"Про Город" сайтри сӑн

Паян, утӑ уйӑхӗн 11-мӗшӗнче, Ҫӗнӗ Шупашкарта Атӑл хӗрринче канакансем шыв ҫине ҫын вилли ишсе тухнине курнӑ. Кун пирки вӗсем ҫӑлав службине пӗлтернӗ.

Ҫӑлавҫӑсем вилене ҫыран хӗррине кӑларнӑ. Ҫак арҫын темиҫе кун каялла путнине ҫынсем курнӑ. «19 ҫулти каччӑ путнӑ, вӑл темиҫе кун каялла ҫухалнӑ, 8-мӗшӗнченпех пулмалла шыраҫҫӗ», - пӗлтернӗ халӑх корреспонденчӗ «Про Город» хаҫата.

Кун тӗлӗшпе процессуаллӑ тӗрӗслев ирттереҫҫӗ.

Пӑтӑрмахлӑ истори Шупашкарти Керамзит проездӗнчи автодромра ута уйӑхӗн 9-мӗшӗнче пулса иртнӗ. Кун пирки Чӑваш Енӗн Патшалӑх ҫул-йӗр хӑрушсӑрлӑхӗн инспекцийӗнче пӗлтернӗ.

21 ҫулти хӗр «автодром» текен тӗрӗслев витӗр ӑнӑҫлӑ тухнӑ. Савӑннипе ҫавскер тусӗн «Мерседес» рулӗ умне ларнӑ. Машина хуҫи ҫав самантра салонта пулнӑ. Хӗр машинӑна хускатса каяс тенӗ. Ҫавна ҫул-йӗр хӑрушсӑрлӑхӗн инспекторӗ, вӑл ӑна экзамен тыттарнӑ, асӑрханӑ. Инспектор машинӑна чарса ҫул-йӗр хӑрушсӑрлӑхӗн экипажне чӗнсе илнӗ.

Хула тӑрӑх машинӑпа ҫӳретӗп тесе хӗр экзаменчченех мухтаннӑ имӗш. Хӑйне тытса чарнӑ хыҫҫӑн вӑл машинӑна урӑх вырӑна куҫарса лартасшӑн пулнине ӗнентерме хӑтланнӑ.

Хула урамӗсем тӑрӑх ҫӳресе практика экзаменӗ тытманскере руль умне правасӑр ларнӑшӑн административлӑ майпа явап тыттарма йышӑннӑ. Правсӑр ҫынна руль тыттарнине те штрафлӗҫ.

Инкеклӗ лару-тӑру министерстви тунӑ сӑн

Утӑ уйӑхӗн 9-мӗшӗнче 15 сехет ҫурӑра Канаш районӗнчи Вӑрӑмпуҫ ялӗнче 33 ҫулти арҫын хуҫалӑхӗнче пушар алхаснӑ.

Ҫулӑм арҫыннӑн 6 ҫулти ывӑлне пула тухнӑ. Амӑшӗ ҫулталӑк ҫурӑри ачипе аппаланнӑ вӑхӑтра ку 5 ҫулти йӑмӑкӗпе аслӑк тӑрринче вылянӑ. Арҫын ача пластик стаканра шыв ӑшӑтнӑ, шӑрпӑка вара тӗпелти плита патӗнчен илнӗ.

Ҫулӑм тухсан ачасем сарайран сиксе тухнӑ, анкартине чупнӑ. Амӑшӗ ҫулӑм алхаснине каярахпа ҫеҫ курнӑ. Вӑйлӑ ҫиле пула ҫулӑм кӳршисен хуралтисем ҫине куҫнӑ.

Инкеклӗ лару-тӑру министерстви тунӑ сӑн

Утӑ уйӑхӗн 7-мӗшӗнче Муркаш районӗнче икӗ ҫын путса вилнӗ. Инкеклӗ лару-тӑру министерстви пӗлтернӗ тӑрӑх, иккӗшӗ те юраман вырӑнта шыва кӗнӗ.

Ҫурла Тӑрри ялӗ ҫывӑхӗнчи пӗвере ҫак тӑрӑхрах пурӑннӑ 48 ҫулти арҫыннӑн пурнӑҫӗ татӑлнӑ. Ҫынсем каланӑ тӑрӑх, утӑ пуҫтарнӑ хыҫҫӑн арҫын юлташӗсемпе шыва кӗме кайнӑ. Хӑй вара урӑ пулман.

Тепӗр инкек Мӑн Шетмӗ плотининче Автанкасси ялӗ ҫывӑхӗнче пулнӑ. 27 ҫулти арҫын та шӑрӑхра шыва кӗме кайнӑ. Вӑл плотина ҫийӗн карнӑ пӑрӑх ҫинчен сикнӗ те каялла тухман.

ҪҪХПИ тунӑ сӑн

Утӑ уйӑхӗн 7-мӗшӗнче 21 сехетре «Сӗнтӗрвӑрри – Аксарин» ҫулӗ ҫинче пулнӑ инкекре хӗр вилнӗ. Вӑл 15 ҫулта пулнӑ.

ҪҪХПИ малтанлӑха пӗлтернӗ тӑрӑх, «Хендай Солярис» машина водителӗ ҫулӑн тепӗр енчи хӗррине тухса кайса хӗр ҫине пырса кӗнӗ.

