chuvashia.sledcom.ru сӑнӳкерчӗкӗ

РФ Следстви комитечӗн Чӑваш Енри управленийӗн тӗпчевҫисем кондитер фабрикинче ӗҫлекен хӗрарӑм аманнӑ тӗслӗхпе пуҫиле ӗҫ пуҫарнӑ. Вӗсем палӑртнӑ тӑрӑх, предприятире ӗҫ хӑрушсӑрлӑхӗн правилисене пӑхӑнман.

Инкек кӑҫалхи ака уйӑхӗн 5-мӗшӗнче 15 сехет те 20 минутра пулнӑ. Шупашкарти предприятисенчен пӗринчи кондитер цехӗнчи газ кӑмакин операторӗ вафли кӑмакине тасатнӑ. Хӗрарӑм аллине кӑмакана чиксе ярсан сылтӑм ал лапписӗр тӑрса юлнӑ.

Ҫывӑх вӑхӑтра суд экспертизисем иртӗҫ, кӳнтеленсенчен ыйтса пӗлеҫҫӗ. Пуҫиле ӗҫе малалла тӗпчеҫҫӗ.

forum.zarulem.ws сӑнӳкерчӗкӗ

Ҫу уйӑхӗн 12-мӗшӗнче Канаш районӗнче ӳсӗр водитель инкеке лекнӗ.

Анат Сурӑм ялӗ ҫывӑхӗнче А-151 автоҫулпа пыракан водитель ҫаврӑнса ӳкнӗ. Пӑтӑрмах 21 сехет те 32 минутра пулса иртнӗ.

Чӑваш Енӗн Ҫул-йӗр хӑрушсӑрлӑхӗн патшалӑх автоинспекцийӗн управленийӗнче малтанласа пӗлтернӗ тӑрӑх, «Renault Megane» автомобиль (унӑн патшалӑх номерӗ — В759СС 21) ҫула май пыракан «Volvo» машина ҫине пырса кӗнӗ, ун хыҫҫӑн кювета чӑмса кутӑн ҫавӑнса ӳкнӗ.

«Renault Megane» рулӗ умӗнчи водитель, 25 ҫулти каччӑ, ӳсӗр пулнӑ. Вӑл ӳсӗрле руль умне ларнӑран пакунлисен куҫӗ тӗлне унччен те ҫакланнӑ. Ӗҫнӗ хыҫҫӑн каллех машинӑпа ҫула тухнӑшӑн ӑна пуҫиле майпа явап тыттарӗҫ. Хальлӗхе вӑл больницӑра суранӗсене сиплет.

chuvashia.sledcom.ru сӑнӳкерчӗкӗ

Шупашкар хулинче 16 тата 17 ҫулсенчи ҫамрӑксем пирки пуҫарнӑ пуҫиле ӗҫе тӗпчесе пӗтернӗ. Вӗсене ҫынна малтанласа калаҫса татӑлса, хӗҫпӑшал евӗр япалапа усӑ курса ҫаратнӑшӑн явап тыттарӗҫ.

Пӑтӑрмах кӑҫалхи кӑрлач уйӑхӗн 26-мӗшӗнче Шупашкарти нумай хваттерлӗ ҫуртсенчен пӗрин подъездӗнчи 4-мӗш хутра пулса иртнӗ.

Ӳсӗр икӗ ҫамрӑк хӑйсем унччен палламан 37 ҫулти хӗрарӑма тапӑннӑ. Пӗри ӑна водка кӗленчипе пуҫӗнчен ҫапнӑ, тепри хӗрарӑмӑн карас телефонне туртса илнӗ. Хӗрарӑма ҫапла майпа 10 пин тенкӗ ытлалӑх шар кӑтартнӑ.

Яшсен тӗлӗшпе пуҫарнӑ пуҫиле ӗҫе тӗпчевҫесем суда ярса панӑ.

auto.ru сӑнӳкерчӗкӗ

Шупашкарта пурӑнакан 37 ҫулти арҫын руль умне ӳсӗрле ларма питех те юратнӑ. Ҫавӑншӑн ӑна юсанмалли колоние ӑсатма йышӑннӑ. Суд приговорӗ хальлӗхе саккунлӑ вӑя кӗрсе пӗтеймен-ха.

