Карлач уйӑхӗн 27-мӗшӗнче Чӑваш Республикин культурӑн тава тивӗҫлӗ ӗҫченӗ, библиотека ӗҫӗн ветеранӗ Тамара Григорьева 75 ҫул тултарнӑ.
Тамара Романовна культура отраслӗнче 50 ҫул ӗҫленӗ. 1996-2023 ҫулсенче вӑл Чӑваш Республикин ача-пӑчапа ҫамрӑксен вулавӑшне ертсе пынӑ. Чӑваш Енӗн Культура министерствинче пӗлтернӗ тӑрӑх, унта чи лайӑх практикӑсене пурнӑҫа кӗртсе пынӑ.
Чӑваш Енри тепӗр икӗ кинемей ҫак кунсенче 100 ҫулхи юбилейне паллӑ тунӑ.
Куславккара пурӑнакан Антонина Ильинична Лебедева 16-ра чухне колхозра ӗҫлеме пуҫланӑ. 1941 ҫулта вӑл Сӑр хӳтӗлев чиккине тунӑ ҫӗре хутшӑннӑ. Халӗ вӑл 98 ҫулти йӑмӑкӗпе пурӑнать.
Канашри Татьяна Васильеана Смагина ӗмӗр тӑршшӗпе вӗрентекенре ӗҫленӗ. Паянхи кун вӑл ҫӗршывӑн тӗрлӗ кӗтесӗнчи нумай ачаллӑ ҫемьесене пулӑшать: утиял ҫӗлесе парнелет.
Паян, кӑрлач уйӑхӗн 23-мӗшӗнче, чӑваш халӑх артистки Татьяна Яфанова 80 ҫул тултарнӑ.
Вӑл Чӑваш Республикин патшалӑх вырӑс драма театрӗнче ӗҫлет. Татьяна Петровна 1945 ҫулта ҫуралнӑ. 1966 ҫулта Куйбышеври драма театрӗ ҫумӗнчи студирен вӗренсе тухнӑ. 1967 ҫулта Шупашкарти Вырӑс драма театрӗнче ӗҫлеме тытӑннӑ. Ҫак ҫулсенче вӑл 80 ытла сӑнара калӑпланӑ.
Чӑваш патшалӑх академи драма театрӗнче Пётр Осипов драматург, театрӑн пӗрремӗш актерӗсенчен пӗри ҫуралнӑранпа 125 ҫул ҫитнине халалласа «Сурхури сӑри» спектакль кӑтартӗҫ.
Театрта пӗлтернӗ тӑрӑх, «пьесӑра пулса иртекен пӑтӑрмахсем 1917 ҫулхи революци саманипе ҫыхӑннӑ пулсан та, тӗп вырӑнта чӑваш ялӗнчи ҫынсен хутшӑнӑвӗсем. Унӑн жанрне «детективлӑ триллер» теме те пулӗ. Режиссерпа художник, композитор сюжетри вӑхӑтпа усӑ курса, халӑхӑн илемлӗ йӑлисене кӑтартма шутланӑ. Ку вара хальхи куракансемшӗн ҫав тери кӑсӑклӑ».
Ку ӗҫе режиссёр ҫуралнӑранпа 120 ҫул ҫитнӗ тӗле хатӗрленӗ пулнӑ. Унӑн режиссёрӗ — Наталья Сергеева, художникӗ — Наталья Зверева, музыкине Лолита Чекушкина ҫырнӑ.
Спектакле кӑрлач уйӑхӗн 27-мӗшӗнче кӑтартӗҫ.
Кӑрлач уйӑхӗн 21-мӗшӗнче Ҫӗнӗ Шупашкарта пурӑнакан Мария Кузьминична Чепурова 100 ҫул тултарнӑ. Вӑл – ӗҫ ветеранӗ.
Унӑн ачалӑхӗ Чулхула облаҫӗнчи Кочетовка ялӗнче иртнӗ. Вӑрҫӑ пуҫлансан вӑл вырӑнти колхозра ӗҫленӗ, фронта пулӑшнӑ. Кайран бухгалтерта вӑй хунӑ, ун хыҫҫӑн Саратов облаҫӗнчи Балаковӑри гидроэлектростанцие тунӑ ҫӗрте тӑрӑшнӑ. 1980 ҫулсенче шӑпа ӑна Ҫӗнӗ Шупашкара илсе ҫитернӗ. Кунта Мария Кузьминична ЖХ тытӑмӗнче ӗҫленӗ.
Пӗр ӗмӗре парӑнтарнӑ кинеме хула влаҫӗн тата социаллӑ служба ӗҫченӗсем саламлама килнӗ.
Кӑрлач уйӑхӗн 29-мӗшӗнче Шупашкарти Трактор тӑвакансен культура керменӗнче Анатолий Музыкантовӑн юбилей каҫӗ иртӗ.
