news.myseldon.com сӑнӳкерчӗкӗ

Вӑрнар районӗнчи Ҫарӑклӑ ялӗ ҫывӑхӗнче полицейски виллине тупнӑ. Пӑтӑрмах пирки малтанласа тӗнче тетелӗнчи халӑх ушкӑнӗсенче пӗлтернӗ, каярах ку хыпара Чӑваш Енӗн Шалти ӗҫсен министерствинче ҫирӗплетсе панӑ.

Лейтенант ӗҫ хыҫҫӑн пистолета ӗҫре парса хӑвӑрман иккен. Ҫавӑн хыҫҫӑн ӑна шырама тытӑннӑ. Ӗҫри сӗтел ҫинче вӑл хут ҫырса хӑварнӑ, унта вӑл тӑван тӑрӑхӗнче пулассине пӗлтернӗ иккен. Полицейски виллине, чӑн та, ҫавӑнта тупнӑ.

Пӑтӑрмах сӑлтавне халӗ йӗрке хуралҫисем тӗпчеҫҫӗ.

https://t.me/pg21ru/3142 сӑнӳкерчӗкӗ

Шупашкар хулинче тӗлӗнмелле пӑтӑрмах пулса иртнӗ. Каччӑна пулӑшас тесе туалетри стенана ватма тивнӗ.

«Прогород» кӑларӑм «Телеграмра» пӗлтернӗ кӗске хыпарта пӑтӑрмах пирки тӗплӗн ӑнлантарса тӑман. Ҫакӑ ҫеҫ паллӑ.

Качча техника шахтипе ҫӳле улӑхнӑ, ҫавӑн чухне вӑл тӑххӑрмӗш хутран персе аннӑ. Ӑна ҫӑлас тесе туалет стенине ишме тивнӗ.

Каччӑ техника шахти тӑрӑх мӗн сӑлтавпа хӑпарни хальлӗхе паллӑ мар. Ӑна вӑл хӑй ҫеҫ пӗлет-тӗр.

P.S. Каччӑ кӑвакарчӑна ҫӑлас тенӗ иккен. 9-мӗш хутран вӑл пӑрӑх тӑрӑх шуса 1-мӗш хута аннӑ. Инкек вырӑнне ҫӑлавҫӑсем пырса ҫитсен стенана перфораторпа шӑтарнӑ, каччӑна ҫав шӑтӑкран кӑларнӑ.

Паян ирхи 5 сехетре Шупашкарта хӑйӗн хваттерӗнче 60 ҫулти хӗрарӑм ҫунса вилнӗ. Шел, ӑна ҫӑлма май килмен. Кун пирки Инкеклӗ лару-тӑру министерстви пӗлтерет.

Пушар Чапаев урамӗнчи 9/1-мӗш ҫуртри хваттерте пулнӑ. Тӗтӗм тухнине подьездри кӳрши чи малтан асӑрханӑ. Вӑлах пушарнӑйсене чӗннӗ.

Ҫулӑм мӗнрен тухнӑ-ха? Кил хуҫи хӗрарӑмӗ пируса сӳнтермен иккен. Малтан кравать ҫунма тытӑннӑ, кайран ытти сӗтел-пукана ярса илнӗ.

«Промлит» савутӑн слесарӗ ӑшӑпа тивӗҫтерекен трассӑна ӳксе вилнӗ. Ку пӑтӑрмах пуш уйӑхӗн 11-мӗшӗнче пулнӑ. Халӗ йӗрке хуралҫисем ку тӗлӗшпе тӗрӗслев ирттереҫҫӗ.

Ҫав кун Шупашкарти Сӗнтӗрвӑрри ҫулӗ ҫинчи 26-мӗш ҫурт адреспа вырнаҫнӑ ӑшӑпа тивӗҫтерекен трасса ҫинче слесарь виллине тупнӑ. Ӑна пусмӑрласа вӗлернӗ йӗр пулман. Вӑл 68 ҫулта пулнӑ.

Малтанлӑха пӗлтернӗ тӑрӑх, слесарь дежурствӑра пулнӑ. Вӑл ӗҫ вырӑнӗнчен тухнӑ пулнӑ, ҫул ҫинче вилнӗ.

pixabay.com сӑнӳкерчӗкӗ

Улатӑрти район пульницинче ӗҫлекен тухтӑр йӗрке хуралҫисене пулӑшнӑшӑн ята кӗнӗ.

ЧР Следстви комитечӗн Чӑваш Енри управленийӗнче пӗлтернӗ тӑрӑх, хирург-тухтӑр 2019 ҫулхи ҫурла уйӑхӗнчен тытӑнса 2021 ҫулхи утӑ уйӑхӗччен йӗрке хуралҫисене сӗтевле пулӑшса пурӑннӑ. 2 пин тенкӗ укҫалла вӑл вӗсене (пурӗ 5 ҫынна) ӗҫрен пӑрӑнма ирӗк паракан справка ҫырса панӑ. Сӗтев панӑ йӗрке хуралҫисене халӗ ӗҫрен кӑларса янӑ ӗнтӗ. Вӗсенчен пӗрне 5 пин тенкӗлх штраф хурса панӑ.

Тухтӑр пирки каласан, 2021 ҫулхи ҫӗртме уйӑхӗнче вӑл пӗлӗшӗнчен 1 пин тенкӗ илнӗ, ӑна вӑл больничнӑй уҫса панӑ.

Врач тӗлӗшпе пуҫарнӑ пуҫиле ӗҫе Улатӑр районӗнчи суда ярса панӑ.

