаҫҫӗ.

Ҫӗнӗ Шупашкарти спорткомплекса тӗрӗслевҫӗсем ака уйӑхӗн 9-мӗшӗнче пырса кӗнӗ. Унта спорт вӑййи иртнӗ. Пурӗ 10 ҫын ытла пухӑннӑ. Саккуна административлӑ майпа пӑсни ҫинчен протокол ҫырнӑ, ӑна суда ярса панӑ. Ҫавӑн хыҫҫӑн Ҫӗнӗ Шупашкарти спорт комплексне суд ӗҫлеме чарнӑ. Яланлӑха мар. 22 кунлӑха. Эпидемиологи тӑрӑмӗ япӑхнӑ вӑхӑтлӑха. Спорткомплекса суд приставӗсем пырса кӗнӗ, алӑксене хупса хунӑ.

lospet.ru сайтри сӑн

Шупашкарта 42 ҫулти арҫынна тытса чарнӑ. Вӑл ҫынна вӗлернӗ тесе шухӑшлаҫҫӗ.

РФ Следстви комитечӗ пӗлтернӗ тӑрӑх, ака уйӑхӗн 8-мӗшӗнче ҫак ӳсӗр арҫын хӗрсен ушкӑнне ҫулӑхнӑ. Лешсем унпа калаҫасшӑн пулман. Ку вӗсене кӗленчепе пеме пуҫланӑ, икӗ ҫӗҫӗпе хӑратнӑ.

Хӗрсем хӑраса кайнӑ, пулӑшу ыйтса кӑшкӑрнӑ. Арҫын вара пӗрин хыҫҫӑн чупнӑ. Ҫакна 35-ри арҫын курнӑ та хӗре хӳтӗлеме тӑнӑ, ӳсӗрскере лӑпланма ыйтнӑ.

Икӗ арҫын тытӑҫса ӳкнӗ. Ӳсӗрскер ҫамрӑккине ҫӗҫӗпе 6 хут чикнӗ. Лешӗ сурансене пула ҫавӑнтах вилнӗ. Ӳсӗр арҫынна иртен-ҫӳрен тытса чарнӑ, ӑна полицие тыттарса янӑ.

Халӗ пуҫиле ӗҫе малалла уҫӑмлатаҫҫӗ.

ptzgovorit.ru сайтри сӑн

Ака уйӑхӗн 11-мӗшӗнче Ҫӗнӗ Шупашкарта пулнӑ пушарта хӗрачан пурнӑҫӗ татӑлнӑ. Инкек Терешкова урамӗнчи 3-мӗш ҫуртра пулнӑ.

Ҫӑлавҫӑсем вырӑна ҫитсен чи малтанах ҫунакан ҫуртран кастрюль кӑларса пенӗ. Пушар шӑпах ҫавӑнтан тухнӑ ахӑртнех. Кайран хӗрачана урама йӑтса тухнӑ. Ӑна реанимаци машини илсе кайнӑ. Унтан хӗрарӑма ҫӑлнӑ, ӑна та пульницӑна ӑсатнӑ. Шел те, хӗрача чӗрӗ юлайман, унӑн чӗри тапма пӑрахнӑ.

Ҫынсем каланӑ тӑрӑх, хваттерте икӗ хӗрарӑмпа ача пурӑннӑ. Ҫӑлавҫӑсем пушара хӑвӑртах сӳнтернӗ.

aliexpress.ru сӑнӳкерчӗкӗ

Ҫак кунсенче Чӑваш Ен тӗп хулинче каклишкепе ҫӳрекен арҫынна тапӑннӑ. 58 ҫулти арҫын ака уйӑхӗн 7-мӗшӗнче 16 сехет тӗлӗнче Хусанкай урамӗнчи хӑй пурӑнакан ҫурт подъездне кӗнӗ. Ун патне иккӗн пырса туртмалли ыйтнӑ, Унтан документсене туртса илнӗ. Шар кураканнине пӗри тытса тӑнӑ, тепри ҫулланнӑ ҫын кӗсйисенчен паспорт, пенси удостоверенине, ҫавӑн пекех банк карттине тата 3 пин тенкӗ кӑларса илнӗ.

Шар курни килте пӑтӑрмах пирки 35 ҫулти ывӑлне пӗлтернӗ. Лешӗ ҫывӑхри уҫланкӑра кӳрентерекенсенчен пӗрне асӑрхать. Вӑл паспортпа пенси удостоверенине ҫунтарма хӑтланнӑ. Ҫамрӑк арҫын документсене туртса илнӗ.

