Вӗсем пӗрлешнӗ те 65 ҫул пӗрле алла-аллӑн тытӑнса утаҫҫӗ.
Ку сӑмахсем – Канаш округӗнчи Муллавар ялӗнче пурӑнакан Петровсем ҫинчен.
Геннадий Петровичпа Нина Маркеловнӑн ҫак кунсенче хӑна-вӗрле пухма харӑсах икӗ сӑлтав пулнӑ. Пӗрремӗшӗнчен, вӗсем ҫемье ҫавӑрнӑранпа 65 ҫул ҫитнӗ. Иккӗмӗшӗнчен, ҫемье пуҫӗ Геннадий Петрович 90 ҫул тултарнӑ.
Петровсем – ялти хисеплӗ ҫемье, вӗсем ялта пуриншӗн те тӗслӗх. Мӑшӑр 6 ача ҫуратса вӗсене ура ҫине тӑратнӑ. Паянхи кун вара сумлӑ ватӑсене 13 мӑнукӗ тата 6 кӗҫӗн мӑнукӗ савӑнтараҫҫӗ.
Ҫакна та палӑртмалла: петровсем иккӗшӗ те – ӗҫ ветеранӗсем. Нина Маркеловна вара «Амӑшӗн мухтавӗ» ордена та тивӗҫнӗ.
Туй тунӑранпа 65 ҫул ҫитнӗ май Петровсене округри ЗАГС пайне чыслама чӗннӗ.
Ку хыпара каярах юлса пӗлтӗмӗр пулин те хыпарласах килет. Ҫӗртме уйӑхӗн 17-мӗшӗнче Роза Деменцова журналист 65 ҫул тултарнӑ.
Вӑл Красноармейски районӗнчи Тусай ялӗнче ҫуралнӑ. Чӑваш патшалӑх университетӗнчи историпе филологи факультетӗнчен вӗренсе тухнӑ. Раҫҫей журналистсен союзӗн членӗ, Чӑваш Республикин культурӑн тава тивӗҫлӗ ӗҫченӗ, Ҫемен Элкер ячӗллӗ журналистсен премийӗн тата Нестер Янкас премийӗн лауреачӗ.
Пӗр вӑхӑт Красноармейски районӗнчи «Ял пурнӑҫӗ» хаҫатра корреспондентра, унта Шупашкарти 1-мӗш типографире корректорта, «Спецстроймеханизаци» организацин «Механизатор» хаҫатӗнче корреспондентра тӑрӑшнӑ. 1990-2008 ҫулсенче Чӑваш Енӗн патшалӑх телерадиокомитетӗнче ӗҫленӗ, каярах Чӑваш наци радиовӗнче, Чӑваш Енӗн епархийӗн пресс-службинче те тимленӗ.
Ыран, ҫӗртме уйӑхӗн 23-мӗшӗнче, Чӑваш Енӗн наци вулавӑшӗнче Никифор Мранькка ҫыравҫӑ ҫуралнӑранпа 125 ҫул ҫитнине асра тытса пуҫтарӑнӗҫ.
Паллӑ чӑваш прозаикӗ тата драматургӗ Куславкка районӗнчи Пилешкассинче ҫӗртме уйӑхӗн 9-мӗшӗнче ҫуралнӑ. Унӑн уйрӑмах паллӑ произведенийӗ — нумай томлӑ «Ӗмӗр сакки сарлака» роман. Шӑпах ҫав хайлава сӳтсе явӗҫ те вулавӑша пуҫтарӑннӑ писательсем, журналистсем, педагогсем, таврапӗлӳҫӗсем, вулавӑш ӗҫченӗсем тата кӗнеке вулама юратакансем.
Сӑмах май каласан, писателӗн пултарулӑхӗнче тарӑн йӗр хӑварнӑ хайлавсем татах пур: «Юншӑн юн», «Тӑван ҫӗршыв чӗнет», «Амӑшӗн ҫырӑвӗ», «Урӑхла калама пултарайман эпӗ», «Юратакан чӗресем».
Ҫӗртме уйӑхӗн 30-мӗшӗнче Чӑваш Енӗн наци вулавӑшӗнче «Драматургия и театральное искусство» (чӑв. Драматурги тата театр ӳнерӗ) ятпа ҫавра ҫӗтел иртӗ. Ӑна Арсений Тарасов ҫыравҫӑ-драматург, журналист 70 ҫул тултарнӑ май йӗркелӗҫ.
Арсений Тарасов — Чӑваш Енӗн искусствӑсен тава тивӗҫлӗ ӗҫченӗ. Унӑн хайлавӗсемпе Чӑваш академи драма театрӗнче спектакльсем лартаҫҫӗ.
