Шупашкарта пурӑнакан виҫӗ ҫынна ултавҫӑсем шӑнман пӑрпа самантрах лартса янӑ.
Пӗрне-пӗри пӗлекен ҫав ҫынсем патне пулӑшу ыйтса видеоҫыру ҫитнӗ. Ӑна вӗсен пӗлӗшӗ янӑ. Анчах тӗрӗссипе пӗлӗшӗ яман та иккен, видеона искусство интеллекчӗ хатӗрленӗскер пулнӑ. Унта самантлӑх укҫа куҫарса пама ыйтнӑ, икӗ-виҫӗ сехетрен каялла тавӑрса пама шантарнӑ.
Суя видеона ӗненсе 10, 27 тата 28 пиншер тенкӗ куҫарса панӑ. Тусӗн аккаунчӗпе ултавҫӑсем усӑ курни кайран ҫеҫ ҫиеле тухнӑ.
Чӑваш Енре «Земство тренерӗ» программа хута каясси пирки унччен те пӗлтернӗччӗ. Вӑл старт илнӗ — заявкӑсене йышӑнма пуҫланӑ.
Программӑпа килӗшӳллӗн, физкультура тата спорт тытӑмӗнче ӗҫлекенсем 1 миллион тенке тивӗҫме пултарӗҫ. Анчах программӑна хутшӑнас текен специалистсен ялта е 50 пин ҫын таран пурӑнакан хулара 5 ҫул ӗҫлемелле. Ятарлӑ пӗлӳ пулмалла.
Заявленисене пушӑн 24-мӗшӗччен ҫак адреспа йышӑнаҫҫӗ: Шупашкар хули, И.Я.Яковлев проспекчӗ, 13-мӗш ҫурт, 615-мӗш пӳлӗм.
Чӑваш Енре пурӑнакансем укҫа-тенке банкра тытма тӑрӑшаҫҫӗ. Иртнӗ ҫул вкладсен виҫи унчченхинчен 19 процент ӳснӗ. Кашни ҫыннӑн банкра вӑтамран 343 пин тенкӗ упранать.
Укҫана банкра тытнин виҫипе Чӑваш Ен Раҫҫейре 37-мӗш вырӑн йышӑнать, Атӑлҫи тӑрӑхӗнчи регионсем хушшинче вара — тӑваттӑмӗш.
Банкра укҫа пухса пыракансен пысӑк пайӗ Мускавпа Питӗр хулисенче пурӑнать. Ингуш тата Чечня республикисенче ун пеккисем ытти регионпа танлаштарсан сахалтарах.
«Ҫыхӑнура» форумра Чӑваш Ен Элтеперӗн Олег Николаевӑн курткине сӳтсе яваҫҫӗ. Сӑмах салтаксем патне гуманитари пулӑшӑвӗ (25 кубла метр вутӑ) ӑсатнӑ чухне республика ертӳҫи тӑхӑннӑ ҫипуҫ пирки пырать.
Элтепер куртки Италире туса кӑларакан «Morris-L» моделе аса илтерет-мӗн. Ун пек куртка 300 пин тенкӗ ытла тӑрать иккен.
Шупашкарта пурӑнакан икӗ хӗрарӑм чечек парнелессе шанса улталаннӑ.
45 ҫулти хӗрарӑм патне чечек лавккинчен текен ҫын шӑнкӑравланӑ. Хайхи этем ӑна пӗри чечек пырса пама ыйтни пирки ӗнентернӗ те хӑҫан илсе пырсан меллӗрех пирки шахвӑртма пуҫланӑ, смс-ҫырупа килнӗ кода курьера пӗлтермелле тесе каланӑ.
Хӗрарӑм каланине итленӗ. Унтан патшалӑх пулӑшӑвӗн порталне ун ячӗпе такам кӗни ҫинчен хыпарланӑ, ултавҫӑсенчен «сыхланмалли» номере ярса панӑ. Хӗрарӑм ҫапла вара хӑй унччен пухса пынӑ 100 пин тенке хӑрушсӑр счет ҫине куҫаратӑп тесе укҫасӑр тӑрса юлнӑ.
18 ҫулти хӗр вара ҫавӑн йышши юмах-халапа ӗненсе 200 пин тенкӗ ытла куҫарса панӑ.