ШӖМ архивӗнчи сӑн

Пуш уйӑхӗн 10-мӗшӗнче каҫхине Муркаш районӗнчи Сидукасси ялӗнче ҫурт ҫунса кайнӑ. Кун пирки Инкеклӗ лару-тӑру министерстви пӗлтерет.

Ҫулӑм пӳрте тӗппипех тӗп тунӑ, хуралтӑсене сиенлетнӗ. 1971 ҫулта ҫурална арҫын, шел те, вилнӗ. Хӗрарӑм суранланнӑ. Ӑна пульницӑна илсе ҫитернӗ.

Сӑмах май, ҫулталӑк пуҫланнӑранпа Чӑваш Енре 197 пушар пулнӑ. Вӗсенче 14 ҫын вилнӗ, 18 ҫын суранланнӑ. Малтанлӑха пӗлтернӗ тӑрӑх, тӑкак 1,6 миллион ытла тенкӗпе танлашнӑ.

chuvashia.sledcom.ru сӑнӳкерчӗкӗ

Шупашкар районӗнчи Курак Чурачӑк ялӗнче 2021 ҫулхи кӑрлач уйӑхӗн 7-мӗшӗнче икӗ арҫын — кӳршӗсем — хирӗҫсе кайнӑ. 69 ҫулти арҫын хӑй пурӑнакан хӗрарӑм килӗнче 55 ҫулти кӳршипе хирӗҫсе кайнӑ.

Малтан икӗ арҫын тавлашса кайнӑ. Унтан асли хӑйнчен кӗҫӗнреххине икӗ хутчен тапса ҫапнӑ, унтан ҫӗҫӗпе кӑкӑрӗ тӗлнче чикнӗ. Сурана пула арҫын кӑштахран вилсе кайнӑ.

Тӗрлӗ экспертиза ирттернӗ хыҫҫӑн 69 ҫулти арҫын пуҫ чирӗпе аптӑрани палӑрнӑ. Вӑл хӑй мӗн хӑтланнине ӑнланса пӗтереймест иккен. Ӑна психиатри пульницине ӑсатма йышӑннӑ.

chuvashia.sledcom.ru сӑнӳкерчӗкӗ

Мускав хулинче пурӑнакан 66 ҫулти арҫын 59 ҫулти шӑллӗне вӗлернӗ. Халӗ ӑна ҫирӗп режимлӑ колоние 10 ҫуллӑха ӑсатнӑ.

Пӑтӑрмах 2021 ҫулхи ҫу уйӑхӗнче пулса иртнӗ.

Мускавран килнӗ арҫын шӑллӗн Шупашкарти ҫуртӗнче пулнӑ. Ӳсӗр хӑна тӑванӗпе хирӗҫсе кайсан ӑна 124 хутран кая мар ҫӗҫӗпе чиксе, 7 хутран кая мар тапса-ҫапса пӗтернӗ. Шар курни йывӑр сурансене пула вилсе кайнӑ.

Пиччӗшӗ шӑллӗн виллине путвала пенӗ.

Психиатри экспертизи палӑртнӑ тӑрӑх, усалланнӑ арҫын пуҫӗ йӗркеллех ӗҫлет. 66 ҫулти арҫыннӑн ҫитес 10 ҫула ҫирӗп режимлӑ колонире ирттерме тивӗ.

portretist.moy.su сӑнӳкерчӗкӗ

Краснодар крайӗнче пурӑнакан хӗрарӑма Чӑваш Енре суд тунӑ. Хӗрарӑм унччен Чӑваш Енре пурӑннӑ. Кунта вӑл пуҫлӑх пулса ӗҫленӗ — Вӑрнарти 1-мӗш шкулта директор пулнӑ.

Директорта тӑрӑшнӑ вӑхӑтра хӗрарӑм 2017 ҫулхи чӳк уйӑхӗнчен пуҫласа 2020 ҫулхи раштав уйӑхӗччен ӗҫ вырӑнӗпе усӑ курса пурӑнни ҫиеле тухнӑ. Вӑл учительсене преми тӳленӗ те укҫан пӗр пайне хӑйне пама ыйтнӑ. Ҫапла майпа виҫӗ преподаватель директора пурӗ 150 пине яхӑн тенкӗ тыттарнӑ.

Следстви пынӑ вӑхӑтра экс-директор вӗрентекенсене укҫана каялла тавӑрса панӑ. Хӗрарӑма суд тӗрмене хупмасӑр 2,5 ҫуллӑха ирӗкрен хӑтарма йышӑннӑ.

Чӑваш Енре иртнӗ талӑкра икӗ пушар пулнӑ. Вӗсенче икӗ ҫын аманнӑ.

Инкеклӗ лару-тӑру министерстви пӗлтернӗ тӑрӑх, пуш уйӑхӗн 8-мӗшӗнче Шупашкарти Гарин-Михайловский урамӗнче мунча ҫуннӑ. Кил хуҫин 65 ҫулти мӑшӑрӗ тӗтӗмпе наркӑмӑшланнӑ. Ӑна тухтӑрсем пулӑшнӑ. Малтанлӑха пӗлтернӗ тӑрӑх, пашар мунчари кӑмака йӗркеллӗ ӗҫлеменрен тухнӑ.

Пуш уйӑхӗн 8-мӗшӗнче ҫӗрле Сӗнтӗрвӑрри районӗнчи Кукашни ялӗнче пушар ҫурта тӗп тунӑ. 62 ҫулти кил хуҫине ҫӑлавҫӑсем урама илсе тухнӑ. Арҫыннӑн пичӗ тата ҫӳлти сывлав органӗсем пиҫсе кайнӑ.