Шупашкар хулинче пӗр арҫынна общежитирен кӑларса яма йышӑннӑ. Ӑна пула унччен пушар тухнӑ.
Муниципалитетӑн ҫуртӗнче пурӑнаканскер айӑпӗпе пӗлтӗр хулари 9-мӗш Пилӗкҫуллӑх урамӗнчи 4-мӗш ҫуртра «хӗрлӗ автан» алхасма тытӑннӑ. Ҫавна май муниципалитет пурлӑхӗ шар курнӑ.
Шупашкар хулинчи ҫурт-йӗр фончӗн управленийӗн иртнӗ ҫул вӗҫӗнче суда тавӑҫпа тухнӑ. Унта вӑл арҫынна общежитирен кӑларса яма тата тӑкака саплаштарттарма ыйтнӑ. Суд тавӑҫ авторӗсемпе килӗшнӗ.
Суд йышӑнӑвӗ саккунлӑ вӑя кӗнӗ.
Шупашкар хулинче тӗлӗнмелле пӑтӑрмах пулса иртнӗ. Каччӑна пулӑшас тесе туалетри стенана ватма тивнӗ.
«Прогород» кӑларӑм «Телеграмра» пӗлтернӗ кӗске хыпарта пӑтӑрмах пирки тӗплӗн ӑнлантарса тӑман. Ҫакӑ ҫеҫ паллӑ.
Качча техника шахтипе ҫӳле улӑхнӑ, ҫавӑн чухне вӑл тӑххӑрмӗш хутран персе аннӑ. Ӑна ҫӑлас тесе туалет стенине ишме тивнӗ.
Каччӑ техника шахти тӑрӑх мӗн сӑлтавпа хӑпарни хальлӗхе паллӑ мар. Ӑна вӑл хӑй ҫеҫ пӗлет-тӗр.
P.S. Каччӑ кӑвакарчӑна ҫӑлас тенӗ иккен. 9-мӗш хутран вӑл пӑрӑх тӑрӑх шуса 1-мӗш хута аннӑ. Инкек вырӑнне ҫӑлавҫӑсем пырса ҫитсен стенана перфораторпа шӑтарнӑ, каччӑна ҫав шӑтӑкран кӑларнӑ.
Етӗрне хулинче паллӑ чӑваш ӑсчахӗ Николай Ашмарин ҫуралса ӳснӗ ҫурта юсаса ҫӗнетӗҫ. Икӗ хутлӑ ҫав ҫурт япӑхса та ишӗлсе ларни ҫинчен Чӑваш халӑх сайчӗ те унччен пӗлтернӗччӗ. Кӑҫал пирӗн республикӑра Паллӑ ентешсен ҫулталӑкӗ пулнӑ май историлле ҫав ҫурта юсӗҫех.
Республика Элтеперӗ Олег Николаев Телеграмра паян ирпе пӗлтернӗ тӑрӑх, Федерацин Атӑлҫи тӑрӑхӗнчи культура эткерлӗхӗн объекчӗсене упрассине 2021 ҫулта иртнӗ форумра сӳтсе явнӑ. Унта Чӑваш чӗлхин музейӗ уҫассине те асӑнса хӑварнӑ.
Асӑннӑ учреждени Етӗрнери Ленин урамӗнчи 18-мӗш ҫуртра (унта чӑваш чӗлхин тӗпчевҫин Николай Ашмаринӑн ачалӑхӗ иртнӗ) вырнаҫӗ. Революциччен ҫав ҫурт Николай Ашмаринӑн ашшӗн тӑванӗн, Александр Филиппович Ашмарин купсан, пулнӑ. Унта бакалей тата гастрономи лавккисем пулнӑ.
Ҫурта юсассипе ҫыхӑннӑ хутсене хатӗрлеме маларах республика хыснинчен укҫа уйӑрнӑ, халӗ вара – юсав ирттерме. Ӗҫе ҫывӑх вӑхӑтра пуҫӑнмалла.
