Шупашкарта пурӑнакан 45 ҫулти хӗрарӑм банк картти ҫинчен 95 пин тенкӗ ҫухални пирки полицие пӗлтернӗ. Анчах ҫакна вӑл пӗр уйӑхран кӑна тунӑ.
Йӗрке хуралҫисем тӗрӗслев ирттернӗ те ку ӗҫе унӑн 34 ҫулти пӗлӗшӗ тунине палӑртнӑ. Хӗрарӑм ӑна телефона хӑйех эрех-сӑра илме панӑ. Кайран пӗрле эрех-сӑра ӗҫнӗ хыҫҫӑн хайхи арҫын телефонри банк сарӑмӗпе усӑ курса унӑн счечӗ ҫинчен 95 пин тенкӗ куҫарнӑ.
Ҫак арҫын тӗлӗшпе пуҫиле ӗҫ пуҫарнӑ. Банк картти ҫинчен укҫа вӑрланӑшӑн 6 ҫул таран ирӗксӗр хӑварма пултараҫҫӗ.
Муркаш тӑрӑхӗнче пурӑнакан Макаровсем патшалӑх укҫипе усӑ курса усламҫӑсем пулса тӑнӑ.
Ҫемье район центрӗнче, Муркашра пурӑнать. Социаллӑ контракт алӑ пусса патшалӑхран укҫа илме май пуррине илтсен арӑмӗпе упӑшки ку майпа усӑ курса юлас тенӗ. Халӗ Иван машинӑсем юсать, арӑмӗ Амиля ача-пӑча таварӗ сутакан лавкка уҫнӑ.
Республикӑн влаҫ органӗсен официаллӑ порталӗ халӑх тетелӗнчи хӑйӗн пабликӗнче хыпарланӑ тӑрӑх, Иван уҫнӑ автосервис халӑхра та ырӑ ят ҫӗнсе илме ӗлкӗрнӗ. Ӑна ҫынсем шанаҫҫӗ, машинӑна тӗплӗ юсать тесе ырлаҫҫӗ. Вӑр-вар та чӗрӗ арҫын коллектива професси енчен аталанма пулӑшать, кулленхи ӗҫре ҫӗнӗлле тимлеме тӑрӑшнӑ май хальхи вӑхӑтри технологисене пурнӑҫа кӗртсе пырать, вӗсемпе усӑ курать.
Ӗнер, пуш уйӑхӗн 31-мӗшӗнче, республикӑн ӗҫ тата социаллӑ хӳтлӗх министрӗ Алена Елизарова асӑннӑ ведомствӑна пӑхӑнса тӑракан учрежденисен директорӗсемпе тӗл пулнӑ. Министр 2026 ҫул валли хыснаран уйӑрнӑ укҫапа пӗлсе усӑ курмалли пирки сӑмах хускатнӑ, ҫав шутра — тӗплӗ юсав ирттернӗ чухне тата социаллӑ инфраструктурӑна юсаса ҫӗнетнӗ вӑхӑтра.
Республикӑра ваттисен ҫурчӗсене юсаса ҫӗнетесшӗн. Йӳҫкассинчи, Турханти психоневрологи диспансерӗсене, Шомикпа Атратьри интернат-ҫуртсене юсама 104 миллиона яхӑн тенкӗ уйӑрӗҫ. Кӳкеҫри интернат-ҫуртӑн пурлӑхпа техника базине ҫӗнетесшӗн, Шупашкарти ачасен реабилитаци центрӗ валли тӗрлӗ оборудовани туянасшӑн. Ун валли тепӗр 11 миллион тенкӗ уйӑрма палӑртнӑ.
Чӑваш Енре пурӑнакан арҫын телее хӳринчен тытасса шанса виҫӗ ҫул патшалӑх лотерейисене хутшӑннӑ. Тинех ӑна ӑннӑ! Пӗртен-пӗр туяннӑ билет ӑна 600 пин тенкӗ выляса илме пулӑшнӑ.
Андрей укҫа выляса илни пирки кӗтмен ҫӗртен пӗлнӗ: ун патне СМС-ҫыру килнӗ. «Ку пысӑк ҫӗнтерӳ пулнине тӳрех ӑнлантӑм», — тенӗ арҫын.