Раҫҫейре «Амӑшӗн капиталӗ» программа пур. «Ашшӗн капиталӗ» программа та хута яма сӗннӗ
Унпа килӗшӳллӗн нумай ачаллӑ ашшӗсене 2 миллион тенкӗ парасшӑн. Общество палатин пайташӗсем ку темиҫе ача ҫитӗнтерекен ашшӗсемшӗн самай пысӑк пулӑшу пулнине палӑртаҫҫӗ. 2 млн тенке ҫемьере 3 е ытларах ача ҫуралсан парасшӑн.
Шупашкарта 22 ҫулти воспитатель ултавҫӑсен аллине лекнӗ. Вӑл вӗсене 1 млн тенкӗ ытла куҫарса панӑ.
Палламан ҫын ун патне шӑнкӑравласа унӑн сим-карттӑпа усӑ курмалли вӑхӑт вӗҫленнине пӗлтернӗ. Килӗшӗве тӑсмалла тесе смс-ҫырупа килнӗ кода калама ыйтнӑ.
Унтан пикепе воспитательпе банк тата ФСБ «ӗҫченӗсем» ҫыхӑннӑ. Такам унӑн ячӗпе кредит илнӗ-мӗн, укҫана Украинӑна куҫарасшӑн имӗш. Палламан ҫын укҫана сыхласа хӑвармали мел пирки те каланӑ, ҫапла воспитатель микрозаймсем тата пӗлӗшӗсенчен кивҫен илнӗ, ҫав укҫана пӗтӗмпех ултавҫӑсем каланӑ счетсем ҫине куҫарнӑ.
Ултав серепине лекнине ӑнлансан вӑл полицие кайнӑ.
Канаш округӗнче прокуратура ятарлӑ ҫар операцийӗнче вилнӗ салтакшӑн патшалӑх паракан тӳлеве тӑванӗсене памалла тунӑ.
Укҫана вара малтан ют хӗрарӑм хапсӑннӑ. Вӑл салтакпа РФ Хӳтӗлев министерствипе килӗшӳ тунӑ кун паллашнӑ. Вӗсем ҫав кунах пӗрлешнӗ. Анчах пӗрле пурӑнман, пӗр хуҫалӑх тытса пыман. Ҫак хӗрарӑма салтакӑн тӑванӗсем те палламан. Салтак ятарлӑ ҫар операцийӗнче пулнӑ чухне хӗрарӑм унпа ҫыхӑну тытман.
Темиҫе уйӑхран арҫын хыпарсӑр ҫухалнӑ, вӑхӑт иртсен суд вӑл вилнӗ тесе йышӑннӑ. Кун хыҫҫӑн «арӑмӗ» патшалӑх паракан тӳлеве илме тесе тӑнӑ. Анчах май килмен: суд вӗсем суя майпа пӗрлешнӗ тесе йышӑннӑ.
«Волна» (чӑв. Хум) ача-пӑча сывлӑхне ҫирӗплетмелли уйлӑхра хушма корпуссем хӑпартса лартасшӑн. Ӗҫе хӑвӑрт пурнӑҫламалли меслетпе тума палӑртнӑ. Ҫавна май корпуссене кӑҫалхи ҫу уйӑхӗн 29-мӗшӗччен туса пӗтермелле.
Ӗҫе епле организаци пурнӑҫлассине нарӑс уйӑхӗн 18-мӗшӗнче палӑртӗҫ. Контрактӑн пуҫламӑш хакӗ — 80 миллион та 220,2 пин тенкӗ.
Уйлӑхра ҫӗнӗрен 4 корпус туса лартасшӑн.
Чӑваш Енри тӳре-шарана вӗрентме республика Правительствин резерв фондӗнчен 11,5 миллион тенкӗ укҫа уйӑрнӑ. Кун пек йышӑнӑва Сергей Артамонов премьер-министр кӑрлач уйӑхӗн 23-мӗшӗнче алӑ пуснӑ.
Укҫана Чӑваш Республикин Вӗренӳ институтне уйӑрса парӗҫ. Вӑл тупрана «Социаллӑ архитектура тата политика управленийӗ» программа валли тӑкаклӗҫ.
Патшалӑх службинче ӗҫлекенсене вӗрентсе кӑларма тата вӗсен квалификацине ӳстерме ҫав шутран 7 миллион тенкӗ уйӑрӗҫ, муниципалитетсенче тӑрӑшакансене вӗрентме — 4,5 миллиона яхӑн тенкӗ.
+24.1 °C