Ӗнер, нарӑс уйӑхӗн 20-мӗшӗнче, Ҫӗмӗрле хула администрацийӗн пуҫлӑхӗ Валерий Шигашев хулари пӗр ҫуртпа ҫыхӑннӑ пӑтӑрмах пирки Фейсбукра пӗлтернӗ.
Кивӗ ҫуртсенчен пӗрин ҫивиттийӗнче ҫӗрле юр йӑтӑнса аннӑ та ҫурта кӗмелли вырӑнти ҫивиттие тата вӗри шыв тытӑмне сиенленӗ. Хула администрацийӗн пуҫлӑхӗ ҫв ҫуртра пурӑнакансемпе тата ҫурта тытса тӑракан управляющи компанин директорӗпе Микаэл Гурбановпа тӗл пулнӑ. Вырӑнтисем кӑлтӑка ҫийӗнчех пӗтернӗ-ха, анчах, Валерий Шигашев калашле, ыйтусем юлнӑ.
Темиҫе хваттерлӗ йывӑҫ ҫурт кивӗ. Управляющи компани ӑна тытса тӑма пайталлӑ маррине пӗлтернӗ. Унтан та ытларах — компани панкурата тухать, ҫурта ҫӗнӗ управляющи компанин тытса тӑма тивӗ. Кивӗ ҫуртсене никам та тытса тӑрасшӑн мар. Ку ыйтӑва хулара паян канашлу ирттерсе сӳтсе явма палӑртнӑ.
Шупашкарта рабочи ҫӳллӗшӗнчен ӳкнӗ. Шел те, унӑн пурнӑҫне тухтӑрсем те ҫӑлса хӑварайман.
Кун тӗлӗшпе пуҫиле ӗҫ пуҫарнӑ. Инкек «Феникс» пурӑнмалли комплексра пулнӑ. Следстви комитечӗн следователӗсен версийӗ тӑрӑх, пӗлтӗрхи раштав уйӑхӗн 28-мӗшӗнче 25 ҫулти строитель 10-мӗш хутра ӗҫленӗ чухне таянса кайнӑ та 8-мӗш хута персе аннӑ. Унӑн пуҫӗ, мӑйӗ, кӗлетки, алли-ури аманнӑ. Вӑл пульницӑра кӑрлач уйӑхӗн 1-мӗшӗнче вилнӗ.
Следовательсем шутланӑ тӑрӑх, инкек страховка тросӗсем ҫуккипе пулнӑ. Ҫавӑн пекех ӗҫ хӑрушсӑрлӑхӗн нормисене пӑснӑ тесе шутлаҫҫӗ.
Ҫӗнӗ ҫуртсенче хваттер туянакансен йышӗ пӗлтӗр ҫӗршывӑн кашни виҫҫӗмӗш регионӗнче чакнӑ. Ку цифрӑна РБК Росреестр пӗлтерни тӑрӑх хыпарланӑ. Хваттер сутасси 2021 ҫулта пирӗн ҫӗршывра 17,6% ӳснӗ, ҫав вӑхӑтрах 29 регионта туянакансен йышӗ чакнӑ. Ҫав шутра – Чӑваш Енре те.
2021 ҫулта пайҫӑсемпе пирӗн ҫӗршывра 898,6 пин килӗшӳ тунӑ. Ҫав шутра Мускавра – 144 пин, Мускав облаҫӗнче – 116,3 пин, Санкт-Петербургра – 75,8 пин, Краснодар крайӗнче – 70,7 пин, Свердловск облаҫӗнче – 32,4 пин.
Пирӗн республикӑра пурӗ 6,9 пин килешӳ тунӑ, ку вӑл 2020 ҫулхинчен 18,7% сахалрах. Абсолютлӑ цифрӑсемпе илсен, хваттер туянакансен йышӗ уйрӑмах чакнин кӑтартӑвӗпе пирӗн республика ҫавӑн йышши 5 регион шутӗнче. Хваттер сахал туяннисен йышӗнче – Санкт-Петербург, Архангельск облаҫӗ, Алтай крайӗ.