Андрей – строительствӑпа монтаж ӗҫӗсен мастерӗ. Килте те ӗҫлеме ӗлкӗрет: мӑшӑрӗпе пӗрле сыр пӗҫереҫҫӗ, ҫу, тӑпӑрчӑ тӑваҫҫӗ. Лотерейӑра выляса илнӗ укҫапа вӑл кӗҫӗн хӗрӗн хваттерӗнче юсав ӗҫӗсем тӑвасшӑн.
Ҫӗнӗ Шупашкарти 60 ҫулти арҫын ултавҫӑсене 2 миллион ытла тенкӗ куҫарса панӑ. Ку кӑна мар-ха, вӑл кунсӑр пуҫне кредит илнӗ.
Ун патне ҫак уйӑхра мессенджерта палламан ҫын шӑнкӑравланӑ. Хайхи арҫын вӑл унччен ӗҫленӗ организацири кадрсенчен пайӗнчен-мӗн. Вӑл пенсие ҫӗнӗрен шутламаллине пӗлтернӗ.
Кайран хӑйсемпе «Госуслуги» портал тата йӗрке хуралӗн ӗҫченӗсем тесе паллаштарнӑ ҫынсем шӑнкӑравланӑ. Хайхискерсем арҫынна вӑл унччен ултавҫӑпа калаҫнине ӗнентернӗ, ҫавна май халӗ унӑн ячӗпе кредит илме хӑтланаҫҫӗ имӗш.
Палламан ҫынсем каланипе арҫын пухнӑ 2 миллон тенкине курьер урлӑ парса янӑ. Кунсӑр пуҫне 430 пин тенкӗ кредит илнӗ, ӑна та палламан ҫынсем каланӑ счет ҫине куҫарнӑ.
Пуш уйӑхӗн 28-мӗшӗнче ултавҫӑсенчен шар курнӑ арҫын полицие пулӑшу ыйтма пынӑ.
Елчӗк районӗнче пурӑнакан 47 ҫулти арҫын алимент тӳлесшӗн пулман. Ҫул ҫитмен ачана пулӑшса тӑмалли пирки ун тӗлӗшпе суд йышӑнӑвӗ те пулнӑ-ха, апла пулин те вӑл тӑван тӗпренчӗкне ним вырӑнне те хуман — ӑна укҫа-тенкӗпе пулӑшман.
Суд приставӗсем парӑма шырама хӑтланса пӑхнӑ-ха, анчах арҫын пӗрех тӳлемен. Ҫапла майпа унӑн парӑмӗ 506 пин тенке ҫитсе кайнӑ.
Явапсӑр ашшӗ тӗлӗшпе РФ Пуҫиле кодексӗн 187-мӗш статйин 1-мӗш пайӗпе пуҫиле ӗҫ пуҫарнӑ. Ҫавӑн хыҫҫӑн унран 300 пин тенкӗ шыраса илме май килнӗ.
РФ Пуҫиле кодексӗн 187-мӗш статйин 1-мӗш пайӗпе пуҫиле ӗҫ пӑхса тухнӑ чухне суд арҫын парӑмӑн пӗр пайне тӳлесе татнине шута илсе ӑна 180 сехет ӗҫлеттерме йышӑннӑ.
Шупашкарта пурӑнакан 19 ҫулти ҫамрӑк наркотик сутса укҫа тӑвас тенӗ. Ӑна Шалти ӗҫсен министерствин Наркотик ҫаврӑнӑшне тӗрӗслесе тӑракан управлени ӗҫченӗсем тытса чарнӑ. Каччӑн ҫумӗнче 15 грама яхӑн гашиш тата наркотик вӑрттӑн хумалли вырӑнсене кӑтартнӑ телефон пулнӑ.
Пакунлисем кайран Шурпашкарти кӑнтӑр-хӗвеланӑҫ районӗнчи вӑрманта ҫавӑн пек вӑрттӑн вырӑнта 7 грама яхӑн марихуана хунине тупса палӑртнӑ.
Ҫӑмӑл майпа укҫа ӗҫлесе илме май пурри пирки каччӑ мессенджерсенчен пӗринче пӗлтерӳ асӑрханӑ. Унӑн наркотика пӗр ҫӗртен илсе кайса ӑна пӗчӗкшер партипе хурса ҫӳремелле пулнӑ.