Ӳсӗр пуҫпа руль умне ларакан ҫынна унччен виҫӗ хутчен пуҫиле майпа явап тыттарнӑ. Пӗрре — 2018 ҫулхи ака уйӑхӗнче, тепре — 2019 ҫулхи ака тата утӑ уйӑхӗсенче. Ӑна ирӗкрен те хӑтарнӑ.

Колонирен тухнӑ хыҫҫӑн вӑл права ҫук пулин те икӗ хутчен (2021 ҫулхи нарӑс уйӑхӗн 13-мӗшӗнче тата юпа уйӑхн 17-мӗшӗнче) «ВАЗ – 21093» автомобиль рулӗ умне ларса тухнӑ. Ҫул-йӗр хӑрушсӑрлӑхӗн инспекторӗсем ӑна пӗринче Шупашкарти Ашмарин урамӗнче, тепрехинче Крупская урамӗнче тытса чарнӑ.

Кайран вӑл йӗрке хуралҫисенчен пытанса пурӑннӑ. Халӗ ӑна суд пӗтӗмӗшле режимлӑ колоние 1 ҫул та 2 уйӑхлӑха ӑсатас, транспорт рулӗ умне 5 ҫул хушши лартас мар тесе йышӑннӑ.

Ҫӗнӗ Шупашкарта пурӑннӑ 37 ҫулти арҫынна суд 22 ҫуллӑха тӗрмене хупса хума йышӑннӑ. Вӑл ачасем ҫумне ҫулӑхма юратнӑ. 2007 ҫулта ӑна ҫавӑншӑн 15 ҫуллӑха хупса хунӑ-ха. 2020 ҫулхи ҫурла уйӑхӗнче ӑна ирӗке кӑларнӑ, анчах судпа айӑпланнӑ вӑхӑчӗ иртсе пӗтеймен. Ирӗкре савӑнса пурӑнас вырӑннӗ вӑл тепӗр икӗ хутчен пуҫтахланнӑ.

2021 ҫулхи кӑрлач уйӑхӗнче хайхи этем хӑй паллакан хӗрарӑмӑн килӗнче ӑна вӗлерессипе хӑратса пусмӑрланӑ. Арҫын ҫӗҫӗпе хӑмсарнӑ.

Ҫав ҫулхи нарӑс уйӑхӗн 17-мӗшӗнче Ҫӗнӗ Шупашкарти нумай хваттерлӗ ҫуртсенчен пӗрин картишӗнче 9 ҫулти хӗрачана асӑрханӑ, ун хыҫҫӑн подъезда кӗнӗ. Унта ача ҫумне ҫулӑхнӑ.

vk.com/kugesionline сӑнӳкерчӗкӗ

Ҫуркунне кахал ҫын та урампа пахчана тирпейлеме вӑй-халпа вӑхӑт тупатех.

Кӳкеҫри 27-мӗш професси училищинче (темиҫе ҫул каялла ӑна Ҫӗрпӳри аграрипе технологи техникумӗпе пӗрлештерчӗҫ) вӗренекенсем вӗренӳ заведенийӗ тавралли территорие тасатса тирпейленӗ. Анчах ҫӳп-ҫап миххисене урамрах купаласа хунӑ. Ҫамрӑксем ӗҫлени харама каясси те часах. Ара, йытӑсем туртса-ҫурса пӗтерсен е вӑйлӑ ҫилпе михӗсем ҫӗтӗлсе пӗтсен ҫӳп-ҫап каллех сапаланса пӗтӗ.

Кӳкеҫсем тӗнче тетелӗнчи пабликсенчен пӗринче ҫӳп-ҫап купине ӳкерсе илсе вырнаҫтарнӑ, вырӑнти пуҫлӑхсене михӗсене турттараса кайма ыйтнӑ.