«Музыкантов приглашает!» (чӑв. Музыкантов йыхравлать) пултарулӑх каҫне Раҫҫей Федерацийӗн тата Чӑваш Республикин культурӑн тава тивӗҫлӗ ӗҫченӗ, «Сувар» халӑх ташшин ансамблӗн тата «Суварята» халӑх ташшин ача-пӑча ансамблӗн ертӳҫи Анатолий Музыкантов 75 ҫул тултарнине халалланӑ.
Уяв каҫне Мари Элти, Пушкӑртстанри, Тутарстанри коллективсем килсе ҫитмелле. Виталий Адюков, Вячеслав Христофоров тата Ирина Музыкантова юрӑсем шӑрантарӗҫ.
Кӑрлач уйӑхӗн 14-мӗшӗнче Чӑваш Енӗн Наци вулавӑшӗн Виталий Станьял ӑсчах 85 ҫул тултарнӑ ятпа пуҫтарӑнассине эпир унччен пӗлтернӗччӗ-ха.
Виталий Станьял – учёнӑй, педагог, поэт, публицист. Пултарулӑх каҫӗнче юбиляр ячӗпе ӑшӑ сӑмах калакан йышлӑн пулнӑ. Ҫав шутра — вулавӑшӑн директоре Роза Лизакова та, Чӑваш патшалӑх вӗрӗнӳ инстиутчӗн доценчӗ Надежда Иванова та, филологи наукисен доккторӗ Виталий Родионов та, филологи наукисен кандидачӗсем Геннадий Дегтярёв та, Вера Никифорова та, Ирина Софронова та, Евгений Михайлов археолог та.
Хусанта пурӑнакан чӑваш арҫынни 100 тултарнӑ. Кун пирки Тутарстанри чӑвашсен «Сувар» хаҫатӗнче пӗлтернӗ.
Хусан ҫумӗнчи Мирный поселокӗнче пурӑнакан Федор Мердюков Ҫӗпрел районӗнчи Кӗҫӗн Аксура 1925 ҫулхи кӑрлач уйӑхӗн 14-мӗшӗнче ҫуралнӑ.
Ветерана РФ Президенчӗн В.Путинӑн, ТР Раисӗн Р.Миннихановӑн, Хусан мэрӗн И.Метшинӑн саламӗсене Хусанти Приволжски тата Вахитов районӗн пуҫлӑхӗ Альберт Салихов ҫитернӗ. Ҫӗпрел район пуҫлӑхӗ Марат Гафаров, унӑн ҫумӗ, районти ЧНКЦ председателӗ Алексей Ярухин, Кивӗ Чакӑ ял хутлӑхӗн пуҫлӑхӗ Артем Солдатов та ватта саламалама ппырса ҫитнӗ. «Сувар» хаҫатӑн тӗп редакторӗпе Ирина Трифоновӑпа ТР ЧНКА Председателӗн пӗрремӗш ҫумӗ Константин Малышев та хисеплӗ ветерана ӑшшӑн саламласа парнесем панӑ.
Паян Патӑрьел округӗнчи Шӑнкӑртам ялӗнче пурӑнакан Минникадире Зейдулловна Хамбикова 100 ҫул тултарнӑ. Пурнӑҫӗнче темӗн те курма тивнӗ пулсан пурнӑҫа яланах юратнӑ вӑл.
Минникадире Зейдулловна ҫак округрах Ыхраҫырми ялӗнче нумай ачаллӑ хресчен ҫемйинче ҫуралнӑ. Мӗн пӗчӗкрен аслисен ҫумӗнче ӗҫленӗ вӑл.
Вӑрҫӑ пӗтсен хӗр Мускава савута ӗҫлеме кайнӑ. Унта вӑл пулас мӑшӑрӗпе паллашнӑ. Вӗсем пӗрле Шӑнкӑртам ялне таарӑннӑ, колхозра ӗҫленӗ, ҫурт ҫӗкленӗ. Мӑшӑр 7 ачана кун ҫути парнелесе ура ҫине тӑратнӑ.
Халӗ Минникадире Зейдулловнӑн 23 мӑнук, 40 кӗҫӗн мӑнук, вӗсен икӗ ачи пур. Чухне
Паян, кӑрлач уйӑхӗн 11-мӗшӗнче, Шупашкарта пурӑнакан Алла Поздеева 95 ҫул тултарнӑ. Ӑна хулари халӑхӑн социаллӑ ыйтӑвӗсене тивӗҫтерекен комплекслӑ центрӗн социаллӑ ӗҫченӗ Кристина Вахтеркина пӑхса пулӑшать.
Алла Григорьевна Курск хулинче ҫуралнӑ. 1965 ҫулта Шупашкара пурӑнма куҫса килнӗ. Качча кайса икӗ ывӑлпа пӗр хӗр ҫуратнӑ. Халӗ кинемейӗн тӑхӑр мӑнук тата мӑнукӗн виҫӗ ачи пур.
+20.3 °C