«Шар курни 2 кунран право сыхлавҫисенчен пулӑшу ыйтасах тенӗ», – хыпарлаҫҫӗ Чӑваш Ен Шалти ӗҫсен министерствинче.

Сусӑра Шупашкарта пурӑнакан, унччен вӑрӑ тунӑшӑн тата ҫарантнӑшӑн судпа унччен айӑпланнӑ 36 ҫулти ҫын, ҫавӑн пекех вӑрлӑнӑшӑн тата алимент тӳлеменшӗн саккунпа унччен пӑтӑрмаха лекнӗ Канаш районӗнче пурӑнакан 35 ҫулти ҫын кӳрентернӗ. Палӑртнӑ тӑрӑх, вӗсем подъездри хваттерсенчен пӗринче эрех ӗҫнӗ. Сусӑра курсан вӗсем ҫаратса кӗсьене пуянлатма йышӑннӑ.

Нефедовсен сӑнӳкерчӗкӗ

Улатӑрта пурӑнакан, шкулта алгебрӑпа геометрие вӗрентекен Надежда Нефедовӑн ҫемйи шар курнӑ. Ака уйӑхӗн 6-мӗшӗнче ҫӗрле вӗсен килӗнче пушар тухнӑ. Ҫулӑм ҫуртне тӗп тунӑ, никӗс ҫеҫ юлнӑ.

Ҫемьери ҫынсем ҫири кӗпе вӗҫҫӗн урама чупса тухнӑ. Вӗсем ун чухне ҫывӑрнӑ. Ҫур ҫӗр иртни 2 сехет ҫурӑра вӑранса кайнӑ – ҫулӑм пӳртӗн пӗр пайне ярса илнӗ ӗнтӗ.

Ҫемьере – тӑватӑ ҫын, вӗсем халӗ хваттер тара тытнӑ, кил-тӗрӗшре усӑ курмалли хатӗрсем пачах ҫук. Ҫынсем май килнӗ таран пулӑшаҫҫӗ. Нефедовсене халь нихӑҫанхинчен ытла пулӑшу кирлӗ.

Раҫҫей Следстви комитечӗн тӗпчевҫисем Вӑрмар район ҫыннин тӗлӗшпе пуҫиле ӗҫ пуҫарнӑ. 45 ҫулти арҫын азартлӑ (кӑмӑл хӗрсе каймалли) вӑйӑ йӗркеленӗ тесе шухӑшлаҫҫӗ.

Тӗпчевҫӗсем хальлӗхе палӑртнӑ тӑрӑх, Вӑрмар районӗнче пурӑнакан арҫын Канашра 2019 ҫулхи чӳк уйӑхӗнчен пуҫласа 2020 ҫулхи пуш уйӑхӗччен вӑйӑ заведенине ӗҫлеттернӗ. Ун валли вӑл пурӑнмалли мар ҫуртра пӳлӗм тара илнӗ. Унта 14 компьютер вырнаҫтарнӑ.

Тӗпчевҫӗсем халӗ пуҫиле ӗҫе малалла тишкереҫҫӗ. Вӗсем арҫын вӑйӑ заведенине уҫнипе мӗн чухлӗ тупӑш илнине палӑртӗҫ.

РФ Следстви комитечӗн Чӑваш Енри управленийӗн пресс-службинче пӗлтернӗ тӑрӑх, азартлӑ вӑйӑ заведенине Шалти ӗҫсен министерствин Канашри йӗрке хуралҫисем тупса палӑртнӑ.

Муркаш районӗнчи Шомик ялӗнче 8 ҫулти ача шыва путнӑ. Пӑтӑрмах хыҫҫӑн тӗпчевҫӗсем тӗрӗслев пуҫарнӑ.

Ҫемьешӗн калама ҫук пысӑк инкек ака уйӑхӗн 4-мӗшӗнче пулса иртнӗ. Сакӑр ҫулти арҫын ача урама уҫӑлма тухсан пӗве ҫинчи пӑр ҫине кӗрсе кайнӑ. Анчах пӑр катӑлса кайнӑ та шыва кайнӑ. Саккӑрти ачапа пӗрле пулнӑ ҫичӗ ҫулти арҫын ача тусне пулӑшма хӑтланнӑ. Анчах хӑй те шыва кӗрсе ӳкнӗ. Апла пулин те вӑл ҫӑлӑнма вӑй ҫитернӗ. Унтан вӑл аслисенчен пулӑшу ыйтма чупнӑ. Анчах ачана ҫӑлма ӗлкӗреймен.

