21.мвд.рф сӑнӳкерчӗкӗ

Ӗнер, ака уйӑхӗн 17-мӗшӗнче, ирхи 9 сехетре Канаш районӗнче виҫӗ машина пырса ҫапӑннӑ. Пӑтӑрмах «Аниш» автоҫул ҫинче сиксе тухнӑ.

Хучел ялӗ тӗлӗнче «Форд-Фокус», «Фольксваген-Поло» тата «Лада-Гранта» машина пырса ҫапӑннӑ. Хамӑр ҫӗршывра туса кӑларни хыпса илнӗ.

Чӑваш Енӗн Шалти ӗҫсен министерствинче малтанласа пӗлтернӗ тӑрӑх, инкек сӑлтавӗ — «Форд-Фокус» автомашинӑн 46 ҫулти водителӗ сулахаялла пӑрӑннӑ чухне «Фольксвагена» ирттерсе яманни. «Поло» пассажирӗ суранланнӑ, ӑна больницӑна ӑсатнӑ.

Сӑмах май, водительсем урӑ пулнӑ.

"Про Город" сайтӗнчи сӑн

Паян 15 сехет те 45 минутра Ҫӗнӗ Шупашкарти Собор лапамӗнчи общество транспорчӗн чарӑнӑвӗнче ҫын виллине тупнӑ. Кун пирки "Про Город" хаҫата халӑх корреспонденчӗ пӗлтернӗ.

Ҫакӑ паллӑ: арҫынна пумсӑрласа вӗлернӗ йӗр ҫук. Вӑл 1951 ҫулта ҫуралнӑскер пулнӑ.

РФ Следстви комитечӗн Чӑваш Енри следстви органӗсем кун тӗлӗшпе следстви умӗнхи тӗрӗслев ирттереҫҫӗ

pulse.mail.ru сӑнӳкерчӗкӗ

Пӗлтӗрхи ҫурла уйӑхӗн 31-мӗшӗнче Шупашкари общество транспортӗнче пӗр пассажир персе аннӑ. Салонта тӑрса пыракан 28 ҫулти хӗрарӑм 45-мӗш маршрутпа ҫӳрекен автобусра хыҫалта тӑрса пынӑ. Вӑл сылтӑм аллипе салонти карлӑкран тытӑнса тӑнӑ, тепӗр аллинче чечек ҫыххи пулнӑ.

Фучик тата Богдан Хмельницкий урамӗсем хӗресленнӗ ҫӗрте автобус водителӗ кӗтмен ҫӗртен чарӑнса ларнӑ. Ҫапла вӑл ирӗксӗртен тунӑ. Ахальлӗн тепӗр машинӑпа ҫапӑнма пултарнӑ. Пассажир-хӗрарӑм вӑркӑнса кайнӑ та аллине амантнӑ.

Пӑтӑрмах тӗлӗшпе йӗрке хуралҫисем пуҫиле ӗҫ пуҫарнӑ. Водитель шар курнине тӑкака саплаштарнӑ, ҫавна май водителе (вӑл — Ҫӗнӗ Шупашкарта пурӑнакан 47 ҫулти арҫын) суд туман.

Росгварди сайтӗнчен илнӗ сӑн

Росгварди Управленийӗн Чӑваш Енри управленийӗн ведомство хуралӗн сотрудникӗсем ӳсӗрӗлнине пӑхмасӑр руль умне ларса ҫул ҫинче хӑрушӑ лару-тӑру йӗркелекен Шупашкар ҫыннине тытса чарнӑ.

Трактор тӑвакансен проспектӗнче унталла-кунталла пӑркаланса пыракан ҫӑмӑл машинӑна росгвардеецсем иртнӗ каҫ хурал вӑхӑтӗнче асӑрханӑ. Ҫул-йӗр патруль службин ӗҫтешӗсене йӗрке пӑсакан пирки пӗлтернӗ хыҫҫӑн йӗрке хуралҫисем унӑн машинине чарнӑ та унӑн хучӗсене тӗрӗсленӗ хушӑра водитель ӳсӗр пулнин характерлӑ паллисене асӑрханӑ. Каярахпа ӑна ҪҪХПИ сотрудникӗсен аллине тыттарнӑ.

32 ҫулти ҫын медицина тӗрӗслевне тума килӗшмен. Ун тӗлӗшпе административлӑ правӑна пӑсни пирки протокол ҫырнӑ.

Следстви комитечӗ тунӑ сӑн

Элӗк районӗнче пурӑнакан виҫӗ арҫынна тытса чарнӑ. Вӗсем ҫынна вӗлернӗ тесе шутлаҫҫӗ. Иккӗшӗ - пиччӗшӗпе шӑллӗ, тепри - пӗлӗшӗ.

Следстви пӗлтернӗ тӑрӑх, Элӗкушкӑнӗнче пурӑнакан ҫак арҫынсем ака уйӑхӗн 8-мӗшӗнче яла Чулхулари ҫын выльӑх пуҫтарма килнине пӗлнӗ. Хайхискерсем унӑн укҫа пуррине чухланӑ, ӑна пӑру кӑтартма тесе картише илсе кӗнӗ.

Картишре вӗсем ӑна хӗнеме пуҫланӑ, вӗрен илсе тухса пӑвнӑ. Выльӑх пуҫтаракан сывлама пӑрахсан унӑн укҫине илнӗ. Вилене вара аслӑк тӑрринче пытарнӑ.