«Ҫырма пурнӑҫ хӑех хавхалантарать», — тет иккен калем ӑсти. Чӑваш академи драма театрӗнче кӑтартакан «Хӗрлӗ кӗпеллӗ телей» спектакльти сюжет та, сӑмахран, пурнӑҫран тата тӗрӗсрех каласан, ҫыравҫӑн ашшӗ-амӑшӗн пурнӑҫӗнчен, илнӗскерех-мӗн.
Арсений Тарасовӑн юбилейне халалланӑ ҫавра сӗтел вулавӑшри концеренц-залра 14 сехетре пуҫланӗ.
Ҫӗртме уйӑхӗн 28-мӗшӗнче паллӑ драматург, журналист, Чӑваш Республикин искусствӑсен тава тивӗҫлӗ ӗҫченӗ Арсений Тарасов 70 ҫул тултарать. Ҫавна май ӑна «Хыпар» хаҫат тӗпелне йыхравланӑ.
«Унӑн пултарулӑхӗ наци искусствинче пысӑк вырӑн йышӑнать. Арсений Алексеевичӑн чӑваш драматургине аталантарассишӗн тӳпе хывнӑ ӗҫӗн хакӗ виҫесӗр. Чуна уҫса калаҫнӑ статьяпа хаҫатӑн ҫитес номерӗнче паллаштарӑпӑр», — пӗлтернӗ МАХри «Хыпар-Вести Чувашии» каналта.
Патӑрьел чӑвашӗ 1978 ҫултанпа Чӑваш радиора тата телевиденире ӗҫленӗ. 1987–1989 ҫулсенче Чӑваш кӗнеке издательствин редакторӗ пулнӑ. 2010-2015 ҫулсенче «Тӑван Атӑл» литература журналӗн шеф-редакторӗнче тӑрӑшнӑ.
Пӑрачкав округӗнчи Напольное ялӗнче пурӑнакан Татьяна Михайловна Клюковкина 100 ҫулхи юбилейне уявланӑ. Унӑн пурнӑҫӗ ҫӑмӑл килмен, хура-шурне чӑтса ирттерме тивнӗ.
Пилӗк ҫулта чухне вӑл хытӑ чирленӗ, хӑлхи илтме пӑрахнӑ. Анчах ку ӑна ҫапса хуҫман. Татьяна 15 ҫулта чухне Тӑван ҫӗршывӑн Аслӑ вӑрҫи пуҫланнӑ. 1941 ҫулхи кӗркунне вӑл ашшӗпе тата тӑванӗпе пӗрле станок умне тӑнӑ, Сӑр хӳтӗлев чиккисене тума хутшӑннӑ.
Татьяна Михайловна пурнӑҫ тӑршшӗпех «Туслӑх» колхозра уй-хир бригадинче тӑрӑшнӑ. Унӑн хӑйӗн ачисем ҫук, вӑл хӑйӗн пӗтӗм юратӑвне тӑванӗсене парнеленӗ. Малтан ашшӗ-амӑшне пӑхса пурӑннӑ, кайран шӑллӗн ҫемйине пулӑшнӑ. Халӗ вӗсем ашшӗ-амӑшӗн ҫуртӗнче шӑллӗн ҫемйипе пӗрле пурӑнаҫҫӗ, Иван Михайлович унӑн тӗрекӗ пулса тӑнӑ.
Вӑрӑм пурнӑҫлӑ кинемее влаҫ представителӗсем саламланӑ. Вӗсем юбиляра вӑрҫӑ ҫулӗсенче тата мирлӗ вӑхӑтра пурнӑҫланӑ ӗҫӗсемшӗн тав сӑмахӗсем каласа ҫирӗп сывлӑх суннӑ.
Паян, ҫӗртме уйӑхӗн 9-мӗшӗнче, Никифор Мранькка чӑваш ҫыравҫи ҫуралнӑранпа 125 ҫул ҫитнӗ.
Вӑл Куславкка районӗнчи Пилешкассинче ҫуралнӑ. Чиркӳпе прихут шкулӗнче вӗренсе тухнӑ хыҫҫӑн тӗрлӗ ӗҫре тӑрӑшнӑ, ҫав шутра матрос та, вӑрман тиекен те пулнӑ.
1925 ҫулхи пуш уйӑхӗнче ӑна вырӑнти ял совечӗн председательне лартнӑ, тепӗр ҫулхи ҫу уйӑхӗнче Чӑваш АССР халӑх комиссариачӗн коллеги пайташӗ пулма шаннӑ.