Инкек сӑлтавне, яваплисене тӗпчевҫӗсем тупса палӑртӗҫ.

Тӗпчевҫӗсем аслисене ачасемпе тимлӗ те асӑрхануллӑ пулма чӗнсе калаҫҫӗ. Кӑшӑлвируса пула халӗ шкул ачисем инҫет мелпе вӗренеҫҫӗ. Вӑхӑта вӗсем килте ирттереҫҫӗ.

Ҫак кунсенче кӑшӑлвирус саманинче пурӑнатпӑр та, ку хыпар та ҫав чирпе ҫыхӑннӑскерех. Килтен тухмасӑр ларсан амакран асӑрханма пулать тесе ӗнентернипе ватти-вӗтти урама тухма шикленет. Влаҫрисем йӗркене ҫирӗплететпӗр тесе саккунсене хытарчӗҫ. Карантин йӗркине пӑсакансене тата кӑшӑлвируспа ҫыхӑннӑ суя хыпар саракансене ҫирӗп явап тыттарма йышӑнчӗҫ.

«Контактра» халӑх ушкӑнӗнчи «Мы из Чувашии» (чӑв. Эпир Чӑваш Енрен) пӗрлӗхре «Ырантан хулана кӗртме тата унтан тухма чарӗҫ... Ятарлӑ ирӗк кирлӗ пулӗ. Протоколсем ҫырӗҫ… Штраф виҫи 40-70 пин тенкӗ…», – тесе ҫырнине прокуратура асӑрханӑ. Шупашкар хула администрацийӗнче ҫавӑн пек чаруллӑ хушу пулман. Апла пулсан тӗнче тетелӗнчи ҫӳлерех асӑннӑ хыпар суя шутланать.

Chuvash.er.ru сӑнӳкерчӗкӗ

Патӑрьел районӗнчи пӗр пуҫлӑха ӗҫри машинӑпа хӑйӗн тӗллевӗпе ярӑнма юратнӑшӑн явап тыттарнӑ.

Чӑваш Ен прокуратуринче пӗлтернӗ тӑрӑх, надзор органӗ вырӑнти хӑйтытӑмлӑх органӗсем коррупципе кӗрешмелли саккуна епле пӑхӑннине тӗрӗсленӗ.

Пӑлапуҫ Пашьел ял тӑрӑхӗн пуҫлӑхӗн машина пулнӑ. Унпа вӑл кӑмалтан усӑ курнӑ. Ӗҫ тума кайнӑ чухне ҫеҫ мар. Канмалли кунсенче те, уявра та. Ун чухне вӑл ӗҫри машинӑпа хӑйӗн тӗллевӗпе усӑ курнӑ.

Ӗҫри машинӑпа тӗллевсӗр хутланӑ пуҫлӑх тӗлӗшпе прокуратура РФ Административлӑ кодексӗн 19.1 статйипе килӗшӳллӗн ӗҫ пуҫарнӑ. Пӑлапуҫ Пашьел ял тӑрӑхӗн пуҫлӑхӗн тӗлӗшпе пуҫарнӑ ӗҫе пӑхса тухса суд административлӑ майпа явап тыттарма йышӑннӑ. Тепӗр майлӑ каласан, штрафланӑ.

«Про Город» сайтран илнӗ сӑн

Тӑвай районӗнче типӗ курӑк ҫунтарнине пула чутах ял хыпса илмен. Кун пирки «Про Город» хаҫата халӑх корреспонденчӗ пӗлтернӗ.

Тӑвай районӗнчи Ҫӑлпуҫ ялӗ ҫывӑхӗнче типӗ курӑк ҫунтарнӑ. Анчах ҫулӑма тытса чарайман – вӑл ял патне ҫывхарнӑ. Вырӑна пушар машинисем ҫитнӗ.

Ҫулӑм икӗ масар патне ҫитнӗ, унти типӗ курӑк та ҫуннӑ. Ял ҫывӑхне ҫывхарнӑҫемӗн-ҫывхарнӑ. 10 метр кӑна юлнӑ. Юрать, ҫав вӑхӑталла ҫӗре сухалама ӗлкӗрнӗ.

Сӑмах май, паян Атӑл леш енче те ҫуннӑ тӗслӗх пулнӑ.