Выльӑх пуҫтараканӑн тӑванӗсем пӑшӑрханма пуҫланӑ, полицие кайса заявлени ҫырнӑ. Ара, вӑл ҫыхӑнӑва тухма пӑрахнӑ. Участковӑй шырав вӑхӑтӗнче ҫав картишре кӳршӗ регион арҫыннин телефонне тупнӑ. Арҫынсене тытса чарнӑ. Палӑртмалла: пӗртӑвансенчен асли унччен те судпа темиҫе хут айӑпланнӑ, тӗрмерен акан 5-мӗшӗнче тухнӑ.

Следстви комитечӗ тунӑ сӑн

Куславккара пурӑнакан 32 ҫулти арҫын пӗлтӗр раштав уйӑхӗн 30-мӗшӗнче тӗрмерен ирӗке тухнӑ, анчах тепӗр 9 кунранах вӑл каллех преступлени тунӑ. Кун пирки сайтра пӗлтернеччӗ.

Ун телӗшпе суд пулнӑ. Хальхинче ӑна уйрӑм режимлӑ колоние 11 ҫуллӑха ӑсатнӑ. Палӑртмалла: арҫын унччен те судра пӗрре мар явап тытнӑ, йӗплӗ пралук леш енче пӗтӗмпе 13 ҫул ирттернӗ.

Следстви тата суд акӑ мӗн ҫирӗплетнӗ: кӑрлачӑн 9-мӗшӗнче вӑл урамра 45-ри арҫынпа паллашнӑ. Вӗсем эрех илнӗ те хваттере кайнӑ. Ӗҫкӗ вӑхӑтӗнче хайхискерсем хирӗҫсе кайнӑ. Тин кӑна тӗрмерен тухнӑ арҫын хӑнана 30 хутчен ҫапнӑ-тапнӑ. Лешӗ тепӗр кун реанимацире вилсе кайнӑ.

cheb.media сайтри сӑн

Паян каҫхи 6 сехетре Шупашкарти "Ярмӑрккӑ" суту-илӳ комплексӗнче пушар пулнӑ. Вырӑна пушарнӑйсем часах ҫитнӗ. Ҫулӑма 10-а яхӑн техника сӳнтернӗ. Ҫавӑнтах пушара сӳнтерес енӗпе ӗҫлекен оперштаб йӗркеленӗ.

Инкеклӗ лару-тӑру министерстви пӗлтернӗ тарӑх, ҫулӑм парковка енчи 8-9-мӗш ретсенче тухнӑ. Ӑна часах сӳнтернӗ. Малтанлӑха пӗлтернӗ тӑрӑх, ҫулӑм темиҫе контейнера сиенлетнӗ. Хальлӗхе пушар мӗнрен тухнине пӗлтермен.

Патшалӑхӑн ҫул-йӗр инспекцийӗн сӑнӳкерчӗкӗ

Шупашкар хулинче пӗр хӗрарӑм-водитель машинӑна хыҫалалла чакарма хӑтланса ватӑ хӗрарӑма таптанӑ. Ҫавӑн пек инкексенче кӑҫалхи 3 уйӑхра пирӗн республикӑра 14 ҫынна амантнӑ.

Республикӑн клиника больници умӗнчи инкек ака уйӑхӗн 10-мӗшӗнче кӑнтӑрла пулса иртнӗ. 28 ҫулти хӗрарӑм-водитель больница умӗнчи парковкӑра «Opel Corsa» автомбильпе каялла чакса пынӑ чухне 58 ҫулти хӗрарӑм ҫине пырса кӗнӗ. Инкеке лекнине тухтӑрсем тӗрӗсленӗ хыҫҫӑн хӗрарӑм килне кайнӑ.

Водитель урах пулнӑ, анчах ҫын сывлӑхне сиен кӳнӗшӗн ун тӗлӗшпе административлӑ ӗҫ пуҫарнӑ.

Паян ирхине Шупашкарти Граждан урамӗнче «Шевроле» ҫаврӑнса ӳкнӗ. Кун пирки ҪҪХПИ пӗлтерет.

Ку ирхи 5 сехет те 16 минутра пулнӑ. Граждан урамӗнчи 101/1-мӗш ҫурт ҫывӑхӗнче машина ҫаврӑнса ӳкнӗ. Руль умӗнче 21 ҫулти каччӑ ларнӑ. Унӑн права та пулман. Хайхискер ӳсӗр пулни те палӑрнӑ, анчах вӑл медосвидетельствовани витӗр тухма килӗшмен.

Водителе 10-15 талӑклӑха хупма е 30 пин тенкӗ таран штраф тӳлеттерме пултараҫҫӗ.

Инкеклӗ лару-тӑру министерстви тунӑ сӑн

Ака уйӑхӗн 8-мӗшӗнче каҫхи 5 сехетре пушарнӑйсем патне шӑнкӑрав ҫитнӗ: Шупашкар районӗнчи Ҫӗнӗ Тутаркасси ялӗнче ҫулӑм алхасма пуҫланӑ. Октябрь – 70 ҫул урамӗнчи 23-мӗш ҫуртри пӗрремӗш хутри хваттерте пушар тухнӑ.

Кил хуҫисем урама хӑйсемех тухӑ. Анчах ҫӑра тӗтӗм сарӑлнипе виҫҫӗмӗш хутри икӗ хваттерти ҫынсем урама тухайман. 46-ри хӗрарӑм, 85 ҫулти кинемейпе унӑн 14-ри мӑнукӗ килӗсенчех юлнӑ. Вӗсене ҫӑлавҫӑсем илсе тухнӑ.

Кинмейпе мӑнукне пульницӑна ӑсатнӑ, вӗсене тухтӑрсен пулӑшӑве кирлӗ пулнӑ. Халӗ пушар мӗнрен тухнине уҫӑмлатаҫҫӗ.