Иномарка водителӗ ӳсӗр пулни паллӑ. 15 ҫулти хӗрӗн кӑҫал 9-мӗш класа каймалла пулнӑ.

goodfon.ru сайтри сӑн

Етӗрне районӗнчи Ҫатра ялӗнче пушар алхаснӑ. Ку инкек ҫынна пула тухман.

Утӑ уйӑхӗн 5-мӗшӗнче Ҫатра ялӗ ҫывӑхӗнче аслатиллӗ ҫумӑр ҫунӑ. Ҫур ҫӗр иртни 2 сехетре 80 ҫулти хӗрарӑмӑн мунчине аҫа ҫапнӑ. Мунча тӗппипех ҫунса кайнӑ. Юрать-ха, кил хуҫи хӗрарӑмӗ хӑй шар курман.

Ҫулӑм хӑмаран ҫапса тунӑ вутӑ сарайне кӑштах куҫма ӗлкӗрнӗ. Пушарнӑйсем ҫулӑма сарӑлма паман – сӳнтернӗ.

Сӑмах май, иртнӗ талӑкра республикӑра 7 пушар пулнӑ.

«Про Город» сайтран илнӗ сӑн

Ҫӗнӗ Шупашкарта Атӑлта арҫын виллине тупнӑ. Ку паян 16 сехет те 20 минутра пулнӑ. Унӑн виллине иртен-ҫӳрен асӑрханӑ. Кун пирки «Про Город» хаҫата халӑх корреспонденчӗ пӗлтернӗ.

Арҫын 50 ҫулсенчи пек курӑнать. Унӑн вилли ҫыранран инҫех мар шывра выртнӑ. Ҫакна курнӑ ҫынсем каланӑ тӑрӑх, арҫын юраман вырӑнта шыва кӗнӗ.

Арҫын виллине ҫӑлавҫӑсем 17 сехет те 10 минутран шывран кӑларнӑ. Вырӑнта следовательсем ӗҫленӗ.

Шупашкарта пурӑнакан 17 ҫулти каччӑна наркотик сутма тӑнӑшӑн айӑпланӑ. Ӑна Раҫҫей Федерацийӗн 30-мӗш статйин 3-мӗш пайӗпе тата 228-мӗш статйин 1-мӗш пайӗпе явап тыттарма йышӑннӑ. Ку статьясемпе наркотика саккуна пӑсса пысӑк виҫепе сутакансене айӑплаҫҫӗ.

Следстви тата суд ҫирӗплетнӗ тӑрӑх, кӑҫалхи пуш уйӑхӗн 30-мӗшӗнче каччӑ Шупашкарти пӗр ҫуртӑн картишӗнче 8 грамм ытла наркотик туяннӑ. Ӑна вӑл кайран сутма тесе упранӑ. Анчах ярӑнтарса ӗлкӗреймен – наркотика пакунлисем асӑрхаса туртса илнӗ.

РФ Следстви комитечӗн Чӑваш Енри управленийӗн пресс-службинче пӗлтернӗ тӑрӑх, ҫамрӑка суд хупса усрамасӑр 5 ҫуллӑха ирӗкрен хӑтарма йышӑннӑ.

«Про Город» сайтран илнӗ сӑн

Чӑваш Енре пассажирсене илсе ҫӳрекен автобус ҫунса кайнӑ. Ку Канаш хулинче пулнӑ. Кун пирки «Про Город» хаҫата халӑх корреспонденчӗ пӗлтернӗ.

Паян, утӑ уйӑхӗн 5-мӗшӗнче, Канаш хулинче автовокзал ҫывӑхӗнчи общество транспорчӗн чарӑнӑвӗнче автобус ҫунма тытӑннӑ. Вӑл хулари маршрут пулман, «Мускав - Канаш» маршрутпа ҫӳренӗ.

Автобус мӗншӗн мӑкӑрланма тытӑнни паллӑ мар, сӑлтавне халӗ специалистсем уҫӑмлатаҫҫӗ. Тен, транспортра ҫитменлӗхсем пулнӑ. Инкек вӑхӑтӗнче автобусра ҫынсем пулман.

izhevsk.ru сӑнӳкерчӗкӗ

Ҫӗнӗ Шупашкарта пурӑнакан 30 ҫулти хӗрарӑм чаплӑ йытӑ ҫури туянасшӑн пулнӑ. Шпиц ӑрачӗллӗ йытӑ ҫури сутакан ҫыннӑн пӗлтерӗвне вӑл тӗнче тетелӗнче асӑрханӑ. Хӗрарӑм анчӑк хуҫипе ҫыру ҫӳретсе хӑш-пӗр ыйтӑва уҫӑмлатнӑ. Чӗрчуна сутаканни йытӑ ҫурине икӗ сехет хушшинче килех пырса пама шантарнӑ. Анчах малтан укҫа тӳлеме ыйтнӑ. 15 пин тенкӗ. Шпиц туянас ӗмӗтлӗ хӗрарӑм укҫана куҫарса панӑ, анчах йытӑ ҫурин «хуҫи» ҫырусене хуравлама пӑрахнӑ.

Улталаннине ӑнланса илнӗ хыҫҫӑн хӗрарӑм йӗрке хуралҫисем патне васканӑ. Вӑл вӗсене каланӑ тӑрӑх, ҫынсене ун пек улталакансем пирки вӑл пӗрре ҫеҫ мар илтнӗ, анчах хӑй те ҫавӑн пек авӑра лекесси пирки шухӑшлама та пултарайман. Пакунлисем халӗ ултавҫӑна шыраҫҫӗ.