Инкелӗ лару-тӑру министерстви тунӑ сӑн

Ӗнер, ҫу уйӑхӗн 10-мӗшӗнче, ирхи 5 сехетре Муркаш районӗнчи Ильинкӑра йывӑҫ ҫурт ҫунса кайнӑ. Шел те, пушарта кил хуҫи, 68 ҫулти арҫын, ҫунса вилнӗ. Халӗ ҫулӑм мӗнрен тухнине тӗпчеҫҫӗ.

Ӗнер ирхи 9 сехетре Шупашкарти Иван Яковлев проспектӗнчи строительство базинче типӗ курӑк ҫунма тытӑннӑ. Пушар вӑйлӑ сарӑлман, 2 тӑваткал метра ҫеҫ ярса илнӗ. Малтанлӑха пӗлтернӗ тӑрӑх, ҫулӑм ҫӳп-ҫап ҫунтарнӑ чухне асӑрханманран тухнӑ.

гибдд.рф/r/21 сӑнӳкерчӗкӗ

Ҫу уйӑхӗн 10-мӗшӗнче 19 сехет те 10 минутра Канаш районӗнче ҫӑмӑл машина инкеке лекнӗ. Автомобиль «Ҫӗрпӳ-Чӗмпӗр» ҫулпа пынӑ. 21 ҫулти хӗр тытса пыракан «Тойота Каролла» машина кювета чӑмнӑ. Унччен вӑл хирӗҫ пыракан ҫул ҫине тухса кайнӑ, унтан ҫаврӑнса ӳкнӗ. Салонти пассажир аманнӑ. Вӑл хӑрушсӑрлӑх пиҫихиийӗпе ҫыхӑнман.

Чӑваш Енӗн Патшалӑх ҫул-йӗр хӑрушсӑрлӑхӗн инспекцийӗнче пӗлтернӗ тӑрӑх, инкеке лекнӗ машинӑн малти урапи шӑтса кайнӑ, ҫавӑнпа вӑл пӑтӑрмаха ҫакланнӑ.

Шупашкар хулинче тата республикӑн тӗп хулипе юнашар районсенче пурӑнакан арҫынсем йӗрке хуралҫисенчен пулӑшу ыйтма пӗлтӗрхи чӳк уйӑхӗнченпе тытӑнса кайнӑ.

Вӗсем хӑйсем патне хӗрсене чӗнес тесе шӑнкӑравланӑ та арҫын патне лекнӗ. Хайхи этем: «Эпӗ — хулара пӑхса тӑраканӗ», — тесе хӑйӗнпе паллаштарнӑ. Пӑтӑрмаха ҫакланас мар тесен арҫынсене укҫа тӳлеме хистенӗ. Хӑраса ӳкнӗ арҫынсем ултавҫа 250 пине яхӑн тенкӗ куҫарса панӑ. Ултавҫӑ капкӑнне 5 арҫын ҫакланнӑ.

Ҫынсене улталаканни Сарту облаҫӗнчи Энгельс хули ҫывӑхӗнчи таборсенчен пӗринче пурӑнакан 25 ҫулти арҫын пулнӑ иккен. Хӑй шар кӑтартнисене вӑл парӑма саплаштарма шантарнӑ.

Пуҫиле ӗҫе йӗрке хуралҫисем малалла тӗпчеҫҫӗ.

chuvashia.sledcom.ru сӑнӳкерчӗкӗ

Шупашкар хулинче пӗр арҫын 14 ҫулти хӗрача ҫумне ҫулӑхнӑ. Усал шухӑшлӑ арҫын лавккаран тухакан 14 ҫулти пикене асӑрханӑ. Вӑл ӑна аллинчен ярса илнӗ те общество чарӑнӑвӗн хыҫне илсе кайнӑ. Унта хайхи этем хӗрача ҫумне ҫулӑхма тытӑнса кайнӑ.

Пӑтӑрмаха ҫулпа иртсе пыракан машинӑри арҫын асӑрханӑ. 34 ҫулти Владимир Григорьев автомбильтен чупса тухса пырса вӑл хӗрачана пулӑшнӑ. Арҫынна халӗ Раҫҫей Следстви комитечӗн Тав хучӗпе чыслама тӑратнӑ.