Наркотик сарнӑшӑн ӑна 20 ҫул таран ирӗкрен хӑтарма пултараҫҫӗ.
Пуҫиле ӗҫе Шупашкарти Ленин районӗн судӗнче пӑхса тухӗҫ.
Чӑваш Енри пӗр ялта 55 миллион тенкӗпе культура ҫурчӗ туса лартасшӑн. Сӑмах Вӑрмар районӗнчи Кӗлкеш ялӗ пирки пырать. Контрактӑн пуҫламӑш хакӗ — 54,96 миллион тенкӗ.
Тӗнче тетелӗнчи «Правда ПФО» хаҫат пӗлтернӗ тӑрӑх, аукцион ирттересси пирки виҫҫӗмӗш хут пӗлтереҫҫӗ. Унчченхисенче подрядчика тупма май килмен.
55 миллион тенкӗ тӑракан культура ҫуртне Кӗлкешри «Шкул урамӗнчи 22-мӗш ҫурт» адреспа туса лартмалла.
Пӗр хутлӑ ҫуртӑн пӗтӗмӗшле калӑпӑшӗ 352 тӑваткал метр пулӗ. Унта 72 вырӑнлах курмалли зал, вулавӑш, гардероб, кружоксен пӳлӗмӗсем тата ытти пӳлӗм пулӗ. Унпа юнашар котельнӑй хӑпартса лартӗҫ.
Ӗҫе кӑҫалхи раштав уйӑхӗн 1-мӗшӗччен вӗҫлеме палӑртнӑ.
Электрон аукциона ака уйӑхӗн 8-мӗшӗнче пӗтӗмлетӗҫ.
Чӑваш Енри пӗр ялта 55 миллион тенкӗпе культура ҫурчӗ туса лартасшӑн. Сӑмах Вӑрмар районӗнчи Кӗлкеш ялӗ пирки пырать. Контрактӑн пуҫламӑш хакӗ — 54,96 миллион тенкӗ.
Тӗнче тетелӗнчи «Правда ПФО» хаҫат пӗлтернӗ тӑрӑх, аукцион ирттересси пирки виҫҫӗмӗш хут пӗлтереҫҫӗ. Унчченхисенче подрядчика тупма май килмен.
55 миллион тенкӗ тӑракан культура ҫуртне Кӗлкешри «Шкул урамӗнчи 22-мӗш ҫурт» адреспа туса лартмалла.
Пӗр хутлӑ ҫуртӑн пӗтӗмӗшле калӑпӑшӗ 352 тӑваткал метр пулӗ. Унта 72 вырӑнлах курмалли зал, вулавӑш, гардероб, кружоксен пӳлӗмӗсем тата ытти пӳлӗм пулӗ. Унпа юнашар котельнӑй хӑпартса лартӗҫ.
Ӗҫе кӑҫалхи раштав уйӑхӗн 1-мӗшӗччен вӗҫлеме палӑртнӑ.
Электрон аукциона ака уйӑхӗн 8-мӗшӗнче пӗтӗмлетӗҫ.
Чӑваш Енре уйрӑм ҫынсен ҫурчӗсем хакланнӑ. Кӑҫалхи пӗремӗш кварталта хак 4 процент ӳссе вӑтамран 4,4 миллион тенке ҫитнӗ. Кун пирки «Мир квартир» (чӑв. Хваттер тӗнчи) федераци порталӗ пӗлтернӗ.
Специалистсем ҫӗршывӑн 85 регионӗнчи уйрӑм ҫынсен ҫурчӗсен хакне тишкернӗ. Кӑрлач-пуш уйӑхӗсенче ҫӗршывӑн 70 регионӗнче ҫуртсемпе дачӑсем хакланнӑ, 14 регионта йӳнелнӗ, пӗр регионта хак унчченхинчен улшӑнман.
Федерацин Атӑлҫи регионне илсен уйрӑм ҫынсен чи хаклӑ ҫурчӗсем Тутарстанра. Унта пӗр ҫурт вӑтамран 9 миллион тенкӗ тӑрать. Пушкӑртстанра — 6,5 миллион тенкӗ, Чулхула облаҫӗнче – 6,12 миллион тенкӗ. Чи йӳнӗ хак Мордва Республикинче (3,5 миллион тенкӗ) тата Чӑваш Енре (4,4 миллион тенкӗ).
+24.1 °C