Нарӑс уйӑхӗн 12-мӗшӗнче каҫ пуласпа Шупашкарта, Чӑваш патшалӑх культурӑпа ӳнер институчӗн общежитийӗнче пушар тухнине Чӑваш халӑх сайчӗ пӗлтернӗччӗ.
Халӗ пушар сӑлтавне уҫӑмлатнӑ. Малтанласа пӗтӗмлетнӗ тӑрӑх, инкек электрооборудованипе усӑ курнӑ чух правилӑна пӑснӑ. Пушар зарядка хатӗрӗнчен тухнӑ.
Пушар вӑхӑтӗнче общежитире 40 студентпа преподаватель пулнӑ. Вӗсенчен никам та шар курман.
Тӑкак виҫине малтанласа шутласа кӑларнӑ. Общежитие юсаса ҫӗнетме хыснаран укҫа уйӑрма тивӗ.
Ӗнер, нарӑс уйӑхӗн 1-мӗшӗнче, Шупашкарӑн историлле пайӗнче Юрий Шакеев оппозиционерӑн ҫурчӗ вутра кӗлленнӗ. Кун пирки Шакеев Фейсбукра ҫырнӑ. Усал хыпара «В «Замамье» сгорел дом оппозиционера Юрия Шакеева: «Враги сожгли родную хату» ятпа «Pg21.ru» сайтра та пӗлтернӗ.
Юрий Шакеевӑн ҫурчӗ Шупашкарти Амӑш палӑкӗн ҫурчӗ хыҫӗнче, Герцен урамӗнче, вырнаҫнӑ. Асӑннӑ урамри 31-мӗш ҫурт 17 сехет те 15 минут тӗлӗнче ҫунма тытӑннӑ. Унта никам та пурӑнман, ҫуртра ҫутӑ пулман.
Инкек сӑлтавне Шакеев ҫурт вырӑнӗ такамсене строительство валли вырӑн кирлӗ пулнӑ тесе тӗшмӗртет.
Шупашкар районӗнчи Ҫӗктерте пурӑнакансем пӗр кунзне ӑшӑсӑр тӑрса юлнӑ. «Волжские зори» урамри нумай хваттерлӗ ҫуртра пурӑнакансен ҫав нушана тӳсме тивнӗ. «Пирӗн чӑтӑмлӑха тӗрӗслеҫҫӗ курӑнать», — тесе ҫырнӑ ҫав ҫуртра пурӑнакансем тӗнче тетелӗнчи халӑх ушкӑнӗсенчен пӗринчи пабликра.
Ҫавӑн хыҫҫӑн Чӑваш Енри регион управленийӗн центрӗн специалисчӗсем ҫӑхава яваплисем патне ҫитернӗ. Вӗсем вырӑнтан хӑвӑрт хускалнӑ. Тепӗр куннех ҫынсене ӑшӑ пама тытӑннӑ.
Чӑваш Енре премьер-министра тата министрсене хваттер тара илсе пурӑннин тӑкакне хыснаран саплаштарӗҫ. Ҫавӑн пек йышӑну проектне Чӑваш Ен Элтеперӗн Администрацийӗ хатӗрленӗ.
Ҫӗнӗ йӗрке Министрсен Кабинечӗн Председательне, премьер-министрӑн ҫумӗсене, министрсене, Чӑваш Ен Элтеперӗн Администрацийӗн ертӳҫине, Раҫҫей Президенчӗ ҫумӗнчи Чӑваш Енӗн полпредне пырса тивӗ. Вӗсене тӑкака патшалӑх должноҫӗнче ӗҫленӗ вӑхӑтра саплаштармалла.
Хваттер тара илсе пурӑнас, ҫавӑншӑн хыснаран укҫа илес текен тӳре-шаран социаллӑ килӗшӳ мелӗпе е харпӑрлӑхри ҫурт-йӗр пуррипе ҫуккине шута илӗҫ. Асӑннӑ пурлӑх Шупашкарта, Ҫӗнӗ Шупашкарта, Шупашкар, ӗнтӗрвӑрри, Муркаш тата Ҫӗрпӳ районӗсенче пулсан тара илнин тӑкакне спалаштармӗҫ.
+1.3 °C