1931 ҫулта вӑл Мускаври кинематографистсен институтӗнчи киносценаристсен ҫулталӑклӑх курсӗнчен вӗренсе тухнӑ. 1938 ҫулччен «Чӑвашкинора» сценарист пулнӑ. Унсӑр пуҫне вӑл 1933–1938 ҫулсенче «Союзкинохроникӑн» чӑваш студийӗн директорӗнче тӑрӑшнӑ. 1938–1942 ҫулсенче «Ленин ялавӗпе» хаҫат редакторӗнче тимленӗ. 1942 ҫулта вӑл Хӗрлӗ ҫарта политика ӗҫченӗ пулнӑ.
Вӑрҫӑ хыҫҫӑн Куславкка районӗнче партин райкомӗнче агитаципе пропаганда пайӗн заведующийӗнче, райӗҫтӑвкомра культура учрежденийӗсен пайӗн заведующийӗнче тӑрӑшнӑ.
Никифор Мранькка 1973 ҫулхи нарӑс уйӑхӗн 20-мӗшӗнче вилнӗ. Ӑна Куславккара пытарнӑ.
Унӑн уйрӑмах паллӑ хайлавӗ — нумай томлӑ «Ӗмӗр сакки сарлака» романӗ. Асӑннӑ роман тӑрӑх Чӑваш академи драма театрӗнче спектакль те лартнӑ.
Ҫӗртме уйӑхӗн 4-мӗшӗнчеч Канаш тӑрӑхӗнче пурӑнакан Тимофеевсем ылтӑн туйне паллӑ тунӑ.
Анатолий Васильевичпа Зинаида Ефимовна 50 ҫул каялла Канашри ЗАГСра ҫемье ҫавӑрнӑ. Вӗсем виҫӗ ача ҫуратса ӳстернӗ: Сергей, Ольга тата Екатерина. Халӗ ултӑ мӑнукпа тата пӗр кӗҫӗн мӑнукпа савӑнса пурӑнаҫҫӗ.
Тимофеевсем иккӗшӗ те тивӗҫлӗ канӑва тухиччен Канаш хулинче ӗҫленӗ. Анатолий Васильевич малтана ПАТПра, кайран Канашри автоагрегат савутӗнче водительте тӑрӑшнӑ. Зинаида Ефимовна КААЗра повар пулса ӗҫленӗ.
Мӑшӑра Канаш округӗн ЗАГС ӗҫченӗсем саламланӑ.
И.Н.Ульянов ячӗллӗ Чӑваш патшалӑх университечӗн ректорӗ Андрей Александров нумаях пулмасть 60 ҫул тултарнӑ. Ҫав ятпа ӑна, Чӑваш Енӗн Патшалӑх Канашӗн депутачӗ пулнӑ май, парламентӑн черетлӗ, 43-мӗш сессийӗнче, саламланӑ. Кун пирки чӑваш парламенчӗн спикерӗ Леонид Черкесов халӑх тетелӗнчи хӑйӗн страницинче хыпарланӑ.
Андрей Юрьевич Адыгей автономи облаҫӗн тӗп хулинче 1966 ҫулти ҫу уйӑхӗн 21-мӗшӗнче Майкоп хулинче ҫуралнӑ. Вӑл – ученӑй-экономист, правовед, историк. Унӑн ашшӗ-амӑшӗ Чӑваш Енрен. Ашшӗ Шупашкар районӗнчи Паҫпак ялӗнче ҫуралнӑ, амӑшӗ – Советски поселокӗнче.
Андрей Александров, сӑмах май каласан, иртнӗ ҫул уйӑхсерен вӑтамран ҫур миллиона яхӑн тенкӗ ӗҫлесе илнӗ. Тӗрӗсрех каласан, 486 пин тенкӗ.
Етӗрнери сӗт завочӗ юбилея хатӗрленет. Ӑна предпряити сумлӑн иртетерсшӗн. Мӗн тесен те пӗчӗк дата мар, предприяти 95 ҫул тултарнине уявлать. Паян вӑл акционерсен уҫӑ обществи шутланать.
Уява сӗт завочӗ Натали юрӑҫа йыхравланӑ. Унсӑр пуҫне те уяв программи кӑсӑклӑ пулмалла: ача-пӑча валли тӗрлӗ мероприяти ирттерме палӑртса хунӑ, аттракционсем тӳлевсӗр ӗҫлӗҫ, юмах кӑтартӗҫ, «Наша Корова» (чӑв. Пирӗн ӗне) маркӑпа кӑларакан продукцие тӳлевсӗр астивсе пӑхма май килӗ.
Уявра вырӑнти коллективсен тата чӑваш эстрада юрӑҫӗсен, «Воздух» тата «Малов» ушкӑнсен колнцерчӗсем пулӗҫ. Программа хедлайнерӗ — Натали.
Уяв программи ҫӗртме уйӑхӗн 6-мӗшӗнче 17 сехетре пуҫланӗ. Унта тӳлевсӗр ҫитсе курма май килӗ.
+20.3 °C